1-2. a) Lèwvwè nou pèd on moun nou té enmé, a ki moman nou ka sonjé-y plis ? b) Ka Jézi fè avan jou-la i mò la, lavèy oswa ?

MENMSI sa ka fè plizyè lanné kè nou pèd on moun nou té enmé, nou ka sonjé-y toujou. É nou ka sonjé moun-lasa plis ankò lèwvwè sé anivèwsè a mò a-y.

² Chak lanné, toupatou si latè, ni milyon é milyon moun ki ka sanblé pou yo sélébré anivèwsè a mò a on moun yo enmé toubònman : Jézikris. É nou ka fè pawti a sé moun-lasa (1 Pyè 1:8). Nou ka réini-nou pou nou pé sa sonjé kè Jézi bay vi a-y an ranson pou woté-nou anba jouk a péché-la é anba jouk a lanmò (Mat. 20:28). É sé sa Jézi té vé, i té vé kè disip a-y sonjé kè i mò ba yo. Avan jou-la i mò la, lavèy oswa i fè on rèpa èspésyal é i mandé-yo kontinyé fè sa lanné apré lanné. Mi sa i di-yo : « Kontinyé fè sa pou zòt sonjé-mwen » (Lik 22:19).

3. Ka nou ké vwè adan awtik-lasa ?

³ Pawmi moun ki ka vin an Mémoryal-la, ni on ti gwoup ki ni lèspwa dè ay viv an syèl-la. Men tout sélézòt-la ki ka vin la ni lèspwa dè viv asi latè pou touttan é yo a plizyè milyon. Adan awtik-lasa nou ké vwè poukwa sé 2 gwoup-moun-lasa présé vin an Mémoryal-la chak lanné. Mémoryal-la ka pòté onlo bon biten pou nou é nou ké vwè ka nou pé fè pou pwofité dè sa. Sé wen-la ka vin an Mémoryal-la pou plizyè rézon. Pou koumansé, an-nou vwè déotwa adan yo.

4. Poukwa sé wen-la ka manjé pen-la é ka bwè diven-la pannan Mémoryal-la ?

⁴ Chak lanné, sé wen-la présé vin an Mémoryal-la, é yo ka manjé pen-la é yo ka bwè diven-la pannan Mémoryal-la. Poukwa yo ka fè sa ? Pou nou réponn a kèsyon-lasa, an-nou vwè ka Jézi fè dènyé lannuit-la i pasé asi latè la. Apré yo sélébré Lapak, Jézi mèt sa yo ka kriyé rèpa a Ségnè-la anplas. I té èvè 11 apòt a-y é i fè pen-la é diven-la pasé pawmi yo. Aprésa, i di-yo manjé pen-la é bwè diven-la. Jézi palé-yo dè 2 alyans kivédi dè 2 akò : nouvo alyans-la é alyans-la pou on wayòm * (Lik 22:19, 20, 28-30). Grasa sé alyans-lasa, sé apòt-la é dòt moun kè Bondyé té’é chwazi té’é vin wa é prèt adan syèl-la (Rév. 5:10 ; 14:1). Jòdijou, sé enki rèstan a sé wen-la * ki ka manjé pen-la é ki ka bwè diven-la pannan Mémoryal-la pas sé èvè sé wen-la yo fè sé 2 alyans-lasa.

5. Ka sé wen-la konnèt asi èspérans a yo ?

⁵ Ni ondòt rézon ki ka fè si sé krétyen wen la présé vin an Mémoryal-la : moman-lasa sé on bèl lokazyon pou yo médité asi bèl èspwa-la yo ni la. Jéova ba-yo on èspérans ki èstraòwdinè toubònman. Yo ké pé viv pou touttan an syèl-la èvè on kò ki pé pa pouri, yo ké pé gouvèné èvè Jézikris ki résisité é èvè rèstan a sé 144 000 la. É pi bèl la sé kè yo ké pé vwè Jéova an 2 zyé a yo ! (1 Kor. 15:51-53 ; 1 Jan 3:2). Sé wen-la sav kè Jéova envité-yo pou yo bénéfisyé dè tout sé privilèj-lasa an syèl-la men yo sav osi kè pou yo bénéfisyé dè sa, fò-yo rété fidèl joustan yo mò (2 Tim. 4:7, 8). Lè sé wen-la ka sonjé kè yo kay viv an syèl-la, a pa ti kontan yo kontan ! (Tit 2:13). Men é ‘sélézòt mouton-la’ aprézan ? (Jan 10:16). Pou ki rézon yo ka vin an Mémoryal-la ?

