1. Bay on rézon ki ka fè si fanmi a Jéova soudé ?

NOU adan fanmi a Jéova é nou kontan sa toubònman. Adan fanmi an nou, nou ka antann-nou byen, é nou soudé. Poukwa ? On rézon ki fè si sa konsa, sé kè chakmoun ka rèspèkté otorité-la Jéova mèt anplas la adan lasanblé-la. Pi nou ké rèspèkté otorité-lasa, é pi nou ké soudé.

2. A ki kèsyon nou ké réponn adan awtik-lasa ?

² Adan awtik-lasa, nou ké vwè kimoun ki ni on otorité adan lasanblé-la. É nou ké réponn a sé kèsyon-lasa : Ki travay Jéova ba sé sè-la ? Ès tout sé frè-la sé chèf a tout sé sè-la ? On ansyen ni on otorité an lasanblé-la, é on mari ni on otorité an fanmi a-y, men ès sé menm otorité-la ? Pou nou koumansé, an-nou vwè ki valè pou nou ba sé sè-la.

3. Kijan nou pé ni plis rèkonésans pou tousa sé sè-la ka fè ?

³ Nou enmé sè an nou toubònman pas yo ka fè anlo éfò pou okipé dè fanmi a yo, pou préché bon nouvèl-la, é pou édé sé frè é sè-la an lasanblé-la. Lè nou ka vwè ki valè Jéova é Jézi ka ba-yo, sa ka ban-nou anvi ni plis rèkonésans pou yo. Anplisdisa, si nou pran tan ègzaminé kijan lapòt Pòl té ka aji èvè sé madanm-la, sa ké itil pou nou.

4. Jéova ka ba sé madanm-la menm valè ki sé misyé-la, kijan Labib ka montré sa ?

⁴ Labib ka montré on mannyè ki klè, kè pou Jéova, sé madanm-la ni menm valè ki sé misyé-la. I ka montré osi, kè o 1^é syèk, Jéova ba, ki misyé ki madanm, lèspri sen a-y pou yo té pé sa fè dé biten èstraòwdinè. Pa ègzanp, yo té ka palé an plizyè lang diféran (Akt 2:1-4, 15-18). Lè nou ka gadé kimoun Jéova chwazi pou gouvèné èvè Kris an  syèl-la, nou ka rèmawké kè adan gwoupmoun-lasa, ni misyé men ni madanm osi (Gal. 3:26-29). Pawmi moun ki kay viv asi latè, ni misyé é ni madanm osi (Rév. 7:9, 10, 13-15). Anplisdisa, pou préché é pou anségné bon nouvèl-la, Jéova chwazi misyé é i chwazi madanm osi (Mat. 28:19, 20). Pa ègzanp, adan liv a Akt, yo ka palé-nou dè on sè non a-y sé té Prisil. Li é mari a-y Akilas, édé on misyé, non a-y sé té Apolòs, konprann lavérité pibyen. É poutan, misyé-lasa té enstwi (Akt 18:24-26).

5. Jézi té ka ba sé madanm-la onlo valè, kijan Lik 10:38, 39, 42 ka montré-sa ?

⁵ Jézi té ka onoré sé madanm-la é i té ka rèspèkté-yo osi. Sé farizyen-la té ka méprizé sé madanm-la. Yo pa té ka palé ba sé madanm-la douvan moun, é yo pa jen té ka palé dè sa ki maké adan Lézékriti èvè yo nonplis. Men, li Jézi, pa té ka fè kon yo. I ni lokazyon palé dè onlo vérité enpòwtan, ki èvè misyé, ki èvè madanm * (li Lik 10:38, 39, 42). Lè i té k’ay préché, i té ka lésé sé madanm-la vin èvè-y (Lik 8:1-3). É sé déotwa madanm i chwazi pou ay di apòt a-y kè i résisité. Mi on bèl lonnè mi ! (Jan 20:16-18).

6. Kijan Pòl montré kè i té ka rèspèkté sé madanm-la ?

⁶ Lapòt Pòl fè Timoté sonjé kè fò i rèspèkté sé madanm-la pas sé on biten ki enpòwtan toubonman. I di Timoté konsa kè ‘si on madanm ja ni on bèl laj, fò i aji èvè-y konsi sé té manman-y é si sé on jenn madanm, fò i aji èvè-y konsi sé té sè a-y’ (1 Tim. 5:1, 2). Pòl fè onlo biten pou Timoté té vin on krétyen ki byen doubout adan lavérité. Men i rèkonnèt kè si Timoté té konnèt Lézékriti byen konsa, sé pas manman-y é granmèw a-y, té fè on bèl travay (2 Tim. 1:5 ; 3:14, 15). Adan lèt-la i maké ba sé Women-la, i voyé bonjou ba plizyè sè, é i kriyé-yo pa non a yo. Pòl té ka vwè, tout bèl travay-la sé sè-la té ka fè la. Men i té k’ay pi lwen ki sa. I té ka fè-yo sav osi kè i té ka aprésyé tout bèl travay-la yo té ka fè la (Wom. 16:1-4, 6, 12 ; Filip. 4:3).

