AN TAN a Labib, lè on misyé té bizwen mayé èvè on fi, misyé-la oben fanmi a-y té ka ba fanmi a fi-la on lajan oben ondòt biten si sé 2 fanmi-la té dakò pou mayé-la fèt. Yo té pé ba fanmi a fi-la dé biten ki té ni valè, zannimo oben on lajan. Dépawfwa osi, pou mayé èvè fi-la, misyé-la té ka travay pou fanmi a fi-la. Pa ègzanp, Jakòb travay ba papa Rachèl pannan 7 an pou i té mayé èvè Rachèl (Jén. 29:17, 18, 20). Poukwa yo té ni sé mès é labitid-lasa ?

Mi sa Carol Meyers, on èspésyalis a Labib ka di : « Lajan-la oben sé biten-la yo té ka ba fanmi-la pou fi a yo té ka édé fanmi-la pas sa tifi-la té ka fè pou fanmi a-y té enpòwtan, siwtou si fanmi a-y té agrikiltè *. » Anplis, sa yo té ka ba fanmi a fi-la té’é pèwmèt sé 2 fanmi-la vin pibon zanmi pas grasa mayé-lasa, sé konsi yo té ka fè onsèl fanmi. Aprézan, lè yo té’é jwenn bout-rèd yonn té’é pé édé lòt. Lajan-la oben sé biten-la yo té ka ba fanmi a fi-la té ka montré kè tifi-la té fiyansé é kè lè i té’é mayé, a pa té’é pap’a-y ki té’é pran swen a-y é ki té’é pwotéjé-y ankò men sé mari a-y ki té’é ni rèsponsabilité-lasa.

Lè yo té ka ba fanmi a fi-la ki té k’ay mayé la on lajan oben dòt biten ankò, sa pa té vé di kè sé vann fanmi a-y té ka vann-li oben kè mari a-y té ka achté-y. Mi sa on liv non a-y sé Les institutions de l’Ancien Testament ka di : « An Izrayèl, lè ou té ka vwè on misyé ki té ka ba fanmi a on fi on lajan, oben ondòt biten ki té ni menm valè-la pou i té pé sa mayé èvè-y, ou té’é pé ni lenprésyon kè sé achté misyé-la té ka achté fi-la. Men a té pa sa ! An réyalité, lajan-la oben sé biten-la yo té ka ba fanmi a fi-la sé té pou édé fanmi-la pas fi-la pa té’é la ankò pou édé-yo *. »

Jòdijou, adan sèwten péyi, sé moun-la ka kontinyé suiv tradisyon-lasa. Lè fanmi a fi-la ka mandé on lajan oben dòt biten pou mayé fi a yo é kè sé dé krétyen, yo ka montré-yo ‘rézonab’. Yo pa’a mandé misyé-la oben fanmi a-y plis ki dwètèt (Filip. 4:5 ; 1 Kor. 10:32, 33). Lè yo ka fè sa, yo ka montré kè yo pa dé moun ki enmé lajan oben kè yo pa dé moun ki pa jen ni asé (2 Tim. 3:2). Anplis, sa ka pèwmèt tifi-la é misyé-la mayé jou-la yo té prévwa la olyé yo mayé kèlkè mwa oben kèlkè lanné apré pas misyé-la po’o ni tout lajan-la yo ka mandé-y la. É si frè-la pyonyé, i pé’é oblijé lagé sèwvis a-y pou travay plis pou i pé sa gangné tout kantité lajan-la yo ka mandé-y la.

Adan dòt péyi ankò, sé lwa-la ki ka di konmen lajan fò on misyé ba fanmi a on fi pou mayé èvè fi-la. Lèwvwè sé sa, si sé fanmi-la Témwen a Jéova, yo ka rèspèkté lwa-la. Poukwa ? Pas Bondyé ka di kè fò sé krétyen-la « soumèt-yo douvan sa ki ni otorité-la » é i ka di osi kè lèwvwè sa sé otorité-la ka mandé annakò èvè sa Bondyé ka di, fò-yo obéyi (Wom. 13:1 ; Akt 5:29).