1. Yo pé ban-nou konsèy plizyè mannyè diféran. Kilès ? É poukwa noutout bizwen konsèy ?

 NOUTOUT bizwen yo ban-nou on ti konsèy dè tanzantan. Dépawfwa, sé noumenm an nou ki pé ay owa on moun nou ka rèspèkté pou mandé-y on konsèy. Défwa osi, sé pé on frè ki ka vwè kè nou kay fè on biten ki pa bon é ki ka vin di-nou sa avan nou règrété sa (Gal. 6:1). Dòt fwa ankò, yo ka ban-nou on konsèy, lèwvwè yo ka korijé-nou pas nou fè on fòt ki grav. Men, kèlkèswa konsèy-la yo ka ban-nou la, fò-nou kouté-y. Si nou ka fè sa, sé bon biten sa ké pòté ban nou é sa pé jous sové vi an nou ! (Pwov. 6:23).

2. Dapré sa Pwovèb 12:15 ka di, poukwa fò-nou kouté lè yo ka ban-nou on konsèy ?

² Awtik-lasa bazé asi on vèwsé ki ka ankourajé-nou « kouté pawòl a moun ki ni sajès » (Pwov. 22:17). Pa ni ponmoun ki konnèt toutbiten ; nou ké toujou touvé on moun ki konnèt plis biten ki nou oben ki ni plis èkspéryans ki nou (li Pwovèb 12:15). Alò, lè nou ka kouté konsèy a lézòt, sa ka montré kè nou ni imilité. Sa ka montré osi kè nou ka rèkonnèt limit an nou é kè nou sav byen kè pou nou rivé atenn objèktif an nou, nou bizwen lézòt édé-nou. Mi sa Bondyé fè wa Salomon maké : « Tout biten ka maché byen lè ni onlo moun pou bay konsèy » (Pwov. 15:22).

3. Nou pé rèsèvwa konsèy plizyè mannyè diféran. Kilès ?

³ Nou pé trapé konsèy 2 mannyè diféran. Prèmyèwman, « on moun pé vin ban-nou on konsèy ». Sé pé on ansyen oben ondòt moun ki byen doubout adan lavérité ki ka fè-nou vwè kè ni on biten ki pa k’ay adan konpòwtasyon an nou. Si moun-lasa ka vin vwè-nou é kè i ka montré-nou dé ti konsèy adan Labib, sé kè moun-lasa enmé-nou. Nou ké montré kè nou ka aprésyé moun-lasa, lè nou ké kouté sa i ni a di-nou é lè nou ké ba konsèy-la i ka ban-nou la onlo valè. Dézyèmman, « noumenm an nou pé touvé on konsèy » an Bib-la oben adan  piblikasyon an nou ki ké fè-nou réfléchi asi jan nou ka aji. A moman-lasa, pétèt kè nou ké vwè kè fò-nou arété fè on biten oben kè fò-nou chanjé konpòwtasyon an nou (Ébr. 4:12).

4. Dapré Éklézyas 7:9, adan ki pyèj pou nou pa tonbé lè yo ka ban-nou on konsèy ?

⁴ Fò-nou rèkonnèt kè lèwvwè on moun ka vin vwè-nou pou ban-nou on konsèy, délè pou nou aksèpté sa, a pa on biten ki fasil. Pétèt sa pé jous fè-nou fè kòlè. Poukwa ? Paskè menmsi nou sav kè nou pa pawfè, lè on moun ka vin vwè-nou pou ban-nou on konsèy ki ka mèt défo an nou déwò, nou pé ni dimal a aksèpté sa (li Éklézyas 7:9). Pétèt nou ké chèché èskiz oben nou ké di kè sé mové lentansyon moun-lasa té ni, oben nou pé’é pran jan-la moun-la palé ban nou la. Pétèt osi nou ké kritiké moun-la ki konséyé-nou la é nou ké di an tchè an nou : « Ankijan entèl ka pèwmèt-li dè vin ban-mwen konsèy ? Ka i konprann ? I pa ni défo alò ? » É si nou pa enmé konsèy-la moun-lasa ban-nou la, pétèt nou ké ay vwè ondòt moun pou i ban-nou on konsèy ki ké agou an nou.

