1-2. Ki sitiyasyon onlo sèwvitè a Jéova ka jwenn, é kijan sa pé aji asi yo ?

 RÉFLÉCHI asi sé 3 ègzanp-lasa : On jenn frè ka vin sav kè i ni on maladi grav ki ka fébli-y piti-a-piti. On frè ki ni pliski 50 an ka pèd travay a-y, é magré tout éfò i ka fè, i pa’a touvé pondòt travay. On sè ki ja ni on bèl laj pé pa fè tousa i té ka fè avan pou i pé sa sèvi Jéova.

² Si ou ka viv dé sitiyasyon kon séla, pétèt ou ni lenprésyon kè ou pa itil ankò. É dé sitiyasyon konsa pé rivé a fè-w pèd jwa a-w, pé fè-w mèt an tèt a-w kè ou pa vo ayen é sa pé anpéché-w ni bon rèlasyon èvè lézòt.

3. Kijan Satan é touséla ki ka suiv-li la ka konsidéré lavi ?

³ Mond-lasa pa’a ba lavi pon valè, menmjan ki Satan. Satan toujou aji èvè lézimen konsi yo pa vo ayen. Tèlman i ni méchansté an kò a-y, i fè Èv konprann kè si i dézobéyi Bondyé, i ké lib, alòskè i té sav byen sé lanmò ki té ka atann Èv. Anplisdisa, sé Satan ki ka kontwolé sistèm a lajan-la, sistèm politik la é sé fo rèlijyon-la ki an mond-lasa. Donk sa pa ka étoné-nou si onlo nonm ki ka fè biznès, onlo moun ki antèt a rèlijyon, é onlo chèf politik pa ni pon rèspé pou lavi é pa’a tchenn kont dè sa lézòt ka rèsanti nonplis.

4. Ka nou ké vwè adan awtik-lasa ?

⁴ Pawkont, Jéova pa kon Satan. Li Jéova, i vlé nou sav kè nou ni valè, é i ka édé-nou lè nou ka jwenn dé sitiyasyon  ki té’é pé fè-nou santi-nou initil (Sòm 136:23 ; Wom. 12:3). Adan awtik-lasa, nou ké vwè kijan Jéova ka édé-nou : 1) lè nou ka soufè èvè on maladi, 2) lè nou ni pwoblèm a lajan, é 3) lè laj-la ka bat-nou. Men pou koumansé, an-nou vwè poukwa noutout pé sèten kè nou ni onlo valè pou Jéova.

5. Ki prèv ou ni kè lézimen ni onlo valè pou Jéova ?

⁵ Menmsi nou fèt èvè pousyè a latè, nou ni onlo valè pou Jéova kanmenm (Jén. 2:7). An-nou vwè déotwa rézon ki fè nou sèten kè nou ni valè pou Jéova. On prèmyé biten sé kè i kréyé lézimen on mannyè pou yo pé sa imité kalité a-y (Jén. 1:27). Nou ni plis kapasité ki tout sélézòt biten-la i kréyé la asi latè. É i ban-nou okipé dè Latè é dè sé zannimo-la (Sòm 8:4-8).

6. Ki prèv ki ka montré kè Jéova ka ba lézimen ki enpawfè onlo valè ?

⁶ Menm apré Adan péché, Jéova kontinyé ba lézimen valè. Tèlman nou ni enpòwtans pou-y, i sakrifyé Jézi, Gason a-y, sila i pi enmé la, an ranson pou péché an nou (1 Jan 4:9, 10). Grasa ranson-la, Jéova ké résisité moun ki mò akòz dè péché a Adan. I ké résisité ‘ki moun jis, ki moun ki pa jis’ (Akt 24:15).Anplisdisa, Labib ka montré-nou kè nou ni valè pou-y, ki nou malad, ki nou ni pwoblèm a lajan, ki nou ja ni on bèl laj (Akt 10:34, 35).

