1. Bay on ègzanp ki ka montré poukwa fò-nou suiv dirèksyon-la Jéova ka ban-nou la.

 IMAJINÉ kè ou ay an bwa é kè ou pèd chimen a-w. Ni danjé toupatou alantou a-w : bèt sovaj, tibèt ki pé rann-vou malad, plant ki pé pwazonné-w, oben ou pé rivé a tonbé adan on tou. Imajiné aprézan kè ou ni on moun ki la pou montré-w chimen-la é kè moun-lasa ni onlo èkspéryans, sèten ou ké kontan ! Dépi moun-lasa ké vwè on danjé, i ké pé di-w sa, konsa ayen pé’é rivé-w. Mond-la nou ka viv adan-y la tibwen kon bwa-la. Andidan a-y ni onpakèt danjé ki pé aji asi lanmityé an nou èvè Jéova. Men érèzman nou ni on moun pou montré-nou chimen-la é moun-lasa pawfè : sé Jéova. I ka fè ansòt pou lè ni on danjé nou pa pri adan é anmenmditan i ka gidonné-nou pou nou viv pou touttan adan paradi-la.

2. Kijan Jéova ka gidonné-nou ?

² Kijan Jéova ka gidonné-nou ? Dabò pou yonn i ka sèvi èvè Pawòl a-y pou gidonné-nou, men i ka sèvi èvè moun osi pou fè sa. Pa ègzanp, Jéova ka sèvi èvè « èsklav fidèl é prévwayan la » pou ban-nou sa nou bizwen pou nou rété bon zanmi èvè-y é pou nou pran bon désizyon (Mat. 24:45). I ka sèvi osi èvè dòt nonm kapab pou gidé-nou. Pa ègzanp, sé rèsponsab a siwkonskripsyon la é sé ansyen-la adan lasanblé-la ka ankourajé-nou é ka ban-nou on dirèksyon ki pé édé-nou lè nou ka jwenn bout-rèd. Talè lafen ka vin é biten-la ké vin dè plizanpli rèd, alò lè nou ka vwè jan Jéova ka gidonné-nou byen toubònman, a pa ti kontan nou kontan ! Lè nou ka suiv dirèksyon-la i ka ban-nou la, Jéova kontan-nou é nou ka rété asi chimen a lavi.

3. Ka nou ké vwè adan awtik-lasa ?

³ Men délè nou pé ni dimal a suiv dirèksyon-la Jéova ka ban-nou la, siwtou lèwvwè i ka sèvi èvè dé nonm enpawfè pou  gidé-nou. Kijansa ? Pétèt nou pa enmé sa yo ka di-nou oben nou pé touvé kè sa yo ka di-nou la pa ni pon sans, alò pou nou sa pa ka vin dè Jéova. Men pou nou pa rivé jous la, fò-nou sèten a 200% kè sé Jéova ki ka gidé pèp a-y é kè suiv dirèksyon a-y ka pòté enki bon biten ban nou. Pou nou pli sèten dè sa, adan awtik-lasa nou ké vwè 1) kijan Jéova gidé pèp a-y an tan a Labib, 2) kijan Jéova ka gidé-nou jòdijou, é 3) ki byenfé sa ka pwokiré-nou lèwvwè nou ka suiv dirèksyon a-y.

KIJAN JÉOVA GIDONNÉ PÈP A IZRAYÈL

4-5. Kijan Jéova montré kè i té ka sèvi èvè Moyiz pou gidé pèp a Izrayèl ? (gadé imaj-la ki anlè po a jounal-la).