5. Ka nou ké vwè adan awtik-lasa ?

⁵ Adan awtik-lasa, nou ké vwè ègzanp a moun ki pa pran lèwvwè yo ba-yo on konsèy é nou ké vwè ègzanp a moun osi ki aksèpté konsèy-la yo ba-yo la. Anplisdisa, nou ké vwè ka ki pé édé-nou aksèpté sé konsèy-la yo ka ban-nou la é ki bon biten sa pé pòté ban nou.

6. Jan-la Roboam réyaji la lèwvwè yo ba-y on konsèy ka aprann-nou on biten. Ki biten ésa ?

⁶ An-nou palé dè ègzanp a Roboam. Lèwvwè Salomon, papa a Roboam, té wa an Izrayèl, i té ka fè pèp-la travay rèd toubònman. Kifè, lè Roboam vin wa, pèp-la mandé-y si i té pé ba-yo mwens travay a fè. Alò, avan i réponn-yo, i ay chèché konsèy owa sé nonm-la ki té ja ni on bèl laj-la an Izrayèl é désizyon-lasa té plen sajès. Yo di-y konsa kè si i té ka aksèpté sa pèp-la té di, yo té’é kontinyé soutyenn-li (1 Wa 12:3-7). Men, i ka sanm sa konsèy-lasa pa té agou a-y piskè i ay chèché konsèy owa boug ki té lévé èvè-y. Pétèt kè sé boug-lasa té ja ni apépré 40 an, kifè yo té konnèt sèwten biten (2 Kron. 12:13). Men adan sitiyasyon-lasa, yo ba Roboam on mové konsèy : yo di-y fè pèp-la travay plis ankò (1 Wa 12:8-11). A moman-lasa, fò Roboam té chwazi ki konsèy i té’é suiv é pou sa i té pé priyé Jéova pou mandé-y édé-y. Olyé i té fè sa, Roboam suiv konsèy-la sé jennboug-la té ba-y la pas i touvé konsèy-lasa pi agou a-y. É ki rézilta sa pòté ? Ében ki Roboam ki pèp-la pran plon adan sa. Menmjan-la osi, si yo ka ban-nou on konsèy é kè nou pa’a touvé konsèy-lasa agou an nou, dépi i bazé asi Pawòl a Bondyé, fò-nou suiv-li.

7. Ka ègzanp a wa Ozyas ka aprann-nou ?

⁷ Wa Ozyas pa kouté nonplis lèwvwè yo ba-y on konsèy. I ay adan tanp a Jéova é i rantré on koté i pa té ni dwa rantré. I ay la pas i té bizwen brilé lansan pou Jéova alòskè sé yenki sé prèt-la ki té ni dwa ay la. Alò, sé prèt-la di-y : « Ou pa ni dwa brilé lansan pou Jéova ! Sé sé prèt-la tousèl ki ni dwa brilé lansan. » Kijan Ozyas réyaji ? Si i té montré-y toupiti, kè i té kouté konsèy-la yo té ba-y la é kè i té sòti tousuit an Tanp-la, pétèt Jéova té’é padonné-y. Men a pa sa Ozyas fè, i vin anrajé toubònman. Poukwa i pa kouté konsèy-la yo ba-y la ? Pétèt i té ka kwè kè konm sé-y ki té wa, i té pé fè sa i té vlé. Men a pa konsa Jéova té ka vwè sa. Konm i fè on biten kè i pa té ni dwa fè, Ozyas trapé lalèp é i « rété malad èvè lalèp joustan i mò » (2 Kron. 26:16-21). Sa ki rivé wa Ozyas ka aprann-nou kè kèlkèswa moun-la, si nou pa ka aksèpté kouté sé konsèy-la ki an Bib-la, nou ké pèd favè a Jéova.

