AWTIK POU ÉTIDYÉ 7
KANTIK 51 Je me suis voué à Dieu
Ka ègzanp a sé naziréyen-la pé aprann-nou ?
« Tout tan-la i naziréyen la, pou Jéova i sen » (NONB 6:8).
ON TI LIDÉ ASI SA NOU KAY VWÈ
Nou ké vwè kijan ègzanp a sé naziréyen-la pé édé-nou fè sakrifis é ni kouraj lèwvwè nou ka sèvi Jéova.
1. Ki bèl létadèspri onpakèt sèwvitè a Jéova té ni toutolon a Listwa ?
ÈS OU enmé Jéova fò toubònman ? Asiré pa pétèt. É a pa-w tousèl. Dépi nanni nannan, onlo moun ka rèsanti menm biten ki-w (Sòm 104:33, 34). Onlo sèwvitè a Bondyé fè sakrifis pou sèvi-y. Sé sa sé naziréyen-la ki té adan pèp a Izrayèl fè. Ka sa yé on « naziréyen » é ka ègzanp a yo ka aprann-nou ?
2. a) Kimoun sé naziréyen-la té yé ? (Nonb 6:1, 2). b) Poukwa sèwten Izraélit té ka chwazi vin naziréyen ?
2 Mo ébré la yo tradui la é ki bay « naziréyen » vé di « on moun yo chwazi » oben « on moun yo mèt apa ». On naziréyen, sé té on Izraélit ki té ka sèvi Jéova on mannyè èspésyal é i té paré a fè sèwten sakrifis pou i té fè sa. I té ka sèvi Jéova èvè onlo balan. Lwa a Moyiz té ka ba misyé kon madanm laposibilité dè fè Jéova on pwomès èspésyal pou di-y kè yo ké viv kon on naziréyen pannan on sèwten tan a (li Nonb 6:1, 2). Lè on Izraélit té ka fè pwomès èspésyal lasa, fò i té fè sèwten biten rèstan a pèp-la pa té oblijé fè. Alò, poukwa on Izraélit té ka chwazi fè Jéova pwomès-lasa ? I ka sanmsa sé pas i té enmé Jéova onlo é sé pas i té ni onlo rèkonésans pou tout sé byenfé-la Jéova té ka pwokiré-y la (Dét. 6:5 ; 16:17).
3. Poukwa nou pé di kè sèwvitè a Bondyé ki ka viv jòdijou kon sé naziréyen-la ?
3 Lè « lwa a Kris » vin pran plas a Lwa a Moyiz, ponmoun adan pèp a Bondyé pa té pé vin naziréyen ankò (Gal. 6:2 ; Wom. 10:4). Men jòdijou, kon sé naziréyen-la, sèwvitè a Bondyé anvi sèvi-y èvè tou tchè a yo, èvè tout nanm a yo, èvè tout entélijans a yo é èvè tout fòs a yo (Mawk 12:30). Ében sé ègzaktèman pwomès-lasa nou ka fè Jéova lèwvwè nou ka ba-y vi an nou. Pou nou viv annakò èvè pwomès-la nou fè la, fò-nou kouté Jéova é fò-nou paré a fè sakrifis. Toupannan nou ké ègzaminé kijan sé naziréyen-la té ka tchenn a mo a yo, nou ké vwè kijan nou pé imité ègzanp a yo é tchenn a mo an nou nou osi b (Mat. 16:24).
FÒ OU PARÉ A FÈ SAKRIFIS
4. Sèlon Nonb 6:3, 4, ki sakrifis sé naziréyen-la té paré a fè ?
4 (Li Nonb 6:3, 4.) Fò pa sé naziréyen-la té bwè pon bwason ki té ni alkòl adan, ni manjé ayen ki té ni rézen adan, ki sé rézen fré ki sé rézen sèk. Men moun alantou a yo té ni labitid bwè é manjé sé biten-lasa é pa té ni pon pwoblèm adan sa. Dayè, Labib ka di kè ‘diven-la ka mèt jwa an tchè a lòm’. Sé on kado Bondyé fè-nou (Sòm 104:14, 15). Menmsi diven-la é sé rézen-la té ka mèt jwa an tchè a moun, sé naziréyen-la té ka mèt sa akoté é yo té ka fè sakrifis-lasa volontyé c.
