1-2. Ka ki pé édé-nou konprann sa Jéova ka rèsanti anrapò èvè sé manti-la yo di asi-y la ?

 IMAJINÉ sitiyasyon-lasa : On moun ou enmé onlo ka di on vyé biten asi-w. Sa pa menm vré, men ni sèwten moun ki ka pran sa pou lajan-kontan. É sa ki pi rèd la, sé kè yo ka mèt-yo ka répété sa ba dòt moun é onlo moun ka fin pa kwè sa. Ka sa ké fè-w ? Si sa lézòt ka pansé ka konté ba-w é si répitasyon a-w ni valè ba-w, manti-lasa ké fè-w mal toubònman. Pa vré ? (Pwov. 22:1).

² Ti ègzanp-lasa ka édé-nou konprann ka sa fè Jéova lèwvwè yo sali répitasyon a-y. On pitit a-y, on zanj, ba Èv on manti asi Bondyé. I di-y on vyé biten asi Bondyé, é Èv kwè sa. Akòz dè manti-lasa, Adan é Èv ba Bondyé do. É ki rézilta sa bay ? Toutmoun ka péché é ka fin pa mò (Jén. 3:1-6 ; Wom. 5:12). Tout sé pwoblèm-la nou ka vwè adan mond-lasa, kon lanmò, lagè é soufrans, ka ègzisté akòz dè sé manti-la Satan koumansé simé la adan Jadendédèn-la. Lè Jéova ka tann tout sé manti-la yo ka di asi-y la é lè i ka vwè pwoblèm sa ka menné, ou ka di sa pa’a fè-y lapenn ? Pa ni pon dout asi sa. Men, Jéova pa égri pou sa é i pa ni ponmoun si tchè nonplis. Okontrè, i ka rété « Dyé-la tchè a-y kontan la » (1 Tim. 1:11).

3. Ki bèl lonnè nou ni ?

³ Nou pé fè on biten pou montré kè Satan manti asi Jéova. Nou pé fè sa lè nou ka suiv komandman-lasa : « Louwé non a Jéova » (Sòm 113:1). Kijan nou pé louwé non a Jéova ? Ében sé lè nou ka palé anbyen dè Moun-la ki ka pòté non sen lasa. É vou, ès ou anvi fè sa ? An-nou ègzaminé 3 rézon ki ké ban-nou plis balan pou nou louwé non a Bondyé an nou èvè tout tchè an nou.

 NOU KA FÈ JÉOVA PLÉZI

4. Lèwvwè nou ka ba Jéova louwanj, poukwa sa ka fè-y plézi ? Bay on ègzanp (gadé imaj-la osi).

⁴ Lèwvwè nou ka ba non a Pap’an nou ki an syèl-la louwanj, nou ka fè-y plézi (Sòm 119:108). An jénéral, on moun bizwen yo félisité-y pas sa ka rasiré-y. Men ès sa ka maché konsa pou Jéova osi ? Non. An-nou pran on ègzanp pou nou konprann sa : Imajiné kè on tifi ka kouri owa pap’a-y, ka séré-y fò an 2 bra a-y é ka di pap’a-y : « Papa, pa ni pibon papa ki-w asi latè ! » Sèten lè papa-la ka tann sa, i kontan é sa ka touché-y. Men ès sa vé di kè papa-lasa sé on nonm ki pa ni konfyans adan-y é kè siwvwè timoun-la pa’a félisité-y, papa-la pa’a santi-y byen ? Awa. Nou sèten kè papa-la sé on bon papa é kè i kontan lè i ka vwè jan timoun a-y ka montré-y kè i enmé-y é kè i ni rèkonésans pou-y. I sav kè si timoun-la kontinyé ni sé kalité-lasa, i ké ni tchè-kontan lè i ké pi gran. Ében sé pousa osi Pap’an nou Jéova kontan lè nou ka ba-y louwanj.

