1. Adan ki sitiyasyon difisil David touvé-y ?

 DAVID ka chèché tout ti koté pou kaché kò a-y pas Sayil, on wa ki puisan bizwen tchouyé-y. Konm i pa ni ayen pou manjé, i k’ay adan vil a Nòb é i ka mandé Ayimélèk ba-y 5 pen tousèl (1 Sam. 21:1, 3). Aprésa, li é sé boug a-y la ay kaché kò a yo adan on gròt (1 Sam. 22:1). Men kijan David fè pou touvé-y adan sitiyasyon-lasa ?

2. Kijan Sayil mété-y limenm a-y andanjé ? (1 Samiyèl 23:16, 17).

² Sayil jalou David toubònman pas ni onlo moun ki enmé-y é pas i ja gangné onlo konba. Anplisdisa, i sav kè sé pas i pa kouté Jéova kè Jéova chwazi David pou vin wa an plas a-y asi Izrayèl (li 1 Samiyèl 23:16, 17). Men annatandan, konm sé-y ki wa toujou, i ni on gran lawmé anba men a-y é ni onlo moun ki ka pran ba-y. Alò, David té oblijé chapé kò a-y pou i pa mò. Men ès Sayil konpranndèdi kè i té’é pé anpéché Bondyé mèt David wa an plas a-y ? (Iz. 55:11). Labib pa’a ban-nou répons a kèsyon-lasa. Men ni on biten nou pé sèten : Sayil mété-y limenm a-y andanjé. Moun ki bizwen goumé èvè Bondyé toujou ka pèd.

3. Ka David té ka rèsanti parapòt a sitiyasyon-la i té ka viv la ?

³ David sé té on boug ki ni onlo imilité. A pa li ki désidé vin wa a Izrayèl men sé Jéova ki chwazi mété-y la  (1 Sam. 16:1, 12, 13). Sayil touvé-y hay David é i pa té vlé vwè-y ni an blan ni an nwè. Men ès David di Jéova kè sé fòt a-y si vi a-y té andanjé ? Oben ès i té ka plenn-li pas i pa té ni asé manjé pou i té manjé oben pas fò i té kaché kò a-y adan on gròt ? Awa, okontrè ! Pétèt kè sé lèwvwè i té adan gròt-lasa kè i maké bèl ti chanté pou louwé Bondyé. É sé adan ti chanté-lasa kè nou ka touvé sé pawòl-la ki adan tèks a lanné-la : « Pa ni pon bon biten moun ki ka chèché Jéova pé’é ni » (Sòm 34:10).

4. A ki kèsyon nou ké réponn adan awtik-lasa é poukwa yo enpòwtan ?

⁴ Jòdijou, onlo sèwvitè a Jéova pa ni asé manjé é ka manké-yo onlo dòt biten pou viv b. Nou vwè sa siwtou pannan pandémi a Covid-19 la. Anplisdisa, akòz dè « gwo tribilasyon-la » ki ka vin la, biten-la ké vin pli rèd ankò (Mat. 24:21). É konm nou ja sav sa, an-nou réponn a sé 4 kèsyon-lasa ki vréman enpòwtan : An ki sans pa té ka manké David ayen ? Poukwa fò-nou aprann kontanté-nou dè sa nou ni ? Poukwa nou pé sèten kè Jéova ké pran swen an nou ? É kijan nou pé préparé-nou pou sa ki ké fèt dèmen ?

5-6. David di pa ni pon bon biten ki ké manké moun ki ka sèvi Jéova. Kijan Sòm 23:1-6 ka édé-nou konprann sa ?

⁵ Lè David di kè ‘pa ni pon bon biten ki ké manké moun ki ka sèvi Bondyé’, ka i té vlé di pa la ? Lè David maké Sòm 23 la, i di apéprè menm biten la. Kifè, sòm-lasa pé édé-nou konprann ka i té vlé di pa la (li Sòm 23:1-6). Mi konsa sòm-lasa ka koumansé : « Jéova sé Bèwjé an mwen. Pé’é manké-mwen ayen. » É adan rèstan a sòm-la David ka palé dè biten ki vréman enpòwtan. Pa ègzanp, i ka palé dè sé byenfé-la Jéova ka bay la pas i chwazi Jéova pou vin Bèwjé a-y. Jéova ka  gidé-y asi « chimen-la ki dwèt la » é i ka rété toupré a-y ki biten-la bon ki biten-la pa bon. David ka rèkonnèt kè menmsi i ka viv adan on « savann ki plen zèb » apapousa i pé’é ni pwoblèm. Délè, moun té’é kont-li é i té’é pé santi-y dékourajé konsi i té ka maché « on koté ki ni gwo nwèsè ». Men konm Jéova sé Bèwjé a-y i ‘pé’é pè ayen rivé-y’.

