1. Kijan ou ka imajiné Jéova ?

 ÈS OU ja éséyé imajiné ka Jéova ka sanm ? Lè ou ka priyé, kijan ou ka imajiné Jéova ? Sé vré, nou pé pa vwè Jéova, men Labib ka sèvi èvè onpakèt èksprésyon pou palé dè-y. Labib ka di kè Jéova sé « on solèy é on boukliyé » é « on difé ki ka détwi » (Sòm 84:11 ; Ébr. 12:29). Ézékyèl vwè Jéova adan on vizyon é i di kè i ka kléré kon on biten ki an lò blan, kè i sizé asi on twòn ki fèt èvè on wòch yo ka kriyé saphir an fransé é kè i lantouré èvè on lawkansyèl ki ka kléré (Ézék. 1:26-28). Lè nou ka li sèwten biten Bib-la ka di asi Jéova, délè nou ka èstèbèkwè oben sa pé fè-nou pè.

2. Poukwa nou pé ni dimal a vin bon zanmi èvè Bondyé ?

² Konm nou pé pa vwè Jéova, pétèt nou pé ni dimal a kwè kè i enmé-nou. Pétèt nou viv dé biten ki té rèd an vi an nou, alò nou pa’a vwè kijan Jéova pé enmé-nou. Pa ègzanp, sé pé pas pap’an nou pa jen montré-nou kè i enmé-nou. Jéova ka konprann sa nou ka rèsanti é i sav kijan sa ka aji asi nou. Pou édé-nou, i ka di-nou adan Pawòl a-y kijan dè moun i yé.

3. Poukwa sa ké fè-nou dibyen dè palé dè lanmou-la Jéova ni pou nou la ?

³ Lanmou. Mo-lasa sé pi bèl mo ki tini pou palé dè Jéova. Labib ka di : « Bondyé sé lanmou » (1 Jan 4:8). Tousa Jéova ka fè, i ka fè-y èvè lanmou. Tèlman Jéova enmé lézòt é tèlman lanmou a-y fò, i jous ka aji èvè lanmou épi moun ki pa enmé-y (Mat. 5:44, 45). Adan awtik-lasa, nou ké palé dè Jéova é dè lanmou-la i ni pou nou la. Pi nou ké aprann konnèt Bondyé é pi nou ké enmé-y.

 JÉOVA ENMÉ-NOU TOUBÒNMAN

4. Lè ou ka sonjé kè Jéova enmé-w èvè tandrès, ka ou ka rèsanti ? (gadé imaj-la osi).

⁴ « Jéova enmé-nou èvè tandrès » (Jak 5:11). Adan Labib, Jéova limenm ka konparé-y èvè on manman ki plen lanmou (Iz. 66:12, 13). Enki imajiné on manman ki ka pran swen a timoun a-y èvè onlo lanmou. I ka mèt timoun-la asi jounou a-y, i ka palé ba-y èvè on ti vwa ki dous é ou ka santi ni plen tandrès adan sa i ka di. Lè timoun-la ka pléré oben lè timoun-la ni on biten ki ka fè-y mal, manman-la ka fè ansòt pou timoun-la ni tousa i bizwen. Menmjan-la, lè nou ké anpenn, nou pé sèten kè Jéova ké montré-nou jan i enmé-nou. Mi sa ki maké adan on sòm : « Lè an santi an té ka néyé anba sa ki té ka enkyété-mwen, ou konsolé-mwen é ou trankilizé-mwen » (Sòm 94:19).

