Ni sèwten frè ki lévé dé koté sé nonm-la toujou vwè sé madanm-la kon dé moun ki ni mwens valè ki yo. Hans sé on rèsponsab a siwkonskripsyon ki ka rété an Bolivi é mi sa i ka di : « Pou sèwten boug, on misyé ni plis valè ki on madanm. Yo ka kwè sa pas sé sa yo aprann-yo dépi yo té toupiti, é yo pa ni pon rèspé pou sé madanm-la. » Shengxian, sé on ansyen ki ka rété Taywann é mi sa i ka di : « La an ka viv la, pou onlo misyé, sé madanm-la pa ni a mélé-yo adan zafè a yo. Siwvwè on boug ka répété sa on madanm ka pansé asi on biten, sélézòt boug-la pé’é ni pon rèspé ba-y ankò. » Ni dòt boug ki ka fè dòt biten ki ka montré kè yo pa’a rèspèkté madanm. Pa ègzanp, yo ka fè vyé blag asi sé madanm-la pou méprizé-yo.

Men menmsi yo aprann on misyé kè sé misyé-la ni plis valè ki sé madanm-la, i pé chanjé menmsi sé dépi toupiti yo aprann-li sa. I pé rivé woté lidé-lasa an tèt a-y (Éféz. 4:22-24). I ké rivé fè sa siwvwè i ka imité ègzanp a Jéova. Adan awtik-lasa, nou ké vwè kijan Jéova ka aji èvè sé madanm-la, ki biten sé frè-la pé aprann fè pou aji èvè sé sè-la kon Jéova ka fè-y é kijan sé ansyen-la pé montré kè yo ka rèspèkté sé sè-la adan lasanblé-la.

KIJAN JÉOVA KA AJI ÈVÈ SÉ MADANM-LA ?

Adan domenn-lasa, pa ni pi bèl ègzanp ki Jéova. I ni onlo rèspé pou sé madanm-la. Sé on Papa ki ni onlo konpasyon é i enmé tout timoun a-y (Jan 3:16). Wi, sé madanm-la ki fidèl la kon fi a-y, yo ni onlo valè pou-y. I ka ba-yo lonnè plizyè fason diféran. An-nou vwè déotwa adan yo :

I ka aji èvè sé madanm-la kon i ka aji èvè sé misyé-la. Lèwvwè Jéova kréyé misyé-la é madanm-la, i fè-yo pòtré a-y (Jén. 1:27). I pa fè misyé-la pli  entélijan ki madanm-la oben i pa ba misyé-la plis kapasité ki madanm-la ; i pa préféré yonn plis ki lòt (2 Kron. 19:7). I ba-yo toulédé sé menm kapasité-la pou konprann Labib é pou imité kalité a-y. Dépi on misyé é on madanm ni fwa adan-y, i ka ba-yo valè. I ka ba ki misyé ki madanm lèspwa dè viv asi latè pou touttan oben i ka ba ki misyé ki madanm lèspwa dè ay viv an syèl-la antankè wa é antankè prèt (2 Pyè 1:1, nòt a Bib-la an fransé). Nou ka vwè on mannyè ki klè kè menmsi sé moun-la ka di onlo mové biten asi sé madanm-la, li Jéova, i pa ni ayen kont-yo.

I ka kouté-yo. Sa sé madanm-la ka rèsanti é sa ki ka trakasé-yo ni onlo enpòwtans pou Jéova. Pa ègzanp, i kouté priyè a Àn é priyè a Rachèl é i réponn a priyè a yo (Jén. 30:22 ; 1 Sam. 1:10, 11, 19, 20). Anplisdisa, i ba sèwten moun ki maké Bib-la lèspri sen a-y pou yo té ékri istwa a plizyè misyé ki kouté on madanm. Pa ègzanp, lè Jéova di Abraam kouté Sara, madanm a-y, Abraam obéyi Jéova (Jén. 21:12-14). Wa David kouté Abigayil. An réyalité, i fè konsi sé té Jéova ki té voyé Abigayil palé ba-y (1 Sam. 25:32-35). Jézi ki té ka imité kalité a Pap’a-y on mannyè ki pawfè, kouté manman-y, Mari (Jan 2:3-10). Sé ègzanp-lasa ka montré-nou kè Jéova ka rèspèkté sé madanm-la é i ka fè sa lè i ka kouté-yo pa ègzanp.

