1. Kijan on jenn réyaji lèwvwè i tann on diskou yo bay adan on lasanblé an 1935 ?

NI ON jenn tiboug ki té ni 18 an lèwvwè i pran lèbatèm an 1926. Fanmi a-y té Étidyan a Labib. Sé konsa, yo té ka kriyé Témwen a Jéova a épòk-lasa. Fanmi-lasa, té ni 3 gason é 2 fi. É dépi toupiti, sé paran-la aprann timoun a yo sèvi Bondyé é imité Jézikris. A épòk-lasa, Étidyan a Labib té ni labitid manjé pen-la é bwè diven-la pannan Rèpa a Ségnè la. Kifè, tou natirèlman, ti jenn-lasa ki té fidèl, mété-y ka fè sa osi. Men an 1935, Joseph Rutherford bay on diskou adan on lasanblé ki fèt a Wachintòn, o Zétazini. Tèm a diskou-lasa sé té « La grande multitude ». Lèwvwè ti jenn-lasa tann diskou-lasa, èspérans-la i té ni la enkin chanjé onsèl kou. Ka yo di konsa adan lasanblé-lasa ?

2. Ki vérité enpòwtan frè Rutherford èspliké adan diskou a-y ?

² Révélasyon 7:9 ka palé dè on gran foulmoun. Adan diskou-la i fè la, frè Rutherford èspliké ka ki gran foulmoun-lasa. An tan-lasa, Étidyan a Labib té ka kwè kè gran foulmoun-la sé té on gwoupmoun ki té k’ay viv an syèl-la men ki pa té fidèl kon sé wen-la. Frè Rutherford sèvi èvè Bib-la pou montré kè Bondyé pa chwazi gran foulmoun-la pou ay viv an syèl-la. Men i èspliké kè gran foulmoun-la sé sélézòt mouton-la * ki ké rété vivan apré  « gwo tribilasyon-la » é ki ké viv asi latè pou touttan (Rév. 7:14). Mi sa Jézi pwomèt : « É an ni dòt mouton ki pa adan pak-lasa ; yo osi fò an fè-yo rantré, é yo ké kouté vwa an mwen : yo ké vin onsèl twoupo é yo ké ni onsèl bèwjé » (Jan 10:16). Sé mouton-lasa sé Témwen a Jéova ki fidèl é ki ni lèspwa dè viv si latè pou touttan adan paradi-la (Mat. 25:31-33, 46). An-nou vwè kijan èsplikasyon-lasa chanjé vi a onlo Témwen a Jéova é ta jenn ti frè-la osi (Sòm 97:11 ; Pwov. 4:18).

3-4. Pannan on lasanblé ki fèt an 1935, ka onlo moun rivé konprann anrapò èvè èspérans a yo ?

³ Pannan lasanblé-lasa, ni on biten èstraòwdinè ki fèt. Frè-la ki té ka fè diskou-la pozé sé moun-la ki té la la kèsyon-lasa : « Èskè moun ki ni lèspwa dè viv si latè pou touttan pé mèt-yo doubout ? » On frè ki té la jou-lasa di kè i vwè plis ki lanmwatyé a sé moun-la mèt-yo doubout. Lèwgadé, mi sa frè Rutherford di : « Mi gran foulmoun-la ! Mi mi-y ! » Tèlman moun té kontan, a pa ti aplodi yo aplodi ! Sé moun-la ki té doubout la rann-yo kont kè Bondyé pa té chwazi-yo pou ay viv an syèl-la. Yo rivé konprann kè Bondyé pa té voyé lèspri sen a-y asi yo pou yo pé sa vin wen. Lèlandèmen-la, 840 moun pran lèbatèm é lamajorité adan yo té ka fè pawti a sélézòt mouton-la.

⁴ Apré lasanblé-lasa, jenn ti frè-la nou palé dè-y talè la é dòt frè ankò arété manjé pen-la é bwè diven-la pannan Mémoryal-la é sa toutafè nòwmal. Èvè onlo imilité, on frè èspliké sa onlo moun rèsanti. Mi sa i di : « Dènyé fwa an manjé pen-la é an bwè diven-la sé té pou Mémoryal a 1935. An rann-mwen kont kè Jéova pa té voyé lèspri sen a-y si mwen mwen té ay viv an syèl-la. Olyé dè sa, an té ni lèspwa dè viv asi latè é dè travay pou fè-y vin on paradi » (Wom. 8:16, 17 ; 2 Kor. 1:21, 22). Dépi sa, kantité moun ki ka fè pawti a gran foulmoun-la pa jen arété ògmanté é yo ka travay men-dan-lamen èvè sé rèstan wen la ki ka rété la.