5. Lèwvwè nou ka ba non a Bondyé louwanj, nou ka réponn Satan. Ka Satan di konsa ?

⁵ Lèwvwè nou ka ba Pap’an nou ki an syèl-la louwanj, nou ka réponn Satan davwa i manti asi nou. Satan di konsa kè ponmoun asi latè pé’é défann non a Bondyé. Dapré-y, ponyonn adan nou pa fidèl a san pou san. I ka di kè noutout ké arété sèvi Bondyé si nou pa ni pon entéré adan sa (Jòb 1:9-11 ; 2:4). Men Jòb rété fidèl é i montré kè Satan sé té on mantè. É vou ? Ès ou ké rété fidèl a Jéova ? Nouchak pé défann non a Jéova é mèt jwa an tchè a-y lè nou ka sèvi-y é lè nou ka rété fidèl a-y (Pwov. 27:11). Sé vréman on bèl lonnè toubònman.

6. Kijan nou pé imité wa David é sé Lévit-la ? (Néémi 9:5).

⁶ Davwa sèwvitè a Bondyé enmé-y, sa ka ba-yo balan pou louwé non a-y èvè tout tchè a yo. Mi sa wa David di : « An vé ba Jéova louwanj ; é an vé sèvi èvè tousa ki andidan an mwen pou louwé non a-y ki sen » (Sòm 103:1). David té sav kè lè i té ka louwé non a Jéova, sé té konsi i té ka louwé Jéova. Lèwvwè nou ka tann non a Jéova, sa ka fè-nou sonjé kijan dè moun i yé, tout sé bèl kalité-la i ni la, é tout sé biten èstraòwdinè la i fè la. Pou David non a Bondyé té sen. Alò i té vé montré kè i té ni onlo rèspé pou non-lasa é i té vé louwé non-lasa osi. I té vé fè sa ‘èvè tousa ki andidan a-y’, kivédi èvè tout tchè a-y. Sé Lévit-la lésé on bèl ègzanp pou nou adan domenn-lasa osi. Èvè onlo imilité, yo rèkonnèt kè non a Bondyé ki sen mérité  tèlman louwanj, kè kèlkèswa louwanj-la yo té’é ba-y la, pa té’é ni asé (li Néémi 9:5). Konm yo té ni imilité é kè yo té sensè lèwvwè yo té ka ba Jéova louwanj, nou pé sèten sa fè Jéova plézi.

7. Kijan nou pé ba Jéova louwanj lèwvwè nou an prédikasyon oben adan alé é vini an nou ?

⁷ Jòdijou, lèwvwè nou ka palé dè Jéova é kè sé moun-la ka santi jan nou ni rèkonésans pou-y é jan nou enmé-y, sa ka fè Jéova plézi. Lè nou ka préché, òbjèktif an nou sé ba sé moun-la anvi vin zanmi a Jéova é édé-yo enmé Jéova kon nou (Jak 4:8). Nou kontan montré sé moun-la adan Bib-la jan Jéova ni lanmou, jan i sé on moun ki jis, jan i ni sajès, jan i ni puisans é dòt kalité ankò ki ka atiré-nou. Anplisdisa lèwvwè nou ka fè tousa nou pé pou nou aji kon Jéova, sa ka ba-y louwanj é sa ka fè-y plézi (Éféz. 5:1). Lèwvwè nou ka aji konsa, nou pa ka aji kon sé moun-la ki adan mond méchan lasa. Alò ni sèwten moun ki ka vwè sa é yo ka anvi sav poukwa nou pa ka aji kon yo (Mat. 5:14-16). Adan alé é vini an nou, délè nou pé touvé on lokazyon pou nou èspliké moun poukwa nou ka aji kon nou ka aji la. Lè nou ka fè sa, sa ka ba sé moun-la ki sensè la gou pou yo vin owa Jéova. Lè nou ka ba Jéova louwanj konsa, a pa ti kontan i ka kontan ! (1 Tim. 2:3, 4).

