1-3. Sèwten sitiyasyon difisil toubònman é yo pé fè-nou pléré. Ki sitiyasyon ésa ?

DÈNYÉ fwa ou pléré sé té kitan ? Sé vré, défwa, tèlman nou kontan sa ka fè-nou pléré. Men, pli souvan ki rarman lèwvwè nou ka pléré sé paskè nou anpenn. Pa ègzanp, nou ka pléré lèwvwè nou ka pèd on moun nou enmé. Mi sa Lorilei *, on sè ki ka rété o Zétazini maké : « Lè an pèd fi an mwen, dépawfwa an té ka soufè tèlman, kè an té ni lenprésyon kè ayen pa té’é pé soulajé-mwen. A moman-lasa, an té ka pansé kè an pa té’é pé andiré sa. »

² Ni onlo dòt biten ki pé fè-nou pléré. Hiromi sé on sè ki ka rété o Japon é i pyonyé. Mi sa i di : « Adan téritwa an mwen, sé moun-la vé pa tann palé dè Labib. Lè an ka vwè sa, sa ka kasé 2 bra an mwen. Délè, dlo ka sòti an zyé an mwen lè an ka mandé Jéova pou i édé-mwen touvé on moun ki anvi tann palé dè lavérité. »

³ Ès ou ja rèsanti menm biten ki sé sè-lasa ? Sé sa onlo adan nou ka rèsanti osi (1 Pyè 5:9). Sé vré, noutout anvi sèvi Jéova èvè tchè-kontan, men dépawfwa, nou ka pléré pas nou pèd on moun nou té enmé oben pas nou ka santi-nou dékourajé. Sé pé osi pas nou ka jwenn sèwten difikilté é pou rété fidèl a pa on biten ki fasil (Sòm 6:6 ; 100:2). Lè nou ka santi-nou tris konsa, ka nou pé fè ?

4. Ka nou ké vwè adan awtik-lasa ?

 ⁴ Ègzanp a Jézi ka aprann-nou onlo biten. Tèlman i té tris, i té ni lokazyon pléré a plizyè rèpriz (Jan 11:35 ; Lik 19:41 ; 22:44 ; Ébr. 5:7). Adan awtik-lasa, nou ké vwè 3 sitiyasyon ki fè Jézi pléré é nou ké vwè osi ka nou pé fè lè nou ka jwenn dé sitiyasyon kon séla.

5. Ka istwa-la nou ka touvé an Jan 11:32-36 ka aprann-nou asi Jézi ?

⁵ An 32 a épòk an nou, pannan livè, Laza, on bon zanmi a Jézi tonbé malad é i mò (Jan 11:3, 14). I té ni 2 sè, Mari é Mawt, é Jézi té enmé-yo toulétwa toubònman. Lèwvwè yo pèd frè a yo, Mari é Mawt santi tchè a yo ka raché. Apré mò a Laza, Jézi pati pou ay Bétanni owa Mari é Mawt. Lè Mawt tann Jézi ka vin, i kouri jwenn-li. I di-y konsa : « Ségnè, si ou té la, frè an mwen pa té’é mò » (Jan 11:21). Imajiné jan Mawt té tris a moman-lasa. On ti moman apré, lè Jézi vwè Mari é sélézòt moun-la ki té la la ka pléré, ‘dlo sòti an zyé a-y’ (li Jan 11:32-36).

6. Poukwa Jézi pléré jou-lasa ?

⁶ Poukwa Jézi pléré jou-lasa ? Pétèt Jézi té ka sonjé jan Laza soufè lèwvwè i té malad. Oben i té ka imajiné sa Laza rèsanti lèwvwè i rann-li kont kè i té kay mò. Pétèt i té ka pléré osi pas i vwè jan Mari é Mawt té ka soufè akòz dè mò a frè a yo. Mi sa liv Étude perspicace des Écritures * ka di : « Lè Jézi vwè jan sè a Laza té ka soufè lè i mò, i plenn é ‘dlo sòti an zyé a-y.’ » Si ou pèd on fanmi a-w oben on zanmi a-w, pétèt kè ou ka rivé konprann sa Jézi, Mari é Mawt rèsanti. Aprézan, an-nou vwè 3 lidé enpòwtan kè istwa-lasa ka aprann-nou.

