1-2. Ka on zanj di sé madanm-la ki ay owa tonm a Jézi la, é ka Jézi mandé-yo fè ?

 NOU lè 16 nizan 33. Jou ka wouvè. Ja ni prèskè 2 jou yo mèt kò a Jézikri, Ségnè-la, adan on tonm. Plizyè madanm ki enmé Jéova k’ay owa tonm-la. Yo tris toubònman. Yo ni lentansyon mèt zépis é luil ka santi bon asi kò a Jézi, men lè yo ka rivé douvan tonm-la, yo ka rété èstèbèkwè : tonm-la vid ! On zanj ka di-yo konsa : ‘Jézi résisité. I ja rivé Galilé. Sé la zò ké vwè-y’ (Mat. 28:1-7 ; Lik 23:56 ; 24:10).

² Apré sé madanm-la kité tonm-la, Jézi ka vin owa a yo é i ka di-yo konsa : « Ay anonsé frè an mwen nouvèl-la, pou yo pé ay an Galilé. Sé la yo ké vwè-mwen » (Mat. 28:10). Nou ka tou konprann Jézi dwèt ni on biten enpòwtan pou i di sé disip-la, pas prèmyé biten i ka òwganizé apré rézirèksyon a-y, sé ti réinyon-lasa !

3-4. Kijan nou fè sav kè lè Jézi bay lòd-la ki an Matyé 28:19, 20, a pa té yenki pou sé apòt-la ? (gadé imaj-la ki anlè po a jounal-la).

³ (Li Matyé 28:16-20.) Pannan réinyon-la Jézi òwganizé la, i palé dè on misyon ki té vréman enpòwtan é kè disip a-y té ké akonpli toutolon a prèmyé syèk-la. Jousalè nou ka kontinyé akonpli-y. I di-yo konsa : « Donk, alé é fè disip pawmi moun a tout kalté nasyon. [...] Aprann-yo fè tousa an mandé-zòt fè. »

⁴ Jézi vlé kè tout disip a-y préché. A pa yenki 11 apòt fidèl a-y i mandé fè disip. Kijan nou fè sav sa ? Pas lè Jézi té asi on montangn an Galilé é kè i bay lòd-lasa, a pa enki  apòt a-y ki té la. Ou ka sonjé ka zanj-la té di sé madanm-la ? I té di-yo : « Sé la [an Galilé] zò ké vwè-y. » Kivédi dwèt té ni madanm fidèl ki té la pou réinyon-lasa. Mi ondòt biten ankò : lapòt Pòl di konsa kè Jézi « parèt douvan pliski 500 frè anmenmtan » (1 Kor. 15:6). Dè ki biten Pòl té ka palé ?

5. Poukwa nou pé di kè 1 Korentyen 15:6 é Matyé chapit 28 ka palé dè menm réinyon-la ?

⁵ Ni plizyè rézon ka pèwmèt-nou di kè adan 1 Korentyen 15:6, Pòl té ka palé dè réinyon-la ki an Matyé chapit 28 la. Ki rézon ésa ? Prèmyèwman, prèstout disip a Jézi sé té moun Galilé. Nou ka tou konprann kè sa té’é pli fasil dè réini onlo moun asi on montangn an Galilé kè aka on moun a Jérizalèm. Dézyèmman, apré i résisité, Jézi té ja ni lokazyon palé èvè 11 apòt a-y adan on kaz a Jérizalèm. Si sé yenki sé apòt-la ki té dwèt ay préché é fè disip, Jézi té’é di-yo sa a Jérizalèm. I pa té’é mandé ni yo, ni sé madanm-la ni sélézòt moun-la vin jwenn-li an Galilé (Lik 24:33, 36).

6. An Matyé 28:20, Jézi di ay préché. Poukwa nou pé di lòd-lasa ka konsèwné-nou, é ki bon rézilta aktivité-lasa ka pòté ?

⁶ Ni on twazyèm biten ki ka montré kè a pa enki sé prèmyé krétyen-la Jézi té di ay préché. Kijan nou fè sav sa ? Apré i té di sé disip-la ka pou yo té fè, mi sa i di-yo : « An ké èvè zòt touléjou, jiskatan fen a mond-la rivé » (Mat. 28:20). É sé té vré a-y ! Jòdijou, ni onlo adoratè a Jéova ka chèché a fè disip. Gay sa : chak lanné, ou ni près 300 000 moun ki ka pran lèbatèm pou vin Témwen a Jéova é yo ka vin disip a Jézikri !

