MÈWKRÈDI 18 janvyé 2023, yo mèt on enfòwmasyon èspésyal asi jw.org. Yo anonsé kè té ni 2 nouvo frè adan Komité santral a Témwen a Jéova : frè Gage Fleegle é frè Jeffrey Winder. Sé 2 frè-lasa fidèl é yo ka sèvi Jéova dépi onpakèt lanné.

Frè Fleegle grandi o Zétazini, an Pennsylvanie. Fanmi a-y Témwen a Jéova é yo lévé-y adan lavérité. Lèwvwè i té jenngason, li é fanmi a-y ay rété on koté té ka manké pwoklamatè. Sé té adan on piti vil ki té ka touvé-y lakanpagn. Kèlkètan apré, lè 20 novanm 1988, i pran lèbatèm.

Fanmi a frè Fleegle toujou ankourajé-y sèvi Jéova aplentan. Souvantfwa yo té ka envité sé rèsponsab a siwkonskripsyon la é madanm a yo akaz a yo é frè é sè ki té ka travay an Bétèl-la osi. Kifè, frè Fleegle ni lokazyon konstaté kijan sé frè é sè-lasa té ni tchè-kontan toubònman. Lè 1^é sèptanm 1989, i vin pyonyé pèwmanan. Sé té déotwa tan apré batèm a-y. 2 lanné apré, i rivé atenn on òbjèktif kè i té ni lè i té ni 12 an : sèvi adan Bétèl-la. I rantré adan Bétèl a Brouklin an òktòb 1991.

Adan Bétèl-la, frè Fleegle travay pannan 8 an adan atèlyé-la yo ka fè sé liv-la. Aprésa, yo voyé-y travay adan biwo-la ki ka jéré prédikasyon-la. Pannan péryòd-lasa, i rété kèlkè lanné adan on lasanblé ris. An 2006, i mayé èvè Nadia ki vin jwenn-li an Bétèl-la. Yo soutyenn on lasanblé pòwtigé é pannan pliski 10 an yo soutyenn on lasanblé èspagnòl. Frè Fleegle rété bon enpé lanné adan biwo-la ki ka jéré prédikasyon-la. Aprésa yo voyé-y adan biwo a Komité pou ansègnman-la, é apré yo voyé-y adan biwo a Komité pou sèwvis-la. An maws 2022, yo nonmé-y asistan a Komité pou sèwvis-la a.

 Frè Winder grandi a Murrieta, on vil ki ka touvé-y an Kalifòwni o Zétazini. Fanmi a-y lévé-y adan lavérité é i pran lèbatèm lè 29 maws 1986. On mwa apré, i té pyonyé anranfò é tèlman i touvé-y enmé sa, i kontinyé. I rété pyonyé an ranfò plizyè mwa, é lè 1^é òktòb 1986, i vin pyonyé pèwmanan.

Lè i té jenngason 2 gran frè a-y té ka travay adan Bétèl-la. On jou i ay vwè-yo é lèwvwè i sòti la, li osi té anvi vin bétélit. Alò lè i vin pi gran i ranpli on dèmann pou ay an Bétèl-la. É an mé 1990, yo envité-y pou vin travay adan Bétèl a Wallkill.

An Bétèl-la, frè Winder travay adan plizyè sèwvis diféran. Pa ègzanp, i travay adan sèwvis-la ki ka nétwayé andidan a sé batiman-la, adan fèwm a Bétèl-la é adan biwo a Bétèl-la. An 1997, i mayé èvè Angela é dépi jou-lasa, yo toulédé ka travay adan Bétèl-la. An 2014, yo voyé-yo Warwick é lè yo té la, frè Winder travay adan pwojé a konstriksyon a biwo mondyal la. An 2016 yo voyé-yo Patterson adan Sant a ansègnman a Témwen a Jéova. Lè yo té la, frè Winder travay adan biwo pou odyo é vidéo la. 4 an apré, frè Winder é madanm a-y viré Warwick é yo mandé frè Winder travay adan biwo a Komité pou pèwsonèl-la. An maws 2022, yo nonmé-y asistan a Komité pou pèwsonèl-la.

Nou ka priyé pou Jéova béni sé 2 frè-lasa onlo toubònman pas yo ka travay rèd pou fè aktivité a Wayòm-la vansé. Sé 2 nonm-lasa, sé dé bèl kado Jéova fè-nou (Éféz. 4:8).