⁶ Alò an ki sans pa té ka manké David ayen ? Sé prèmyé kèsyon-la nou té pozé la é mi répons-la : David té ni tousa ki té fo-y pou i té rété bon bon zanmi èvè Jéova é i pa té bizwen ni granzafè pou i té ni tchè-kontan. I té ka kontanté-y dè sa Jéova té ka ba-y. Sa ki té pli enpòwtan pou-y sé té kè Jéova béni-y é kè i pwotéjé-y.

7. Dapré Lik 21:20-24, ki sitiyasyon difisil sé krétyen-la ki té ka viv Jidé la jwenn ?

⁷ Sa David di la ka fè-nou sonjé jan sa enpòwtan kè nou pa ba byen matéryèl twòp enpòwtans. Lè nou ka pwofité dè sa nou ni, pa ni pon pwoblèm adan sa men a pa sa ki dwèt pi enpòwtan adan vi an nou. Sé on lidé ki vréman enpòwtan toubònman é fò sé prèmyé krétyen-la ki té ka rété Jidé la té rivé konprann sa (li Lik 21:20-24). Jézi di-yo kè on jou, onlo solda té’é lantouré Jérizalèm é a moman-lasa fò-yo té’é chapé kò a yo adan sé montangn-la. Lè yo té’é lésé vil-la, sa té’é sové vi a yo, men yo té’é lésé onlo biten dèyè do a yo. Ni kèlkè lanné dè sa mi sa Tou dè Gad la té ka di : « Yo lésé jaden a yo é yo lésé kaz a yo. Yo pa menm viré pran zéfé a yo, yo té sèten kè Jéova té’é pwotéjé-yo é kè i té’é soutyenn-yo. Kifè, yo mèt Jéova prèmyé douvan adan vi a yo. »

8. Ki biten enpòwtan sa ki rivé sé krétyen Jidé la ka aprann-nou ?

⁸ Ki biten enpòwtan sa ki rivé sé krétyen Jidé la ka aprann- nou ? Mi sa Tou dè Gad la nou palé talè la ka di ankò : « Nou pé rivé a jwenn sèwten sitiyasyon ki ké montré ki enpòwtans nou ka ba byen matéryèl an nou. A moman-lasa ès sa ki ké pi enpòwtan pou nou sé ké byen matéryèl an nou oben ès sé ké rété fidèl a Jéova pou sové vi an nou ? Lè lafen ké rivé, nou ké touvé-nou douvan sèwten difikilté é nou ké oblijé fè sèwten sakrifis. Lè moman-la ké rive fò nou ké paré a fè sakrifis kon sé krétyen Jidé la c. »

9. Kijan konsèy-la Pòl ba sé Ébré-la ka ankourajé-w ?

⁹ Fò sé krétyen Jidé la té lagé près tousa yo té ni pou woukoumansé vi a yo. Ou ka imajiné jan sa té rèd pou yo ! Fò yo té ni fwa toubònman pou yo té sèten kè Jéova té’é ba-yo tousa yo té bizwen pou viv. Men Jéova té fè on biten pou édé-yo préparé-yo avan éprèv-lasa. Pòl té ba-yo on bon konsèy 5 an avan sé lawmé women la té lantouré Jérizalèm. I di-yo : « Fò pa lanmou pou lajan dirijé mannyè zò ka viv ; kontanté-zòt dè sa zò ni. Pas i di : “An pé’é jen kité-w, é an pé’é jen lagé-w.” Kifè, èvè onlo kouraj, nou pé di : “Jéova sé sèkou an mwen, an pé ké pè. Ka on nonm pé fè-mwen ?” » (Ébr. 13:5, 6). Sèten sé krétyen-la ki té tchenn kont dè sé konsèy-la kè Pòl té ba-yo la té ka rivé menné on vi ki té senp apré yo té kité Jérizalèm. Yo té sèten kè Jéova té’é ba-yo tousa ki té fo-yo. Kon Pòl di, nou osi nou pé sèten kè Jéova ké ban-nou tousa nou bizwen pou viv.

