1-2. a) Jòdijou onlo moun ni dimal a fè moun ki ni on otorité konfyans. Poukwa sa ? b) Ka nou ké vwè adan awtik-lasa ?

 JÒDILA, onlo moun ni dimal a fè on moun konfyans lèwvwè moun-lasa ni on otorité. Yo ka vwè jan sé gouvènman-la é sé lwa-la ka pwotéjé moun ki rich é moun ki ni on gwo pozisyon, é jan yo pa ka soutyenn moun ki maléré. Labib ka di : « Lòm ka dominé lòm pou fè-y soufè » (Ékl. 8:9). Anplisdisa, yo ka vwè sèwten moun ki an tèt a rèlijyon ka fè bétiz. Kifè, ni onlo moun ki pa’a fè Bondyé konfyans ankò. Alò si nou ka étidyé Labib èvè on moun, sa enpòwtan kè nou édé-y fè Jéova konfyans, é fò-nou édé-y fè sé moun-la ki ni on rèsponsabilité adan òwganizasyon a Jéova konfyans osi, pas sé-y ki chwazi-yo.

² Sé vré, fò sé étidyan-la aprann fè Jéova konfyans é fò-yo aprann fè òwganizasyon a-y konfyans osi. Men a pa yo tousèl ki dwètèt fè sa. Menmsi nou ka sèvi Jéova dépi plizyè lanné, fò pa nou jen pèd fwa an nou. Dépawfwa, nou ka jwenn sèwten sitiyasyon ki difisil é akòz dè sa nou pé ni dimal a fè Jéova konfyans. Adan awtik-lasa, nou ké vwè 3 sitiyasyon ki té’é pé fébli fwa an nou : 1) lèwvwè nou ka li sèwten istwa ki an Bib-la, 2) lèwvwè òwganizasyon a Jéova ka mandé-nou fè sèwten biten é 3) lèwvwè nou ké ka jwenn difikilté plita.

3. Akòz dè sèwten istwa ki adan Labib nou pé ni dimal a fè Jéova konfyans. Poukwa sa ?

 ³ Lè nou ka li Labib é kè nou ka vwè jan Jéova aji èvè sèwten moun, é lè nou ka vwè sèwten désizyon kè i pran, pétèt  sa ka pousé-nou a pozé-nou sèwten kèsyon. Pa ègzanp, adan liv a Nonb, nou ka li kè Jéova kondanné on Izraélit é i mandé pou yo tchouyé-y pas i té ka ranmasé bwa jou a saba-la. Adan liv a 2 Samiyèl, nou ka vwè kè plizyè lanné apré, Jéova padonné David alòskè i fè adiltè èvè madanm a on boug é i tchouyé boug-lasa apré (Nonb 15:32, 35 ; 2 Sam. 12:9, 13). Pétèt nou ka mandé-nou : « Poukwa Jéova padonné David alòskè i fè on adiltè é kè i tchouyé on moun men i kondanné lòt boug-la pou on péché ki té ka parèt mwen grav ? » Pou réponn a kèsyon-lasa, an-nou vwè 3 biten pou nou sonjé lè nou ka li Labib.

4. Lè nou ka li Jénèz 18:20, 21 é Détéwonòm 10:17 sa ka édé-nou ni plis konfyans adan mannyè Jéova ka jijé. Kijansa ?

⁴ A pa toutlè Labib ka ban-nou tout ti détay adan on istwa. Pa ègzanp, nou sav kè David rèpanti-y pou tousa i té fè é i té vréman sensè lè i fè sa (Sòm 51:2-4). Men ka nou sav asi boug-la ki pa rèspèkté lwa a saba-la ? Ès i té ka règrété sa i té fè ? Ès sé prèmyé fwa i pa kouté Jéova ? Lè yo avèti-y, ès i tchenn kont dè sa oben i fè sa i té vé ? Labib pa’a ban-nou sé enfòwmasyon-lasa. Men on biten nou sèten sé kè Jéova « pa ni enjistis adan-y » (Dét. 32:4). Lè Jéova ka jijé, i ka tchenn kont dè tousa ki pasé. A pa kon lézimen ! Yo, yo ka bazé-yo asi sa moun ka di, asi jan yomenm ka vwè sitiyasyon-la oben asi dòt biten konsa. Kifè, yo pa kapab jijé byen konm i fo (li Jénèz 18:20, 21 ; Détéwonòm 10:17). Pi nou ké aprann konnèt Jéova é prensip a-y byen, pi nou ké ni konfyans adan mannyè i ka jijé. Menmsi nou pé pa réponn tousuit a sèwten kèsyon ki ka vin an lèspri an nou lè nou ka li Labib, nou sèten kè « Jéova toujou ka fè sa ki jis » pas nou ja konnèt onlo biten asi-y (Sòm 145:17).

