Labib ka èspliké-nou on mannyè ki klè kè Jéova kapab di alavans sa ki ké fèt dèmen (Iz. 45:21). Men nou pé pa sav kijan i ka fè sa, kitan i ka fè-y, ni jis ola i pé ay pou sav sa ki ké fèt dèmen pas Labib pa’a di-nou granzafè asi sa. Alò menmsi nou pé pa konnèt tout ti détay asi sa, Labib ka ban-nou déotwa enfòwmasyon kanmenm. An-nou vwè sèwten adan yo.

Jéova pé fè tousa i vé men délè, i ka désidé kè i pé’é fè sèwten biten. Grasa sajès a-y ki pa ni pon limit, i pé sav alavans tousa i vlé (Wom. 11:33). Men konm i ka métrizé-y a san pou san, i pé désidé osi kè i pé’é chèché a sav alavans sa ki ké fèt (konparé èvè sa ki maké adan Izayi 42:14).

Jéova ka fè ansòt pou volonté a-y fèt. Ka sa ni a vwè èvè kapasité-la i ni la dè di alavans sa ki ké fèt dèmen ? Izayi 46:10 ka èspliké : « Dépi odépa, an ja ka di kijan sa ké fin, é dépi an tan lontan, an ka anonsé sé biten-la ki poko fèt la. An ka di : “Sa an désidé ké fèt, é tousa ki ka fè-mwen plézi, an ké fè-y.” »

Donk, on biten ki ka fè si Jéova kapab di alavans sa ki ké fèt dèmen, sé kè i ni pouvwa-la ki fo la pou fè dé biten rivé. Jéova pa kon on moun ki ka gadé on fim é ki ka vansé fim-la pou vwè alavans kijan sa ké fin. I pa bizwen fè sa. Pawkont, Jéova pé désidé kè on biten ké rivé a on moman byen prési, é aprésa lè moman-la rivé, i pé fè ansòt pou biten-lasa fèt (Ègz. 9:5, 6 ; Mat. 24:36 ; Akt 17:31).

Sé pousa Labib ka sèvi èvè dé mo kon « préparé », « fòwmé » é « désidé » pou èspliké kijan Jéova ka aji asi sa ki ké fèt (2 Wa 19:25 ; Iz. 46:11). Mo-la yo tradui la odépa é ki bay sé 3 mo-la nou sòti vwè la lyanné èvè ondòt mo ki vé di « awtizan ki ka travay awjil » (Jér. 18:4). Menmjan on bon awtizan ki ka travay awjil pé fè ansòt pou on mòso awjil vin on bèl pòt a flè, sé menmjan-la Jéova pé fè ansòt pou sé évènman-la fèt kon li i vlé (Éféz. 1:11).

Jéova ka lésé moun fè pwòp chwa a yo. I pa ka désidé alavans sa ki ké rivé adan vi a chakmoun. I pa ka fòsé ponmoun fè sa ki bon kon i pa ka fòsé ponmoun fè mové biten pou pini-yo apré. I ka lésé toutmoun désidé kijan yo ké menné vi a yo, toupannan i ka ankourajé-yo fè bon chwa-la.

An-nou pran 2 ègzanp. Prèmyé-la, sé ègzanp a moun ki té ka rété Niniv. Jéova té anonsé kè i té’é détwi vil-lasa akòz dè méchansté a sé moun-la. Men lè sé moun-la rèpanti-yo, Jéova « chanjé lidé é i pa voyé asi yo malè-la i té di i té’é voyé la » (Jonas 3:1-10). Jéova wouvin asi sa i té anonsé pas sé Ninivit-la désidé chanjé lèwvwè Jéova avèti-yo.

Dézyèm ègzanp-la, sé pwofési-la anrapò èvè on dénonmé Siris, ki té’é libéré sé Juif-la yo té chayé pa fòs Babilòn é ki té’é bay lòd pou yo rèkonstwi tanp a Jéova (Iz. 44:26 – 45:4). Sé Siris, wa a Lapèws, ki akonpli pwofési-lasa (Èsdr. 1:1-4). Men nonm-lasa pa té ka adoré vré Dyé-la. Jéova sèvi èvè-y pou réyalizé on pwofési men apapousa i fòsé-y adoré-y (Pwov. 21:1).

Asirésèten, sa nou sòti vwè la pa ka sifi pou èspliké kijan Jéova ka itilizé kapasité-la i ni la pou di alavans sa ki ké fèt dèmen. An réyalité, pa ni ponmoun asi latè ki pé konprann jan Jéova ka aji a san pou san (Iz. 55:8, 9). Antouka, nou konnèt asé biten asi Jéova pou nou sèten a san pou san kè i toujou ka aji on mannyè ki jis, menm lèwvwè i ka di sa ki ké fèt dèmen.