7. Dè ki biten nou kay palé aprézan é poukwa ?

⁷ Pawmi moun ki ka étidyé Labib, ni onlo ki ka fè pwogré é ki ka pran lèbatèm. Pawkont, ni déotwa ki ka étidyé Labib èvè nou, men yo konsa yo pè vin disip. Yo byen enmé étid a yo, men yo pa’a fè pwogré. Si ou ka fè étid a on moun, sèten ou vlé édé moun-lasa mèt sa i ka aprann an pratik é vin on disip a Kris. Adan rèstan a awtik-la, nou ké vwè kijan ou pé édé étidyan a-w enmé Jéova é fè pwogré. Poukwa fò-nou palé dè sa ? Paskè rivé onlè, pétèt fò ou ké désidé si ou ka kontinyé étid-la oben si ou ka arété-y.

8. Poukwa délè sa pé rèd dè édé on étidyan a enmé Jéova ?

⁸ Jéova vlé nou sèvi-y, pas nou enmé-y. Sé pousa nou vlé édé étidyan an nou konprann kè Jéova ka sousyé-y dè yo pèwsonèlman é kè i enmé-yo fò. Nou vlé yo vwè-y kon « on Papa pou moun ki san papa, é [kon] on moun ka pwotéjé sé vèv-la » (Sòm 68:5). Lè étidyan a-w ké konprann kè Jéova enmé-y fò, sa dwèt ké touché tchè a-y é i ké enmé-y plis ankò. Pou désèrten étidyan, sa pé rèd dè vwè Bondyé kon on Papa ki plen lanmou pas pwòp pap’a yo pa jen aji èvè lanmou épi yo (2 Tim. 3:1, 3). Sé pousa, lè ou ka kondui on lèson biblik, palé dè bèl kalité a Jéova. Fè étidyan a-w konprann kè Bondyé an nou, ki plen lanmou, vlé i ni lavi étèwnèl. É Bondyé paré a édé-y pou sa. Ki dòt biten ou pé fè ?

9-10. Ki piblikasyon pou nou itilizé lè nou ka fè étid a on moun, é poukwa sé yo pou nou itilizé ?

⁹ Sèvi èvè sé liv-la Ka Labib ka aprann-nou ? é Restez dans l’amour de Dieu. Yo fè  sé liv-lasa pou édé-nou touché tchè a étidyan an nou. Pa ègzanp, adan chapit 1 a liv Aprann la, nou ka touvé répons a sé kèsyon-lasa : « Ès Bondyé ka sousyé-y dè nou ? », « Lè moun ka soufè, ka Bondyé ka rèsanti ? » é « Ès ou pé vin zanmi a Jéova ? ». Liv-la Restez dans l’amour de Dieu ka édé étidyan-la konprann kijan i pé rann vi a-y pli bèl é vin zanmi a Jéova si i ka mèt sé prensip-la ki an Bib-la an pratik. Pétèt ou ja ni lokazyon sèvi èvè sé liv-lasa pou fè étid a sèwten moun, men kanmenmsa, pran tan préparé-w byen chakfwa ou k’ay fè on étid é pran tan réfléchi asi sa chak étidyan a-w bizwen.

¹⁰ Bon. É si étidyan a-w vlé ni plis enfòwmasyon asi on sijé ki adan on piblikasyon ki pa adan bwèt a zouti an nou pou anségné ? Ka ou ka fè ? Pétèt ou pé ankourajé-y a li piblikasyon-lasa tousèl a-y. Konsa ou pé’é bizwen koupé étid-la zo ka fè la adan liv Aprann la oben adan liv Restez dans l’amour de Dieu la.

11. A ki moman fò-nou pwopozé étidyan-la koumansé é bout étid-la èvè on priyè, é ka nou pé fè pou nou édé-y konprann kè sa enpòwtan dè fè sa ?

 ¹¹ Koumansé lèson biblik la èvè on priyè. Pli souvan ki rarman, méyè biten ki ni, sé pwopozé étidyan-la koumansé é bout étid-la èvè on priyè menmsi sé yenki déotwa fwa sèlman zò ja fè-y. Fò-nou édé-y réyalizé kè si a pa té lèspri sen a Bondyé, nou pa té’é rivé konprann Pawòl a-y. Pou édé moun-la konprann kijan sa enpòwtan dè priyé avan on lèson biblik, ni sèwten pwoklamatè ki ka sèvi èvè Jak 1:5. Adan vèwsé-lasa, nou ka li : « Si yonn adan zòt ka manké sajès, fò i kontinyé mandé Bondyé li. » Aprésa, yo ka mandé étidyan-la : « Sèlon vou, kijan nou pé mandé Bondyé sajès ? » Byensouvan, étidyan-la ka dakò pou di kè fò moun-lasa priyé Bondyé.