Ès ou paré a fè sakrifis kon sé naziréyen-la ? (gadé sé paragraf 4 a 6 la).
5. Ki sakrifis Madián é Marcela désidé fè é poukwa yo fè sa ?
5 Kon sé naziréyen-la, nou osi, nou ka fè sakrifis pou nou pé sa fè plis ba Jéova. An-nou palé dè on frè é madanm a-y non a yo sé Madián é Marcela d. Madián té ka gangné vi a-y byen grasa travay-la i té ni la, kifè yo té ka rété adan on gran apawtèman é yo té ka viv alèz a yo. Men yo té anvi fè plis pou Jéova. Alò, yo désidé chanjé déotwa biten adan vi a yo. Mi sa yo ka di : « Pou koumansé, nou mèt-nou ka dépansé mwens lajan, nou ay rété adan on apawtèman ki té pi piti é nou vann vwati an nou. » Madián é Marcela pa té oblijé fè sé sakrifis-lasa. Men sé yo ki fè pwòp chwa a yo, pas yo té anvi fè plis pou Jéova adan travay a prédikasyon-la. É a pa ti kontan yo kontan !
6. Jòdijou, ka ki ka pousé sèwvitè a Bondyé fè sakrifis ? (gadé imaj-la osi).
6 Jòdijou, sèwvitè a Jéova ni tchè-kontan davwa yo ka fè sakrifis pou yo pé sa ni plis tan pou sèvi-y (1 Kor. 9:3-6). Jéova pa ka fòsé-nou fè sé sakrifis-lasa é sé biten-la nou ka lagé la, a pa dé mové biten nonplis. Pa ègzanp, sèwten adan nou té vé konstwi on kaz oben nou té ka vwè-nou ka fè on sèwten travay. Onlo désidé atann avan yo mayé oben avan yo ni timoun. Dòt ankò ka pati dé koté ka manké pwoklamatè menmsi sa ka oblijé-yo ay rété lwen a fanmi a yo é zanmi a yo. Onlo adan nou ka fè dé sakrifis konsa, pas nou vé ba Jéova sa nou ni dè méyè. Kèlkèswa sakrifis-la ou ka fè la, ki i piti ki i gwo, ou pé sèten kè Jéova ka ba chak sakrifis ou ka fè pou sèvi-y onlo valè (Ébr. 6:10).
FÒ OU PARÉ A PA FÈ KON TOUTMOUN
7. Délè, ki difikilté on naziréyen té ka jwenn pou i té tchenn a mo a-y ? (Nonb 6:5 ; gadé imaj-la osi).
7 (Li Nonb 6:5.) Sé naziréyen-la pa té ni dwa koupé chivé a yo é yo té dakò èvè sa. Sa té ka montré kè yo té ka soumèt-yo douvan Jéova a san pou san. Si sa té ka fè on moman kè on Izraélit té naziréyen, toutmoun té ka vwè sa pas i té ni onlo chivé asi tèt a-y. Si lézòt té ka rèspèkté-y é si yo té ka ankourajé-y pou i tchenn pwomès a-y, i té’é fè sa Jéova té ka mandé-y san pon pwoblèm. Men malérèzman, a sèwten moman adan istwa a Izrayèl, sé moun-la pa té enmé sé naziréyen-la é yo pa té ka soutyenn-yo. An tan a pwofèt Amòs, sé Izraélit-la ki té vin apòsta la té ka fè sé naziréyen-la bwè diven. Yo té sav byen kè sé naziréyen-la pa té ni dwa bwè diven alò pétèt sé apòsta-lasa té bizwen fè-yo fè chimen kochi (Amòs 2:12). Alò délè, fò sé naziréyen-la té ni onlo kouraj pou yo té rèspèkté pwomès a yo é pou yo pa té fè kon toutmoun.
Pou on naziréyen té rèspèkté pwomès a-y, i té paré a fè dé biten ki té ka montré kè i té diféran dè sélézòt moun-la ki té adan pèp-la (gadé paragraf 7 la).