5. Konm nou sav kè Jéova sé on Bondyé ki ni on lanmou ki fidèl, dè kibiten nou pé sèten ?

⁵ Jéova sé on Bondyé ki fidèl (Sòm 103:8). Lèwvwè nou ka fè on biten ki pa bon, i pa’a ban-nou do a-y. A pa ti désèvwa pèp a Izrayèl désèvwa-y. Poutan lèwvwè sé moun-la ki té adan pèp-la té ka rèpanti-yo, i té ka montré-yo kè i té ni on lanmou ki fidèl pou yo. Pa ègzanp, mi sa i di pèp-la on jou : « Ou vin ni onlo valè pou mwen, an pòté-w anlè, é an enmé-w » (Iz. 43:4, 5). Jéova pa chanjé. Jousalè nou pé konté asi-y. Menmsi nou fè péché ki grav, i pé’é lagé-nou. Si nou ka rèpanti-nou é kè nou ka wouvin an 2 bra a-y, nou ké vwè kè i pa jen arété enmé-nou. I ka pwomèt-nou kè « i ké padonné anplen » (Iz. 55:7). Lè Jéova ka padonné on moun, Labib ka konparé sa èvè « épòk a soulajman » ki ka vin dè Bondyé limenm (Akt 3:19).

6. Ka Zakari 2:8 ka aprann-nou asi Jéova ?

⁶ (Li Zakari 2:8.) Konm Jéova enmé-nou, i ka konprann sa nou ka rèsanti byen menm é i anvi pwotéjé-nou toubònman. Lèwvwè nou ka soufè, i ka soufè ansanm èvè nou. Sé pousa nou pé sèten i ké réponn a priyè an nou si nou ka di-y : « Pwotéjé-mwen kon koko a zyé a-w » (Sòm 17:8). Zyé an nou, sé on biten ki frajil é ki enpòwtan toubònman. Alò lèwvwè Jéova ka konparé-nou èvè koko a zyé a-y, sé konsi i té ka di-nou : « Kèlkèswa moun-la ki mannyé-zòt la, zòt sèwvitè an mwen kè an enmé, sé koko a zyé an mwen i ka mannyé. »

7. Poukwa fò nou fè ansòt pou nou pli sèten kè Jéova enmé-nou ?

 ⁷ Jéova vé nouchak sav kè i enmé-nou é i vé kè nou sèten dè sa. Men i sav kè délè, akòz dè sèwten biten difisil nou viv, nou ka mandé-nou si i pé enmé-nou. Oben pétèt kè alèla nou ka pran bon gaz é sa pé fè-nou mandé-nou si Jéova enmé-nou poudèbon. Alò ka pou nou fè pou nou pli sèten kè Jéova enmé-nou ? Fò-nou ké pran on tan pou ègzaminé kijan Jéova ka montré Jézi kè i enmé-y, kijan i ka montré sé wen-la kè i enmé-yo é kijan i ka montré-nouchak sa osi.

KIJAN JÉOVA KA MONTRÉ ON MOUN KÈ I ENMÉ-Y ?

8. Poukwa Jézi té sèten kè Pap’a-y té enmé-y ?

⁸ Ni milya é milya lanné Jéova é Jézi kon bag é dwèt. Pa ni lanmou ki pi fò ki ta Jéova é ti Gason chéri a-y. Jéova di jan i enmé Jézi é i pa té pè fè sa douvan toutmoun. Nou ka touvé sa i di adan Matyé 17:5. I té pé di : « Mi sila ki ka fè-mwen plézi la. » Men konm i té anvi nou sav jan i enmé Gason a-y, i di : « Gason an mwen, sila an enmé onlo la ». A pa ti fyèw Jéova fyèw dè-y siwtou pas i té dakò pou bay vi a-y an sakrifis (Éféz. 1:7). Li Jézi aprézan té sav Pap’a-y té enmé-y é i pa té ni pon dout asi sa. I té sèten dè sa a san pou san. A plizyè rèpriz, i ni lokazyon di kè Pap’a-y enmé-y é ou té ka santi jan i té sèten dè sa i té ka di (Jan 3:35 ; 10:17 ; 17:24).

