1. Sèwten pawmi nou pé ka pozé-yo menm kèsyon ki wa David. Ki kèsyon ésa ?

NOUTOUT anvi viv alèz an nou. Nou ponyonn pa enmé lè nou angwasé. Men défwa, tèlman nou istrésé, nou ka santi kè nou ka toufé ! Sé pousa sèwten sèwvitè a Bondyé pé ka pozé-yo menm kèsyon ki wa David : « An enkyèt é chakjou tchè an mwen anpenn. Men kitan sa ké fin ? » (Sòm 13:2).

2. Ka nou ké vwè adan awtik-lasa ?

² Menmsi délè, noutout ka santi-nou angwasé, ni sèwten biten nou pé fè pou nou pa lésé sa pran lanmen asi nou. Adan awtik-lasa, adan on prèmyé tan, nou ké palé dè sa ki pé rann-nou enkyèt. Aprésa, nou ké vwè 6 biten nou pé fè pou trankilizé lèspri an nou lè nou ka jwenn pwoblèm.

3. Ka ki té’é pé rann-nou enkyèt é ès ni mwayen anpéché sa fèt ?

³ Ni onlo biten ki pé rann-nou enkyèt, é dépawfwa, nou pé pa anpéché sa rivé. Pa ègzanp, pri a manjé-la, pri a sé lenj-la é pri a lwayé-la ka ògmanté chak lanné, é nou pé pa fè ayen kont sa. É délè, kolèg-travay an nou oben kanmarad-lékòl an nou ka fè présyon asi nou pou pé sa fè-nou fè on biten ki malonnèt oben pou pé sa fè-nou fè on péché sèksyèl. Nou té’é byen anvi yo arété anbété-nou, men malérèzman, nou pé pa fè ayen kont sa. É si la nou ka rété la ni onpakèt krim ka fèt, nou pa annéta fè ayen pou arété sa. Tout sé pwoblèm-lasa ka ègzisté pas lamajorité a sé moun-la pa’a suiv sé prensip-la ki an  Bib-la. Sé Satan ki ka gouvèné mond-lasa é i sav trèbyen kè sistèm-lasa ka angwasé moun é kè sa pé anpéché-yo sèvi Jéova (Mat. 13:22 ; 1 Jan 5:19). Alò, sa pa ka étoné-nou si adan mond-lasa ni onpakèt pwoblèm ki ka istrésé moun.

4. Si pwoblèm an nou ka pran tèt an nou, ka ki té’é pé rivé-nou ?

⁴ Délè, tèlman pwoblèm an nou ka pran tèt an nou, sé yenki sa nou ka sonjé. Pa ègzanp, nou pé enkyèt pas nou pa sav si nou ké ni asé lajan pou nou achté sa nou bizwen. Nou pé enkyèt osi pas si nou tonbé malad, nou pé’é pé ay travay é nou ka riské dè pèd travay an nou. Nou pé ka enkyété-nou osi pas nou pè fè on biten ki ké fè Jéova lapenn. Talè, Satan ké pousé bannélo a-y ataké pèp a Bondyé, é konm nou po’o sav kijan nou ké réyaji lè sa ké fèt, sa pé ka angwasé-nou osi. Alò, nou pé ka mandé-nou èskè sa nòwmal kè nou enkyété-nou pou sé biten-lasa.

5. Jézi di : « Arété enkyété-zòt ». Ka i té vlé di pa la ?

⁵ Nou ka sonjé sa Jézi di disip a-y : « Arété enkyété-zòt » (Mat. 6:25). Ès Jézi té vlé di kè fò-nou viv alawoulib-lébwa-kwazé ? Awa ! Pa oubliyé kè an Bib-la, yo ka palé-nou dè sèwten sèwvitè a Jéova ki té fidèl é ki té angwasé bon angwasé la menm. Men a pa pousa Jéova pa té kontan-yo * ! (1 Wa 19:4 ; Sòm 6:3). Men an réyalité, sé ankourajé Jézi té ka ankourajé-nou. Jézi té vlé fè-nou sonjé kè fò-nou mèt Jéova prèmyé douvan an vi an nou é kè fò pa sa ki ka enkyété-nou anpéché-nou fè sa. Alò, ka nou pé fè lè nou enkyèt ? (gadé ti karé-la «  Ka ou pé fè »).

