1. Ka nou pé fè pou nou pasé on moman èvè Jéova ?

A PA ti enmé nou enmé pasé tan èvè bon zig an nou. Pa ègzanp, a pa ti kontan 2 moun-mayé kontan lèwvwè yo ka pasé on ti swaré ansanm. Sé jenn-la osi enmé rété èvè zanmi a yo. É noutout enmé pasé tibwen tan èvè frè é sè a lasanblé-la. Men sa nou pi enmé, sé pasé on moman èvè Bondyé an nou. Nou pé fè sa lèwvwè nou ka priyé-y, lèwvwè nou ka li Pawòl a-y, é lèwvwè nou ka pran tan médité asi pwojé a-y é asi bèl kalité a-y. Sé vré, pa ni biten ki pi enpòwtan ki tan-la nou ka pasé la èvè Jéova ! (Sòm 139:17).

2. Ki difikilté nou pé rivé a jwenn ?

² Sé vré, nou enmé pasé tan èvè Jéova men pou nou pé sa priyé é étidyé Labib, dépawfwa sa pé rèd pou nou. Noutout ni onlo biten a fè, kifè, sa pa toujou fasil pou nou pé sa touvé on ti tan adan pwogram an nou pou nou pé sa adoré Jéova. Travay an nou, fanmi an nou é dòt biten ankò pé pran près tout tan an nou kifè, nou pé ni lenprésyon kè nou pa ni asé tan pou priyé, étidyé oben médité.

3. Ki dòt biten ki pé pran adan tan an nou ?

³ Ni ondòt biten ankò ki pé pran tan an nou. Si nou pa fè atansyon, nou pé touvé-nou ka pasé onpakèt tan ka fè sèwten biten ki pa oblijé mové men sa pé anpéché-nou touvé on moman pou vin pibon zanmi èvè Jéova. Pa ègzanp, an-nou palé dè anmizman. Lè nou ka anmizé-nou dè tanzantan sa ka fè noutout dibyen. Men menmsi pa ni ayen dè mal adan sa nou ka fè lè nou ka anmizé-nou, si nou ka pasé twòp tan adan sa, nou pé’é ni asé tan pou adoré Jéova. Sé pousa, fò-nou sonjé kè anmizman a pa  sa ki pli enpòwtan adan lavi (Pwov. 25:27 ; 1 Tim. 4:8).

4. Ka nou ké vwè adan awtik-lasa ?

⁴ Adan awtik-lasa, nou ké vwè poukwa fò-nou chwazi sa ki pli enpòwtan adan vi an nou. Anplisdisa, nou ké vwè kijan nou pé pwofité afon dè sé moman-la nou ka pasé la èvè Jéova é nou ké vwè ka sa ké pòté dè bon ban nou si nou fè sa.

5. An Éfézyen 5:15-17 nou ka touvé on bon konsèy. Kijan nou pé sèvi èvè konsèy-lasa pou édé on jenn chwazi méyè vi ki tini ?

⁵Chwazi pi bèl vi ki tini. Souvantfwa, sé jenn-la ka mandé-yo ka yo pé fè pou yo pé sa réyisi vi a yo. Pétèt adan lékòl a yo, moun ki alantou a yo é fanmi a yo ki pa Témwen ka mèt présyon asi yo pou yo pé sa fè onlo lékòl pou yo pé sa ni on bèl pozisyon adan mond-lasa. Si sé désizyon-lasa yo ka pran, sa ka riské dè pran tout tan a yo. É anmenmtan, pétèt kè fanmi a yo é zanmi a yo adan lasanblé-la ka ankourajé-yo itilizé tan a yo pou sèvi Jéova. Ka ki pé édé on jenn ki enmé Jéova pran méyè désizyon-la ? I pé li Éfézyen 5:15-17 é médité anlè-y. Sa ké fè-y dibyen toubònman (li-y). Lè i ké li sé vèwsé-lasa pétèt i té’é pé mandé-y : « Ka “Jéova vlé” ? Ki désizyon ki ké fè-y plézi ? Ki désizyon ki ké édé-mwen itilizé tan an mwen èvè sajès ? » Pa oubliyé, « sé jou-la nou ka viv la mové menm » é mond a Satan kay bout talè. Sa té’é byen si nou té ka itilizé tan an nou èvè sajès pou nou pé sa vin pibon zanmi èvè Jéova.