7. Apré mò a Laza, Jézi pléré. Ka sa ka aprann-nou asi Jéova ?

⁷Jéova ka konprann sa ou ka rèsanti. Jézi sé « pòtré » a Pap’a-y (Ébr. 1:3). Kifè, lè i pléré, i montré-nou sa Pap’a-y  té ka rèsanti osi (Jan 14:9). Si ou pèd on moun ou enmé, ou pé sèten kè Jéova ka vwè jan ou ka soufè. Men a pa enki vwè i ka vwè sa, i ka soufè ansanm èvè-w. Tchè a-w fann men ou pé sèten kè Jéova vlé géri-y (Sòm 34:18 ; 147:3).

8. Poukwa nou pé sèten kè Jézi ké résisité moun kè nou enmé ?

⁸Jézi anvi résisité moun ou pèd. Tibwen tan avan Jézi pléré, mi sa i pwomèt Mawt : « Frè a-w ké résisité. » É Mawt kwè adan sa Jézi di (Jan 11:23-27). Konm Mawt té ka adoré Jéova, i té sav kè pwofèt Éli é pwofèt Élizé té ni lokazyon résisité moun an tan a yo (1 Wa 17:17-24 ; 2 Wa 4:32-37). É sèten i té ja tann di kè Jézi té résisité plizyè moun (Lik 7:11-15 ; 8:41, 42, 49-56). Vou osi, ou pé sèten kè moun ou enmé ké résisité. Lè Jézi té ka konsolé zanmi a-y ki té anpenn, i pléré. Sa ka montré jan Jézi présé résisité moun ki mò !

9. Menmjan ki Jézi, kijan nou pé soutyenn on moun ki pèd on fanmi a-y oben on zanmi a-y ? Bay on ègzanp.

⁹Vou osi ou pé soutyenn moun ki pèd on moun yo té enmé. Jézi pléré èvè Mawt é Mari men anplisdisa i kouté-yo é i konsolé-yo. Nou pé fè menm biten-la lèwvwè on moun pèd on fanmi a-y oben on zanmi a-y. Dan, sé on ansyen ki ka viv an Òstrali. Mi sa i ka rakonté : « Lèwvwè madanm an mwen mò, an té bizwen yo édé-mwen. Onlo frè é madanm a yo té toujou la pou mwen lèwvwè an té bizwen palé. Yo té la lajouné kon lannuit. Yo té ka lésé-mwen di tousa ki té asi tchè an mwen. É lè an té ka pléré yo pa té jenné. Yo fè onlo biten pou édé-mwen osi. Pa ègzanp, yo lavé vwati an mwen, yo fè konmisyon pou mwen, yo fè manjé pou mwen lèwvwè an pa té ni fòs ankò é yo té ka priyé èvè mwen toutlè. Yo montré kè yo té dé zanmi-frè pou mwen, kivédi dé frè é dé sè ou ‘pé konté asi yo lè malè ka rivé’ » (Pwov. 17:17).

10. Lik 19:36-40 ka palé dè on évènman. Kilès ?

¹⁰ Lè 9 nizan 33, Jézi rivé Jérizalèm. Lè yo vwè-y ka vin olwen, onpakèt moun sanblé é toupannan Jézi té ka avansé yo té ka mèt lenj a yo atè-la douvan-y toutolon a chimen-la. Lè yo té ka fè sa, yo té ka montré kè yo té ka rèkonnèt kè Jézi sé Wa a yo. Sèten a moman-lasa sé moun-la té ni tchè-kontan (li Lik 19:36-40). Sé pousa, lèwvwè sé disip-la vwè sa ki pasé apré, yo rété èstèbèkwè. Mi sa nou ka li : « Lè [Jézi] rivé toupré Jérizalèm, i gadé vil-la é i mété-y ka pléré » (Lik 19:41-44). Jézi anonsé on biten ki té’é rivé Jérizalèm é sé on biten ki té’é rèd toubònman. Toupannan i té ka di sa dlo té ka sòti an zyé a-y.