6. Sèlon Filipyen 4:6, 7, ka ki pé édé-nou trankilizé lèspri an nou ?

⁶ 1) Priyé souvan. Lèwvwè on pwoblèm ka pran tèt a-w, priyé Jéova pou i pé sa édé-w (1 Pyè 5:7). Konsa, Jéova ké trankilizé lèspri a-w, é pousa, i ké ba-w « lapé ki ka vin dè Bondyé ki ka dépasé tousa on moun pé konprann » (li Filipyen 4:6, 7). Grasa lèspri sen a-y ki puisan toubònman, Jéova ké trankilizé tchè a-w (Gal. 5:22).

7. Ka pou nou pa jen oubliyé lè nou ka priyé Jéova ?

⁷ Lè ou ka priyé Jéova, di-y tousa ou ni an fon a tchè a-w. Pa pè di-y sa ki ka trakasé-w é sa ou ka rèsanti. Si sé on pwoblèm ni mwayen réglé, mandé Jéova sajès é mandé-y fòs pou ou pé sa réglé-y. Si sé on pwoblèm ki pa ni solisyon, mandé Jéova édé-w pou ou pa pran tèt a-w twòp. Si ou ka priyé Jéova pou on biten byen prési, lè i ké réponn-vou, ou ké vwè sa pi fasilman. Si Jéova pa’a réponn-vou tousuit, pa di ou ka arété priyé-y, pas Jéova vé kè ou di-y sa ki ka trakasé-w ègzaktèman é i vé kè ou kontinyé priyé-y anrapò èvè sa (Lik 11:8-10).

8. Ka fò pa nou oubliyé di Jéova adan priyè an nou ?

⁸ Lè ou ka di Jéova tousa ki ka trakasé-w, pa oubliyé di-y mèsi osi. Lè nou ni pwoblèm é kè nou ka sonjé tout bénédisyon Jéova ka vidé asi nou, sa ka fè-nou dibyen. Men dépawfwa, nou pa sav kijan pou nou di Jéova sa nou ka rèsanti.  Alò, adan on ka konsa, fò-nou sonjé kè Jéova ké toujou réponn a priyè an nou menmsi sèl ti biten nou pé di sé : « Souplé, édé-mwen ! » (2 Kron. 18:31 ; Wom. 8:26).

9. Lè nou pè, ka pou nou fè ?

⁹ 2) Pa apiyé-w asi sajès a-w, konté asi ta Jéova. An tan a pwofèt Izayi, pèp a Jida té pè kè sé Asiriyen-la ataké-yo. Konm yo pa té vé vin èsklav a sé Asiriyen-la, yo mandé sé Éjipsyen-la édé-yo (Iz. 30:1, 2). Men Jéova di-yo kè konm sé sé Éjipsyen-la yo ka fè konfyans, malè ké rivé-yo (Iz. 30:7, 12, 13). Jéova voyé Izayi di-yo ka pou yo fè pou yo viv ansékirité. Mi sa pwofèt-la di-yo : « Si zò rété kalm é si zò ni konfyans an Jéova, sé sa ki ké fòs a zòt » (Iz. 30:15b).

10. Adan ki sitiyasyon nou pé montré Jéova kè nou ka fè-y konfyans ?

¹⁰ A ki moman pou nou montré kè nou ni konfyans an Jéova ? An-nou pran déotwa ègzanp. Imajiné kè yo ka pwopozé-w on travay ki ké pèwmèt-vou gangné plis lajan men ki ké oblijé-w fè onpakèt lè siplémantè, é ki ké anpéché-w sèvi Jéova kon ou ka sèvi-y konnyéla la. Oben imajiné kè on kolèg-travay a-w bizwen fè bas èvè-w, men moun-lasa pa batizé. Oben si on moun an fanmi a-w ka di-w : « Swa sé mwen swa sé Jéova ! ». Ka ou ka fè ? Kèlkèswa sitiyasyon-la, sa pé’é fasil ba-w, men Jéova ké gidé-w pou ou pé sa pran bon désizyon-la (Mat. 6:33 ; 10:37 ; 1 Kor. 7:39). Men kèsyon-la sé : ès ou ké fè Jéova konfyans é ès ou ké suiv dirèksyon-la i ka ba-w la ?

