1. Poukwa Mémoryal-la sé jou-la ki pi enpòwtan la adan lanné-la ? (Lik 22:19, 20).

 POU moun ki ka adoré Jéova, Mémoryal a mò a Jézikris sé évènman-la ki pi enpòwtan la adan lanné-la. Sé sèl biten Jézi mandé sé disip-la sélébré (li Lik 22:19, 20). Nou présé sélébré Mémoryal-la pou plizyè rézon diféran. An-nou vwè déotwa adan yo.

2. Poukwa nou présé ay adan Mémoryal-la ?

² Mémoryal-la ka édé-nou médité asi jan ranson-la sé on biten ki enpòwtan, é asi bénédisyon nou pé ni grasa-y. I ka fè-nou sonjé osi kijan nou pé montré rèkonésans an nou pou sakrifis a Jézi (2 Kor. 5:14, 15). Anplisdisa, pannan Mémoryal-la, « yonn pé ankourajé lòt » adan lasanblé-la (Wom. 1:12). Chak lanné, onlo moun ki inaktif ka vin Mémoryal é lèwvwè yo ka vwè jan yo ka akéyi-yo bra gran wouvè, ni sèwten adan yo ki anvi viré an 2 bra a Jéova. Pannan Mémoryal-la, sa onlo moun ka vwè é sa yo ka tann ka touché tchè a yo é sa ka ba-yo anvi étidyé Labib. Alò nou ka tou konprann poukwa jou-lasa enpòwtan toubònman pou nou.

3. Poukwa nou pé di kè Mémoryal-la ka ini tout sèwvitè a Jéova asi latè ? (gadé imaj-la osi).

³ Nou présé vwè jou a Mémoryal-la rivé osi pas nou sav kè jou-lasa toupatou asi latè, frè é sè an nou ké sélébré évènman-lasa kon noumenm. Kifè, nou ini. Adan chak péyi,  Témwen a Jéova ka réini-yo lè solèy-la ka kouché. Noutout nou ka kouté menm diskou-la ki ka palé dè ranson-la. Nou ka chanté 2 kantik, nou ka fè pen-la é diven-la pasé adan sal-la, é nou ka di « amèn » èvè tout tchè an nou lè yo ka fè sé 4 priyè-la pannan sérémoni-la. Pannan 24è apépré, noutout ka fè menm biten-la. Ou ka imajiné jan Jéova é Jézi dwèt kontan lè yo ka vwè kè noutout ka fè menm biten-la toupatou asi latè pou ba-yo lonnè !

4. A ki kèsyon nou ké réponn adan awtik-lasa ?

⁴ Adan awtik-lasa, nou ké réponn a 3 kèsyon : Kijan nou pé préparé tchè an nou pou Mémoryal-la ? Kijan nou pé édé dòt moun pwofité dè bèl évènman-lasa ? É kijan nou pé ankourajé frè é sè an nou ki inaktif ? Lè nou ké réponn a sé kèsyon-lasa, sa ké édé-nou préparé-nou pou évènman-lasa ki vréman enpòwtan.

KIJAN NOU PÉ PRÉPARÉ TCHÈ AN NOU ?

5. a) Sakrifis a Jézi ni onlo valè. Poukwa fò-nou réfléchi asi sa ? (Sòm 49:7, 8). b) Lè ou gadé vidéo-la Poukwa Jézi mò, ka ou woutyenn ?

⁵ Nou pé fè plizyè biten pou préparé-nou pou Mémoryal-la men on biten enpòwtan nou pé fè, sé réfléchi asi jan sakrifis a Jézi ni valè. Noumenm an nou pé pa fè ayen pou woté-nou anba jouk a péché-la é anba jouk a lanmò (li Sòm 49:7, 8 ; gadé vidéo-la a Poukwa Jézi mò ? osi). Jéova fè ansòt pou Jézi bay vi a-y pou nou, men sé té on gwo sakrifis ki pou yonn ki pou lòt (Wom. 6:23). Pi nou ké pran tan réfléchi asi sé sakrifis-la Jéova é Jézi fè pou nou la, pi nou ké ni rèkonésans pou ranson-la. Nou ké vwè sèwten sakrifis Jéova é Jézi fè pou péyé ranson-la. Men pou koumansé, an-nou vwè déotwa détay asi ranson-la.