NOU KA FÈ JÉZI PLÉZI

8. Jézi louwé non a Pap’a-y é pa ni pi bèl ègzanp ki-y adan domenn-lasa. Poukwa nou ka di sa ?

⁸ Pawmi tout sé kréyati-la ki ka viv an syèl-la é asi latè, pa ni ponyonn ki konnèt Papa-la pibyen ki Gason-la (Mat. 11:27). Jézi enmé Pap’a-y, alò i louwé non a Pap’a-y. Adan domenn-lasa, sé Jézi ki ban-nou pi bèl ègzanp-la (Jan 14:31). Dènyé lannuit-la avan i mò, i priyé Pap’a-y. Mi sa i di-y anrapò èvè travay-la i té vin fè la asi latè : « An fè-yo konnèt non a-w » (Jan 17:26). Ka i té vlé di pa la ?

9. Jézi èspliké kimoun ki Pap’a-y vréman. Grasa ki istwa i fè sa ?

⁹ Jézi pa enki kontanté-y dè di kè non a Bondyé sé Jéova. Labib ka di kè ‘sé Jézi ki èspliké kimoun ki Papa-la’ (Jan 1:17, 18). Men sé Juif-la i té ka anségné la té ja konnèt non a Bondyé. Pa ègzanp, yo té ja ka palé dè mizérikòd é dè konpasyon a Jéova adan Lézékriti Ébrayik (Ègz. 34:5-7). Lè Jézi rakonté istwa a tigason-la ki té pèd la é ki viré owa pap’a-y, Jézi montré jan Jéova té ni sé kalité-lasa pibyen ankò. Nou ka li kè lè papa-la vwè tigason a-y ki té rèpanti-y, alòskè tigason-la té olwen toujou, papa-la kouri jwenn-li, i bo-y é i padonné-y èvè tout tchè a-y. Lè nou ka li istwa-lasa, nou ka vwè pibyen kijan Jéova ni mizérikòd é kijan i ni konpasyon (Lik 15:11-32). Asiré pa pétèt, Jézi montré kimoun Papa-la té yé vréman.

10. a) Kijan nou fè sav kè Jézi té ka sèvi èvè non a Pap’a-y é kè i té vé kè dòt moun sèvi èvè-y osi ? (Mawk 5:19 ; gadé imaj-la osi). b) Ka Jézi vé kè nou fè jòdijou ?

¹⁰ Ès Jézi té vé kè yo sèvi èvè non a Pap’a-y ? Wi. Sèwten chèf a rèlijyon té ka kwè kè si yo té ka sèvi èvè non a Bondyé, sé dérèspèkté yo té ka dérèspèkté-y. Men sé on tradisyon yo té ka suiv é sa pa té annakò èvè Lézékriti. Alò Jézi pa lésé sa sé moun-la té ka kwè anpéché-y ba Pap’a-y lonnè. On jou, Jézi géri on nonm ki té ni démon asi-y adan réjyon-la sé Jérazényen-la té ka viv la. Lè sé moun-la vwè sa, yo touvé-yo tèlman pè, alò yo sipliyé Jézi pou i té pati (Mawk 5:16, 17). Men li Jézi té anvi sé moun-la konnèt non a Bondyé adan réjyon-lasa. Alò, i di boug-la i té sòti géri la, rakonté sélézòt moun-la sa  Jéova té fè ba-y (li Mawk 5:19 a). Jòdijou, sé sa Jézi vé kè nou fè. I vé nou fè toutmoun asi latè konnèt non a Pap’a-y (Mat. 24:14 ; 28:19, 20). Lèwvwè nou ka fè sa, nou ka fè Wa an nou Jézi plézi.