11. Poukwa Jézi pléré lè i sonjé moun ki té ka rété Jérizalèm ?

¹¹ Lè Jézi rantré Jérizalèm, sé Juif-la akéyi-y byen. Men Jézi té anpenn pas i té sav kè onlo adan yo pa té’é jen aksèpté mésaj a-y. Akòz dè sa yo té’é détwi Jérizalèm, onlo Juif té’é mò é séla ki té’é rété vivan la té’é vin èsklav (Lik 21:20-24). Malérèzman, kon Jézi té anonsé lamajorité a sé moun-la pa kouté-y. É adan téritwa a-w, lè ou ka préché bon nouvèl-la, kijan lamajorité a sé moun-la ka réyaji ? Si magré tousa ou ka fè lavérité pa ka entérésé onlo moun, ka ègzanp a Jézi pé aprann-vou lèwvwè i pléré akòz dè sé moun Jérizalèm la ? An-nou vwè 3 lidé ankò ki vréman enpòwtan.

12. Jézi pléré lè i sonjé moun ki té ka rété Jérizalèm. Ka sa ka aprann-nou asi Jéova ?

 ¹²Jéova ka sousyé-y dè toutmoun asi latè. Lèfètkè Jézi pléré, sa ka fè-nou sonjé jan Jéova ka sousyé-y dè toutmoun asi latè. « I vé pa ponmoun détwi, men i vé kè toutmoun rivé rèpanti » (2 Pyè 3:9). Jòdijou nou ka montré kè nou enmé sé moun-la lè nou ka fè tousa nou pé pou édé-yo konnèt bon nouvèl a Wayòm-la (Mat. 22:39).

13-14. Kijan Jézi montré kè i té ni konpasyon pou sé moun-la, é ka nou pé fè pou imité-y ?

¹³Jézi travay rèd toubònman pou i té fè moun konnèt bon nouvèl-la. I montré kè i té enmé sé moun-la pas i té ka pwofité dè tout ti lokazyon i té ni pou anségné-yo (Lik 19:47, 48). I té ka fè sa pas i té ni onlo konpasyon pou yo. Délè, té ni tèlman moun ki té vlé kouté Jézi, kè li é disip a-y pa menm té ni tan manjé (Mawk 3:20). É onfwa, ni on boug ki té vlé palé èvè Jézi. Magré sé té lannuit, Jézi aksèpté palé èvè-y (Jan 3:1, 2). Jézi préché ba onlo moun men anfinaldikont lamajorité adan yo pa vin disip a-y. Men antouka, yotout tann tout mésaj-la Jézi té vin pòté ba yo la. Nou osi, nou vlé pwofité dè tout ti lokazyon nou ni pou édé sé moun-la konnèt bon nouvèl-la (Akt 10:42). Pou nou rivé fè sa, fò-nou paré a chanjé jan nou ni labitid préché.

¹⁴Fo ou paré a chanjé pwogram a-w. Si nou toujou ka préché a menm lè-la nou pé’é jwenn tout sé moun-la bon nouvèl-la ka entérésé la. Mi sa Matilda, on sè ki pyonyé ka di : « Mwen é mari an mwen nou ka éséyé préché a diféran moman an jouné-la. Pa ègzanp, granbonnè maten nou k’ay préché la i ni biwo é la i ni magazen. Koté midi, ni onlo moun an lari-la, kifè, nou ka sèvi èvè sé prézantwa-la pou préché ba yo. É an fen a jouné-la, nou ka préché dè kaz-an-kaz pas sé a moman-lasa sé moun-la akaz a yo. » Olyé nou ay préché lè sa ka aranjé-nou, fò-nou paré a préché lè nou pi fasil a touvé sé moun-la. Nou pé sèten kè Jéova ké kontan tout sé éfò-la nou ka fè la.

15. Dapré Lik 22:39-44, ka ki pasé pannan dènyé lannuit-la Jézi pasé asi latè la ?

¹⁵ Dènyé lannuit Jézi pasé asi latè sé té lè 14 nizan 33 é i ay adan jaden a Jètsémani. Lè i rivé la, i pasé on bon moman ka priyé Pap’a-y (li Lik 22:39-44). A moman lasa « i hélé é i pléré gwodlo lè i sipliyé » Pap’a-y (Ébr. 5:7). Men ka i mandé Pap’a-y ? I mandé-y fòs pou i té pé sa rété fidèl é pou i té pé sa fè volonté a-y. Jéova vwè jan Gason a-y té angwasé é i voyé on zanj pou ba-y fòs.