5. Konm nou enpawfè, a pa toutlè nou ka rivé jijé byen konm i fo. Kijansa ? (gadé ti karé-la «  Konm nou enpawfè, nou pa’a rivé konprann toutbiten byen konm i fo »).

⁵ Konm nou enpawfè, a pa toutlè nou ka rivé jijé byen konm i fo. Jéova kréyé-nou pòtré a-y, sé pousa, kon li, nou anvi kè yo jijé lézòt èvè jistis (Jén. 1:26). Men konm nou enpawfè, nou pé rivé a mal jijé sèwten biten menmsi nou okouran a tousa ki pasé. An-nou sonjé ègzanp a Jonas. Jéova désidé aji èvè mizérikòd épi sé Ninivit-la, men Jonas pa té dakò pou sa (Jonas 3:10 – 4:1). Lè nou byen gadé sa ki rivé apré, Jéova té ni rézon aji èvè mizérikòd épi sé Ninivit-la  pas yo rèpanti-yo, é sa sové vi a yo ! Yo té a plis ki 120 000. Anfinaldikont, nou ka tou konprann kè a pa Jéova ki mal jijé pèp-la men sé Jonas.

6. Poukwa Jéova pa ni pon èsplikasyon a ban-nou lè i ka pran on désizyon ?

⁶ Lè Jéova ka pran on désizyon, i pa ni pon èsplikasyon a ban-nou. Sé vré, an tan lontan, Jéova pèwmèt sèwvitè a-y di-y sa yo té ka rèsanti anrapò èvè on désizyon i té pran oben anrapò èvè on désizyon i té kay pran (Jén. 18:25 ; Jonas 4:2, 3). Dépawfwa, sa rivé kè i èspliké poukwa i té pran tèl ou tèl désizyon (Jonas 4:10, 11). Men Jéova pa oblijé ban-nou pon èsplikasyon. Konm sé-y ki kréyé-nou, i pa bizwen mandé-nou si nou dakò lè i kay fè on biten oben lè i ja fè-y (Iz. 40:13, 14 ; 55:9).

7. Ka nou pé ni dimal a fè, é poukwa ?

⁷ On biten nou sèten sé kè Jéova toujou ka fè sa ki jis. Men pawkont, pétèt kè nou pé ni dimal a fè sé frè-la ki ni rèsponsabilité adan òwganizasyon a Jéova konfyans. Nou pé ka mandé-nou : « Ès sé Jéova ki ka gidé-yo vréman oben ès yo ka fè sa yo vé ? » Pétèt kè sé konsa sèwten moun an tan a Labib té ka vwè sa. An-nou wouvin asi sé ègzanp-la nou vwè la adan  paragraf 3 la. On fanmi a misyé-la ki pa té rèspèkté lwa a saba-la té’é pé mandé-y : « Ès désizyon-lasa té ka vin vréman dè Jéova oben ès a pa Moyiz ki pran asi-y pou i pé sa mandé pou yo tchouyé misyé-la ? » Iri, Itit-la, té mayé èvè madanm-la ki fè adiltè la èvè David. On zanmi a Iri té’é pé di kè konm sé David ki wa, i sèvi èvè otorité-la i té ni la pou yo pa té tchouyé-y. Men Jéova ka fè sé frè-la ki ni rèsponsabilité adan òwganizasyon a-y konfyans. Donk, siwvwè nou pa’a fè-yo konfyans, nou pé pa di kè nou ka fè Jéova konfyans.

8. Lè nou ka gadé Akt 16:4, 5, ki biten yo té ka fè adan lasanblé-la an tan a sé prèmyé krétyen-la é kè yo ka fè jòdijou osi ?

⁸ Jòdijou, Jéova ka sèvi èvè « èsklav fidèl é prévwayan la » pou dirijé òwganizasyon a-y asi latè (Mat. 24:45). Kon an tan a sé prèmyé krétyen-la, sé èsklav-lasa, kivédi komité santral la, ki ka dirijé pèp a Bondyé asi tout latè é sé-y ki ka di sé ansyen-la ka pou yo fè osi (li Akt 16:4, 5). Sé ansyen-la, a tou a yo, ka fè tousa yo pé pou fè sa komité santral la ka mandé-yo fè adan sé lasanblé-la. Nou ka montré kè nou ka fè Jéova konfyans lè nou ka fè sa òwganizasyon a-y ka mandé-nou fè é lè nou ka fè sa sé ansyen-la ka mandé-nou fè osi.