5. Lè on moun ka arété manjé pen-la é bwè diven-la, ka Jéova ka pansé dè-y ?

⁵ Apré 1935, ni onlo moun ki arété manjé pen-la é bwè diven-la. Ka Jéova ka pansé dè sa ? É jòdijou, ka Jéova ka pansé dè on Témwen ki abityé pran pen-la é diven-la pannan Mémoryal-la é ki ka rann-li kont finalman kè i pa wen ? (1 Kor. 11:28). Ni sèwten moun ki ka pran pen-la é diven-la pas yo pa byen konprann ki èspérans yo ni. Men si yo ka admèt kè yo fè on érè, kè yo ka arété pran pen-la é diven-la é si yo ka kontinyé sèvi Jéova, sèten Jéova ké dakò pou yo pé sa fè pawti a sélézòt mouton-la. Menmsi yo pa’a pran pen-la é yo pa’a pran diven-la ankò, yo ka vin an Mémoryal-la pas yo kontan toubònman sa Jéova é Jézi fè pou yo.

6. Ka Jézi mandé sé zanj-la fè ?

⁶ Révélasyon chapit 7 ka palé dè sé krétyen wen la é dè gran foulmoun-la. Konm gwo tribilasyon-la toupré rivé, sa té’é byen kè nou ègzaminé chapit-lasa. Jézi mandé sé zanj-la kontinyé tchenbé sé 4 van-la ki fèt pou détwi la, kivédi, fò pa yo lésé sé van-la souflé asi latè  jiskatan Jéova mété so a-y asi sé krétyen wen la. Lè Jéova ké mèt so a-y asi yo, sa ké vé di kè pou-y, yo gangné kous-la (Rév. 7:1-4). Kòm yo rété fidèl, Jéova ké rékonpansé-yo. Sé krétyen wen la, kivédi frè a Kris, ké vin wa é prèt èvè-y an syèl-la (Rév. 20:6). Lè sé 144 000 wen-la ké rèsèvwa rèkonpans a yo, a pa ti kontan Jéova, Jézi é sé zanj-la ké kontan !

7. Sèlon Révélasyon 7:9, 10, ka Jan vwè é ka sé moun-lasa té ka fè ? (gadé imaj-la ki anlè po a jounal-la).

⁷ Apré Jan palé dè sé 144 000 la ki ké wa é prèt alafwa, i palé dè on biten èstraòwdinè toubònman. I palé dè « on gran foulmoun » ki rété vivan apré Awmagédon. Sé 2 gwoup-lasa diféran toubònman. Poukwa nou ka di sa ? Pas adan prèmyé gwoup-la, ni 144 000 moun men adan dézyèm gwoup-la ké ni onlo moun adan-y é nou pa sav konmen moun ké ni (li Révélasyon 7:9, 10). Yo ni gran wòb blan asi yo é sa ka montré kè yo pa’a lésé mond-la mèt « pon tach » asi yo é kè yo ka rété fidèl a Bondyé é a Jézikris (Jak 1:27). Yo ka kriyé pas Jéova é Jézi, Timouton a Bondyé, sové-yo. Anplisdisa, yo ni branch a palmyé an men a yo. Sa ka montré kè yo ka rèkonnèt kè Jézi sé Wa-la Jéova chwazi la (gadé Jan 12:12, 13).

8. Ka Révélasyon 7:11, 12 ka di anrapò èvè Jéova, Jézi, sé zanj-la é sé wen-la ki résisité la ?

⁸ (Li Révélasyon 7:11, 12.) Ka ki pasé lè sé moun-la ki an syèl-la vwè gran foulmoun-la ? Jan ka vwè kè Jéova, Jézi, sé zanj-la é sé wen-la ki anhola kontan toubònman lè yo ka vwè gran foulmoun-la. É toutmoun ka louwé Bondyé tèlman yo kontan ! Jéova, Jézi é sé zanj-la ké kontan toubònman lèwvwè vizyon-lasa ké réyalizé, kivédi, lèwvwè gran foulmoun-la ké sòti anba gwo tribilasyon-la.

9. Dapré Révélasyon 7:13-15, ka gran foulmoun-la ka fè jòdijou ?

⁹ (Li Révélasyon 7:13-15.) Jan maké kè sé moun-ka ki an gran foulmoun-lasa « lavé gran wòb a yo é yo blanchi sé wòb-lasa adan san a Timouton-la ». Sa vé di kè yo ni on konsyans ki nèt é kè, pou Jéova, yo sé dé moun ki jis (Iz. 1:18). Yo ba Bondyé vi a yo é yo pran lèbatèm. Yo ka kwè fò adan sakrifis a Jézi é yo bon bon zanmi èvè Jéova (Jan 3:36 ; 1 Pyè 3:21). Sé poukwa Bondyé kontan-yo é yo pé ofè-y on « sèwvis sakré lajouné kon lannuit » toupannan yo asi latè. Jòdijou, yo ka pòté bon mannèv pou préché bon nouvèl a Wayòm-la é pou fè disip, pas pou yo, pa ni biten ki pi enpòwtan ki Wayòm a Bondyé (Mat. 6:33 ; 24:14 ; 28:19, 20).