I ka fè-yo konfyans. Pa ègzanp, Jéova té ka konté asi Èv menmjan i té ka konté asi Adan pou pran swen a latè (Jén. 1:28). A moman-lasa, i montré kè pou-y Èv pa té ni mwens valè ki mari a-y, Adan, men kè Èv sé té on bon konpangn menm pou édé Adan. Anplisdisa, Jéova chwazi Débora é Oulda pou vin pwofèt a-y é i mandé-yo ba pèp a-y konsèy. Jéova mandé-yo ba on jij é on wa konsèy osi (Jij 4:4-9 ; 2 Wa 22:14-20). Jòdila osi, Jéova ka konté asi sé sè-la pou travay ba-y. Sé sè-lasa pwoklamatè, pyonyé oben yo misyonè é yo fidèl. Lèwvwè lòwganizasyon ka fè plan pou konstwi sal di Wayòm oben filyal oben lèwvwè i ka pran dispozisyon pou konstwi sé batiman-lasa oben pou pran swen a yo, sé sè-la ka pawtisipé adan sa. Ni sèwten adan yo ki ka travay adan Bétèl é ni dòt osi ki ka travay adan antèn a tradiksyon. Sé sè-lasa sé on gran lawmé é Jéova ka itilizé-yo pou fè volonté a-y (Sòm 68:11). Alò nou ka vwè on mannyè ki klè kè Jéova pa ka vwè sé madanm-la kon dé moun ki fèb oben ki pa sav fè ayen.

KI BITEN SÉ FRÈ-LA PÉ APRANN FÈ POU AJI ÈVÈ SÉ MADANM-LA KON JÉOVA KA FÈ-Y ?

Léfrè, pou nou sav si nou ka aji èvè sé sè-la kon Jéova ka fè-y, fò-nou pran tan ègzaminé byen jan nou ka pansé é jan nou ka aji. Pou nou rivé fè sa, nou bizwen on pal. Menmjan on aparèy ki fèt pou gadé sa ki ka pasé andidan kò a on moun pé vwè si on moun ni on pwoblèm an tchè, sé konsa on bon bon zanmi é Pawòl a Bondyé pé édé on frè sav si délè jan-la i ka vwè sé madanm-la pa bon. Ka ou pé fè pou ou pé sa bénéfisyé dè èd-lasa ?

Mandé on bon zanmi a-w konsèy (Pwov. 18:17). Sèten ou ni on zanmi ou ka fè konfyans ki janti é ki rézonab. Pétèt ou té’é pé mandé-y : « Ès ou ka touvé kè an ka aji byen èvè sé sè-la ? Ou ka di kè yo ka santi kè an ka rèspèkté-yo ? Ès ni on biten an pé fè pou an vin pibon adan domenn-lasa ? » Si zanmi a-w ka di-w kè sa té’é byen kè ou fè on éfò adan domenn-lasa, pa chèché èskiz. Chèché a vwè ki chanjman pou ou fè plito é pa tadé pou fè sé chanjman-lasa.

Étidyé Pawòl a Bondyé. Pou ou sav si ou ka aji byen èvè sé sè-la, méyè biten ou pé fè, sé sèvi èvè Bib-la pou ou pé sa analizé mannyè ou ka rézonné é jan ou ka aji (Ébr. 4:12). Sé vré pas adan-y ou ka touvé ègzanp a misyé ki aji byen èvè sé madanm-la é ou ka touvé ègzanp a misyé osi ki pa aji byen èvè yo. A moman-lasa, ou ké pé konparé jan ou ka aji èvè sé ègzanp-lasa. Anplisdisa, lè ou ka fè sa, pa kontanté-w dè onsèl vèwsé, men pran plizyè vèwsé adan Bib-la. Konsa, sa ké édé-w vwè byen sa Jéova ka pansé dè sé madanm-la. Pa ègzanp, dapré 1 Pyè 3:7, fò sé misyé-la « ba sé madanm-la lonnè, kon moun ka fè-y pou on ja ki pli frajil b». Men ès sa vé di kè sé misyé-la ni plis valè ki sé madanm-la, kè sé misyé-la pi entélijan ki sé madanm-la oben kè sé misyé-la sav fè plis biten ki sé madanm-la ? Awa, a pa sa ! Pou édé-nou konprann sa, fò-nou konparé sa Pyè di èvè sa Galat 3:26-29 ka di. Sé vèwsé-lasa  ka èspliké kè Jéova chwazi misyé kon madanm pou gouvèné an syèl-la èvè Jézi. Alò sé frè-la pé aprann kijan pou yo montré sé sè-la kè yo ka rèspèkté-yo siwvwè yo ka étidyé Labib é siwvwè yo ka mandé on bon zanmi a yo sa i ka pansé asi jan yo ka aji èvè sé madanm-la.