6. Ki chwa Mari fè é poukwa désizyon-lasa té plen sajès ?

⁶Chwazi sa ki pi enpòwtan ba-w. Dépawfwa, nou pé ni 2 biten a fè é ponyonn adan yo pa mové. Men si nou vé sèvi byen èvè tan an nou nou ké oblijé chwazi yonn adan yo. On biten ki ka édé-nou konprann sa byen, sè lèwvwè nou ka sonjé sa ki pasé lè Jézi ay owa Mawt é Mari. A pa ti kontan Mawt té kontan akéyi Jézi, kifè i pran tout ti tan a-y pou préparé on bon ti manjé ba-y. Men pannansitan, Mari ay sizé an pyé a Jézi pou kouté sa i té ka di. Sé vré, sa Mawt té ka fè la a pa té on mové biten, men Jézi di kè sé Mari ki té « chwazi méyè pa-la » (Lik 10:38-42). Lè tan-la pasé, pétèt Mari oubliyé sa i manjé jou-lasa men nou pé sèten kè i pa jen oubliyé sa Jézi anségné-y. Ti moman-la Mari pasé èvè Jézi la té ni onlo valè pou-y toubònman. Menmjan-la, lè nou ka pasé tan èvè Jéova, sa ni onlo valè pou nou. Ka nou pé fè pou nou sèvi èvè tan-lasa méyè fason ki tini ?

7. Poukwa sa enpòwtan kè nou priyé, kè nou étidyé é kè nou pran tan médité ?

⁷Pa jen oubliyé kè lè ou ka priyé, lè ou ka étidyé é lè ou ka pran tan médité sé adoré ou ka adoré Jéova. Lè nou ka priyé, sé palé nou ka palé èvè Pap’an nou ki an syèl-la é ki enmé-nou onlo toubònman (Sòm 5:7). Lè nou ka étidyé Bib an nou, nou ka lésé Bondyé anségné-nou, é pa ni moun ki pi saj ki Bondyé (Pwov. 2:1-5). É lè nou ka médité, sé réfléchi nou ka réfléchi asi bèl kalité a Jéova é asi bèl pwojé-la i ni la pou nou é pou tout limanité. Pa ni pi bèl mannyè nou pé sèvi èvè tan an nou ki sa. Men ka ki pé édé-nou fè sa ?

8. Jézi byen sèvi èvè tan-la i pasé an dézè-la. Ka sa ka aprann-nou ?

⁸Si ou pé, chwazi on ti koté trankil.  An-nou réfléchi asi ègzanp a Jézi (Lik 4:1, 2). Avan i koumansé préché, i pasé 40 jou adan dézè-la. Konm dézè-la sé on koté ki kalm, sa pèwmèt-li priyé é médité asi sa Pap’a-y té vlé i fè. Sèten sa édé-y préparé-y pou sé éprèv-la ki té ka atann-li la. Kijan ègzanp a Jézi pé édé-w ? Pétèt kè ou ké ni dimal a touvé on ti koté trankil si zò a plizyè an kaz-la. Alò, ès ou pa té’é pé touvé on ti koté konsa andéwò a kaz-la ? Sé sa Julie ka fè lè i vlé pran tibwen tan pou priyé Jéova. Li é mari a-y ka viv adan on batiman an Frans é kaz a yo toupiti. Kifè, sa pé rèd pou-y dè touvé on ti koté adan kaz-la pas souvantfwa ni on biten ki ka anpéché-y konsantré-y. Mi sa i ka di : « Touléjou an k’ay fè on ti lantou adan on pawk. Konsa, konm an tousèl, an pé konsantré-mwen é an pé palé ba Jéova pou di-y tousa ki an tchè an mwen. »