10. Dè ki biten gran foulmoun-la sèten, é ki pwomès ki ké réyalizé an 2 zyé a yo ?

¹⁰ Gran foulmoun-la ki sòti anba gwo tribilasyon-la sèten kè Bondyé ké pran swen a-y pas sila ki sizé anlè twòn-la ké wouvè tant a-y si yo. Anfinaldikont, pwomès-la sélézòt mouton-la té ka atann la ké réyalizé : « Bondyé ké suiyé tout dlo an zyé a yo é lanmò pé ké la ankò, pé ké tini ni dèy, ni kri, ni doulè ankò. Sa ki té la avan disparèt » (Rév. 21:3, 4).

11-12. a) Sèlon Révélasyon 7:16, 17, kijan Bondyé ké béni gran foulmoun-la ? b) Ka sélézòt mouton-la ka fè pannan Mémoryal-la, é ka ki ka pousé-yo fè sa ?

¹¹ (Li Révélasyon 7:16, 17.) Jòdijou, onlo moun adan pèp a Bondyé ka  mò-fen pas yo pa ni asé lajan pou achté manjé oben pas ni lagè la yo ka rété la. Kifè, yo ka pran bon gaz adan sa. Ni dòt yo mété lajòl pas yo ka sèvi Jéova. Men magré tousa, gran foulmoun-la pé ni tchè-kontan pas lè Bondyé ké détwi mond méchan lasa, yo ké ni manjé agogo é Bondyé ké toujou kontinyé anségné-yo. Lè Jéova ké détwi mond a Satan, on mond ki méchan toubònman, kòlè a-y ké kon « gwo chalè » ki ka brilé men i ké owganizé-y pou ayen pa rivé gran foulmoun-la. Apré gwo tribilasyon-la, Jézi ké menné touséla ki rété vivan la owa dlo-sous ki ka bay lavi, kivédi, i ké édé-yo ni lavi pou touttan. Ou ka rann-vou kont ! Sé moun-la ki an gran foulmoun-lasa ni on bèl èspwa toubònman ! Pétèt kè ni déotwa adan yo ki pé’é jen mò ! (Jan 11:26).

¹² Sélézòt mouton-la ni on èspwa ki èstraòwdinè toubònman é parapòt a sa, yo ni onpakèt rèkonésans pou Jéova é Jézi. A pa paskè Jéova pa chwazi-yo pou ay viv an syèl-la kè Jéova enmé-yo mwens ki sé wen-la. Ki sé wen-la, ki sélézòt mouton-la ka ba Jéova louwanj é yo ka ba Jézikris louwanj osi. On mannyè yo ka fè sa, sé lè yo ka vin an Mémoryal-la.

13-14. Fò sé wen-la é sélézòt mouton-la sélébré Mémoryal-la. Poukisa ?

¹³ Dépi kèlkè lanné, asi 1 000 moun apépré ki ka vin an Mémoryal-la, ni onsèl ki ka manjé pen-la é ki ka bwè diven-la. Sa vé di kè adan lamajorité a sé lasanblé-la, ponmoun pa’a manjé pen-la é ponmoun pa’a bwè diven-la. Sa vé di osi kè lamajorité a moun ki ka vin Mémoryal ka èspéré viv asi latè. Alò, poukwa yo ka vin an Rèpa a Ségnè la ? An-nou pran on ègzanp pou nou byen konprann. Pou ki rézon ou k’ay adan mayé a on zanmi a-w ? Sé pou montré-y kè ou enmè-y é kè ou ka soutyenn-li. Menmjan-la, sélézòt mouton-la k’ay adan Mémoryal-la pou montré Jézi é sé wen-la kè yo enmé-yo é kè yo ka soutyenn-yo. Yo ka vin Mémoryal osi pou montré kè yo ni  onlo rèkonésans pou sakrifis-la Jézi fè la. Anplis, grasa sakrifis-lasa, yo ké pé viv asi latè pou touttan.

¹⁴ Anplisdisa, si yo ka vin Mémoryal, sé pou suiv on komandman kè Jézi bay. Lè Jézi sélébré prèmyé Rèpa a Ségnè la, mi sa i di sé apòt-la ki té fidèl la : « Kontinyé fè sa pou zòt sonjé-mwen » (1 Kor. 11:23-26). Alò, touttan ou vwè ni wen asi latè, sélézòt mouton-la ka sélébré Mémoryal-la. É sélézòt mouton-la ka envité moun pou yo vin sélébré Mémoryal-la èvè yo.