⁴ Pou Jéova té fè Izrayèl sòti an Éjipt i sèvi èvè Moyiz. É i fè pèp-la vwè an 2 zyé a-y kè sé Moyiz i té chwazi pou gidonné-yo. Pa ègzanp, lajouné yo té ka vwè douvan yo on niyaj ki té ka sanm on kolòn é lannuit niyaj-lasa té ka vin on difé (Ègz. 13:21). Grasa kolòn-lasa Moyiz té ka gidé pèp-la é kolòn-lasa fè-yo rivé jous douvan lanmè Wouj la. Lèwvwè sé Izraélit-la rann-yo kont kè douvan yo, té ni lanmè Wouj la, é kè lawmé a sé Éjipsyen-la té ka kouri dèyè do a yo, yo pèd lakat é yo konpranndèdi yo té pri adan on zatrap. Pou yo, Moyiz té pran on mové désizyon é a pa chimen-lasa pou yo té pran. Men a pa té sa ditou-ditou. Okontrè, sé Jéova ki té fè Moyiz menné pèp-la koté-lasa (Ègz. 14:2). Aprésa, Jéova fè on mirak pou sové pèp a-y é yomenm pa té ka atann-yo a sa (Ègz. 14:26-28).

⁵ Pannan sé 40 lanné-la ki vin apré la, Moyiz toujou té ka fè fon asi kolòn-la pou i té pé sa gidé pèp a Bondyé an dézè-la a. Pannan on tan, Jéova mèt kolòn-la anlè tant a Moyiz, kifè tout pèp-la té pé vwè-y (Ègz. 33:7, 9, 10). Moyiz té ka tann vwa a Jéova ki té ka sòti adan kolòn-la é aprésa Moyiz té ka di pèp-la sa Jéova té di-y (Sòm 99:7). Kifè, sé Izraélit-la té pé vwè an 2 zyé a yo kè Jéova té ka sèvi èvè Moyiz pou gidé-yo.

6. Kijan sé Izraélit-la réyaji magré Jéova montré-yo kimoun i chwazi pou gidé-yo ? (Nonb 14:2, 10, 11).

⁶ Jéova fè ansòt pou sé Izraélit-la té vwè an 2 zyé a yo kè sé Moyiz i té chwazi pou palé an non a-y. Men malérèzman, lamajorité adan yo pa tchenn kont dè sa (li Nonb 14:2, 10, 11). Yo montré a plizyè rèpriz kè yo pa té vlé aksèpté kè sé èvè Moyiz Jéova té ka sèvi pou gidé-yo. Alò Jéova pa lésé-yo rantré adan péyi-la i té pwomèt-yo la (Nonb 14:30).

7. Bay ègzanp a déotwa moun ki lésé Jéova gidonné-yo (Nonb 14:24 ; gadé imaj-la osi).

⁷ Men ni sèwten Izraélit ki soumèt-yo douvan Jéova é yo lésé-y gidonné-yo. Pa ègzanp, mi sa Jéova ni lokazyon di : « Kalèb [...] kontinyé kouté-mwen èvè tout tchè a-y » (li Nonb 14:24). Bondyé rékonpansé Kalèb é i jous lésé-y chwazi on koté pou i rété Kanaan (Joz. 14:12-14). Sé Izraélit-la ki rantré adan Péyi-la Jéova té pwomèt-yo la lésé Jéova gidonné-yo osi é yo ka ban-nou on bèl ègzanp adan domenn-lasa. Labib ka di kè lè Jéova mèt Joziyé chèf a pèp-la anplas a Moyiz, « pannan tout vi a Joziyé, sé Izraélit-la rèspèkté-y » (Joz. 4:14). Alò, Jéova béni-yo é i fè-yo rantré adan péyi-la i té pwomèt-yo la (Joz. 21:43, 44).

8. An tan a sé wa-la, kijan Jéova té ka gidé sé Izraélit-la ? Bay on èsplikasyon (gadé imaj-la osi).

⁸ Plizyè lanné apré, Jéova sèvi èvè jij pou gidé pèp a-y. Aprésa, lèwvwè té ni wa pou gouvèné Izrayèl, Jéova sèvi èvè pwofèt pou gidé pèp a-y é sé pwofèt-lasa té ka ba sé  wa-la konsèy. Sèwten wa kouté konsèy a sé pwofèt-la. Pa ègzanp, lè pwofèt Natan vin pou korijé wa David, i aksèpté sa èvè onlo imilité (2 Sam. 12:7, 13 ; 1 Kron. 17:3, 4). Wa Jozafa suiv sa pwofèt Jaazyèl té di-y é i ankourajé pèp a Jida ni fwa adan pwofèt a Bondyé (2 Kron. 20:14, 15, 20). Lèwvwè biten-la té rèd, wa Ézékyas chèché konsèy owa pwofèt Izayi (Iz. 37:1-6). Chakfwa on wa té ka chèché dirèksyon a Jéova, Jéova té ka béni-y é pèp-la té ka touvé-y ansékirité (2 Kron. 20:29, 30 ; 32:22). Jéova té ka sèvi èvè pwofèt a-y pou gidé pèp a-y é toutmoun té dwèt konprann sa. Men malérèzman, lamajorité a sé wa-la é sé Izraélit-la pa kouté sé pwofèt-la (Jér. 35:12-15)..