9. Jézi té ni onlo biten a fè men sa té enpòwtan ba-y dè pasé tan èvè Pap’a-y. Ka ki ka montré sa ?

⁹ Jézi té ni onlo biten a fè. Lè i té ka préché, onlo moun té ka suiv-li é yotout té vé pasé tan èvè-y. On jouswa, i té adan on vil é tout sé moun-la ki té ka rété la la vin douvan pòt a kaz-la i té yé la pou vwè-y. Men apapousa i pa pran on tan pou priyé Pap’a-y. I toujou òwganizé-y pou fè sa. Lèlandèmen, avan solèy-la té lévé, i chèché « on koté pa té ni ponmoun » pou pasé on moman èvè Pap’a-y (Mawk 1:32-35).

10-11. Dapré Matyé 26:40, 41, ki biten enpòwtan Jézi mandé disip a-y fè adan jaden a Jètsémani, men ka ki pasé ?

¹⁰ Dènyé lannuit-la Jézi pasé asi latè la, alòskè i té ja près fin travay-la Pap’a-y té ba-y fè la, Jézi òwganizé-y pou i té touvé on ti koté trankil pou i té pé sa médité é pou i té pé sa priyé Pap’a-y. I touvé ti koté-lasa adan jaden a Jètsémani (Mat. 26:36). I pwofité dè moman-lasa pou di disip a-y on biten enpòwtan anrapò èvè lapriyè.

¹¹ Mi sa ki pasé. Lè yo rivé adan jaden-la i té ja on bèl lè, pétèt i té ja minui pasé. Jézi mandé apòt a-y ‘véyé’ é i ay tibwen pli lwen pou priyé (Mat. 26:37-39). Men pannan Jézi té ka priyé, sé apòt-la pran sonmèy. Alò lè Jézi viré, i woudi-yo « kontinyé véyé é pa arété priyé » (li Matyé 26:40, 41). I té sav kè yo té angwasé é kè yo té byen las. Dayè i jous di : « Chè-la fèb. » Sa té ka montré jan i té ni konpasyon pou yo. Aprésa, Jézi viré ay priyé 2 fwa ankò. Men chakfwa i té ka viré owa disip a-y, i té ka touvé-yo ka dòmi olyé yo té kontinyé priyé kon i té mandé-yo (Mat. 26:42-45).

12. Si délè ou ka santi-w two las oben two istrésé pou priyé, ka ou pé fè ?

 ¹²Chwazi bon moman-la. Dépawfwa a pa ti las nou ka las é a pa ti istrésé nou ka istrésé, kifè, nou pa’a menm rivé priyé. Si sé ka a-w, fò ou sav kè a pa vou tousèl ki ka rèsanti sa. Ka ou pé fè ? Ni sèwten moun ki té ni labitid priyé avan yo ay dòmi, men yo rann-yo kont kè yo té two las a moman-lasa. Alò yo désidé kè lèwvwè yo ké priyé lèswa, yo ké fè sa pli bonnè. Ni dòt aprézan ki konstaté kè yo ka rivé konsantré-yo pibyen lèwvwè yo ka sizé oben lèwvwè yo ka mèt-yo ajounou pou yo priyé. É si délè tèlman ou enkyèt oben tèlman ou dékourajé ou pa’a rivé priyé, ka pou ou fè ? Di Jéova tousa ou ka résanti. Ou pé sèten kè Pap’an nou ki ni onlo konpasyon ké konprann-vou (Sòm 139:4).

13. Kijan téléfòn an nou oben dòt aparèy kè nou ni pé anpéché-nou konsantré-nou lè nou ka priyé, lè nou ka étidyé oben lè nou an réinyon ?