8. Kijan ègzanp a Benjamin ka ankourajé-w ?
8 Grasa Jéova, nou osi nou pé ni kouraj pou nou pa fè kon lézòt menmsi nou on ti jan timid. An-nou pran ègzanp a Benjamin. Sé on jenn Témwen a Jéova ki ni 10 an é ki ka rété an Nòwvèj. Adan lékòl a-y, yo té òwganizé on sérémoni pou soutyenn Likrèn pas ni lagè an péyi-lasa. Fò tout sé timoun-la té abiyé-yo èvè lenj ki ni menm koulè ki drapo a Likrèn é fò-yo té chanté on chanson. Pou i pa té mélanjé-y adan sérémoni a yo, Benjamin mété-y on ti koté apa. Men on métrès vwè-y, é i kriyé-y. Mi sa i di-y : « Ka ou ka fè la ? Vini-w ! Toutmoun ka atann-vou ! » Anplisdisa, i palé byen fò pou toutmoun tann. Benjamin pran kouraj a-y a 2 men, i ay vwè métrès-la é mi sa i èspliké-y : « An pa ka mélanjé-mwen adan zafè a politik, alò an pa ka pawtisipé adan pon biten ki anrapò èvè sa. Anfèt, ni onlo Témwen a Jéova ki lajòl pas yo ka rèfizé fè lagè. » Métrès-la kouté sa Benjamin di-y é i di-y kè i pa oblijé pawtisipé adan sérémoni-la. Men dòt zélèv mèt-yo ka mandé Benjamin poukwa i pa té ka vin èvè yo. Tèlman sa angwasé timoun-la, tibwen ankò, i té kay mèt pléré atè. Men i tchenn tchè, é i répété sa i té sòti di métrès-la douvan tout sé zélèv-la. Plita, lè Benjamin rakonté manman-y é pap’a-y sa ki té pasé, i di-yo kè i santi kè Jéova édé-y défann fwa a-y.
9. Kijan nou pé fè tchè a Jéova kontan ?
9 Lèwvwè nou ka chwazi kouté Jéova, sélézòt moun-la ka vwè kè nou pa ka aji kon yo. A moman-lasa, fò-nou ni kouraj pou nou fè lézòt sav kè nou Témwen a Jéova, ki nou an travay an nou, ki nou lékòl. Pi tan ka pasé, pi sé moun-la ka fè dé biten ki mové adan mond-lasa. Alò pou nou kontinyé suiv sé prensip-la ki an Bib-la é pou nou palé dè bon nouvèl-la èvè sé moun-la, nou pé ni lenprésyon kè sa ka vin dè plizanpli difisil (2 Tim. 1:8 ; 3:13). Men on biten pou nou pa jen oubliyé sé kè lèwvwè nou ka aji èvè kouraj é kè nou pa ka aji kon sé moun-la ki adan mond-lasa, nou ka ‘fè tchè a Jéova kontan’ (Pwov. 27:11 ; Mal. 3:18).
BA JÉOVA PRÈMYÉ PLAS-LA
10. Poukwa sé naziréyen-la té pé ni dimal a suiv sa ki maké an Nonb 6:6, 7 ?
10 (Li Nonb 6:6, 7.) Sé naziréyen-la pa té ni dwa ay owa on moun ki mò. Pétèt nou pé pansé kè sakrifis-lasa a pa té granzafè. Men an tan a Labib, lèwvwè on naziréyen té ka pèd on moun i té enmé onlo, sa dwèt té rèd ba-y toubònman. An tan-lasa jistèman lèwvwè on moun té ka mò, pli souvan ki rarman sé moun-la té ka suiv diféran koutim. Kifè, fò-yo té ay toupré a moun-la ki mò-la (Jan 19:39, 40 ; Akt 9:36-40). Men akòz dè pwomès èspésyal la sé naziréyen-la té fè la, yo pa té pé suiv granzafè adan sé koutim-lasa. Alò, menmsi sé on moun an fanmi a-y on naziréyen té pèd é kè i té tris toubònman, fò i té ni on fwa ki solid pou i té tchenn a pwomès a-y. Lèwvwè on sèwvitè a Jéova té ka jwenn dé kalté éprèv konsa, nou pé sèten kè Jéova té ka ba-y fòs.