7. A ki kèsyon nou ké réponn ?

⁷ Kon nou vwè pi ho, Labib pa’a di kè sé sè-la ni mwens valè ki sé frè-la. Lè on sè donan, é kè i enmé frè é sè a-y, sé on bénédisyon pou lasanblé-la. Sé ansyen-la ka aprésyé sé sè-lasa onlo, pas yo ka fè tousa yo pé pou yo antann-yo byen èvè lézòt é yo ka édé lasanblé-la rété soudé. Men fò nou réponn a dòt kèsyon ankò : Poukwa Jéova ka mandé sé sè-la kouvè tèt a yo adan sèwten sitiyasyon ? Konm sé yenki sé frè-la yo pé nonmé ansyen oben asistan, ès sa vé di kè sé frè-la sé chèf a sé sè-la ?

8. Dapré Éfézyen 5:23, ès tout sé frè-la sé chèf a tout sé sè-la ? Bay on ti èsplikasyon.

⁸ Awa, anponjan ! (li Éfézyen 5:23). Pa ni pon frè ki sé chèf a tout sé sè-la an lasanblé-la, pas chèf a yo sé Kris. Adan on fanmi, mari-la sé chèf a madanm-la. Pawkont, menmsi on gason batizé, i pa chèf a manman-y (Éféz. 6:1, 2). Jéova ba sé ansyen-la on sèwten otorité adan lasanblé-la, men sa vé pa di kè yo ni dwa menné-yo alabagèt (1 Tés. 5:12 ; Ébr. 13:17). Konnyéla, an-nou palé dè sé sè  sélibatè la, ki pa’a viv aka fanmi a yo ankò. Yo ka kontinyé rèspèkté fanmi a yo, men yo pa anba otorité a pap’a-yo ankò. Yo ka rèspèkté sé ansyen-la osi, men konm tout sé frè-la, onsèl chèf yo ni, sé Jézi.

9. Déparfwa, poukwa sé sè-la oblijé kouvè tèt a yo ?

⁹ Sé vré, sé sé frè-la Jéova chwazi pou dirijé lasanblé-la. I pa ba sé madanm-la otorité-lasa (1 Tim. 2:12). Men poukwa ? Si Jéova fè sa, sé paskè i vé kè tout fanmi a-y byen òwganizé. Dayè pou yonn, sé pousa i mèt Jézi chèf a tout nonm osi. Adan òwganizasyon a Jéova, sé sé frè-la ki dwètèt fè sèwten travay. Men si on jou on sè ka touvé-y oblijé fè yonn adan sé travay-lasa, Jéova ka mandé-y kouvè tèt a-y * (1 Kor. 11:4-7). Si Jéova fè sa, a pa pou montré kè sé sè-la ni mwens valè ki sé frè-la, men sé pou sé sè-la montré kè yo ka rèspèkté otorité-la Jéova mèt anplas la. An-nou tchenbé sé lidé-la nou sòti vwè-la an tèt an nou é konnyéla, an-nou réponn a kèsyon-lasa : Ki otorité Jéova ba sé chèf a fanmi-la é sé ansyen-la ?

10. Ka ki té’é pé pousé on ansyen pran sèwten désizyon kè i pa andwa pran ?

¹⁰ Sé ansyen-la enmé Jézikris. É yo enmé sé ‘timouton-la’ Jéova é Jézi mété anba rèsponsabilité a yo la (Jan 21:15-17). Konm on ansyen ka pran swen a lasanblé-la, pétèt i pé mèt an tèt a-y kè i sé papa toutmoun an lasanblé-la. I pé mèt an tèt a-y osi, kè piskè  on mari pé di madanm a-y é timoun a-y kijan pou yo aji, i pé fè menm biten an lasanblé-la pou pwotéjé timouton a Bondyé. É pétèt kè, jous ni sèwten moun an lasanblé-la ki ka pousé-y aji konsa pas yo ka mandé-y pran sèwten désizyon an plas a yo. Men ès Jéova ba sé ansyen-la é sé mari-la menm otorité-la ?