¹³Lè ou ka étidyé, pa lésé ayen anpéché-w konsantré-w. Sé vré kè lè nou ka priyé nou ka vin pibon zanmi èvè Jéova men a pa sa tousèl ki ka pèwmèt-nou fè sa. Lè nou ka étidyé é lè nou ka vin réinyon, sa ka édé-nou vin pibon zanmi èvè-y osi. Alò, ka ou pé fè pou pwofité afon dè sé moman-lasa ? Mi sa pou ou mandé-w : « Lèwvwè mwen an réinyon oben lèwvwè an ka étidyé tousèl an mwen ka ki ka anpéché-mwen konsantré-mwen ? » Pa ègzanp, ès yo ka voyé mésaj ba-w, ès yo ka voyé imèl ba-w oben ès yo ka kriyé-w asi téléfòn a-w oben asi ondòt aparèy ? Jòdijou ni plizyè milya moun ki ka sèvi èvè sé aparèy-lasa. Dapré sa sèwten èspésyalis ka di, siwvwè nou bizwen konsantré-nou é kè téléfòn an nou akoté an nou, nou pa’a gè ka rivé fè sa. Mi sa on èspésyalis a psikoloji ka di : « Lèspri a-w pa si sa ou té ka fè ankò. Lèspri a-w ja lwen *. » An jénéral, avan chak lasanblé yo ka mandé-nou fè ansòt pou aparèy an nou pa jenné sélézòt moun-la ki alantou an nou la. Lè nou ka étidyé tousèl an nou, sé on moman nou ka pasé èvè Jéova. Alò, ès nou té’é pé òwganizé-nou pou aparèy an nou pa déranjé-nou é fè-nou lagé sa nou té ka fè la ?

14. Dapré Filipyen 4:6, 7, kijan Jéova ka édé-nou konsantré-nou ?

 ¹⁴Mandé Jéova édé-w konsantré-w. Si ou ka rann-vou kont kè ou pa’a rivé konsantré-w pannan ou ka étidyé, oben pannan ou an réinyon, mandé Jéova édé-w. Si ou enkyèt oben si ni on biten ki ka trakasé-w, ou pé ni dimal a konsantré-w asi Pawòl a Bondyé. Men sa enpòwtan toubònman kè ou fè sa. Priyé pou Bondyé pé sa ba-w lapé ki ké pwotéjé tchè a-w é ‘lèspri a-w’ (li Filipyen 4:6, 7).

15. Lè nou ka pasé tan èvè Jéova, ki byenfé sa ka pwokiré-nou ?

¹⁵ Si ou ka pran on tan pou palé èvè Jéova, pou kouté-y é pou sonjé-y ou ké ni onlo byenfé. Kilès ? Prèmyèwman, ou ké pran pibon désizyon. Labib ka di kè « on moun ki ka maché èvè moun saj ké vin saj » (Pwov. 13:20). Alò, pi ou ké pasé tan èvè Jéova, pi ou ké vin saj pas pa ni ponmoun ki ni plis sajès ki-y. Konsa, ou ké konprann pibyen sa ki ka fè-y plézi é ki désizyon ki ka fè-y lapenn.

16. Lèwvwè ou ka pasé tan èvè Jéova, poukwa sa ka édé-w anségné pibyen ?

¹⁶ Dézyèmman, ou ké anségné pibyen. Lèwvwè nou ka étidyé èvè on moun, on biten nou vé fè é ki enpòwtan pou nou sé édé moun-la vin bon zanmi èvè Jéova. Pi nou ka palé èvè Jéova é kè nou ka kouté-y, pi nou ka vin enmè-y. Kifè, jan-la nou ké anségné moun-la ké ba-y gou pou i pé sa enmé Jéova a tou a-y. Jézi ban-nou on bèl ègzanp adan domenn-lasa. Lèwvwè i té ka palé dè Pap’a-y èvè disip a-y, i té ka fè sa èvè onlo lanmou é èvè onlo chalè. Sé pousa, tou natirèlman sé disip-la vin enmé Jéova (Jan 17:25, 26).