9. A ki moman nou pé touvé sa rèd dè kolaboré èvè sé ansyen-la, é poukwa ?

⁹ Défwa, pou soutyenn sé désizyon-la sé ansyen-la ka pran la, sa pé rèd pou nou toubònman. Pa ègzanp, sé dènyé lanné-la ki pasé la, yo fè déotwa ti chanjman adan plizyè lasanblé é adan plizyè siwkonskripsyon. Dépawfwa, sé ansyen-la mandé sé pwoklamatè-la ay réinyon adan dòt lasanblé pou ranpli sé Sal di Wayòm la. Si yo ka mandé-nou ay adan ondòt lasanblé é kè fò-nou lésé fanmi an nou é zanmi an nou, pétèt kè nou ké touvé sa rèd menm. Ès sé Jéova ki di sé ansyen-la ki koté pou voyé chak pwoklamatè ? Awa. É lè nou ka sonjé sa, pétèt sé pousa nou ni dimal a fè sa sé ansyen-la ka mandé-nou fè. Men Jéova ka pèwmèt sé ansyen-la pran dé désizyon konsa pas i ka fè-yo konfyans, é nou osi fò-nou fè-yo konfyans. b

10. Poukwa fò-nou kolaboré èvè sé ansyen-la ? (Ébré 13:17).

 ¹⁰ Poukwa fò-nou kolaboré èvè sé ansyen-la é soutyenn sé désizyon-la yo ka pran la menmsi sé désizyon-lasa pa agou an nou ? Paskè lè nou ka fè sa, nou ka édé pèp a Bondyé rété soudé (Éféz. 4:2, 3). Sé lasanblé-la ka vin pi solid lè chak pwoklamatè ka aji èvè imilité é ka soutyenn sé désizyon-la komité a sé ansyen-la ka pran la (li Ébré 13:17). Jéova ka fè-yo konfyans pou pran swen an nou, é lè nou ka kolaboré èvè yo, nou ka montré Jéova kè nou ka fè-y konfyans, é sé sa ki pli enpòwtan la (Akt 20:28).

11. Ka ki pé édé-nou ni plis konfyans adan dirèksyon-la sé ansyen-la ka ban-nou la ?

¹¹ Lè nou ka sonjé kè sé ansyen-la ka priyé Jéova pou i pé sa ba-yo lèspri sen a-y pou yo pé sa ègzaminé sé kèsyon-la ki anrapò èvè lasanblé-la, sa ka édé-nou ni plis konfyans adan dirèksyon-la yo ka ban-nou la. Anplisdisa, yo ka pran tan ègzaminé prensip a Labib ki anrapò èvè sitiyasyon-la é yo ka chèché sé enstriksyon-la lòwganizasyon ka ba-yo la adan domenn-lasa. Sa yo vé, sé fè Jéova plézi é fè tousa yo pé pou pran swen a pèp a-y. Sé frè-lasa fidèl é yo sav kè Jéova ka gadé jan yo ka pran swen a pèp a-y (1 Pyè 5:2, 3). An-nou réfléchi asi sa : adan mond-lasa, ni onlo moun ki pa ka antann-yo yonn èvè lòt akòz dè ras a yo, dè rèlijyon a yo é akòz dè pawti politik la yo ka soutyenn la. Men pèp a Bondyé, li, i soudé pas yotout ka adoré sèl vré Dyé-la. Si sa posib, sé enki paskè Jéova ka béni òwganizasyon a-y !

12. Lè sé ansyen-la ka chèché a sav si on moun ka rèpanti-y poudèbon, ka fò-yo pran tan ègzaminé byen konm i fo ?

¹² Jéova ba sé ansyen-la on gwo rèsponsabilité toubònman. Fò-yo fè ansòt pou lasanblé-la rété pwòp. Si on frè oben on sè fè on péché ki grav, Jéova ka mandé sé ansyen-la gadé pou vwè si moun-lasa pé rété adan lasanblé-la. Pawmi tout sé biten-la yo ké ni a gadé la, fò-yo ké chèché a sav si moun-la ka règrété sa i fè la poudèbon. Pétèt kè moun-la ka di kè i rèpanti-y, men ès i hay sa i fè la vréman ? Ès i byen désidé a pa woufè péché-la i fè la ? Si i mal aji pas i té ni mové frékantasyon, ès i byen désidé a arété frékanté sé moun-lasa ? Sé ansyen-la ka priyé Jéova pou i édé-yo ègzaminé tout sé enfòwmasyon-la yo ni la grasa Labib. É yo ka ègzaminé osi sa moun-la ki péché la ka rèsanti parapòt a sa i fè la. Aprésa, yo ka désidé si moun-la ki péché la pé rété adan lasanblé-la. Délè, yo ké oblijé èskominyé moun-lasa (1 Kor. 5:11-13).