7. Pou ki dòt rézon sèwvitè a Bondyé pé sèten kè yo ni onlo valè pou Jéova ?

⁷ Nou ni dòt rézon ankò ki ka fè nou sèten kè Jéova ka ban-nou valè. I ban-nou anvi vin zanmi èvè-y, é i vwè kijan nou aksèpté bon nouvèl la (Jan 6:44). É pi nou té ka rapwoché-nou dè-y é pi i té ka rapwoché-y dè nou (Jak 4:8). Anplisdisa, Jéova ka montré kè nou ni valè pou-y pas i ka pran tan a-y é i ka fè éfò pou anségné-nou. I sav osi ki jan dè moun nou yé konnyéla é i ja ka vwè sa nou pé divini. É i ka korijé-nou pas i enmé-nou (Pwov. 3:11, 12). Tousa nou sòti vwè la ka montré kè Jéova ka ban-nou valè menm !

8. Kijan sa ki maké adan Sòm 18:27-29 pé fè-nou vwè difikilté an nou ondòt jan ?

⁸ Menmsi pou sèwten moun wa David pa té vo ayen, li David té sav kè Jéova té enmé-y é kè i té ka soutyenn-li. É sa édé-y andiré é vwè sitiyasyon a-y on mannyè ki pozitif (2 Sam. 16:5-7). Lèwvwè nou ka santi-nou vréman tris oben lè nou ka pasé gwo éprèv, Jéova pé édé-nou vwè sitiyasyon an nou on mannyè ki pozitif, é i pé édé-nou rivé about a nenpòt ki difikilté (li Sòm 18:27-29). Dépi Jéova ka soutyenn-nou, ayen pé pa anpéché-nou sèvi-y èvè jwa (Wom. 8:31). Aprézan, an-nou ègzaminé 3 sitiyasyon byen prési. Lè nou adan sé sitiyasyon-lasa, sa vréman enpòwtan kè nou sonjé kè Jéova enmé-nou é kè i ka ban-nou valè.

9. Lè nou malad, ka nou pé rèsanti ?

⁹ Lè nou malad sa pé rann-nou négatif é nou pé ni lenprésyon kè nou pa itil ba ponmoun ankò. Nou pé rivé a santi-nou jenné lè lézòt ka rann-yo kont kè ni dé biten nou pé pa fè ankò oben lè nou oblijé konté asi yo pou yo fè sèwten biten ban nou. É menm lè lézòt pa sav kè nou malad, pétèt kè nou ni lenprésyon nou pa ni pon valè ankò paskè nou pé pa fè  tousa nou té ka fè avan. Lè nou angwasé konsa, Jéova ka ankourajé-nou. Kijan i ka fè sa ?

10. Dapré sa Pwovèb 12:25 ka di, ka ki pé édé-nou si nou malad ?

¹⁰ Lè nou malad, « on bèl ti pawòl » pé ban-nou kouraj (li Pwovèb 12:25). Adan Labib, Jéova di-nou onlo ‘bèl pawòl’ ki ka fè-nou sonjé kè nou ni onlo valè pou-y menmsi nou malad (Sòm 31:19 ; 41:3). Si nou ka pran tan li é wouli sé pawòl-lasa ki ka vin dè Bondyé, i ké édé-nou lité kont tout santiman négatif nou pé ni pas nou malad.