11. Lèwvwè fò on krétyen pran sèwten désizyon anrapò èvè fanmi a-y, ka fò i byen désidé a fè ? (gadé imaj-la osi).
11 Lè nou vin krétyen, nou fè Jéova on pwomès é nou ka pran sa oséryé. É fò-nou tchenn kont dè pwomès-lasa lèwvwè nou ka pran on désizyon é lèwvwè nou ka aji èvè fanmi an nou. Sé vré kè nou ka travay rèd pou pran swen a fanmi an nou, men nou pa ka fè sa fanmi an nou vlé pasé avan sa Jéova ka mandé-nou fè (Mat. 10:35-37 ; 1 Tim. 5:8). Sa pé jous rivé osi kè nou ka pran on désizyon pou fè Jéova plézi é fanmi an nou pa dakò èvè nou.
Ès ou paré a mèt Jéova prèmyé douvan adan vi a-w menm lèwvwè ou anba gwo difikilté ? (gadé paragraf 11 la). e
12. Alexandru té ka viv on sitiyasyon ki pa té senp akaz a-y. Ka i fè é ka i désidé pa fè pou rivé about a sitiyasyon-lasa ?
12 An-nou pran ègzanp a Alexandru. Li é madanm a-y Dorina étidyé Labib pannan on lanné. Aprésa Dorina désidé arété étidyé é i té vé Alexandru fè menm biten-la. Men èvè onlo jantiyès, Alexandru di-y kè i anvi kontinyé. Dorina pa té kontan ditou é i éséyé fòsé Alexandru arété étidyé Labib. Alexandru té ka fè éfò pou konprann poukwa madanm a-y té ka aji konsa é limenm té ka admèt kè sa pa té fasil ba-y ditou-ditou. Délè, lèwvwè madanm a-y té ka tonbé an zo a-y oben lèwvwè i té ka palé rèd ba-y, Alexandru té anvi arété étid a-y. Magrésa, i kontinyé mèt Jéova prèmyé douvan toupannan i té ka kontinyé aji èvè onlo lanmou é onlo rèspé èvè madanm a-y. Grasa bèl ègzanp a mari a-y, piti-a-piti Dorina woukoumansé étidyé Labib é i fin pa pran lèbatèm (asi jw.org, gadé vidéo-la Alexandru é Dorina Văcar : « Lanmou ni pasyans é i ni bonté » adan ribrik-la « Lavérité ka chanjé vi a moun »).
13. Kijan nou pé montré kè nou enmé ki Jéova ki fanmi an nou ?
13 Sé Jéova ki fè si tout fanmi ka ègzisté é i vlé kè fanmi an nou ni tchè-kontan (Éféz. 3:14, 15). Si nou vé ni tchè-kontan pou bon, fò-nou fè sa Jéova vé. Sèten ou ka fè onlo éfò ki pou adoré Jéova ki pou aji èvè fanmi a-w épi lanmou é rèspé. On biten pou-w pa jen oubliyé sé kè Jéova ka ba tout sé sakrifis-la ou ka fè la onlo valè (Wom. 12:10).
ANKOURAJÉ LÉZÒT POU YO FÈ SAKRIFIS KON SÉ NAZIRÉYEN-LA
14. Kimoun an pawtikilyé pou nou pé sa ankourajé ?
14 Jòdijou, lèwvwè on moun ka désidé sèvi Bondyé, lanmou-la i ni pou-y la dwètèt pousé-y a fè sakrifis pou sèvi-y. Délè pou fè sa, a pa on ti afè. Alò kijan yonn pé édé lòt fè sakrifis pou sèvi Jéova ? Nou pé ankourajé lézòt adan sa nou ka di (Jòb 16:5). Ès ni moun adan lasanblé a-w ki ka fè éfò pou ni on vi ki senp pou fè plis pou Jéova ? Ès ni jenn adan lasanblé a-w ki ka aji èvè kouraj é ki pa ka lésé kanmarad-lékòl a yo détenn asi yo ? Nou sav kè pou on jenn sa pa fasil. É ès ou konnèt étidyan a Labib oben frè é sè ki ka goumé pou yo rété fidèl a Jéova alòskè moun an fanmi a yo pa dakò pou yo sèvi-y ? Kijan ou pé ankourajé tout sé moun-lasa ? Fò nou pwofité dè tout ti lokazyon nou ni pou nou di-yo kijan nou fyèw dè yo pas yo ka montré kè yo ni onlo kouraj é pas yo ka fè sa Jéova ka mandé-yo (Filém. 4, 5, 7).