13. Si yo èskominyé on zanmi an nou oben on fanmi an nou, ka ki té’é pé pran tèt an nou ?

¹³ Ka ki té’é pé anpéché-nou fè sé ansyen-la konfyans ? Pétèt kè si moun-la yo èskominyé la, a pa on bon zanmi an nou oben a pa fanmi an nou, nou ké asèpté pi fasilman désizyon-la sé ansyen-la pran la. Men imajiné kè moun-la yo èskominyé la sé on bon moun an nou. Pétèt nou té’é pé mandé-nou : « Ès sé ansyen-la ègzaminé tout sé enfòwmasyon-la yo té ni la byen konm i fo ? » Oben pétèt nou té’é pé mandé-nou : « Ès yo jijé afè-lasa kon Jéova té’é fè-y ? » Men ka ki pé édé-nou asèpté désizyon-lasa ?

14. Ka ki pé édé-nou si sé ansyen-la désidé èskominyé on moun kè nou enmé ?

¹⁴ Fò-nou toujou sonjé kè lè yo ka èskominyé on moun, sé Jéova ki mèt dispozisyon-lasa anplas. Sa ka fè tout lasanblé-la dibyen é sa pé fè moun-la ki péché la dibyen osi. Si yo té ka lésé on moun ki fè on péché é ki vé pa rèpanti-y adan lasanblé-la, i té’é pé détenn asi lézòt  (Gal. 5:9). Anplisdisa, i pé konpranndèdi kè sa i fè la pa si grav ki sa, é kè i pa bizwen chanjé mantalité a-y oben jan-la i ka aji la pou fè Jéova plézi (Ékl. 8:11). Nou pé sèten kè lè sé ansyen-la ka désidé èskominyé on moun, yo pa’a pran sa alaléjè. Kon sé jij-la ki té ka jijé pèp a Bondyé an tan a Izrayèl, sé ansyen-la ka rèkonnèt kè ‘a pa pou lòm yo ka jijé men sé pou Jéova’ (2 Kron. 19:6, 7).

15. Poukwa sé dépi aprézan pou nou sèten a san pou san kè Jéova toujou ka fè sa ki byen ?

¹⁵ Talè mond méchan-lasa kay bout, alò pi tan-la ka pasé, pi fò-nou sèten a san pou san kè Jéova toujou ka fè sa ki byen. Poukwa ? Pas pannan gwo tribilasyon-la, pétèt kè yo ké mandé-nou fè sèwten biten é nou pé’é konprann poukwa yo ka mandé-nou fè sa, oben pétèt kè nou ké ni dimal a fè sa yo ka mandé-nou fè. Nou ka tou konprann kè Jéova pé’é vin an zorèy an nouchak pou di-nou ka pou nou fè. Men i ké sèvi èvè sé frè-la ki ni rèsponsabilité adan òwganizasyon a-y pou fè sa. Men a pa a moman-lasa pou nou ni dout oben pou nou mandé-nou : « Ès sa yo mandé-nou fè la, sa ka vin dè Jéova oben sé sé frè-la menm ki désidé fè sa ? » Péryòd-lasa ké on péryòd ki ké vréman enpòwtan, alò ès nou ké fè Jéova é òwganizasyon a-y konfyans ? Pou nou réponn a kèsyon-lasa, fò-nou gadé kijan nou ka réyaji dépi konnyéla lèwvwè sé frè-la Jéova bay on otorité ka mandé-nou fè on biten. Si dépi konnyéla nou ka fè sa yo ka mandé-nou fè é kè nou pa’a tadé pou fè sa, sa ké pli fasil pou nou dè fè sa yo ké mandé-nou fè pannan gwo tribilasyon-la (Lik 16:10).