9. Jéova enmé sé krétyen wen la fò é pou palé dè lanmou-lasa Pòl sèvi èvè on èksprésyon. Kilès ? (Women 5:5).

⁹ Jéova di on mannyè ki klè kè i enmé sé krétyen wen la (li Women 5:5). Pòl ka di kè ‘tchè an nou ranpli èvè lanmou-lasa’. On liv ki ka palé dè Labib ka èspliké kè tèlman Jéova enmé sé wen-la fò, nou pé konparé lanmou-lasa èvè « on gwo manman rivyè a ». Sé on bèl ègzanp ki ka montré jan Jéova enmé sé krétyen wen la. Sé wen-la sav kè ‘Bondyé enmé-yo’ (Jid 1). Lapòt Jan èspliké sa yo ka rèsanti parapòt a sa. Mi sa i maké : « Gay kijan Pap’an nou enmé-nou ! I fè sa pou yo pé sa kriyé-nou timoun a Bondyé » (1 Jan 3:1). Men ès sé enki sé wen-la Bondyé enmé ? Awa ! I montré kè i enmé-nouchak.

10. Ki pi bèl biten Jéova fè pou montré kè i enmé-w ?

¹⁰ Ki pi bèl biten Jéova fè pou montré-nou kè i enmé-nou ? I ban-nou ranson-la. Lèwvwè Jéova fè sa, i montré kè pa ni moun ki ni plis lanmou ki-y (Jan 3:16 ; Wom. 5:8). Jéova bay vi a Gason a-y kè i enmé onlo toubònman. I aksèpté kè i mò pou padonné péché a toutmoun asi latè é pou pèwmèt-yo vin zanmi èvè-y (1 Jan 4:10). Pi nou ké réfléchi asi pri-la Jéova é Jézi péyé la pou nou, pi nou ké vwè jan yo enmé-nouchak (Gal. 2:20). Jéova pa bay ranson-la enki parapòt a jistis a-y. Sé on kado i ban-nou pas i enmé-nou. Lèfètkè i bay vi a Gason a-y kè i té enmé onlo onlo pou nou, sa ka montré on mannyè ki klè kè i enmé-nou. I lésé Jézi soufè é mò pou nou.

11. Ka Jérémi 31:3 ka aprann-nou ?

¹¹ Nou vwè adan awtik-lasa kè Jéova pa pè di moun sa i ka rèsanti. I ka di-yo franchman kè i enmé-yo (li Jérémi 31:3). I fè-nou vin owa a-y pas i enmé-nou (konparé èvè sa ki maké adan Détéwonòm 7:7, 8). Pa ni ayen ni ponmoun ki pé séparé-nou dè lanmou-la i ni pou nou la (Wom. 8:38, 39). Lè ou ka sonjé kè Jéova enmé-w, ka ou ka rèsanti ? David vwè on mannyè ki klè jan Jéova té enmé-y é jan i té ka pran swen a-y. Li Sòm 23 la é gadé pou vwè kijan sa aji asi-y. Pétèt sa ké aji asi-w menmjan-la.

 LÈ OU KA SONJÉ KÈ JÉOVA ENMÉ-W, KA OU KA RÈSANTI ?

12. Èspliké sa Sòm 23 ka di an 2 mo 4 pawòl ?

¹² (Li Sòm 23:1-6.) Sòm 23 la sé on ti chanté David fè pou di kè i sèten kè Jéova enmé-y é kè i ké toujou pran swen a-y. I ka di jan li é Jéova bon bon zanmi. I jous kriyé Jéova Bèwjé a-y. David té ka lésé Jéova gidonné-y. Kifè, i té ka santi-y ansékirité é i té ka fèfon asi Jéova a san pou san. David té sav kè Jéova té’é kontinyé montré-y kè i enmé-y touléjou a vi a-y. Poukwa i té sèten dè sa ?

13. Poukwa David té sèten kè Jéova té’é toujou pran swen a-y ?

¹³ « Pé’é manké-mwen ayen. » David té ka santi kè Jéova té ka pran swen a-y byen menm pas Jéova toujou té ka ba-y sa i té bizwen. I té sav osi kè Jéova sé té zanmi a-y é kè i té kontan-y. Sé pousa, i té sèten kè kèlkèswa sa ki té’é pasé plita, Jéova té’é kontinyé pran swen a-y adan tout domenn a vi a-y. Konm David té sèten kè Jéova té enmé-y é kè i té ka pran swen a-y, sa té ka édé-y trankilizé lèspri a-y lèwvwè i té enkyèt. Okontrè, i té ni lakontantman é i té byen kontan sa i té ni (Sòm 16:11).