6. Poukwa nou pé di kè sakrifis a Jézi sé té on ranson ?

⁶ Sa nou ka kriyé on ranson, sé on lajan moun ka péyé pou yo viré achté on biten. Lè Jéova kréyé Adan, prèmyé misyé-la, i té pawfè. I té ni lèspwa dè viv pou touttan men lèwvwè i péché, i pèd èspwa-lasa é i fè tout désandan a-y pèd sa osi. Alò pou Jézi té viré achté sa Adan pèd, fò i té ofè vi pawfè la i té ni la an sakrifis. Tout tan-la Jézi rété si latè la, « i pa fè pon péché é i pa jen sèvi èvè bouch a-y pou kouyonné moun » (1 Pyè 2:22). Lè i mò, i té pawfè kon Adan té pawfè avan i té péché. Alò, lèwvwè Jézi sakrifyé vi a-y, i té pé péyé vi-la Adan té pèd la (1 Kor. 15:45 ; 1 Tim. 2:6).

7. Ki difikilté Jézi jwenn lè i té asi latè ?

⁷ Lè Jézi té si latè, i toujou obéyi Pap’a-y ki an syèl-la menm lèwvwè sa té rèd. Lè i té timoun, Jézi té pawfè alòskè fanmi a-y pa té pawfè. Magrésa, i toujou obéyi-yo (Lik 2:51). Lè i té jenn, pétèt moun éséyé mèt présyon asi-y pou i pa té obéyi Jéova oben fanmi a-y. É lè i vin grannonm, Satan tanté-y a plizyè rèpriz é i jous di-y ba Jéova do (Mat. 4:1-11). Satan té byen désidé a fè-y fè on péché pou i pa té péyé ranson-la.

8. Ki difikilté ankò Jézi andiré ?

⁸ Pannan Jézi té ka préché asi latè, i andiré dòt difikilté ankò. Yo pèwsékité-y é yo jous chèché a tchouyé-y (Lik 4:28, 29 ; 13:31). Anplisdisa, fò i té sipòté défo a disip a-y osi (Mawk 9:33, 34). É avan yo té tchouyé-y, yo fè jé èvè tèt a-y é yo fè-y bon atrosité. I soufè bon soufè la avan i té mò é yo tchouyé-y kon kriminèl (Ébr.  12:1-3). Anplisdisa, lèwvwè i té asi poto-la, i té tousèl é Jéova pa té ka pwotéjé-y ankò b (Mat. 27:46).

9. Lè ou ka sonjé tout sé sakrifis-la Jézi fè pou nou la, ka ou ka rèsanti ? (1 Pyè 1:8).

⁹ Nou ka vwè on mannyè ki klè kè pou i té péyé ranson-la, Jézi soufè bon soufè la. Lèwvwè nou ka réfléchi asi tout sé sakrifis-la Jézi fè pou nou la, nou ka vin enmé-y pi fò (li 1 Pyè 1:8).

10. Lè Jéova bay vi a Gason a-y pou péyé ranson-la, poukwa nou pé di kè sa kouté-y chè ?

¹⁰ É Jéova aprézan ? Ki sakrifis i té paré a fè pou Jézi té péyé ranson-la ? Jéova é Jézi kon bag é dwèt é pa ni pon papa ki pé ni on lanmou konsa pou gason a-y (Pwov. 8:30). Jézi jwenn éprèv si éprèv. Alò, zò ka imajiné sa Jéova dwèt rèsanti lè i vwè Jézi anba sé éprèv-lasa. Sèten tchè a-y té ka sengné lè i vwè jan yo té ka malmenné Gason a-y, jan yo pa té vlé-y é jan yo fè-y vwè bon mizè.

11. Bay on ègzanp ki ka montré sa Jéova rèsanti lè yo tchouyé Gason a-y.

¹¹ Lè on paran ka pèd on timoun, i ka soufè toubònman. Lè nou ka pèd on moun nou enmé, menmsi nou ka kwè fò fò fò adan larézirèksyon, apapousa sa pa’a fann tchè an nou. Ègzanp-lasa ka édé-nou konprann sa Jéova dwèt rèsanti lè i vwè Gason chéri a-y soufè é mò an lan 33 c (Mat. 3:17).