10. Dè ki « sèkré » Pòl palé ?

¹⁰ Pòl ni lokazyon ba Timoté on konsèy ki ka sanm sila nou sòti vwè la é ki valab pou nou osi. Mi sa i maké : « Si nou ni manjé é nou ni lenj, nou ké kontanté-nou dè sé biten-lasa » (1 Tim. 6:8). Men ès sa vlé di kè nou pa ni dwa manjé on bon ti manjé pou fè-nou plézi, ni ranjé kaz an nou pou nou viv alèz an nou, oben achté on nouvo lenj dè tanzantan ? Awa ! A pa sa Pòl té vlé di. Pòl té vlé kè nou konprann byen kè fò-nou kontanté-nou dè sa nou ni. Sé dè ‘sèkré-lasa’ Pòl té ka palé adan Filipyen 4:12. Sa ki ni plis valè adan vi an nou, a pa sa nou ni men sé lanmityé an nou èvè Jéova (Abak. 3:17, 18).

11. Moyiz di sé Izraélit-la kè fò-yo té aprann kontanté-yo dè sa yo té ni. Ka sa ka aprann-nou ?

¹¹ Pétèt nou ka pansé kè nou bizwen on biten pou viv men pétèt a pa konsa Jéova ka vwè sa. An-nou vwè sa Moyiz di sé Izraélit-la apré yo rété 40 an adan dézè-la : « Jéova Dyé a zòt béni-zòt adan tousa zò té ka fè. I té ka jété on zyé asi zòt pannan zò té ka maché adan gran dézè-lasa. Pannan sé 40 lanné-lasa, Jéova Dyé a zòt té èvè zòt é pa jen manké-zòt ayen » (Dét. 2:7). Pannan tout sé lanné-lasa, Jéova té ba sé Izraélit-la lamàn pou yo té manjé. I fè ansòt pou lenj a yo kivédi sé lenj-la yo té ni la lè yo sòti an Éjipt rété  nèf (Dét. 8:3, 4). Sèwten Izraélit té pé ka pansé kè sé biten-lasa pa té ka sifi. Men Moyiz fè-yo sonjé kè yo té ni tousa yo té bizwen. Nou ké fè Jéova plézi si nou ka aprann kontanté-nou dè sa nou ni. Sa i vé sé kè nou ni rèkonésans pou tousa i ka ban-nou menmsi sé dé biten tou senp. I vé osi kè nou vwè tousa i ka ban-nou kon on kado i ka fè-nou.

12. Ka ki ka montré kè David té ka fè fon asi Jéova olyé i té fè fon asi-y menm ?

¹² David té sav kè Jéova sé on moun ki fidèl é kè i ka pran swen a moun ki enmé-y. Lè i maké Sòm 34 la, vi a-y té andanjé é poutan tèlman fwa a-y té fò, i té ka vwè ‘zanj a Jéova ka kanpé alantou [a-y]’ (Sòm 34:7). Pétèt kè i té ka vwè zanj a Jéova kon sòlda ki an lagè é ki ka véyé lènmi a-y. David sé té on sòlda ki té ni onlo kouraj é Jéova té pwomèt-li kè sé-y ki té’é vin wa. I té ka mannyé épé é banza byen menm men apapousa i té ka fè fon asi pwòp kapasité a-y pou gangné lènmi a-y (1 Sam. 16:13 ; 24:12). I té ka fè fon asi Jéova pas i té sèten kè zanj a-y té pé ‘sové moun ki ka krenn Jéova’. Jòdijou nou pa’a mèt an tèt an nou kè Jéova ké fè on biten èstraòwdinè pou i pé sa pwotéjé-nou. Men on biten ki sèten sé kè si on moun ka fè Jéova konfyans é kè i ka pèd vi a-y konnyéla la, i ké viv pou touttan adan paradi-la.

13. Lè Gòg dè Magòg ké ataké-nou, poukwa yo ké ni lenprésyon kè yo ké pé fè sa yo vlé èvè nou, men poukwa fò pa nou ké pè ? (gadé imaj-la ki anlè po a jounal-la).