8. Lèwvwè yo ba Jòb déotwa konsèy, kijan i réyaji ?

⁸ Labib ka palé osi dè ègzanp a moun kè Bondyé béni pas yo suiv sé konsèy-la yo ba-yo la. An-nou pran ègzanp a Jòb. Sé vré, Jòb té vlé fè Jéova plézi, men i pa té pawfè. Lèwvwè i vin touvé-y adan on sitiyasyon ki té ka mèt bon présyon asi-y, i di dé biten ki té ka montré kè i pa té ka vwè sitiyasyon-la byen konm i fo. Sé pousa Éliyou é Jéova ba Jòb konsèy é yo palé ba-y franchman. Kijan i réyaji ? I montré-y toupiti é i aksèpté sé konsèy-la yo ba-y la. Mi sa i admèt : « An palé, men an pa té ka konprann […] An ka wouvin asi sa an di é an ka sizé adan pousyè-la é adan sann-la pou rèpanti-mwen. » Jéova béni Jòb pas i aji èvè imilité (Jòb 42:3-6, 12-17).

9. Lèwvwè yo ba Moyiz on konsèy, kijan i réyaji é poukwa sé on bèl ègzanp pou nou ?

⁹ Moyiz osi lésé on bèl ègzanp pou nou. I fè on biten ki té grav, men i aksèpté kè yo korijé-y. On jou, tèlman i té kòlè, i pa ba Jéova lonnè. Kifè, Jéova di-y kè i pé’é rantré adan Péyi-la i té pwomèt sé Izraélit-la (Nonb 20:1-13). Alò i di Jéova jan désizyon-lasa té ka fè-y lapenn. Men Jéova di-y konsa : « Pa jen woupalé-mwen dè sa ankò » (Dét. 3:23-27). Men Moyiz pa fè kòlè pou sa. Okontrè, i aksèpté désizyon-la Jéova pran la é konm i aji konsa Jéova kontinyé itilizé-y pou gidé pèp a-y (Dét. 4:1). Jòb é Moyiz sé dé bon ègzanp pou nou menm ! Jòb pa chèché pon èskiz, i chanjé jan-la i té ka rézonné la. É kanta Moyiz, i kontinyé rété fidèl a Jéova menmsi i té sav kè i pa té’é jen rantré adan Péyi-la Jéova té pwomèt sé Izraélit-la alòskè sé on biten i té anvi toubònman. Sa té ka montré kè i té aksèpté sé konsèy-la Jéova té ba-y la.

10. a) Dapré Pwovèb 4:10-13, ki byenfé nou ké ni si nou ka aksèpté konsèy yo ka ban-nou ? b) Sèwten frè é sè byen réyaji lèwvwè yo ba-yo on konsèy. Bay déotwa ègzanp.

¹⁰ Lè nou ka imité ègzanp a moun ki fidèl kon Jòb é Moyiz, sa ka pwokiré-nou onlo byenfé (li Pwovèb 4:10-13). Ni onlo frè é sè ki ké dakò pou di kè sé sa menm. Pa ègzanp, mi sa Emmanuel b, on frè ki ka viv o Kongo ka di : « Lèwvwè an té k’ay pèd lanmityé an mwen èvè Jéova, ni plizyè frè adan lasanblé an mwen ki byen doubout adan lavérité ki vin édé-mwen. An suiv sé konsèy-la yo ban’an la é sa anpéché-mwen trapé onpakèt pwoblèm. » Megan, sé on sè ki pyonyé o Kanada. Mi sa i ka di anrapò èvè déotwa konsèy yo ba-y : « Délè, sé konsèy-la yo té ka ban’an la, a pa sa an té anvi tann, men sé sa an té bizwen. » É pou fin, mi sa Marko, on frè ki ka viv an Kwoasi ka di : « An pèd on rèsponsabilité an té ni adan lasanblé-la, men pli an ka réfléchi asi sa ki pasé, pli an ka rann-mwen kont kè sé konsèy-la yo ban’an la édé-mwen wouvin bon zanmi èvè Jéova. »

