Ès ou té sav sa ?
Jéova pèwmèt sé Izraélit-la ofè-y 2 kalité zozyo. Poukwa sé té on bon biten ?
LWA-LA té ka di kè Jéova té dakò pou sé Izraélit-la té ba-y toutrèl oben pijon an sakrifis. Adan sé lwa-la ki té ka palé dè sé sakrifis-la, lè yo té ka palé dè zozyo, yo toujou té ka mèt sé 2 kalité zozyo-lasa ansanm. Yo té pé ofè Jéova ki yonn ki lòt (Lév. 1:14 ; 12:8 ; 14:30). Poukwa sé té on bon biten ? Pas prèmyèwman, sa pa té toujou fasil dè touvé toutrèl. Kijansa ?
Sé toutrèl-la sé dé zozyo ki ka vin an Izrayèl pannan kèlkè mwa lèwvwè ni bon chalè. É chak lanné, lè òktòb rivé, yo té ka pati pou ay adan dòt péyi pas yo sav yo ké touvé chalè adan sé péyi-lasa é aprésa yo ka viré an Izrayèl lèwvwè sé lèprentan (Chanté a S. 2:11, 12 ; Jér. 8:7). Sa té vé di kè an tan a Labib, pou on Izraélit té ofè on toutrèl an sakrifis pannan livè, sa pa té fasil.
Dézyèmman, sé pijon-la pa té ni labitid pati pou ay adan dòt péyi. Kifè, ou té ka touvé-yo tout lanné-la an Izrayèl. Anplisdisa, sé zozyo-lasa té abityé èvè moun (gadé Jan 2:14, 16 *). Dapré on liv ki ka palé dè plant é zannimo ki adan Labib, « an Palèstin, adan tout sé vilaj-la é adan tout sé vil-la, sé pijon-la té abityé èvè sé moun-la. Adan chak kaz, sé mèt a kaz-la té ni kalòj a pijon a yo oben yo té ka fè on tou an masonn-la pou sé zozyo-la té pé viv * » (gadé Izayi 60:8).
Kifè, Jéova montré kè i té enmé sé Izraélit-la é kè i té rézonab, pas i té dakò pou sé Izraélit-la té ofè-y sé zozyo-la yo té pé touvé la pannan lanné-la.