11. Ki priyè Jézi aprann disip a-y é poukwa sa enpòwtan kè nou fè priyè-lasa ? (Ézékyèl 36:23).

¹¹ Jézi té sav kè Jéova ni lentansyon fè non a-y vin sen. Sé pousa Jézi ki sé Mèt an nou aprann-nou priyé konsa : « Pap’an nou ki an syèl-la, fò non a-w vin sen » (Mat. 6:9). Jézi té sav kè pou tout sé zanj-la é pou tout limanité, pa ni pon biten ki pi enpòwtan ki sa (li Ézékyèl 36:23). Pa ni pon kréyati adan linivè ki ja fè sa Jézi fè pou fè non a Bondyé vin sen. Poutan, lè yo arété Jézi, lènmi a-y di kè i té ka dérèspèkté Bondyé. Pou Jézi, di bétiz asi Bondyé oben manti asi-y sé té pi mové péché on moun té’é pé fè. Alò sé on biten ki pa té’é jen vin an lèspri a-y. Lè i té ka sonjé kè sé dè sa yo té’é akizé-y é kè yo té’é di kè i koupab, sa té ka malmenné-y toubònman. Sé dwèt pousa ‘i té angwasé konsa’ tibwen tan avan yo té arété-y (Lik 22:41-44).

12. Jézi fè non a Pap’a-y vin sen on mannyè ki èstraòwdinè toubònman. Kijan i fè sa ?

¹² Pou fè non a Pap’a-y vin sen a pa ti biten Jézi andiré. Yo fè-y sibi bon abominasyon, yo jiré-y, é yo manti asi-y. Men i té sèten kè i té fè tousa Pap’a-y té mandé-y-fè ; i pa té wont (Ébr. 12:2). I té sav osi kè pannan i té ka pasé sé moman difisil lasa, Satan té ka pwofité pou limé difé asi-y (Lik 22:2-4 ; 23:33, 34). Onsèl biten Satan té ka chèché a fè, sé anpéché-y rété fidèl a Jéova a san pou san. Men Satan pèd fil a-y ! Jézi fin pa montré kè Satan sé on moun ki ka manti é kè ni dé moun ki byen désidé a rété fidèl a Jéova a san pou san menm lèwvwè yo anba gwo éprèv !

13. Kijan ou pé fè Wa a-w plézi ?

¹³ Ès ou anvi fè Wa a-w plézi ? Si sé sa, kontinyé louwé non a Jéova. Pousa, fè dòtmoun konnèt kimoun ki Bondyé an nou vréman. Konsa, ou ké imité Jézi (1 Pyè 2:21). Kon-y, ou ké fè Jéova plézi é ou ké montré kè lènmi a-y, Satan, ka manti kon pa ti ni !

 NOU KA BAY ON PAL POU SOVÉ VI A MOUN

14-15. Ki biten èstraòwdinè ki pé rivé a fèt lè sé moun-la ka dékouvè ki jan dè moun Jéova yé ?

¹⁴ Lè nou ka louwé non a Jéova, nou ka bay on pal pou sové vi a moun. Kijansa ? Ében Satan ‘ka anpéché sé moun-la vwè klè’ (2 Kor. 4:4). Pa ègzanp i ka fè-yo konprann kè Bondyé pa ka ègzisté, kè Bondyé lwen an nou é i pa’a lévé nou digad. I ka fè-yo konprann osi kè lè Bondyé ka vwè on moun ka soufè sa pa ka fè-y ayen é kè lè on moun ka fè on péché i ka fè moun-lasa soufè pou touttan apré mò a-y. Lè sé moun-la ka tann sé manti-lasa, yo ka pran sa pou lajan-kontan. Satan ka bay tout sé manti-lasa pas i bizwen sali répitasyon a Jéova pou moun pa anvi vin zanmi a-y. Men lè nou ka préché nou ka mèt baton an wou a Dyab-la. Nou ka di sé moun-la lavérité asi Pap’an nou, é an menm balan-la nou ka louwé non a Bondyé an nou ki sen. Ki rézilta sa ka bay ?

