DÉPAWFWA sé moun-la ki maké Bib-la té ka woumaké sé menm èksprésyon-la plizyè fwa. Poukwa yo té ka fè sa ? An-nou ègzaminé 3 rézon ki té’é pé èspliké sa.

Épòk-la yo maké Bib-la. An tan-lasa, lamajorité a sé Izraélit-la pa té ni on kopi a Lwa-la ki té ta yo. Pli souvan ki raman, sé lè pèp-la té ka sanblé an tabèwnak-la yo té pé kouté sé moun-la ki té ka li Lwa-la pou toutmoun tann (Dét. 31:10-12). Toupannan on Izraélit té doubout anmitan foul-la ka kouté lèkti-la, ni onlo biten ki té’é pé distrè-y. Siwtou kè sa té ka diré on bon moman (Néém. 8:2, 3, 7). Lè yo té ka répété sé èksprésyon-la ki enpòwtan la, sa té ka pèwmèt-li sonjé sé lidé-la pli fasilman pou i té pé sa apliké-yo apré. É lè yo té ka répété sèwten mo, sa té ka édé-y sonjé déotwa ti détay a Lwa-la kè Jéova té ba-yo la (Lév. 18:4-22 ; Dét. 5:1).

Istil a tèks-la. Adan Labib ou ka touvé onlo chanson kon sé Sòm-la, Chanté a Salomon é liv a Lamantasyon. Pawmi sé chanson-lasa, ni sa ki ni on rèfren adan, kivédi yo ka répété on mòso a chanson-la plizyè fwa. Rèfren-la té ka mèt tèm a chanson-la an valè é i té ka édé sé moun-la sonjé sé pawòl-la. An-nou pran ègzanp a Sòm 115:9-11. Nou ka li : « O Izrayèl, fè Jéova konfyans — i sé sèkou a yo é boukliyé a yo. O fanmi a Aawon, fè Jéova konfyans — i sé sèkou a yo é boukliyé a yo. Zòt ki ka krenn Jéova, fè Jéova konfyans — i sé sèkou a yo é boukliyé a yo. » Lè sé chantè-la té ka répété sé pawòl-lasa, sa té ka fè sé vérité enpòwtan la rantré fon an tèt a yo é an tchè a yo.

Pou mèt sé lidé enpòwtan la an valè. Délè, sé moun-la ki maké Labib répété sèwten lidé paskè yo té enpòwtan toubònman. Pa ègzanp, lè Jéova di sé Izraélit-la kè fò pa yo té manjé san, i fè ansòt pou Moyiz répété plizyè fwa pou ki rézon fò pa yo té fè sa. Mi lidé-lasa i té vlé mèt an valè : vi a chè-la sé adan san-la i yé, kivédi san-la ka rèprézanté lavi (Lév. 17:11, 14). Aprésa, lè sé apòt-la é sé ansyen-la ki té Jérizalèm fè on lis a sé biten enpòwtan la fò pa sé krétyen-la té fè pou fè Bondyé plézi, yo woumèt lidé-lasa an valè : fò pa sé krétyen-la té sèvi èvè san (Akt 15:20, 29).

Menmsi ni dé biten ki ka wouvin plizyè fwa adan Bib-la, apapousa Jéova vlé nou pran labitid répété san réfléchi sé èksprésyon-la ki an Bib-la. Jézi di : « Lè zò ka priyé, pa répété toujou menm biten-la » (Mat. 6:7). Aprésa, i di pou ki biten nou pé priyé (Mat. 6:9-13). Sé pousa, menmsi nou pa’a répété menm pawòl-la toutlè adan priyè an nou, nou pé palé dè menm biten-la plizyè fwa (Mat. 7:7-11).

Kifè, si yo ka répété sèwten mo é sèwten èksprésyon adan Pawòl a Bondyé, sé pou on bon rézon. Jéova, Gran Pwofésè an nou, ka sèvi èvè mwayen-lasa pou anségné-nou pou byen an nou (Iz. 48:17, 18).