KIJAN SÉ ANSYEN-LA KA MONTRÉ SÉ SÈ-LA KÈ YO KA RÈSPÈKTÉ-YO ?

Pou sé frè-la aprann kijan pou yo montré sé sè-la kè yo ka rèspèkté-yo, ni ondòt biten yo pé fè. Yo pé suiv ègzanp a sé ansyen-la adan domenn-lasa. Kijan sé ansyen-la ka montré sé sè-la kè yo ka rèspèkté-yo ? Mi déotwa biten yo ka fè :

Yo ka félisité sé sè-la. Lapòt Pòl ka ba sé ansyen-la on bèl ègzanp toubònman. Adan on lèt i maké pou lasanblé a Wòm, i félisité plizyè sè é i fè ansòt pou toutmoun tann sa (Wom. 16:12). Ou ka imajiné jan sé sè-la dwèt té kontan lèwvwè yo li lèt-lasa pou lasanblé-la ! Menmjan-la, sé ansyen-la pa chich pou félisité sé sè-la pou bèl kalité a yo é pou tout travay-la yo ka fè la pou Jéova. Sa ka édé sé sè-la sav jan toutmoun adan lasanblé-la enmé-yo é jan yo ka rèspèkté-yo. Lè on ansyen ka di on sè on biten pou ankourajé-y, pétèt sé ègzaktèman sa i té bizwen a moman-lasa pou édé-y rété fidèl a Jéova é pou kontinyé sèvi-y (Pwov. 15:23).

Lèwvwè sé ansyen-la ka félisité sé sè-la, fò-yo sensè é fò-yo félisité-yo pou on biten byen prési. Poukwa fò-yo aji konsa ? Mi sa Jessica ka èspliké : « Lèwvwè sé ansyen-la ka félisité-nou pou bèl travay-la nou ka fè la, nou byen kontan. Men sa pi bèl ankò lèwvwè yo ka félisité-nou pou on biten byen prési nou ka fè, kon lèwvwè nou ka aprann timoun an nou tchenbé kò a yo an réinyon oben lèwvwè nou ka pran on tan pou ay chèché on étidyan pou menné-y lasal. » Lèwvwè sé ansyen-la ka félisité sé sè-la pou dé biten byen prési, sé sè-la ka santi kè yo itil adan lasanblé-la é sa ka montré-yo osi kè yo ni valè pou sé frè é sè la.

Yo ka kouté sé sè-la. Sé ansyen-la ka aji èvè imilité lè yo ka rèkonnèt kè a pa yo sèlman ki pé ni dé  bon lidé. Sé pousa yo ka ankourajé sé sè-la di-yo ka yo ka pansé anrapò èvè sèwten biten, é yo ka pran tan kouté byen sa yo ka di. Lè sé ansyen-la ka fè sa, sa ka ankourajé sé sè-la é an menm balan-la sa ka fè sé ansyen-la dibyen. Kijansa ? Gerardo sé on ansyen ki ka travay an Bétèl-la. Mi sa i ka di : « An rann-mwen kont kè lè an ka mandé sé sè-la sa yo ka pansé, sa ka édé-mwen fè on pi bèl travay. Byensouvan, travay-la sé sè-la ka fè la, yo ka fè-y dépi pi lontan ki lamajorité a sé frè-la. » Adan sé lasanblé-la, konm ni onlo sè ki pyonyé, yo konnèt sé moun-la ki ka rété adan téritwa-la byen. Mi sa on ansyen non a-y sé Bryan ka di : « Sé sè-la ni onlo bèl kalité é yo sav fè onlo biten toubònman. Sé dé moun konsa òwganizasyon-la bizwen. Alò, an-nou pwofité dè bèl èkspéryans a yo ! »

Sé ansyen-la ka aji èvè sajès lèwvwè yo ka tchenn kont dè sé lidé-la sé sè-la ka bay la. Poukwa nou ka di sa ? Mi sa Edward, on ansyen ka di : « Èkspéryans a on sè é sa i ka pansé pé édé on frè konprann on pwoblèm pibyen é sa pé édé-y konprann sa lézòt ka rèsanti pibyen osi » (Pwov. 1:5). Lèwvwè on sè ka ba on ansyen on lidé, menmsi frè-la pé pa suiv lidé-lasa, i pé di sè-la mèsi pou lidé-la i ba-y la é i pé di-y mèsi osi davwa i di-y sa i té ka pansé.