15. Ka sèwten frè é sè ka fè pou édé frè é sè a yo ki ka sèvi Jéova aplentan ?
15 Dépawfwa, nou pé fè on biten pou édé frè é sè an nou ki ka sèvi Jéova aplentan (Pwov. 19:17 ; Ébr. 13:16). Sé sa on sè ki ja ni on bèl laj té vréman anvi fè. I ka rété o Sri Lanka. Konm i a larètrèt, toulémwa i ka touché on ti lajan. Onlè, yo koumansé ba-y tibwen plis lajan, alò i té vlé soutyenn 2 jenn sè ki pyonyé pèwmanan pas zafè a sé sè-lasa té mélé. Konsa yo té’é pé kontinyé sèwvis a yo. I désidé ba-yo on pal toulémwa pou yo té pé sa péyé fakti a téléfòn a yo. Mi on bèl létadèspri mi !
16. Ka sé naziréyen-la ki viv an tan a Labib ka aprann-nou ?
16 Sé naziréyen-la té ka sèvi Jéova volontyé é yo ka lésé on bèl ègzanp pou nou toubònman. Men lè nou ka étidyé ègzanp a yo adan Bib-la sa ka aprann-nou on biten asi Jéova osi. Jéova Pap’an-nou ki an syèl-la sav kè nou anvi fè-y plézi. Nou pwomèt-li kè nou ké sèvi-y tout vi an nou é i sav kè nou paré a fè sakrifis pou nou tchenn a mo an nou. I ka fè-nou on bèl lonnè. l ka lésé-nouchak chwazi kijan nou ké montré-y lanmou an nou (Pwov. 23:15, 16 ; Mawk 10:28-30 ; 1 Jan 4:19). Anplisdisa, ègzanp a sé naziréyen-la ka montré-nou kè Jéova ka vwè sé sakrifis-la nou ka fè la pou sèvi-y é i ka ba-yo onlo valè. Alò fò-nou byen désidé a kontinyé sèvi Jéova é a ba-y sa nou ni dè méyè èvè tout tchè an nou.
KA OU TÉ KÉ RÉPONN ?
-
Kijan sé naziréyen-la té ka montré kè yo té paré a fè sakrifis é kè yo té ni kouraj ?
-
Kijan yonn pé édé lòt a ni menm létadèspri ki sé naziréyen-la ?
-
Kijan ègzanp a sé naziréyen-la ka montré-nou kè Jéova ka fè-nou konfyans?
KANTIK 124 Soyons fidèles
a Menmsi Jéova chwazi déotwa Izraélit pou yo té vin naziréyen, i ka sanm sa kè lamajorité adan sé naziréyen-la sé té dé Izraélit ki té désidé vin naziréyen yomenm a yo (gadé ti karé-la « Déotwa moun Jéova chwazi pou vin naziréyen »).
b Adan piblikasyon an nou, dépawfwa nou ka konparé frè é sè ki ka sèvi Jéova aplentan èvè sé naziréyen-la. Men, adan awtik-lasa, nou ké vwè kijan tout sé moun-la ki ba Jéova vi a yo pé ni menm létadèspri ki sé naziréyen-la.
c Lèwvwè on moun té ka vin naziréyen, an jénéral yo pa té ka bay fè on travay an pawtikilyé. Sèl biten i té ni a fè sé suiv sa Jéova té ka mandé on naziréyen fè.
d Asi jw.org gadé awtik-la « Nous avons décidé de simplifier notre vie » adan ribrik-la « Témoignages et anecdotes de Témoins de Jéhovah ».
e SA NOU KA VWÈ ASI IMAJ-LA : On naziréyen ki pèd on moun i té enmé doubout anlè on galri ki ka touvé-y anho a on kaz. On foulmoun ka chayé mò-la pou yo ay téré-y é i ka gadé-yo ka pasé. I oblijé rété olwen akòz dè pwomès èspésyal la i fè la.