17. Lè nou ka priyé é lè nou ka étidyé, fwa an nou ka vin pi fò. Poukwa nou ka di sa ?

¹⁷ Twazyèmman, fwa a-w ké vin pi fò. Pran on ti tan pou réfléchi asi sa ki ka fèt lèwvwè ou ka mandé Jéova dirijé-w, lè ou ka mandé-y soutyenn-vou oben lèwvwè ou ka mandé-y konsolé-w. Sèten kè chakfwa ou ka vwè-y ka réponn priyè a-w, fwa a-w ka vin pli solid (1 Jan 5:15). Men ki dòt biten ou pé fè ankò pou fwa a-w vin pi fò ? Fò ou étidyé tousèl a-w. Pa oubliyé kè « on moun ka ni lafwa grasa sa i ka tann » (Wom. 10:17). Men pou ou pé sa ni on fwa ki solid, a pa enki aprann pou ou aprann sèwten biten. Fò ou fè ondòt biten ankò. Ki biten ésa ?

18. Bay on ègzanp ki ka montré kè sa enpòwtan kè nou pran tan médité.

¹⁸ An-nou pran tan réfléchi asi sa nou ka aprann. An-nou vwè ègzanp a nonm-la  ki maké Sòm 77 la. Pou-y, Bondyé pa té ka soutyenn-li é i pa té ka soutyenn sé Izraélit-la ankò. Kifè, tèlman sa té ka fè-y lapenn, i pa té ka rivé dòmi ankò (vèwsé 2-8). Alò, ka i fè ? Mi sa i di Jéova : « An ké pran tan réfléchi asi sa ou ka fè é an vé réfléchi asi mannyè ou ka aji » (vèwsé 12). Nou ka tou konprann kè i té sav sa Jéova té ja fè ba pèp a-y an tan lontan, men konm i té enkyèt, mi sa i té ka di an tchè a-y : « Ès sé oubliyé Bondyé oubliyé ban-nou favè a-y, oben ès sé kòlè i kòlè èvè nou kifè i pa ka aji èvè mizérikòd èvè nou ankò ? » (vèwsé 9). Men nonm-la ki maké sòm-lasa pran tan médité asi sa Jéova té ja fè é asi jan Jéova té ja montré kè i té ni mizérikòd é konpasyon (vèwsé 11). Ka sa pòté dè bon ba-y ? I vin sèten a san pou san kè Jéova pé’é jen lagé pèp a-y (vèwsé 15). Menmjan-la osi, si ou ka pran tan réfléchi asi tousa Jéova ja fè ba sèwvitè a-y é asi sa i ja fè pou vou osi pèwsonèlman, sa ké konsolidé fwa a-w.

19. Lè nou ka pasé tan èvè Jéova, ki dòt byenfé sa pé pwokiré-nou ?

¹⁹ Katriyèmman, ou ké enmé Jéova pi fò é sé sa ki pi enpòwtan. Nou ka kouté Jéova, nou ka fè sakrifis pou fè-y plézi é nou paré a andiré nenpòt ki éprèv nou pé jwenn. Men ka ki ka pousé-nou fè sa ? A pa pondòt biten ki lanmou-la nou ni pou-y la (Mat. 22:37-39 ; 1 Kor. 13:4, 7 ; 1 Jan 5:3). Lè nou bon bon zanmi èvè Jéova, pa ni pondòt biten ki ni plis valè ki sa ! (Sòm 63:1-8).

20. Ka ou pé fè pou ou pa lésé ayen anpéché-w konsantré-w lè ou ka pasé on moman èvè Jéova ?

²⁰ On biten pou-w pa jen oubliyé sé kè lè ou ka priyé, lè ou ka étidyé é lè ou ka pran tan médité, sé adoré ou ka adoré Jéova. Alò fè kon Jézi, toujou chèché on ti koté trankil pou ou pé sa pasé on bèl moman èvè Jéova. Pa lésé ayen anpéché-w konsantré-w. É lèwvwè ou an réinyon oben lèwvwè ou ka étidyé pa ègzanp, mandé Jéova édé-w pou ou pé sa konsantré-w. Si dépi konnyéla, ou ka fè tousa ou pé pou ou sèvi èvè tan-la ou ni la méyè fason ki tini, Jéova ké ba-w on bèl rékonpans : ou ké viv adan mond nouvo la pou touttan (Mawk 4:24).