6. Poukwa sélézòt mouton-la ka vin an Mémoryal-la chak lanné ?

⁶ Sélézòt mouton-la pa’a manjé pen-la é pa’a bwè diven-la men yo kontan vin an Mémoryal-la. An 1938, yo envité èspésyalman moun ki ni lèspwa dè viv asi latè an Mémoryal-la é sé 1^é fwa yo té ka fè sa. Mi sa Tou dè Gad a 1^é avril 1938 té ka di : « Sa té ké on bon biten pou sélézòt mouton-la si yo té ka vin an Mémoryal-la é si yo té ka vwè jan sa té ka pasé [...]. Moman-lasa dwètèt on moman pou yo osi pé sa ni tchè-kontan, é sé sa menm ki ka fèt pas a moman-lasa toutmoun ni tchè-kontan. » Lè on moun envité adan on mayé, i kontan ay adan mayé-la menmsi a pa-y ki ka mayé. Menmjan-la osi, lèwvwè sélézòt mouton-la ka vin an Mémoryal-la, yo kontan menmsi yo pa’a manjé pen-la é yo pa’a bwè diven-la.

7. Poukwa sélézòt mouton-la présé tann diskou a Mémoryal-la ?

⁷ Sélézòt mouton-la osi ka médité asi èspérans a yo. Yo présé tann diskou a Mémoryal-la pas diskou-lasa ka édé-yo konsantré-yo asi sa Jézikris é asi sa sé 144 000 la ké fè pou moun ki fidèl pannan sé 1 000 an la. Anba dominasyon a Wa a yo Jézikris, sé 144 000 la ké bay on pal pou fè latè vin on paradi é yo ké édé  lézimen vin pawfè. Ni milyon é milyon moun ki ni lèspwa dè viv asi latè ki ka vin an Mémoryal-la é zyé a yotout ka kléré lè yo ka imajiné jan sa ké yé lè sé pwofési-la ki an Bib-la ké réyalizé. Pawmi sé pwofési-lasa ni Izayi 35:5, 6 ; 65:21-23 ; é Révélasyon 21:3, 4. Yo ja ka vwè-yo ka viv an mond nouvo la èvè fanmi a yo é zanmi a yo. Sa ka édé-yo kwè pi fò ankò adan bèl landèmen-la ki ka atann-yo la é sa ka ba-yo plis balan pou yo pa jen arété sèvi Jéova (Mat. 24:13 ; Gal. 6:9).

8. Pou ki dòt rézon ankò sélézòt mouton-la ka vin an Mémoryal-la ?

⁸ Sélézòt mouton-la ka vin an Mémoryal-la pou ondòt rézon ankò. An-nou vwè pou ki rézon. Yo vé montré sé wen-la kè yo enmé-yo é kè yo ka soutyenn-yo. Pawòl a Bondyé té anonsé kè sé wen-la é sé moun-la ki ni lèspwa dè viv asi latè pou touttan té’é travay men-dan-lamen. Kijansa ? An-nou vwè déotwa ègzanp.

9. Kijan pwofési a Zakari 8:23 ka montré sa sélézòt mouton-la ka rèsanti pou sé wen-la ?

⁹ (Li Zakari 8:23.) Pwofési-lasa ka ban-nou on bèl lidé asi sa sélézòt mouton-la ka rèsanti pou frè a yo ki wen. Lè yo ka palé dè « on Juif » é lè yo ka di « zòt » yo ka palé dè menm gwoup-moun-la, kivédi yo ka palé dè rèstan a sé wen-la ki asi latè toujou (Wom. 2:28, 29). Sé ‘10 nonm-la ki sòti adan tout lang sé nasyon-la ka palé’ ka rèprézanté sélézòt mouton-la. Adan on sans, yo ka « pongné lenj » a sé wen-la, kivédi yo ka vin bon bon zanmi èvè yo lè yo ka adoré Jéova ansanm èvè yo kon i ka mandé. Alò, nou ka tou konprann kè jou a Mémoryal-la, si sélézòt mouton-la ka réini-yo èvè sé wen-la, sé pas yo enmé-yo.