16. Poukwa Jézi pléré lè i priyé adan jaden a Jètsémani ?

¹⁶ Poukwa Jézi pléré lè i té ka priyé adan jaden a Jètsémani ? Pétèt sa té ka chouboulé-y toubònman lè i té ka sonjé kè sé moun-la té’é vwè-y kon on moun ki pa ni pon rèspé pou non a Bondyé. Anplisdisa, i té sav kè i té ni on gwo rèsponsabilité asi do a-y. Fò i té défann répitasyon a Pap’a-y é pou sa fò i té rété fidèl. Si ou ni dimal a rété fidèl akòz dè on difikilté kè ou ka jwenn, lè ou ka sonjé kè Jézi pléré, ka sa ka aprann-vou ? An-nou vwè 3 lidé ankò ki vréman enpòwtan.

17. Jan Jéova réponn a priyè a Jézi ka aprann-nou on biten. Ki biten ésa ?

¹⁷Lè ou ka sipliyé Jéova, i ka kouté-w. Jézi priyé Jéova èvè tout fòs a-y é Jéova kouté-y. Poukwa sa ? Paskè sa ki té pli enpòwtan pou Jézi sé té rété fidèl a Pap’a-y é défann répitasyon a Pap’a-y. Si sé sa ki pli enpòwtan pou nou osi, Jéova ké réponn a priyè an nou lèwvwè nou ké mandé-y édé-nou (Sòm 145:18, 19).

18. Poukwa nou pé di kè Jézi sé on zanmi ki ni onlo konpasyon ?

¹⁸Jézi sav sa ou ka rèsanti. Lè nou enkyèt, a pa ti kontan nou kontan lèwvwè nou ni on zanmi ki ka konprann sa nou ka rèsanti, siwtou si limenm a-y ja pasé pa la. Ében sé on zanmi konsa Jézi yé. I sav ka sa yé lè ou ka santi kè ou pa ni fòs ankò é lè ou bizwen yo édé-w. I ka konprann féblès an nou é i ka fè ansòt pou yo édé-nou « lè nou bizwen » (Ébr. 4:15, 16). Lè i té adan jaden a Jètsémani, Jézi  lésé on zanj édé-y. Alò nou osi, an-nou fè kon Jézi. An-nou lésé Jéova édé-nou, ki sé grasa on piblikasyon, ki sé grasa on vidéo oben grasa on diskou. I pé sèvi osi èvè on ansyen oben on zanmi ki byen doubout adan lavérité ki ka vin vwè-nou pou ankourajé-nou.

19. Ka ègzanp a Luz ka aprann-nou ?

¹⁹Jéova ké ba-w sa yo ka kriyé « lapé ki ka vin dè Bondyé ». Kijan Jéova ka ban-nou fòs ? Lè nou ka priyé, Jéova ka ban-nou lapé « ki ka dépasé tousa on moun pé konprann » (Filip. 4:6, 7). « Lapé ki ka vin dè Bondyé », ka édé-nou rété kalm é ka édé-nou woupran sans an nou. Sé sa on sè, non a-y sé Luz ni lokazyon viv. Mi sa i ka rakonté : « An té ka santi-mwen tousèl. Dépawfwa, an jous té ka pansé kè Jéova pa té enmé-mwen. Men lè sé lidé-lasa té ka travèsé lèspri an mwen, tousuit an té ka di Jéova sa an té ka rèsanti. É lè an té ka priyé, an té ka santi-mwen myé. » Ka ègzanp a Luz ka montré-nou ? Lapriyè pé trankilizé-nou.

20. Jézi pléré a plizyè rèpriz. Ka sa ka aprann-nou ?

²⁰ Jézi pléré a plizyè rèpriz. Sa ka aprann-nou onlo biten ki vréman itil é a pa ti ankourajé sa ka ankourajé-nou ! Fò-nou soutyenn zanmi an nou ki pèd on moun yo enmé é lè noumenm an nou adan sitiyasyon-lasa, fò-nou sèten kè Jéova é Jézi ké soutyenn-nou. Lè nou ka préché é lè nou ka anségné, fò-nou aji èvè konpasyon menmjan ki Jéova é Jézi. Sa ka rékonfòwté-nou toubònman lèwvwè nou ka sonjé kè yo ka konprann byen sa nou ka rèsanti, kè yo ka konprann féblès an nou é kè yo vé édé-nou andiré. Alò an-nou kontinyé mèt sa nou aprann an pratik, jistan Jéova « suiyé tout dlo an zyé » an nou kon i pwomèt (Rév. 21:4).