16. Talè Jéova ké jijé mond-lasa é pétèt kè a moman-lasa nou ké ni dimal a fè-y konfyans. Poukwa nou ka di sa ?

¹⁶ Lèwvwè nou ké rivé an fen a mond-lasa, Jéova ké jijé-y. Sé pousa, sé dépi konnyéla pou nou pran tan réfléchi byen asi mannyè nou ké réyaji lèwvwè sa ké fèt. Nou ka èspéré kè onlo moun ki pa’a sèvi Jéova jòdijou, kon fanmi an nou ki pa Témwen pa ègzanp, ké désidé sèvi-y avan mond-lasa bout. Lè Awmagédon ké rivé, Jéova ké désidé ka sé moun-lasa ké divini é i ké itilizé Jézi pou fè sa (Mat. 25:31-33 ; 2 Tés. 1:7-9). A pa nou ki ké désidé èvè kimoun Jéova ké aji èvè mizérikòd é èvè kimoun i pé’é aji èvè mizérikòd (Mat. 25:34, 41, 46). Alò lè sa ké fèt, ès nou ké fè Jéova konfyans ? Oben ès nou ké arété sèvi-y pas nou pa dakò èvè désizyon a-y ? Nou ka tou konprann kè sé dépi konnyéla  pou nou aprann fè Jéova konfyans plis ankò. Konsa, nou ké pé fè-y konfyans a san pou san dèmen.

17. Lè lafen ké rivé é kè Jéova ké jijé mond-lasa, ki byenfé sa ké pwokiré-nou ?

¹⁷ Ès ou ja imajiné sa ou ké rèsanti lèwvwè ou ké adan mond nouvo la é kè ou ké vwè tout bon biten jijman a Bondyé pòté ? Fo-rèlijyon-la ké fè pach, sistèm a lajan-la ké disparèt é sé gouvènman-la ki té ka fè moun soufè la toutolon a Listwa pé ké la ankò. Ponmoun pé ké malad ankò, ponmoun pé ké vin vyé ankò é nou pé ké jen pèd on moun nou enmé ankò. Tout sé biten-lasa pé ké fè pawti a vi an nou ankò. Yo ké maré Satan é sé démon-la pannan 1 000 an é yo pé’é pé fè-nou ayen ankò. Tout sé mové biten-la ki rivé la dépi jou-la yo té ba Bondyé do la pé ké ègzisté ankò (Rév. 20:2, 3). Lè nou ké vwè sa fèt, a pa ti kontan nou ké kontan nou té fè Jéova konfyans, pas i toujou ka fè sa ki byen !

18. Nonb 11:4-6 é Nonb 21:5 ka palé dè sé Izraélit-la. Ka ègzanp a yo ka aprann-nou ?

¹⁸ Lè nou ké adan paradi-la, ès fò-nou ké montré kè nou sèten kè Jéova toujou ka fè sa ki byen ? Pou nou réponn a kèsyon-lasa, an-nou vwè ègzanp a sé Izraélit-la. On ti moman apré yo sòti an Éjipt, sèwten adan yo koumansé plenn-yo pas yo pa té ni sé manjé-la yo té ka manjé la an Éjipt é sa té ka manké-yo, alòskè sé èsklav yo té èsklav an Éjipt ! Kifè, yo té ka di bétiz anlè màn-la Jéova té ka ba-yo manjé la (li Nonb 11:4-6 ; 21:5). Lèwvwè gwo tribilasyon-la ké fin, ès dé lidé konsa ké travèsé lèspri an nou ? Nou po’o sav tout travay-la nou ké ni a fè la pou pwòpté latè é pou fè-y vin on paradi piti-a-piti. Pétèt kè odépa sa pé’é fasil é pétèt ké ni dé biten ki pé’é agou an nou. Men ès a moman-lasa nou ké mèt-nou ka kritiké sa Jéova ka ban-nou ? On biten ki sèten sé kè si nou ni rèkonésans pou tousa Jéova ka ban-nou dépi konnyéla, nou ké ni plis rèkonésans ankò pou sa i ké ban-nou adan paradi-la.

19. Ki lidé enpòwtan nou vwè adan awtik-lasa ?

¹⁹ Jéova toujou ka fè sa ki byen, fò-nou sèten dè sa. Anplisdisa, fò-nou fè sé frè-la Jéova chwazi la pou dirijé òwganizasyon a-y la konfyans osi. Jéova sèvi èvè pwofèt Izayi pou di-nou on biten ki vréman ankourajan. Mi sa i ka di : « Si zò rété kalm é si zò ni konfyans, sé sa ki ké fòs a zòt » (Iz. 30:15).