14. Kijan Jéova pé pran swen an nou èvè onlo lanmou ?

¹⁴ Jéova ka pran swen an nou èvè onlo lanmou siwtou lèwvwè malè ka rivé-nou. Sé sa ki rivé Claire b. Sé on sè ki bétélit dépi plis ki 20 an é lèwvwè fanmi a-y sibi éprèv si éprèv, i santi kè i té ka pèd lakat. Pap’a-y fè on AVC, yo èskominyé on sè a-y, aprésa fanmi a-y té oblijé fèmé ti boutik-la yo té ni la é labank sézi kaz a yo. Kijan Jéova pran swen a yo èvè onlo lanmou ? Mi sa Claire ka di : « Pa ni on jou Jéova pa ba fanmi an mwen sa yo té bizwen pou  viv. Souvantfwa, Jéova té ka jous ba-yo plis ki sa an té’é imajiné ! A moman-lasa, an vwè kijan Jéova enmé-mwen èvè onlo tandrès é souvantfwa an ka sonjé sa. Sé dé biten an pé’é jen oubliyé. Tousa édé-mwen andiré lèwvwè an jwenn éprèv apré. »

15. Ka ki té ka wouba David fòs ? (gadé imaj-la osi).

¹⁵ « I ka wouban-mwen fòs. » David té ka jwenn onlo éprèv é onlo pwoblèm. Kifè, délè, i té angwasé bon angwasé la (Sòm 18:4-6). Men konm Jéova té ni on lanmou ki plen tandrès pou-y é konm i té ka pran swen a David, sa té ka wouba David bon fòs. Lèwvwè David té byen las, Jéova té ka menné-y « adan savann ki plen zèb » é « dé koté ni plen dlo pou pozé kò [a-y] ». Sé konsa, David té ka woupran fòs é i té ka kontinyé sèvi Bondyé a-y èvè tchè-kontan (Sòm 18:28-32).

16. Kijan lanmou a Jéova ka ba-w fòs ?

¹⁶ Jòdijou osi, lèwvwè nou ka pran bon gaz adan vi an nou ‘sé pas Jéova ni on lanmou ki fidèl pou nou kè nou pa ka disparèt’ (Lam. 3:22 ; Kol. 1:11). An-nou palé dè Rachel. Pannan pandémi a Covid-19 la, mari a-y lagé-y é i lagé Jéova osi. Mésyé, i santi i té ka mò. Ka Jéova fè pou édé-y ? Mi sa i ka èspliké : « Jéova fè ansòt pou an santi kè lézòt enmé-mwen : i mèt onpakèt zanmi alantou an mwen. Sé zanmi-lasa té ka pasé tan èvè mwen, yo té ka menné manjé ban mwen, yo té ka voyé mésaj ban mwen é yo té ka voyé dé ti vèwsé pou ankourajé-mwen. Yo té ka souri ban mwen é yo té ka fan’an sonjé kè Jéova té ka pran swen an mwen toutlè. Jéova ban-mwen on fanmi ki enmé-mwen toubònman é a pa onsèl fwa an ja di-y mèsi pou sa. »

17. Poukwa David pa té ‘pè ayen rivé-y’ ?

¹⁷ « An pa pè ayen rivé-mwen, pas ou èvè mwen. » Souvantfwa, vi a David té andanjé é i té ni lènmi ki té ni onlo pouvwa. Men konm Jéova té enmé-y, i té ka santi-y ansékirité é i té sav kè Jéova té ka pwotéjé-y. I té ka vwè on mannyè ki klè kè Jéova té èvè-y adan tout sitiyasyon i té ka jwenn é sa té ka rasiré-y. Sé pousa, mi sa i chanté : « [Jéova] woté-mwen anba tousa ki té ka fè-mwen pè » (Sòm 34:4). Sé vré, délè David té pè toubònman men konm i té sav kè Jéova té enmé-y, i pa té ka lésé sa ki té ka fè-y pè pran lanmen asi-y.