11. Ka frè Karl Klein di asi jan pou nou réyaji lèwvwè yo ka ban-nou on konsèy ?

¹¹ Frè Karl Klein té ka fè pawti a Komité santral la é li osi lèwvwè yo ba-y on konsèy é kè i aksèpté-y, sa pòté bon biten ba-y. Adan istwa a vi a-y, i ka rakonté kè on jou, Joseph Rutherford ki té bon zanmi a-y, ba-y on konsèy é i palé ba-y franchman. I ka rèkonnèt kè odépa sa malpasé-y. Mi sa i ka rakonté : « Lè nou jwenn apré sa rivé, [frè Rutherford] té kontan vwè-mwen. Alò, i di-mwen “bonjou Karl !”. Men konm an té ni sa i di’an la asi tchè an-mwen toujou, an di-y on ti bonjou tou fwèt. Alò i di-mwen : “Fè atansyon Karl ! Dyab-la ka éséyé trapé-w !” Lè i di’an sa, an touv’an jenné, alò mi sa an réponn-li : “É non, a pa ayen  frè Rutherford.” Men frè Rutherford té ja vwè byen kè an té fwèt èvè-y. Alò mi sa i réponn-mwen : “Dakò, men fè atansyon a-w kanmenm. Dyab-la bizwen pran lanmen asi-w.” É i té ni rézon a-y. Lèwvwè nou ni on frè asi tchè alòskè frè-la di on biten kè i té andwa di-nou […], Dyab-la pé pri nou adan on zatrap fasilman c » (Éféz. 4:25-27). Frè Klein aksèpté konsèy a frè Rutherford é yo rété bon zanmi.

12. Kijan limilité pé édé-nou aksèpté on konsèy ? (Sòm 141:5).

¹² Lè on moun ka ban-nou on konsèy ka ki pé édé-nou aksèpté-y ? Sé limilité. Fò pa nou jen oubliyé kè nou enpawfè é kè souvantfwa nou pa’a rézonné byen konm i fo. Kon nou vwè-y talè la, mannyè Jòb té ka pansé pa té bon. Men i chanjé mannyè i té ka rézonné. Kifè, Jéova béni-y toubònman. Poukwa i fè chanjman-lasa ? Pas i té ni imilité. I montré sa lèwvwè i aksèpté konsèy-la Éliyou té ba-y la, menmsi Éliyou té lontan pi jenn ki-y (Jòb 32:6, 7). Nou osi, si nou ni imilité, sa ké édé-nou aksèpté on konsèy yo ka ban-nou menmsi nou pa’a konprann poukwa moun-la ka ban-nou konsèy-lasa oben menmsi moun-la ki ka ban-nou-y la pi jenn ki nou. Mi sa on ansyen ki ka viv o Kanada ka di : « Nou ké ni dimal a progrésé si ponmoun pa’a ban-nou konsèy. » Noutout bizwen kontinyé travay sé kalité-la ki adan fwi a lèspwi a Bondyé é noutout bizwen vin pi filé lèwvwè nou ka préché é anségné bon nouvèl a Wayòm-la (li Sòm 141:5).

13. Lèwvwè yo ka ban-nou on konsèy, kijan pou nou vwè sa ?

¹³ Lèwvwè yo ka ban-nou on konsèy fò-nou vwè sa konsi sé Jéova ki ka di-nou kè i enmé-nou. Jéova vlé sa ki ni dè méyè pou nou (Pwov. 4:20-22). Lè i ka ban-nou on konsèy, ki sé grasa Pawòl a-y, ki sé grasa on piblikasyon ki bazé asi Labib oben ki sé grasa on krétyen ki byen doubout adan lavérité, i ka di-nou jan i enmé-nou. An Ébré 12:9, 10 nou ka li kè i « ka korijé-nou pou byen an nou ».