11. Ki istwa an Bib-la ki pé édé-nou rété kalm lèwvwè yo ka pèwsékité-nou ?

¹¹ 3) Gadé pou ou vwè ka sé bon ègzanp-la é ka sé mové ègzanp-la pé aprann-vou. Adan Labib, nou ka touvé onlo istwa ki ka montré kè sa enpòwtan kè nou rété kalm é kè nou fè Jéova konfyans. Toupannan ou ka étidyé sé istwa-lasa, éséyé vwè ka ki édé sèwvitè a Bondyé rété kalm lè lènmi a yo té ka pèwsékité-yo. Pa ègzanp, lè Sannédren-la mandé sé apòt-la arété préché, yo pa lésé lafrous pran lanmen asi yo. Okontrè, mi sa yo réponn èvè onlo kouraj : « Nou dwèt kouté Bondyé olyé nou kouté lézòm » (Akt 5:29). Menm apré yo ba-yo bon fwèt, sé apòt-la pa pèd lakat. Poukwa ? Pas yo té sav Jéova té ka soutyenn-yo. Yo té sav i té kontan-yo. Kifè, yo kontinyé préché bon nouvèl-la (Akt 5:40-42). Dayè pou yonn, lè yo té k’ay tchouyé Étyèn, i pa chaléré kò a-y, é figi a-y té « kon figi a on zanj » (Akt 6:12-15). Poukwa ? Pas i té sèten kè Jéova té fyè-w dè-y.

12. Sèlon 1 Pyè 3:14 é 4:14, poukwa nou pé ni tchè-kontan menmsi yo ka pèwsékité-nou ?

¹² Sé apòt-la té ka vwè on mannyè ki klè ké Jéova té ka soutyenn-yo piskè i té ba-yo pouvwa pou yo té fè mirak (Akt 5:12-16 ; 6:8). Sé vré, jòdijou, Jéova pa’a ban-nou pouvwa pou nou fè mirak, men grasa Pawòl a-y, Jéova ka fè-nou sav kè lè yo ka pèwsékité-nou pas nou ka fè sa ki byen, nou pé ni tchè-kontan pas i fyèw dè nou é i ka ban-nou lèspri sen a-y pou soutyenn-nou (li 1 Pyè 3:14 ; 4:14). Alò, fò pa nou rété sizé la ka réfléchi pou vwè ka nou ké fè siwvwè yo ka pèwsékité-nou dèmen. Okontrè, fò-nou fè on travay pou an fon a tchè an nou nou sèten a san pou san kè Jéova ké soutyenn-nou é kè i ké sové-nou. Sé prèmyé disip-la  té ni konfyans adan on bèl pwomès Jézi té fè-yo. Nou osi, fò-nou ni konfyans an pwomès-lasa. Mi sa i ka di : « An ké fè-zòt sav sa pou zò di é an ké ba-zòt sajès, konsa, menmsi tout lènmi a zòt mété-yo ansanm, yo pé’é pé fè ayen kont sé pawòl-lasa é yo pé’é pé réponn ayen nonplis. » É Jézi ban-nou on garanti èvè sa : « Si zò andiré, zò ké sové vi a zòt » (Lik 21:12-19). É ni on biten pou nou pa jen oubliyé : Jéova konnèt tout sèwvitè fidèl a-y patchè ! Kifè, menmsi yo mò, i ké pé résisité-yo.

13. Ni sèwten moun ki arété fè Jéova konfyans. Kijan ègzanp a yo pé édé-nou ?

¹³ Ni moun ki pa rivé rété kalm é ki pa fè Jéova konfyans. Ègzanp a yo pé aprann-nou onlo biten osi. Si nou pran tan étidyé ègzanp a yo, nou ké vwè ka pou nou fè pou nou pa fè menm érè ki yo. Pa ègzanp, lè Aza vin wa a Jida, on gwo lawmé vin ataké-y. Alò, i fè Jéova konfyans, é Jéova fè-y gagné konba (2 Kron. 14:9-12). Men aprésa, Baaza, wa a Izrayèl vin ataké-y èvè on lawmé ki té pli piti. Men kou-lasa, Aza pa fè fon asi Jéova pou sové-y. Olyé dè sa, i ay péyé sé Siriyen-la pou yo té pé sa édé-y (2 Kron. 16:1-3). É lèwvwè i pran on ti laj, i trapé on maladi grav, men menm a moman-lasa, i pa konté asi Jéova (2 Kron. 16:12).