18. Lè ou sèten kè Jéova enmé-w, kijan sa pé ba-w fòs lè ou ka viv dé biten ki ka istrésé-w ?

¹⁸ Lèwvwè ni on biten ki ka angwasé-w bon angwasé la é kè ou sèten kè Jéova enmé-w, kijan  sa pé ba-w fòs ? An-nou palé dè Susi, on sè ki pyonyé. I ka èspliké sa li é mari a-y rèsanti lè gason a yo suisidé-y : « Lèwvwè ou ka viv on biten ki rèd konsa, sa ka angwasé-w bon angwasé la é toutlè ou pè dòt mové biten rivé-w ankò. Men lèfètkè Jéova enmé-nou èvè onlo tandrès, sa fè-nou santi-nou ansékirité é nou té ni lenprésyon kè i té ka pwotéjé-nou. » Talè la nou palé dè Rachel. Mi sa i ka sonjé : « On jouswa, an té tris toubònman é an té enkyèt. Alò an priyé Jéova tou ho. An santi-mwen anpé onfwamenm é sa trankilizé-mwen. Sé té konsi i té pran-mwen an 2 bra a-y kon on manman ka fè èvè ti bébé a-y é an pran sonmèy. An pé’é jen oubliyé sa Jéova fè ban mwen. » Aprézan, an-nou palé dè Tasos, on ansyen ki rété 4 an lajòl pas i rèfizé fè lawmé. Kijan Jéova pran swen a-y é kijan i montré-y kè i té enmé-y ? Mi sa i ka réponn : « Jéova ban-mwen tousa an té bizwen é i jous ban-mwen plis ki sa ankò. An té ja sav kè an té pé fè Jéova konfyans men alèla, an té pli sèten dè sa ankò. Anplisdisa, grasa lèspri sen a-y, i édé-mwen ni tchè-kontan alòskè koté-la an té yé la sé on koté ki ka fè moun pèd lakat. Sa édé-mwen vwè kè pi an ka fè Jéova konfyans, pi an ka rivé santi jan i enmé-mwen. Alò an vin pyonyé pèwmanan toupannan an té lajòl. »

VIN PIBON ZANMI ÈVÈ BONDYÉ A-W KI PLEN TANDRÈS

19. a) Si nou sèten Jéova enmé-nou, ka nou ké di-y adan priyè an nou ? b) Pawmi sé vèwsé-la ki ka palé dè lanmou a Jéova, kilès ki ka touché-w plis ? (gadé ti karé-la «  Déotwa vèwsé ki ka édé-nou santi jan Jéova enmé-nou èvè tandrès. »)

¹⁹ Sa David, Claire, Rachel, Susi é Tassos viv ka montré kè Jéova, « Bondyé-la ki plen lanmou la », èvè nou ! (2 Kor. 13:11). Sa nouchak ka viv ka entérésé-y. Nou sav kè i ka ‘lantouré-nou èvè lanmou a-y ki fidèl’ é nou pa ni pon dout asi sa (Sòm 32:10). Pli nou ka médité asi jan i ka aji èvè lanmou épi nou, pli nou ka rann-nou kont kè i ka pran swen an nou é pli nou ka vin bon bon zanmi èvè-y. Nou pé santi-nou alèz pou priyé-y agou a tchè an nou é nou pé di-y jan nou bizwen lanmou a-y. Nou pé di-y tousa ki ka enkyété-nou, é nou pé sèten kè i ka konprann-nou é kè i vlé édé-nou (Sòm 145:18, 19).

20. Poukwa lanmou a Jéova ka ban-nou anvi vin owa a-y ?

²⁰ Menmjan chalè a on bon ti difé pé chofé-nou lèwvwè ka fè fwèt, sé menmjan-la lanmou a Jéova pé konsolé-nou lè nou ka pasé penn é péripési. Alò, lésé Jéova montré-w jan i enmé-w èvè onlo tandrès. Konsa, vou osi ou ké pé di èvè tout tchè a-w : « An enmé Jéova » ! (Sòm 116:1).