KIJAN JÉOVA GIDONNÉ SÉ KRÉTYEN-LA O 1^é SYÈK

9. Èvè kimoun Jéova sèvi pou gidonné sé 1^é krétyen-la ? (gadé imaj-la osi).

⁹ O 1^é syèk Jéova mèt sé lasanblé-la anplas. Men kijan i té ka gidonné sé 1^é krétyen-la ? Ében i chwazi Jézi pou vin Chèf a lasanblé-la (Éf. 5:23). Men ès sa vé di kè Jézi té k’ay gidonné chak disip limenm a-y ? Non. I chwazi sé apòt-la é sé ansyen-la ki té ka rété Jérizalèm la pou ba lasanblé-la on dirèksyon (Akt 15:1, 2). Men a pa a Jérizalèm tousèl, i fè ansòt pou ni ansyen adan sé lasanblé-la ki té ka touvé-yo dòt koté osi (1 Tés. 5:12 ; Tit 1:5).

10. a) Kijan lamajorité a sé 1^é krétyen-la té ka vwè dirèksyon-la yo té ka rèsèvwa la ? (Akt 15:30, 31). b) An tan a Labib, poukwa sèwten moun rèfizé kouté moun Jéova té ka itilizé pou gidé pèp a-y ? (gadé ti karé-la «  Poukwa sèwten moun ka rèfizé vwè sé prèv-la ki anba zyé a yo la »).

¹⁰ Kijan sé 1^é krétyen-la té ka vwè dirèksyon-la yo té ka rèsèvwa la ? Lamajorité adan yo té ka kouté volontyé sa yo té ka di-yo fè. Anfèt, ‘yo té kontan sé ankourajman-la toubònman’ (li Akt 15:30, 31). Men kijan Jéova ka gidé pèp a-y jòdijou ?

KIJAN JÉOVA KA GIDONNÉ-NOU JÒDIJOU

11. Bay on ègzanp ki ka montré kijan Jéova ka gidonné sé moun-la ki ka dirijé òwganizasyon a-y a épòk an nou.

¹¹ Jòdijou, Jéova ka kontinyé gidé pèp a-y. I ka sèvi èvè Pawòl a-y é èvè Gason a-y pou fè sa. Dayè, Gason a-y Chèf a lasanblé-la. Ès nou ka vwè an 2 zyé an nou kè Jéova ka kontinyé sèvi èvè moun pou ban-nou on dirèksyon ? Wi. Pa ègzanp, sonjé sa ki pasé an  fen a lézanné 1800. Charles Taze Russell é sé moun-la ki té ka kolaboré èvè-y la rivé konprann kè 1914 sé té on lanné ki té enpòwtan toubònman anrapò èvè wayòm a Bondyé (Dan. 4:25, 26). Kijan yo rivé konprann sa ? Ében sé paskè yo pran tan analizé sé pwofési-la ki an Bib-la. Lè yo té ka fè rèchèch a yo, ès Jéova té ka gidonné-yo ? Asiré pa pétèt ! Sa ki pasé asi latè an 1914 montré kè wayòm a Bondyé té ka koumansé gouvèné. Prèmyé gè mondyal la koumansé, aprésa vin ni épidémi, tranmanndtè é moun koumansé mò-fen (Lik 21:10, 11). On biten ki té klè sé kè Jéova té ka sèvi èvè sé nonm-lasa ki té sensè pou gidé sèwvitè a-y.

12-13. Pannan 2^èm gè mondyal la, ka frè an nou ki an tèt a lòwganizasyon fè pou prédikasyon-la pran balan ?