¹³ Talè, fò noutout ké montré si nou ka fè Jéova konfyans vréman. Lèwvwè Gòg dè Magòg, kivédi lèwvwè sé nasyon-la ké mèt-yo ansanm pou yo pé sa ataké pèp a Bondyé, pétèt kè nou ké ni lenprésyon kè yo pé rivé a tchouyé-nou. Men a moman-lasa, fò-nou ké sèten ké Jéova pé sové-nou é kè i ké fè-y. Sé nasyon-la ké vwè-nou kon dé timouton ki pa ni mèt é yo ké konpranndèdi kè yo pé fè sa yo vlé èvè nou (Ézék. 38:10-12). Sé vré, nou pa ni zàm é goumé a pa biten an nou. Alò, pou sé nasyon-la yo ké fè-nou fè pach. Men sa yo pa sav la sé kè Jéova ni zanj ki paré a défann-nou. Nou, nou sav sa pas nou ni fwa. Yo ké rété èstèbèkwè lèwvwè yo ké vwè sé lawmé-la ki ka vin goumé pou nou la ! (Rév. 19:11, 14, 15).

14. Ka nou pé fè pou préparé-nou pou sa ki ka vin talè ?

¹⁴ Ka nou pé fè pou préparé-nou pou sa ki ka vin talè ? On prèmyé biten pou nou sonjé sé kè sa pou nou mèt prèmyé douvan adan vi an nou a pa byen an nou pas talè, nou ké oblijé lésé tousa dèyè do an nou. Fò-nou aprann kontanté-nou dè sa nou ni osi é fò-nou kontan davwa nou bon bon zanmi èvè Jéova. Pi nou ké konnèt Bondyé é pi nou ké sèten kè i ké kapab pwotéjé-nou lèwvwè Gòg dè Magòg ké ataké-nou.

15. Ka David viv ki montré-y kè Jéova pa té’é jen désèvwa-y ?

¹⁵ Konnyéla, an-nou palé dè on biten ki édé David fè Jéova konfyans é ki ké préparé-nou pou sé éprèv-la nou ké jwenn la. Mi sa David maké : « Gouté é ou ké vwè jan Jéova bon. Tchè-kontan pou moun ki ka kouri kaché owa a-y ! » (Sòm 34:8). Lè nou ka li sé pawòl-lasa nou ka konprann byen poukwa David té  sav kè i té pé fè fon asi Jéova. Souvantfwa, David fè Jéova konfyans é Jéova Bondyé a-y pa jen désèvwa-y. Lèwvwè i té jenn, fò i té goumé èvè Golyat on jéan ki té fò toubònman, men mi sa i di-y : « Jòdla menm, Jéova ké fè-mwen pran lanmen asi-w » (1 Sam. 17:46). Kèlkètan apré, David ay travay pou Sayil é pannan i té ka travay ba-y, Sayil chèché a tchouyé-y a plizyè rèpriz. Men Jéova « té èvè David » (1 Sam. 18:12). David té ni lokazyon vwè Jéova édé-y, kifè i té sèten kè Jéova té’é soutyenn-li kelkèswa éprèv-la i té’é jwenn la.

16. Adan ki sitiyasyon nou pé ‘gouté’ é vwè jan Jéova bon ?

¹⁶ Si dépi konnyéla nou ka lésé Jéova gidé-nou, nou ké pi sèten ankò kè Jéova ké pé sové-nou lèwvwè gwo éprèv ké vin talè. Pa ègzanp, fò-nou ni fwa pou mandé patron an nou on konjé pou nou pé sa ay lasanblé oben pou nou mandé-y chanjé lè a travay an nou pou nou pa raté pon réinyon é pou nou pé sa préché pli fasilman. Men imajiné kè patron-la pa dakò é kè nou ka pèd travay an nou. Èskè nou sèten kè Jéova pé’é jen lagé-nou é kè i ké ban-nou tousa nou bizwen pou viv ? (Ébr. 13:5). Ni onlo pyonyé ki touvé-yo adan on sitiyasyon konsa é yo pé rakonté jan yo vwè men a Jéova adan vi a yo. Jéova sé on Bondyé ki fidèl.

17. Ka ki tèks a lanné 2022, é poukwa i ka tonbé tèk ?

¹⁷ Konm Jéova èvè nou, nou pa bizwen pè sa ki ké fèt dèmen. Si nou ka mèt wayòm a Bondyé prèmyé douvan an vi an nou, nou pé sèten kè Bondyé an nou pé’é jen lagé-nou. Sa vréman enpòwtan kè nou préparé-nou pou sé difikilté-la ki ka vin la é kè nou fè Jéova konfyans. Sé pousa, pou nou pa jen oubliyé sa, Komité santral la chwazi pou tèks a lanné 2022, Sòm 34:10 : « Pa ni pon bon biten moun ki ka chèché Jéova pé’é ni. »