11. Kijan on frè santi kè Jéova ka édé-y ?

¹¹ An-nou ègzaminé sa Jorge viv. Lè i té jenn, Jorge trapé on maladi ki té ka fébli-y piti-a-piti, ki té ka pwogrésé vit é ki té ka ba-y lenprésyon kè i pa té ni pon valè ankò. Mi sa i ka di : « Jan-la maladi-la té ka aji asi mwen té ka fè moun gadé-mwen é an té ka hont toubònman. An pa té paré pou sipòté tousa. Pi maladi-la té ka vin grav, pi an té ka réfléchi asi chanjman ki té kay ni an vi an mwen. Dé bra an mwen té kasé menm ! An sipliyé Jéova pou i té édé-mwen. » Kijan Jéova soutyenn-li ? Mi sa Jorge ka di : « Konm an pa té ka rivé konsantré-mwen, yo ankourajé-mwen a li dé ti vèwsé ki adan sé Sòm-la é ki ka montré kè Jéova ka sousyé-y dè sèwvitè a-y. An té ka wouli sé pasaj-lasa touléjou. Yo té ka rékonfòwté-mwen onlo. Apré on sèwten tan, lantouraj an mwen konstaté kè an té ka souri plis. Yo jous di-mwen kè konm an té pozitif sa té ka ba-yo kouraj. É la, an réyalizé kè Jéova té réponn a priyè an mwen ! I édé-mwen wòté an tèt an mwen sé santiman négatif la an té ni la.  Dépi sa, an té ka rivé konsantré-mwen asi sèwten pasaj a Labib ki ka montré kijan Jéova ka vwè-mwen magré maladi-la. »

12. Si ou malad, ka ou pé fè, pou Jéova édé-w ?

¹² Si ou malad, ou pé sèten kè Jéova konnèt sa ou ka viv. Priyé-y pou i pé sa édé-w vwè sitiyasyon a-w kon pou ou vwè-y. Aprésa, chèché adan Bib-la sé ‘bèl pawòl-la’ kè Jéova mété èspésyalman ba-w. Konsantré-w asi dé vèwsé ki ka montré kè Jéova ka ba sèwvitè a-y onlo valè. Konsa, ou ké pé vwè kè Jéova janti èvè moun ki ka sèvi-y fidèlman (Sòm 84:11).

13. Ka on chèf a fanmi pé rèsanti si i pèd travay a-y ?

¹³ Tout chèf a fanmi vé ba fanmi a-y sa i bizwen pou viv. Men imajiné on frè ka pèd travay a-y alòskè i pa fè pon érè. I ka pòté bon mannèv pou i pé sa touvé ondòt travay, men i pa’a touvé ayen. Adan on sitiyasyon konsa, i pé ka santi-y initil. Si i ka mèt lèspri a-y asi pwomès a Jéova, kijan sa pé édé-y ?

14. Poukwa Jéova ka tchenn pwomès a-y ?

¹⁴ Jéova toujou ka fè sa i pwomèt (Joz. 21:45 ; 23:14). I ka fè sa pou plizyè rézon. On prèmyé rézon, sé kè sa ka aji asi non a-y oben asi répitasyon a-y. Jéova pwomèt kè i ké okipé-y dè sèwvitè a-y ki fidèl é i ka santi-y oblijé tchenn pwomès-lasa (Sòm 31:1-3). Anplisdisa, Jéova sav byen kè si i pa té ka pran swen an nou alòskè nou ka fè pawti a fanmi a-y, nou té’é tris é sa té’é désèvwa-nou. I ka pwomèt-nou kè i ké ban-nou sa nou bizwen pou viv, é sa nou bizwen pou kontinyé sèvi-y fidèlman. É ayen pé’é pé anpéché-y tchenn pwomès-lasa ! (Mat. 6:30-33 ; 24:45).

15. a) Ki difikilté sé prèmyé krétyen-la jwenn ? b) Dè ki biten nou pé sèten grasa Sòm 37:18, 19 ?

 ¹⁵ Si nou ka sonjé kè Jéova toujou ka tchenn pwomès a-y, nou ké sèten i ké édé-nou si nou ni pwoblèm a lajan. Réfléchi asi ègzanp a sé prèmyé krétyen-la. Onlè, yo pèwsékité-yo rèd menm é lè sa fèt, « tout sé disip-la pran on bò, sòf sé apòt-la » (Akt 8:1). Ou ka tou konprann yo vin ni pwoblèm a lajan ! Sèwten krétyen dwèt pèd ki kaz a yo, ki travay a yo. Men Jéova pa abandoné-yo. É yo pa pèd jwa a yo (Akt 8:4 ; Ébr. 13:5, 6 ; Jak 1:2, 3). Jéova soutyenn sé krétyen fidèl lasa é i ké soutyenn-nou osi (li Sòm 37:18, 19).