12. Kijan ou té ké sèvi èvè Sòm 139:2-4 pou édé on étidyan priyé plibyen ?

¹² Aprann étidyan a-w priyé. Fè-y konprann kè Bondyé vréman anvi kouté priyè a-y. Pran tan èspliké-y kè lè nou tousèl ka priyé, nou pé di Jéova tousa ki an tchè an nou, menm sa nou pa té’é jen rivé di on moun nou konnèt. Sé vré kè lè ou byen gadé, Jéova ja sav tousa ki ka pasé andidan tchè an nou ! (li Sòm 139:2-4). Pétèt étidyan an nou ka éséyé chanjé jan i ka vwè sèwten biten, oben pétèt i ka fè éfò pou lagé vyé mès é labitid i ni. Ankourajé-y mandé Bondyé èd a-y. Imajiné kè on moun ka étidyé Labib èvè-w dépi kèlkètan, men i enmé on fèt ki payen. I sav byen Bondyé pa dakò èvè fèt-lasa, men ni sèwten biten i byen enmé adan-y. Ankourajé-y a priyé Jéova é a di-y ègzaktèman sa i ka rèsanti. Ankourajé-y osi a sipliyé Bondyé pou mandé-y fòs pou i enmé yenki sa Jéova enmé (Sòm 97:10).

13. a) Poukwa fò pa nou tadé pou envité étidyan an nou vin réinyon ? b) Ka nou pé fè pou on étidyan santi-y alèz an réinyon ?

¹³ Pa tadé pou envité étidyan a-w vin réinyon. Sa i ké tann é sa i ké vwè pannan sé réinyon a lasanblé-la pé rivé a bay balan pou i sèvi Jéova é pou i pwogrésé. Montré-y vidéo-la Ka ki ka fèt adan on Sal di Wayòm ? é fè-y santi jan sa té’é fè-w plézi kè i vin réinyon èvè-w. Si ou pé, di-y ou pé pasé chèché-y. Sé on bon biten osi si ou ka envité diféran pwoklamatè adan étid-la. Konsa, étidyan a-w ké fè konésans èvè dòt moun ki adan lasanblé-la é sèten i ké pli alèz lè i ké vin réinyon.

14. Si on étidyan enmé Jéova, ka sa ké pousé-y a fè ?

¹⁴ Sa nou vlé sé édé étidyan an nou pwogrésé èspirityèlman (Éféz. 4:13). Lè on moun dakò pou étidyé Labib, sé pétèt pas i ni on entéré pèwsonèl adan sa. Men pi i ké enmé Jéova, pi i ké chèché a vwè kijan i pé édé lézòt, menm sa ki ja ka fè pawti a lasanblé-la (Mat. 22:37-39). Lè sé ké bon moman-la, èspliké étidyan a-w kè lè nou ka fè on don pou soutyenn aktivité a Wayòm-la, sé on lonnè pou noutout.

15. Kijan ou pé édé étidyan a-w réyaji konm i fo lè i ka jwenn difikilté ?

¹⁵ Aprann étidyan a-w ka pou i fè lè i koumansé jwenn difikilté. Imajiné étidyan a-w koumansé préché, men i po’o pran batèm, é i ka di-w ni on frè adan lasanblé-la ki fè on biten ki pa fè-y plézi menm. Olyé ou koumansé chèché kimoun ki ni rézon oben kimoun ki ni tò, pétèt ou pé pran déotwa vèwsé adan Labib èvè-y pou èspliké-y ka i pé fè adan  on ka konsa. Swa i pé padonné frè-la é fin èvè sa, oben si sa ka tèwbolizé lèspri a-y, i pé ay vwè-y, pou vwè si i ka ‘woumèt frè a-y asi bon chimen-la’ (gadé Matyé 18:15). É i ké fè sa èvè onlo jantiyès é èvè onlo lanmou. Adan ka-lasa, édé étidyan a-w préparé sa i kay di frè-la. Montré-y kijan pou i sèvi èvè JW Library^®, èvè Guide de recherche la, oben èvè jw.org^® pou touvé kijan i pé rézoud pwoblèm-la. Si i byen fòwmé avan i pran batèm, sa ké pli senp pou i antann-li byen èvè frè é sè a-y lè i ké pran batèm.