14. Ka sé érè-la Aza fè la ka aprann-nou ?

¹⁴ Odépa, lèwvwè Aza té ka jwenn pwoblèm, sé an 2 bra a Jéova i té k’ay. Men aprésa, i koumansé fè gran misyé a-y. Olyé i té konté asi Jéova, i té ka chèché a rézoud pwoblèm a-y limenm a-y. Pétèt kè nou té’é pé pansé kè lè Aza mandé sé Siriyen-la édé-y sé té on bon biten, paskè nou ni lenprésyon kè sa i désidé fè la maché. Men an réyalité, tousa sé té pou on ti moman piskè Jida pa tadé a touvé-y an lagè ankò. Alò, Jéova voyé on pwofèt palé ba-y é mi sa i di-y : « Konm ou fè wa a sé Siriyen-la konfyans olyé ou té fè Jéova, Bondyé a-w, konfyans, sé pousa lawmé a wa a sé Siriyen-la chapé anba men a-w » (2 Kron. 16:7). Lèwvwè nou ka jwenn difikilté, fò-nou fè atansyon pou nou pa fè fon asi noumenm, pas nou vwè ola sa menné Aza. Okontrè, fò-nou lésé Jéova gidé-nou grasa Pawòl a-y. É menm lè nou ni on désizyon présé-présé a pran, si nou ka rété kalm é si nou ka fè Jéova konfyans, i ké édé-nou pran bon désizyon-la.

15. Lè nou ka li Labib, ni on biten entérésan nou té’é pé fè. Ki biten ésa ?

¹⁵ 4) Fè on éfò pou rètyenn sèwten pasaj an Bib-la. Lè ou tonbé anlè on vèwsé ki ka montré kè sa enpòwtan kè ou trankilizé lèspri a-w é kè ou fè Jéova konfyans, fè on éfò pou i rété an tèt a-w. Pou ou pé sa rètyenn-li, li-y fò oben maké-y on koté pou ou pé sa wouvin asi-y souvan. Jéova té di Joziyé kè si i té vé aji èvè sajès, fò i té pran labitid li Lwa-la é fò i té pran tan réfléchi asi-y. Sa i té’é li an Lwa-la té’é ba-y fòs é kouraj pou dirijé pèp a Bondyé é sa té’é édé-y pa lésé lafrous pran lanmen asi-y (Joz. 1:8, 9). Ni onlo vèwsé an Bib-la ki ké édé-w trankilizé lèspri a-w lè ou ka touvé-w adan on sitiyasyon ki té’é pé fè-w pèd lakat (Sòm 27:1-3 ; Pwov. 3:25, 26).

16. Kijan Jéova ka sèvi èvè sé frè é sè a lasanblé-la pou édé-nou rété kalm é pou édé-nou ni konfyans adan-y ?

¹⁶ 5) Frékanté frè é sè a lasanblé-la. Jéova ka itilizé sé frè é sè-la pou édé-nou  rété kalm é pou édé-nou ni konfyans adan-y. Lè nou k’ay réinyon, nou ka pé kouté dé bèl diskou, nou ka pé tann komantè a frè é sè an nou é nou ka pé ni dé bèl konvèwsasyon èvè yo ki ka ankourajé-nou toubònman (Ébr. 10:24, 25). Lè nou ka wouvè tchè an nou ba sé zanmi-la nou ni an lasanblé-la, sa ka fè-nou dibyen. Lè on zanmi ka di-nou « on bèl ti pawòl », sa ka trankilizé-nou (Pwov. 12:25).

17. Sèlon Ébré 6:19, kijan èspérans an nou pé trankilizé-nou lè nou ka jwenn difikilté ?

¹⁷ 6) Toujou sonjé èspérans a-w. Èspérans a Wayòm-la ka touvé-y kon « lank a bato pou nanm an nou ». I ka édé-nou rété kalm lè nou ka jwenn difikilté (li Ébré 6:19). Sonjé paradi-la Jéova ka pwomèt-nou la. Lèwvwè i ké la, ponmoun pé’é enkyèt ankò (Iz. 65:17). Éséyé imajiné jan lavi ké trankil adan mond nouvo la. Pé’é ni ayen pou anbété-nou ankò (Mich. 4:4). Lè nou ka palé moun dè mond nouvo la, nou ka kwè adan-y pi fò ankò. Alò, fè tousa zò pé pou préché é pou fè disip. Si sé sa zò ka fè, alò zò ké sèten a san pou san kè sa zò ka èspéré la ké fèt (Ébr. 6:11).

18. Ki difikilté nou pé rivé a jwenn dèmen é ka nou pé fè pou andiré ?

¹⁸ Konm lafen toupré rivé, pi nou ké ay é pi nou ké jwenn pwoblèm ki ka angwasé-nou. Tèks a lanné 2021 ké édé-nou andiré sé difikilté-lasa é ké édé-nou rété kalm. An Izayi 30:15 nou ka li : « Si zò rété kalm é si zò ni konfyans, sé sa ki ké fòs a zòt. » Sé Jéova ki fè-nou pwomès-lasa. Alò, pannan lanné-la, an-nou montré kè nou ni konfyans adan pwomès-lasa.