Yo ka fòwmé sé sè-la. Lèwvwè sé ansyen-la ni bon jijman, yo ka chèché tout ti lokazyon pou yo fòwmé sé sè-la. Pa ègzanp yo pé aprann-yo kijan pou yo fè on réinyon a prédikasyon sianka pa ni pon frè. Yo pé aprann-yo mannyé zouti oben machin. Konsa lèwvwè ké ni on chantyé pou konstwi batiman oben lè ké ni dé ti travo adan sé batiman-lasa, sé sè-la ké pé bay on pal. Adan Bétèl-la, sé rèsponsab-la ka fòwmé sé sè-la pou yo travay adan diféran sèwvis, kon sèwvis ki ka okipé-y dè sé batiman-la, sèwvis ki ka achté biten, sèwvis ki ka fè lakontabilité, sèwvis enfòwmatik oben dòt sèwvis ankò. Lèwvwè yo ka fòwmé sé sè-la, sé ansyen-la ka montré kè pou yo, sé sè-la ni kapasité é kè sé dé moun ou pé fè konfyans.

Onlo sè ka sèvi èvè sa sé ansyen-la aprann-yo pou édé lézòt. Pa ègzanp, yo ba sèwten sè on fòwmasyon pou aprann konstwi batiman é sé sè-lasa ka sèvi èvè sa yo aprann pou édé moun ki sibi on katastwòf rèkonstwi kaz a yo. Dòt sè rèsèvwa on fòwmasyon pou préché an lari é yo ka sèvi èvè sa yo aprann-yo pou fòwmé dòt sè adan domenn-lasa. Ka sé sè-la ka rèsanti davwa sé ansyen-la fòwmé-yo ? Mi sa Jennifer ka di : « Lè an té asi on chantyé a on sal di Wayòm, on frè ki té rèsponsab pran tan a-y pou i té fòwmé-mwen. I té ka gadé travay-la an té ka fè la byen é i té ka félisité-mwen. An té enmé travay èvè-y toubònman pas an té ka santi kè i té ka fè-mwen konfyans é kè sa an té ka fè la té itil. »

AN-NOU AJI ÈVÈ SÉ SÈ-LA KONSI YO SÉ FANMI AN NOU

Menmjan ki Jéova nou enmé sè an nou ki fidèl ! Alò, nou ka aji épi yo kon nou té’é aji èvè fanmi an nou (1 Tim. 5:1, 2). Nou kontan travay pou Jéova èvè yo. Sé on bèl lonnè toubònman. É a pa ti kontan nou kontan lèwvwè yo ka santi kè nou enmé-yo é kè nou ka soutyenn-yo ! Mi sa on sè non a-y sé Vanessa ka di : « Adan òwganizasyon a Jéova, ni onlo frè ki ka ankourajé-mwen. An ni onlo rèkonésans pou Jéova davwa an ka fè pawti a òwganizasyon a-y. » Mi sa on sè ki ka rété Taywann ka di : « Lè an ka vwè jan òwganizasyon a Jéova ka ba sé madanm-la valè é jan yo ka tchenn kont dè sa yo ka rèsanti, an ni onlo rèkonésans pou Jéova. Sa ka konsolidé fwa an mwen é sa ka fè-mwen ni plis rèkonésans ankò pou òwganizasyon a Jéova. »

Lèwvwè Jéova ka vwè kè adan pèp a-y, sé misyé-la ka fè éfò pou yo vwè sé madanm-la menmjan ki-y é aji èvè sé madanm-la menmjan ki-y osi, a pa ti fyèw Jéova dwèt fyèw ! (Pwov. 27:11). Mi sa Benjamin, on ansyen ki ka viv an Ékòs ka di : « Adan mond-lasa, onlo misyé pa ni pon rèspé pou sé madanm-la. Alò sa nou anvi sé kè lèwvwè on madanm ka vin lasal, i vwè kè a pa konsa sa ka pasé owa an nou. » Léfrè, an-nou fè tousa nou pé pou nou imité Jéova adan jan nou ka aji èvè sè an nou é an-nou ba-yo lanmou-la é rèspé-la yo mérité la (Wom. 12:10).