16. Poukwa sé on bon biten lè ou ka envité dòt pwoklamatè adan étid a-w ?

¹⁶ Envité dòt frè é sè oben rèsponsab a siwkonskripsyon la pou fè étid-la èvè-w. Poukwa fò ou fè sa ? Anplis dè sé rézon-la nou ja palé pli ho la, pétèt sélézòt pwoklamatè-la ké édé étidyan a-w jan voumenm pé’é pé fè-y. Imajiné étidyan a-w ka fimé, é tout jan i ja éséyé, i pa ka rivé arété. Pétèt ou pé fè étid-la èvè on Témwen ki rivé lagé vyé labitid-lasa men ki té oblijé goumé onlo pou rivé about a-y. Sèten i ké pé ba étidyan a-w dé bon ti konsèy, ki ké vréman itil ba-y. Si ou envité on frè ou on sè ki ni onlo èkspéryans adan étid-la é kè ou ka santi-w jenné pou kondui étid-la douvan a-y, ou pé pwopozé-y menné diskisyon-la kou-lasa. Men kèlkanswa, fè ansòt pou étidyan-la bénéfisyé dè èkspéryans a lézòt. Pa oubliyé : òbjèktif an nou, sé édé étidyan an nou pwogrésé.

17-18. Ki kèsyon pou-w pozé-w avan ou désidé si ou ka arété on étid oben si ou ka kontinyé-y ?

¹⁷ Si étidyan a-w pa ka kontinyé fè chanjman an vi a-y, fò ou ké pozé-w kèsyon-lasa : ès fò-mwen arété étid-la ? Lè ou ké analizé sitiyasyon-la, tchenn kont dè kapasité a étidyan-la. Ni moun ki ka pwogrésé mwen vit ki dòt. Pozé-w sé kèsyon-lasa : « Ès étidyan an mwen ka pwogrésé on mannyè ki rézonab parapòt a sitiyasyon a-y ? Ès i ka koumansé mèt sa i ka aprann an pratik ? » (Mat. 28:20). On étidyan pa oblijé ka pwogrésé vit, men fò i ka kontinyé fè chanjman an vi a-y.

¹⁸ Bon, aprézan, ka pou ou fè si on moun ka étidyé dépi on moman, men kè i konsa lèson biblik la pa’a gè entérésé-y oben pa ka entérésé-y ditou ? Imajiné : Étidyan a-w ja fin étidyé liv Aprann la, pétèt i ja jous koumansé liv Restez dans l’amour de Dieu, men i po’o jen vin adan pon réinyon. Pa menm Mémoryal i po’o vin ! É i toujou ka touvé on èskiz pou i pa fè étid-la. Adan on ka konsa, sa té’é bon kè ou palé dè sa franchman èvè-y b.

19. Ka ou pé mandé étidyan a-w si étid a-y pa gè ka entérésé-y, é ka répons a-y ké édé-w fè ?

 ¹⁹ Pou koumansé, pétèt ou pé mandé étidyan a-w : « Ka ki ké ba-w pi gaz pou-w pé sa vin Témwen a Jéova ? » Pétèt i ké réponn : « An byen enmé étidyé Labib, men an pé’é jen rantré Témwen a Jéova ! » Si sé konsa i ka vwè sa alòskè ja ni on moman i ka étidyé, ou ka di sa vo lapenn kontinyé étid-la ? Oben pétèt i ké fè-w sav sa ki ka frenné-y. Pa ègzanp, pétèt sé pè i pè ay douvan pòt a moun an prédikasyon. Lè ou ké sav sa i ka rèsanti, ou ké pé édé-y pli fasilman.

20. Kijan Akt 13:48 ka édé-nou lè nou ni a désidé si nou ka kontinyé oben si nou ka arété on étid biblik ?

²⁰ Sa maléré a di, men ni désèrten étidyan ki on ti jan kon sé Izraélit-la an tan a Ézékyèl. Mi sa Jéova di pwofèt a-y anrapò èvè sé Izraélit-lasa : « Pou yo, ou kon on moun ki ni on bèl ti vwa, ki ka jouwé enstriman a kòd byen, é ki ka chanté on bèl chanson ki ka palé dè lanmou. Yo ké kouté sa ou ka di, men ponmoun pé’é tyenn kont dè sa » (Ézék. 33:32). Sa pé on ti jan rèd pou nou dè di on moun kè nou kay arété étid a-y. Men « tan-la ki ka rété la kout » (1 Kor. 7:29). Olyé nou pasé onpakèt tan èvè on étidyan ki pa’a fè pwogré, an-nou chèché moun ki ni « mantalité-la ki fo la pou ni lavi étèwnèl » (li Akt 13:48).

21. Ka ki tèks a lanné 2020, é ka i ké ankourajé-nou a fè ?

²¹ Pannan lanné 2020, tèks a lanné-la ké édé-nou vwè ka nou pé fè pou nou vin on zouti pi filé lè nou ka fè disip. An-nou pa jen oubliyé sa Jézi té di pannan i té asi on montangn an Galilé adan on réinyon vréman enpòwtan : « Donk, alé é fè disip [...]. Batizé-yo » (Mat. 28:19).