¹² Sonjé osi sa ki pasé pannan 2^èm gè mondyal la. Sé frè a biwo mondyal la ki ka okipé-yo dè travay a prédikasyon-la étidyé Révélasyon 17:8. Yo rivé konprann kè lèwvwè lagè-lasa té’é bout, a pa a moman-lasa Awmagédon té’é rivé. Apré lagè-lasa té’é ni lapé pannan on tan é sé Témwen a Jéova la té’é pé préché ba plis moun ankò. Menmsi pou onlo moun sa pa té ni pon sans, sé frè a Komité santral la mèt lékòl a Galaad anplas. Yo fè lékòl-lasa pou fòwmé misyonè kivédi frè é sè ki té’é ay préché é anségné bon nouvèl la toupatou asi latè. Sèwten misyonè pati koté-la yo té voyé-yo la alòskè té ni lagè toujou. Anplisdisa, pou édé sé frè é sè-la vin dé zouti filé adan prédikasyon-la é pou yo anségné pibyen, èsklav fidèl é prévwayan la mèt le Cours pour le ministère théocratique anplas b. Grasa tout sé biten-lasa, pèp a Bondyé té paré pou bèl travay-la ki té ka atann-li la.

¹³ Lè nou ka viré gadé sa ki pasé, nou ka vwè byen kijan Jéova gidé pèp a-y jous a jòdijou. Dépi 2^èm gè mondyal la, sèwvitè à Jéova ka préché alèz a yo adan onlo péyi. Kifè onlo moun aprann konnèt Jéova.

14. Lèwvwè òwganizasyon a Jéova oben sé ansyen-la ka ban-nou on dirèksyon, poukwa nou pé fè-yo konfyans ? (Révélasyon 2:1 ; gadé imaj-la osi).

¹⁴ Jòdijou ankò, sé frè-la ka fè fon asi Jézikris pou ba-yo on dirèksyon. Yo vlé kè sé enstriksyon-la yo ka ba sé frè é sè-la korèsponn ègzaktèman a sa Jéova é Jézi vé. Aprésa sé rèsponsab a siwkonskripsyon la é sé ansyen-la ka ba lasanblé-la dirèksyon-lasa c. Sé ansyen-la ‘adan men dwat’ a Kris (li Révélasyon 2:1). Sé vré kè sé ansyen-la enpawfè é kè yo ka fè érè. Men a pa yo tousèl. Moyiz é Joziyé é jous sé apòt-la ni lokazyon fè érè yo osi (Nonb 20:12 ; Joz. 9:14, 15 ; Wom. 3:23). Nou ka vwè byen kijan Jézi ka gidonné èsklav fidèl é prévwayan la é sé ansyen-la, é kijan i ké kontinyé fè sa « touléjou, jiskatan fen a mond-la rivé » (Mat. 28:20). Alò lèwvwè sé frè-la ki rèsponsab la ka ban-nou on dirèksyon, nou pé fè-yo konfyans a 100 % pas sé Jézi ki ka ban-nou dirèksyon-lasa.

LÈWVWÈ NOU KA KONTINYÉ SUIV DIRÈKSYON A JÉOVA, SA KA PÒTÉ ONLO BYENFÉ BAN NOU

15-16. Ka sé frè é sè-la ki désidé suiv dirèksyon-la Jéova ba-yo la ka aprann-vou ?