¹⁵ Sé vérité-la ki an Bib-la ni onlo pouvwa toubònman. Lèwvwè nou ka édé sé moun-la konnèt kimoun Jéova yé vréman, ni on biten èstraòwdinè ki ka fèt é nou ka vwè sa an 2 zyé an nou. Sé konsi yo té ni on vwal asi zyé a yo é piti-a-piti, vwal-lasa ka sòti, é yo ka koumansé vwè Pap’an nou kon nou nou ka vwè-y. Lè yo ka vin sav kè puisans a Jéova pa ni pon limit yo ka rété èstèbèkwè (Iz. 40:26). Yo ka aprann fè Jéova konfyans pas tousa i ka fè jis é i ka fè-y on mannyè ki pawfè (Dét. 32:4). Yo ka aprann onlo biten grasa tout sajès-la Jéova ni la (Iz. 55:9 ; Wom. 11:33). É lèwvwè yo ka vin sav kè Jéova sé lanmou, sa ka konsolé-yo (1 Jan 4:8). Pi yo ka vin bon zanmi èvè Jéova, pi yo ni lèspwa dè vin timoun a-y é dè viv asi latè pou touttan. Lèwvwè nou ka édé sé moun-la vin pibon zanmi èvè Pap’a yo, nou ni on bèl lonnè toubònman. Pou Jéova, lè nou ka fè sa, « nou ka travay ansanm èvè[-y] » (1 Kor. 3:5, 9).

16. Ka sa fè sèwten moun lè yo vin konnèt non a Bondyé ? Bay déotwa ègzanp.

¹⁶ Lè nou ka préché ba on moun, pétèt nou ka koumansé pa di-y kè non a Bondyé sé Jéova.  Sa sèlman, sa ja pé touché tchè a on moun ki sensè. Pa ègzanp, an-nou palé dè on jenn madanm non a-y sé Aaliyah b. Dépi toupiti i lévé adan on rèlijyon é adan rèlijyon-lasa yo pa té ka sèvi èvè Labib ditou. Men i pa té ka vwè ka sa té ka pòté ba-y é i té ni lenprésyon kè i té lwen lwen lwen a Bondyé. Lèwvwè i koumansé étidyé Labib èvè sé Témwen a Jéova la, tout biten chanjé. I mété-y ka konsidéré Bondyé kon Zanmi a-y. Lè i aprann kè yo té woté non a Bondyé adan onlo Bib é kè yo té mèt on tit an plas a-y, kon Ségnè pa ègzanp, i touvé sa fò menm. Lè i vin aprann kè non a Bondyé sé Jéova, sa chanjé vi a-y bout-pou-bout. Mi sa i di : « Méyè Zanmi an mwen ni on non ! » Ki bon biten sa menné bay ? Mi sa i ka di : « Alèla, an ka santi-mwen anpé toubònman. Jéova fè-mwen on bèl lonnè. » On mizisyen non a-y sé Steve lévé adan on fanmi juif ki té karé asi sé tradisyon-la. Lè i vwè ipokrizi ki té ni adan larèlijyon, i ba yotout gran lè a yo. Men lèwgadé, manman-y mò. Pannan péryòd-lasa, on zanmi a-y té ka étidyé èvè on Témwen a Jéova é i aksèpté vin adan étid-la. Lè i tann non a Bondyé, a pa ti touché sa touché-y ! Mi sa i ka di : « An po’o té jen tann non a Bondyé avan. » Mi sa i ka di ankò : « Sé prèmyé fwa an té ka konprann kè Bondyé té ka ègzisté vréman ! An té ka vwè-y kon on moun alèla. A moman-lasa, an konprann tousuit kè an té touvé on Zanmi. »

17. Poukwa ou byen désidé a louwé non a Bondyé ? (gadé imaj-la osi).

¹⁷ Lè ou ka préché é kè ou ka anségné, ès ou ka fè moun konnèt non a Bondyé-la ki sakré la, Jéova ? Ès ou ka édé-yo vwè ki jan dè moun i yé vréman ? Lè ou ka fè sa, ou ka louwé non a Jéova. Kifè, kontinyé louwé non sen lasa. Pousa, kontinyé fè moun konnèt kimoun ki ka pòté non-lasa. Konsa, ou ké sové vi a moun é ou ké suiv ègzanp a Wa an nou, Jézikris. Men siwtou, ou ké fè Jéova, Pap’a-w ki plen lanmou, plézi. Alò fò ou byen désidé a « louwé non a-[y] pou toujou é pou touttan » ! (Sòm 145:2).