10. Ka Jéova fè pou réyalizé pwofési-la nou ka touvé adan Ézékyèl 37:15-19, 24, 25 ?

¹⁰ (Li Ézékyèl 37:15-19, 24, 25.) Jéova réyalizé pwofési-lasa lèwvwè i fè sé wen-la é sélézòt mouton-la travay men-dan-lamen. Adan pwofési-lasa, yo ka palé dè 2 mòso bwa *. Moun ki ni lèspwa dè ay viv an syèl-la ka touvé-yo kon mòso bwa-la ki « pou Jida » la (sé adan tribi-lasa yo chwazi sé wa a Izrayèl la). É moun ki ni lèspwa dè viv asi latè ka touvé-yo kon mòso bwa « a Éfrayim ». Jéova ké ini sé 2 gwoup-moun-lasa pou yo vin onsèl mòso bwa. Sa vé di kè yo ké adoré Jéova ansanm anba dominasyon a sèl Wa-la Jézikris. Chak lanné, lèwvwè sé wen-la é sélézòt mouton-la ka vin an Mémoryal-la, sé wen-la pa ka mété-yo on koté é sélézòt mouton-la ondòt koté men yotout ka fòwmé « onsèl twoupo » anba dirèksyon a « onsèl bèwjé » (Jan 10:16).

11. An Matyé 25:31-36, 40, yo ka palé dè sé mouton-la. Kijan yo ka montré kè yo ka soutyenn frè a Kris ?

¹¹ (Li Matyé 25:31-36, 40.) Sé mouton-la Jézi palé la ka rèprézanté moun ki jis ki ka viv an tan a lafen é ki ni lèspwa dè viv asi latè. Sé yo ki sé sélézòt mouton-la. Yo ka montré-yo fidèl é yo ka soutyenn frè a Kris. Pi bèl mannyè yo ka fè sa, sé lèwvwè yo ka édé-yo adan gwo rèsponsabilité-la yo ni la, kivédi lè yo ka édé-yo préché toupatou asi latè é fè disip (Mat. 24:14 ; 28:19, 20).

12-13. Sélézòt mouton-la ka montré kè yo ka soutyenn frè a Kris dòt mannyè ankò. Kilès ?

¹² Chak lanné, pannan sé simenn-la ki ka vin avan Mémoryal-la, sélézòt  mouton-la ka fè tousa yo pé pou envité on maksimòm dè moun pou vin adan Mémoryal-la (gadé ti karé-la «  Ès ou ka préparé-w byen pou péryòd a Mémoryal-la ? »). Anplisdisa, toupatou si latè yo ka fè tousa yo pé pou yo pé sa fè Mémoryal-la adan chak lasanblé menmsi pa ni ponmoun ki wen adan lasanblé a yo. A pa ti kontan sélézòt mouton-la kontan soutyenn frè a Kris konsa ! Sélézòt mouton-la sav kè pou Jézi, tousa yo ka fè pou sé wen-la, sé konsi sé pou li yo ka fè-y (Mat. 25:37-40).

¹³ Ki nou ni lèspwa dè viv an syèl-la, ki nou ni lèspwa dè viv asi latè, pou ki dòt rézon nou k’ay adan Mémoryal-la ?

14. Kijan Jéova é Jézi montré kè yo enmé-nou fò ?

¹⁴Jéova é Jézi montré kè yo enmé-nou é nou ni onlo rèkonésans pou sa. Jéova montré kè i enmé-nou plizyè fason diféran. Pi bèl mannyè i montré-nou sa sé lèwvwè i voyé Gason-la i pli enmé la soufè é mò pou nou (Jan 3:16). É Jézi montré kè i enmé-nou fò lèwvwè i chwazi bay vi a-y pou nou (Jan 15:13). Nou pé’é jen pé ranbousé Jéova é Jézi pou tousa yo fè pou montré-nou jan yo enmé-nou fò. Men jan nou ka viv chakjou pé montré-yo si nou ni rèkonésans pou yo (Kol. 3:15). Nou ka vin an Mémoryal-la pas nou vé sonjé jan Jéova é Jézi enmé-nou é pas nou vé montré-yo kè nou enmé-yo osi.

15. Poukwa ranson-la ni onlo valè pou sé wen-la é pou sélézòt mouton-la ?

¹⁵Ranson-la sé on bèl kado é nou ni onlo rèkonésans pou sa (Mat. 20:28). Ranson-la sé on biten ki ni onlo valè pou sé wen-la pas grasa sa, yo ni on bèl èspwa toubònman. Konm yo ni fwa adan sakrifis a Jézikris, pou Jéova yo sé dé moun ki jis é i adòpté-yo pou yo vin timoun a-y (Wom. 5:1 ; 8:15-17, 23). Sélézòt mouton-la osi ni onlo rèkonésans pou ranson-la. Konm yo ni fwa osi adan sakrifis a Jézi, pou Bondyé yo vin dé moun ki pwòp é yo pé ofè-y on sèwvis ki sakré. Anplisdisa, yo ni lèspwa dè pasé « gwo tribilasyon-la » vivan (Rév. 7:13-15). Lèwvwè sé wen-la é sélézòt mouton-la ka vin an Mémoryal-la chak lanné, sé on mannyè yo ka montré kè yo ni onlo rèkonésans pou ranson-la.