¹⁵ Lèwvwè nou ka kontinyé suiv dirèksyon a Jéova, sa ka pòté onlo byenfé ban nou dépi aprézan. An-nou pran ègzanp a Andy é Robyn. Kon èsklav fidèl é prévwayan la ka ankourajé-nou a fè, yo fè chanjman adan vi a yo pou menné on vi ki senp (gadé 2^èm nòt a Matyé 6:22 adan Bib-la pou étidyé la an fransé). Sa pèwmèt-yo vin volontè pou konstwi batiman ki fèt pou adoré Jéova. Mi sa Robyn ka di : « Délè nou ka rété dé koté ki toupiti é délè pa menm ni kuizin an kaz-la. Anplisdisa, fò an té vann on bon pawti a matéryèl an mwen alòskè an enmé fè foto toubònman. An pa’a manti ba-zòt, an mèt pléré atè. Men kon Sara, madanm a Abraam, menmsi an té tris, an té byen désidé a pa lésé sa pran lanmen asi mwen é an té vlé ni tchè-kontan parapòt a sa an té’é pé fè pou Jéova konnyéla » (Éb. 11:15). Davwa Andy é Robyn désidé menné on vi ki senp, ki bon biten sa pòté ba yo ? Mi sa Robyn ka di : « Lèwvwè nou sav kè nou ka ba Jéova tousa nou ni, nou ka tèlman kontan. Anplis, lè nou ka travay pou òwganizasyon a Jéova, sa ka ban-nou on lidé asi kijan lavi ké yé dèmen adan paradi-la. » Andy dakò a 200% èvè sa. Mi sa i ka di : « Nou kontan pas nou fè tousa nou té pé pou soutyenn Wayòm-la. »

¹⁶ Lè nou ka suiv dirèksyon a Jéova, kidòt byenfé sa ka pwokiré-nou ? An-nou vwè ègzanp a Marcia. Lèwvwè i fin lisé-la, i té anvi  vin pyonyé kon lòwganizasyon ka ankourajé-nou fè (Mat. 6:33 ; Wom. 12:11). Mi sa i ka di : « Linivèwsité pwopozé-mwen on lajan kè an té’é touché chak mwa si an té ka fè 4 an étid. Men konm sa an té vé sé fè plis biten pou Jéova, an té préféré aprann fè on travay ki té’é pèwmèt-mwen gangné sou a pen an mwen é vin pyonyé anmenmditan. Sé méyè désizyon an té’é pé pran. Alèla an pyonyé pèwmanan. É konm an pé chwazi konmen tan an ké travay, an pé ay bay on pal adan Bétèl-la é an pé fè enpé dòt biten pou Jéova. »

17. Lè nou ka lésé Jéova gidé-nou, ki dòt byenfé sa ka pwokiré-nou ? (Izayi 48:17, 18).

¹⁷ Délè, òwganizasyon a Jéova ka ban-nou déotwa konsèy pou pwotéjé-nou. Pa ègzanp, yo ka avèti-nou pou nou pa vin dé moun ki ka kouri dèyè lajan é pou nou pa fè pon biten ki pa annakò èvè lwa a Bondyé. Si nou ka lésé Jéova dirijé-nou adan sé domenn-lasa osi, sé enki bon biten sa ka pòté ban nou. Nou ni on konsyans ki nèt é sa ka anpéché-nou trapé onlo pwoblèm (1 Tim. 6:9, 10). Konsa, nou pé kontinyé sèvi Jéova èvè tout tchè an nou. Pa ni pon biten ki pé ban-nou plis jwa ki sa é ki pé fè-nou santi-nou anpé konsa (li Izayi 48:17, 18).

18. Poukwa ou byen désidé a toujou lésé Jéova gidonné-w ?

¹⁸ Asiré sèten, Jéova ké kontinyé sèvi èvè moun asi latè pou gidé-nou ki sé pannan gwo tribilasyon-la ki sé pannan sé 1000 an la (Sòm 45:16). Ès nou ké kontinyé lésé Jéova gidonné-nou, menmsi sa vé di kè fò-nou ké mèt sa nou préféré dè koté pou fè sa Jéova ka mandé ? Nou ké rivé fè sa lontan pi fasilman siwvwè nou ja ka lésé Jéova dirijé-nou dépi konnyéla. Alò an-nou lésé Jéova gidonné-nou toutlè. Nou pé fè sa lèwvwè nou ka lésé sé moun-la i chwazi la gidonné-nou pa ègzanp (Iz. 32:1, 2 ; Éb. 13:17). Nou pé suiv Jéova, Sila ki ka gidé-nou la, é nou pé fè-y konfyans a 100% pas toupannan i ka fè-nou pasé lwen a tousa ki pé fè-nou ditò, i ka dirijé-nou asi chimen a lavi pou nou pé sa viv pou touttan adan nouvo mond la.