16. Ka ki té’é pé ban-nou lenprésyon kè sa nou ka fè pou Jéova pa ni pon valè ?

¹⁶ Lè nou ka pran on ti laj, nou pé rivé a mèt an tèt an nou kè nou pé pa fè granzafè ba Jéova ankò. Pétèt kè wa David rèsanti menm biten-la lè i koumansé pran laj (Sòm 71:9). Si nou adan sitiyasyon-lasa, kijan Jéova pé édé-nou ?

17. Lè nou ka vwè sa on sè non a-y sé Jheri viv, ka sa ka aprann-nou ?

¹⁷ An-nou palé dè sa ki rivé on sè non a-y sé Jheri. Yo envité-y adan on fòwmasyon pou pran swen a sé batiman-la ki fèt pou adoré Jéova é sa té ka fèt adan on Sal di Wayòm. Men i pa té vlé alé. Mi sa i di : « An ja vyé, mari an mwen ja mò é an pa’a vwè ka an té’é pé fè ki té’é itil ba Jéova. An pa sèvi ayen. » Lavèy a fòwmasyon-la, i di Jéova tousa i té ka rèsanti. Lèlandèmen-la, lè i rivé an Sal di Wayòm la, i té ka kontinyé mandé-y ka i té ka fè la. Pannan pwogram-la, ni yonn adan sé frè-la ki èspliké kè pi bèl kapasité  on moun pé ni sé lè i vé lésé Jéova anségné-y. Mi sa Jheri ka sonjé : « An di an tchè an mwen : “Men an ni kapasité-lasa !” An mèt pléré atè pas an rann-men kont kè Jéova réponn a priyè an mwen. I fè-mwen konprann, on mannyè ki klè, kè an té pé ba-y on biten ki ni onlo valè é kè i té paré a fòwmé-mwen pou fè travay-lasa ! » Mi sa Jheri ka ajouté : « Lè an rivé an fòwmasyon-la, an té istrésé, an té dékourajé é an té tris toubònman. Men lè an sòti la, an té ni konfyans, an té plen kouraj, é an té ka santi-mwen itil ! »

18. Kijan Labib ka montré kè Jéova ka kontinyé ba sa nou ka fè pou-y onlo valè, menmsi nou ka pran laj ?

¹⁸ Menmsi nou ja ni on bèl laj, nou pé sèten kè Jéova ké toujou ban-nou on travay a fè (Sòm 92:12-15). Jézi aprann-nou kè menmsi pou nou sa nou ka fè pou Jéova sé on ti ayen, pou Jéova sa ni onlo valè (Lik 21:2-4). Alò konsantré-w asi sa ou pé fè. Pa ègzanp, ou pé palé lézòt dè Jéova, ou pé priyé pou frè é sè a-w, é ou pé ankourajé-yo a rété fidèl osi. Pou Jéova, ou sé kolèg-travay a-y. É si i ka vwè-nou konsa, a pa parapòt a sa nou kapab fè, men sé paskè nou toujou vlé obéyi-y (1 Kor. 3:5-9).

19. Dè ki biten nou pé sèten grasa sa Women 8:38, 39 ka di ?

¹⁹ A pa ti kontan nou kontan adoré Jéova ! Pas sé on Dyé ki ka ba sèwvitè a-y onlo valè menm ! I kréyé-nou pou nou fè volonté a-y é lè nou ka adoré-y sa ka ba vi an nou on sans (Rév. 4:11). Pétèt kè pou mond-la nou initil, men li Jéova pa hont-nou (Ébr. 11:16, 38). Menmsi pwoblèm a lajan, lamaladi, oben lavyéyès ka dékourajé-nou, fò-nou sonjé kè ayen pé pa séparé-nou dè lanmou a Pap’an nou ki an syèl-la (li Women 8:38, 39).