12. Ka ou pé fè dépi alè pou-w préparé-w pou Mémoryal-la ?

¹² Sa té’é byen si ou té ka pran on tan pou-w étidyé dé biten asi laranson lè ou ka étidyé tousèl a-w oben lè ou ka fè étid familyal a-w. Pétèt kè ou té’é pé koumansé fè sa dépi alè. Ou té’é pé sèvi èvè Guide de recherche pour les Témoins de Jéhovah oben èvè dòt zouti nou ni pou fè rèchèch pou-w konnèt plis biten asi sa d. Anplisdisa, éséyé fè tousa ou pé pou ou suiv pwogram a lèkti a Labib pou Mémoryal-la. Ou ké touvé-y adan Kayé pou réinyon Vi é Ministè la. É jou a Mémoryal-la, gadé adorasyon a lèmaten la yo préparé pou évènman-lasa. Lè nou ka préparé tchè an nou pou Mémoryal-la, nou ka rivé édé dòt moun pou yo pwofité dè évènman-lasa osi (Èsdr. 7:10).

 FÈ DÒT MOUN PWOFITÉ DÈ SA

13. Ki prèmyé biten nou pé fè pou fè dòt moun pwofité dè évènman-lasa ?

¹³ Kijan nou pé fè dòt moun pwofité dè évènman-lasa ? Nou ka tou konprann kè prèmyé biten pou nou fè sé envité-yo. Sé vré, nou ka envité moun lè nou ka préché dè kaz-an-kaz men ou pé envité dòt moun osi. Sé pé moun an fanmi a-w, kolèg-travay a-w, kanmarad-lékòl a-w é dòt moun ou konnèt. Si ou pa ni asé envitasyon pou ba sé moun-la an men a yo, ou pé sèvi èvè Entèwnèt pou voyé lyen a envitasyon-la ba yo. Pétèt lè ou ké vwè kantité moun ki dakò pou yo vin Mémoryal, tchè a-w ké soté (Ékl. 11:6).

14. Bay on ègzanp ki ka montré ki travay sa pé fè lè ou ka envité on moun voumenm a-w.

¹⁴ Lè on moun ka vwè kè ou sonjé-y é kè ou envité-y pou vin Mémoryal, sa pé ba-y anvi vin. Sé sa ki rivé on sè, mari a-y pa Témwen a Jéova. On jou, mari a-y enn di-y kè i ka vin èvè-y an Mémoryal-la é misyé-la té tou kontan di-y sa. Alò sè-la pa konprann ayen paskè pannan plizyè lanné, i té ja envité mari a-y men i pa jen vin. Fwa-lasa, ka ki ba misyé-la gou pou i vin ? Mari a-y èspliké kè on ansyen i té konnèt té vin owa a-y pou envité-y. Kifè, mari-la vin Mémoryal é menm plizyè lanné apré, i kontinyé vin Mémoryal.

15. Lèwvwè nou ka envité on moun vin Mémoryal, ka pou nou pa jen oubliyé ?

¹⁵ Fò pa ou oubliyé kè pétèt sé moun-la ou ké envité la pé rivé a pozé-w kèsyon asi Mémoryal-la siwtou siwvwè yo po’o jen vin réinyon avan. Sa té’é byen si ou té ka réfléchi pou vwè ki kèsyon yo té’é pé pozé-w. Konsa, ou ké pé préparé-w pou ou réponn-yo (Kol. 4:6). Pa ègzanp, ni sèwten moun ki pé mandé-yo : « Kijan évènman-lasa ka pasé ? Konmen tan sa ka diré ? Ki lenj pou an mèt asi mwen ? Ès fò an ké péyé pou an rantré ? Ès yo pa’a fè lakèt ? » Lè ou ka envité on moun pou i vin Mémoryal, mandé-y si i ni kèsyon é aprésa réponn a kèsyon a-y. Konsa, sa ké rasiré-y. Ou pé sèvi èvè sé vidéo-la Sonjé  sakrifis a Jézi é Ka ki ka fèt adan on Sal di Wayòm ? pou èspliké-y kijan réinyon an nou ka pasé. É adan lèson 28 a liv-la Ou pé ni tchè kontan pou touttan !, ou pé touvé dé bon ti lidé pou ou pé sa fè on bèl ti kozé èvè moun-la.