15. Ka nouchak pé fè pou nou pé ba Bondyé é Jézikris louwanj pannan Mémoryal-la ?

¹⁵ Lè nou Mémoryal, nou ka pé ba Bondyé é Jézikris louwanj. É pou nou fè sa, nou ka chanté é nou ka priyé. Lanné-lasa, tèm a diskou-la sé ké : « An-nou montré nou ka aprésyé sa Bondyé é Jézikris fè pou nou ! » Sa ké ban-nou plis rèkonésans pou Jéova é Jézikris. Lè yo ké fè pen-la é diven-la pasé sé ké lokazyon pou nou dè réfléchi asi sa yo ka rèprézanté, kivédi, kò a Jézi é san a-y. É sa ké fè-nou sonjé kè Jéova enmé-nou onlo piskè i voyé Gason a-y mò, pou nou pé sa ni lavi (Mat. 20:28). Toutmoun ki enmé Pap’an nou ki an syèl-la é Gason a-y anvi vin an Mémoryal-la.

16. Poukwa nou pé di kè sé krétyen wen la é sélézòt mouton-la près menm biten ?

¹⁶ Pou Jéova, sé wen-la é sélézòt mouton-la ni menm valè-la. I pa enmé on gwoup plis ki lòt. Pou i té achté sé wen-la é pou i té achté sélézòt mouton-la, i péyé menm pri-la : vi a gason a-y. Diférans-la ki ni ant sé 2 gwoup-lasa sé kè yo pa ni menm èspérans-la. Men fò yo toulédé rété fidèl a Bondyé é a Jézikris (Sòm 31:23). É pa oubliyé ! A pa paskè on moun wen kè i ni plis lèspri sen kè on moun ki pa wen. Jéova ka ba chakmoun kantité lèspri sen la i bizwen la.

17. Ka sé wen-la ki asi latè la ja ka vwè-yo ka fè ?

¹⁷ Lè on krétyen wen ka fèt, a pa tousuit i ka ni lèspérans dè ay viv an syèl-la. Fò Bondyé mèt èspérans-lasa an tchè a-y. Yo ka pran tan réfléchi asi èspérans-lasa, yo ka priyé Jéova anrapò èvè sa é yo présé rèsèvwa rékonpans a yo an syèl-la. Sé vré, yo po’o sav ki kalté kò yo ké ni lèwvwè yo ké an syèl-la (Filip. 3:20, 21 ; 1 Jan 3:2). Men yo ja anvi vwè Jéova, Jézi, sé zanj-la é sélézòt wen-la ki ja an syèl-la. Yo ja anvi gouvèné èvè Jézi é sé wen-la adan Wayòm-la ki an syèl-la.

18. Ka sélézòt mouton-la ja ka vwè-yo ka fè ?

 ¹⁸ Sélézòt mouton-la ja anvi viv asi latè pou touttan. É sa nòwmal piskè sé sa toutmoun ki pa wen té’é swété (Ékl. 3:11). Yo ja ka vwè-yo ka travay an mond nouvo la pou yo fè tout latè vin on paradi. Yo ja ka vwè-yo ka fè ti kaz a yo, ka planté ti jaden a yo, ka lévé timoun a yo. É anplis, toutmoun-la ké pawfè ! (Iz. 65:21-23). Yo ja ka vwè-yo ka vwayajé toupatou asi latè pou ay vwè sé montangn-la, sé foré-la, sé loséan-la é pou étidyé tousa Jéova kréyé. Men sa ki ka fè-yo plis plézi menm sé kè yo sav kè yo ké pé vin pibon zanmi èvè Jéova ankò.

19. Pannan Mémoryal-la ka nouchak ni lokazyon fè, é kitan i ké fèt lanné-lasa ?

¹⁹ Jéova ba tout sèwvitè a-y ki fidèl on bèl èspérans (Jér. 29:11). Mémoryal-la, sé on moman èspésyal pou nouchak. Nou ka pé ba Jéova é Jézi louwanj pas sé grasa yo si nou ké pé ni lavi pou touttan. Pou sé vré krétyen-la, Mémoryal-la sé réinyon-la ki pi enpòwtan la an lanné-la. Lanné-lasa, i ké fèt lè sanmdi 27 maws 2021 apré solèy-la kouché. Ni onlo moun ki ké pé sélébré Mémoryal-la alèz a yo piskè la yo ka rété la, yo pa entèwdi aktivité an nou. Ni dòt ki ké sélébré Mémoryal-la menmsi la yo ka rété la yo ka entèwdi aktivité an nou. Ni dòt aprézan ki ké sélébré Mémoryal-la magré yo lajòl. Men kèlkèswa sitiyasyon an nou, fò pa nou oubliyé kè Jéova, Jézi, sé zanj-la é sé wen-la ki anhola ké pran plézi gadé-nou. Alò, nou ka di chak lasanblé, chak gwoup é chakmoun, pasé on bèl Mémoryal !