14. Lèwvwè yo ka ban-nou on konsèy, ka pou nou gadé an prèmyé ?

¹⁴ Pa gadé jan-la yo palé ba-w la, men konsantré-w si konsèy-la yo ba-w la. Dépawfwa, lèwvwè on moun ka ban-nou on konsèy, pétèt kè nou ka di an tchè an nou kè a pa konsa pou moun-la té palé ban nou. Sé vré kè lè on moun ka vin ba ondòt moun on konsèy, fò i fè atansyon a jan-la i ka palé la pou moun-la pé sa aksèpté konsèy-la i ka ba-y la d (Gal. 6:1). Fò-nou gadé ka konsèy-lasa ka pòté ban nou menmsi nou ka touvé  kè moun-la ki ban-nou konsèy-la té pé palé ondòt jan. Mi sa pou nou mandé-nou : « Menmsi an pa enmé jan-la yo ban-mwen konsèy-la, ès pa ni on ti biten adan konsèy-la ki pé itil ban mwen ? Ès an pé pa mèt défo a moun-la ki ban-mwen konsèy-la akoté, mwen pé sa vwè kijan konsèy-lasa pé itil pou mwen ? Si nou aji konsa, nou ké aji èvè sajès é konsèy-lasa ké pòté onlo bon biten pou nou (Pwov. 15:31).

15. Lèwvwè nou ka mandé konsèy poukwa sé on bon biten ?

¹⁵ Labib ka di-nou kè fò pa nou pè mandé on moun on konsèy. Mi sa Pwovèb 13:10 ka di : « Moun ki ka mandé konsèy ni sajès. » Sa sé on biten ki vré menm ! On moun ki ka mandé konsèy olyé i atann kè yo vin ba-y on konsèy ké pran pibon désizyon ki on moun ki pa ka mandé konsèy. Alò pa ézité mandé konsèy !

16. A ki moman sa itil kè nou mandé on moun on konsèy ?

¹⁶ A ki moman nou pé mandé on moun on konsèy ? An-nou vwè déotwa ègzanp : 1) On sè ka mandé ondòt sè ki ni èkspéryans vin èvè-y adan on étid. Apré, i ka mandé lòt sè-la ka i té’é pé fè pou i pé sa vin pli filé adan domenn-lasa. 2) On sè ki sélibatè bizwen achté on pantalon. Alò i ka mandé on sè ki byen doubout adan lavérité ka i ka pansé dè pantalon-lasa. 3) On frè kay fè prèmyé diskou a-y, men avan sa, i ka mandé ondòt frè ki ni èkspéryans si i ké pé kouté diskou-la byen. Konsa i ké pé di-y ka i pé fè pou pwogrésé. É menm on frè ki ka fè diskou dépi onpakèt lanné pé ay vwè ondòt frè pou mandé-y dé ti konsèy. Aprésa, i ké mèt sé konsèy-lasa an pratik.

17. Lè yo ka ban-nou on konsèy, ka nou pé fè pou sa itil ban nou ?

¹⁷ Sé simenn-la oben sé mwa-la ki ka vin la, noutout ké risivwè konsèy. Swa sé on moun ki ké vin palé ban nou, oswa sé noumenm an nou ki ké tonbé asi on konsèy. Sé pé osi on biten nou ké vwè adan Labib oben adan sé piblikasyon-la. A moman-lasa, an-nou sonjé sé lidé-la nou sòti vwè la. An-nou kontinyé aji èvè imilité. An-nou konsantré-nou asi konsèy-la yo ban-nou la olyé nou konsantré-nou asi jan-la yo ban-nou-y la. Aprésa, an-nou mété konsèy-lasa an pratik. Ponyonn adan nou pa té ni sajès lèwvwè i fèt. Men si nou ka ‘kouté lè yo ka ban-nou on konsèy é kè nou ka aksèpté kè yo korijé-nou, nou ké vin saj’ kon Pawòl a Bondyé ka pwomèt-nou (Pwov. 19:20).