16. Ki dòt kèsyon sé moun-la ki ka vin adan Mémoryal-la té’é pé pozé-yo ?

¹⁶ Pétèt kè on moun ki vin Mémoryal pou prèmyé fwa ké ni dòt kèsyon ankò lèwvwè Mémoryal-la ké fin. Pétèt kè i ké mandé-y men poukwa a pa tout sé moun-la ki pran pen-la é diven-la. Pétèt kè i ké vé sav konmen fwa an lanné-la nou ka sélébré Mémoryal-la é ès tout réinyon an nou ka pasé menmjan-la. Sé vré kè adan diskou a Mémoryal-la, nou ka touvé tout sé répons-lasa men pétèt kè on moun ki ka vin pou prèmyé fwa ké bizwen yo èspliké-y plis biten ankò. A moman-lasa, pétèt ou té’é pé sèvi èvè awtik-la « Poukwa Témwen a Jéova pa’a sélébré Rèpa a Ségnè la menmjan ki sélézòt rèlijyon-la ? » ki asi jw.org. Sa nou anvi, sé fè tousa nou pé pou édé ‘tout sé moun-la ki ni mantalité-la ki fo la’ pou yo pé sa pwofité dè bèl évènman-lasa é nou vé fè sa, ki sé avan Mémoryal-la, ki sé pannan Mémoryal-la oben apré Mémoryal-la (Akt 13:48).

ANKOURAJÉ MOUN KI INAKTIF

17. Kijan sé ansyen-la pé ankourajé moun ki inaktif ? (Ézékyèl 34:12, 16).

¹⁷ Si ou ansyen, kijan ou pé ankourajé moun ki inaktif pannan péryòd a Mémoryal-la ? Montré-yo kè ou ka sonjé-yo é kè ou enmé-yo (li Ézékyèl 34:12, 16). Avan Mémoryal-la, éséyé jwenn on maksimòm dè moun ki inaktif. Di-yo kè yo ni valè pou-w é kè ou anvi fè tousa ou pé pou édé-yo. Envité-yo pou yo pé sa vin adan Mémoryal-la. Si yo ka vin, akéyi-yo bra gran wouvè. Apré Mémoryal-la, kontinyé ay vwè-yo oben kontinyé kriyé-yo é fè tousa ou pé pou édé-yo wouvin an 2 bra a Jéova (1 Pyè 2:25).

18. Kijan nouchak pé ankourajé on moun ki inaktif ? (Women 12:10).

 ¹⁸ Nouchak adan lasanblé-la pé ankourajé on moun ki inaktif é ki vin Mémoryal. Kijan nou pé fè sa ? Ében sé siwvwè nou ka montré-yo kè nou enmé-yo, kè nou janti èvè yo é kè nou ka rèspèkté-yo (li Women 12:10). Pétèt kè pou frè an nou oben sè an nou té viré lasal, sa pa té fasil é fò ou sonjé sa. Pétèt kè i té ka mandé-y ka moun té’é di-y é ka yo té’é di asi-y lè yo té’é vwè-y é pétèt kè sa té ka fè-y pè e. Alò pa pozé-y pon kèsyon ki té’é pé jenné-y é pa di-y pon biten ki té’é pé fè-y mal (1 Tés. 5:11). Frè é sè an nou ki inaktif ka fè pawti a fanmi an nou toujou. A pa ti kontan nou kontan lè yo ka woukoumansé adoré Jéova èvè nou ! (Sòm 119:176 ; Akt 20:35).

19. Lè nou ka sélébré mò a Jézi, ki byenfé sa ka pwokiré-nou ?

¹⁹ Jézi mandé-nou sélébré Mémoryal-la chak lanné é sa pa’a siwprann-nou pas lè nou ka vin adan Mémoryal-la, sa ka fè-nou dibyen é nou ka fè lézòt dibyen osi (Iz. 48:17, 18). Nou ka vin enmé Jéova é Jézi pi fò. Nou ka montré jan nou ni rèkonésans pou sa yo fè pou nou. Nou ka vin pibon zanmi èvè frè é sè an nou. É pétèt nou ké pé èspliké dòt moun kijan yo pé pwofité dè sé bon biten-la ranson-la ka pwokiré-nou la. Alò, an-nou fè tousa nou pé pou nou préparé-nou pou jou-la ki pi enpòwtan la an lanné-la, jou a Mémoryal-la !