11. Poukwa nou pé di kè otorité a on mari é ta on ansyen ka sanm ?

¹¹ Pòl di konsa kè adan sèwten sitiyasyon, otorité a sé mari-la é otorité a sé ansyen-la ka sanm (1 Tim. 3:4, 5). Pa ègzanp, Jéova vé kè madanm-la é sé timoun-la kouté chèf a fanmi-la (Kol. 3:20). Menmjan-la i vé kè toutmoun an lasanblé-la kouté sé ansyen-la. Jéova vé kè sé mari-la é sé ansyen-la pran swen a sé moun-la ki anba otorité a yo la. Fò yo édé-yo vin pibon zanmi èvè Jéova. Fò yo fè-yo santi kè yo enmé-yo é fò yo édé-yo lè yo ka jwenn pwoblèm (Jak 2:15-17). Jéova vé kè sé ansyen-la é sé mari-la édé moun ki anba otorité a yo fè sa i ka mandé. Pawkont, fò pa yo ay « pli lwen ki sa ki maké » an Bib-la (1 Kor. 4:6).

12-13. Dapré Women 7:2, ki diférans ki ni ant otorité a on chèf a fanmi é ta on ansyen ?

 ¹² Ni onlo biten ki diféran osi ant otorité a sé mari-la é ta sé ansyen-la. Pa ègzanp, lèwvwè on moun fè on péché ki grav, sé sé ansyen-la ki pou jijé afè-la. É siwvwè moun-la pa’a rèpanti-y, sé yo ki andwa èskominyé-y (1 Kor. 5:11-13).

¹³ Men Jéova ba sé mari-la on otorité kè i pa ba sé ansyen-la. On mari andwa di madanm a-y é timoun a-y kijan pou yo aji é i andwa vérifyé osi si yo ka fè sa i di-yo (li Women 7:2). Kifè, on papa ni dwa di timoun a-y a ki lè pou yo rantré akaz a-y. É i ni dwa pini-yo si yo pa rèspèkté sa (Éféz. 6:1). Nou ka tou konprann kè avan on papa ki plen lanmou pran on désizyon konsa, i ké mandé madanm a-y sa i ka pansé pas yo toulédé sé « onsèl chè * » (Mat. 19:6).

14. a) Dapré Mawk 10:45, poukwa sa toutafè nòwmal kè Jéova chwazi Jézi pou dirijé lasanblé-la ? b) Ki rèsponsabilité Komité santral la tini ? (gadé ti karé-la «  Ki rèsponsabilité a Komité santral la ? »).

¹⁴ Grasa ranson-la, Jéova achté vi a chakmoun adan lasanblé-la (li Mawk 10:45 ; Akt 20:28 ; 1 Kor. 15:21, 22). Konm Jézi bay vi a-y an ranson pou nou, sa toutafè nòwmal si Jéova mété-y chèf a lasanblé-la. É antankè chef, Jézi ni dwa di chak sèwvitè a Bondyé, chak fanmi, é chak lasanblé kijan pou yo  aji. É i andwa gadé si yo ka fè sa i mandé (Gal. 6:2). Jézi pa ka enki di-nou ka pou nou fè. I ka pran swen an nou byen é i enmé noutout an lasanblé-la (Éféz. 5:29).

15-16. Lè ou ka gadé sa Marley é Benjamin ka di, ka sa ka aprann-vou ?

¹⁵ Jézi mandé sé mari-la é sé ansyen-la pran swen a sé madanm-la. Lèwvwè sé madanm-la ka rèspèkté otorité a sé mari-la é ta sé ansyen-la, yo ka montré kè sé Jézikris yo ka rèspèkté. Marley, on sè ki ka viv o Zétazini, ka di sa i ka rèsanti é sé sa onlo sè ka rèsanti osi. Mi sa i ka di : « An sé on madanm-mayé é anmenmtan, an sé on sè an lasanblé-la. An ka ba toulédé rèsponsabilité-lasa onlo valè. Toutlè, fò an fè éfò pou mwen rèspèkté otorité-la Jéova mèt la an fanmi-la é an lasanblé-la. Men mari an mwen é sé frè-la ki an lasanblé-la ka édé-mwen fè sa pas yo ka rèspèkté-mwen é yo ka montré-mwen kè yo ni onlo rèkonésans pou tousa an ka fè. »

¹⁶ Lè sé frè-la ka rèspèkté sé sè-la é ka onoré-yo, yo ka montré kè yo byen konprann kijan pou yo sèvi èvè otorité-la Jéova ba-yo la. Benjamin, sé on frè ki ka rété an Anglètè. Mi sa i ka di : « Sé sè-la ka fè bèl ti komantè lasal, é afòs an kouté sé komantè-lasa, an aprann onlo biten. Yo ban-mwen dé bon ti konsèy pou an pé sa étidyé pibyen é pou an pé sa préché pibyen osi. Yo ka fè on travay ki ni onlo valè toubonman. »

17. Poukwa fò-nou rèspèkté otorité-la Jéova mèt anplas la ?

¹⁷ Lè toutmoun, ki misyé, ki madanm, ki mari, ki ansyen ka rèspèkté otorité-la Jéova mèt anplas la, ni lapé an lasanblé-la. É sa ki pi bèl ankò, sé kè sa ka ba Jéova, Pap’an nou ki an syèl-la, glwa ! (Sòm 150:6).