16. Pou ki dòt rézon nou k’ay an Mémoryal-la ?

¹⁶ Ondòt rézon ki ka fè si nou ka vin an Mémoryal-la sé pas nou vlé fè sa Jézi mandé-nou fè. Ki nou ni lèspwa dè ay viv an syèl-la, ki nou ni lèspwa dè viv asi latè, nouchak vé fè sa Jézi mandé-nou fè lannuit-la i fè prèmyé Mémoryal-la. Mi sa i di : « Kontinyé fè sa pou zòt sonjé-mwen » (1 Kor. 11:23, 24).

17. Kijan Mémoryal-la ka édé-nou vin pibon zanmi èvè Jéova ?

¹⁷Nou ka vin pibon zanmi èvè Jéova (Jak 4:8). Kon nou vwè-y, Mémoryal-la ka pèwmèt-nou réfléchi asi bèl èspwa-la Jéova ka ban-nou la é asi sa Jéova fè pou montré-nou kè i enmé-nou (Jér. 29:11 ; 1 Jan 4:8-10). Lè nou ka sonjé bèl èspwa-la Jéova ka ban-nou la pou dèmen é jan i enmé-nou fò, nou ka vin enmé-y pi fò é nou ka vin pibon zanmi èvè-y (Wom. 8:38, 39).

18. Lèwvwè nou ka pran tan réfléchi asi ègzanp a Jézi, ka sa ka pousé-nou a fè ?

¹⁸Nou anvi imité ègzanp a Jézi  toubònman (1 Pyè 2:21). Kèlkè jou avan Mémoryal-la, nou ka pran tan li déotwa vèwsé anrapò èvè sa Jézi viv lèwvwè i té asi latè, anrapò èvè jan-la i mò la é anrapò èvè rézirèksyon a-y. Aprésa, jou a Mémoryal-la, pannan diskou-la, yo ka fè-nou sonjé jan Jézi té enmé-nou (Éféz. 5:2 ; 1 Jan 3:16). Lèwvwè nou ka li adan Labib é adan sé piblikasyon-la jan Jézi sakrifyé-y pou nou é lèwvwè nou ka pran tan réfléchi asi sa, nou ka santi kè nou « oblijé kontinyé viv kon Jézi viv » (1 Jan 2:6).

19. Kijan nou pé rété adan lanmou a Bondyé ?

¹⁹Nou anvi kontinyé rété adan lanmou a Bondyé (Jid 20, 21). Nou ka rété adan lanmou a Bondyé lè nou ka fè tousa nou pé pou kouté-y, pou fè non a-y vin sen é pou mèt jwa an tchè a-y (Pwov. 27:11 ; Mat. 6:9 ; 1 Jan 5:3). Chakjou, nou pé viv on mannyè ki ka montré Jéova kè nou anvi rété adan lanmou a-y pou touttan. É lèwvwè nou ka vin an Mémoryal-la, sa ka ban-nou balan pou nou fè sa plis ankò !

20. Poukwa sa enpòwtan pou nou dè vin an Mémoryal-la ?

²⁰ Ki nou ni lèspwa dè ay viv an syèl-la pou touttan, ki nou ni lèspwa dè viv asi latè pou touttan, nou ka vin an Mémoryal-la pou onlo bon rézon. Chak lanné, lèwvwè nou ka réini-nou jou a Mémoryal-la, nou ka sonjé mò a Jézikris, on moun kè nou enmé toubònman. É sa ki pi enpòwtan ankò, sé kè nou ka sonjé kè pa ni ponmoun ki enmé-nou plis ki Jéova é i montré sa lèwvwè i sakrifyé Gason a-y pou nou. Lanné-lasa, Mémoryal-la ké fèt vandrèdi 15 avril 2022 apré solèy-la kouché. Konm nou enmé Jéova é Jézi, lè jou a anivèwsè a mò a Jézi rivé, nou ka fè tousa nou pé pou vin an Mémoryal-la pas pou nou, pa ni ayen ki pi enpòwtan ki sa.