AWTIK POU ÉTIDYÉ 3
KANTIK 124 Soyons fidèles
Jéova ké édé-w lè ou ké anba éprèv
« [Jéova] sé on abri é owa-y mwen ansékirité ; ayen pé’é soukwé-mwen two fò » (SÒM 62:2).
ON TI LIDÉ ASI SA NOU KAY VWÈ
Déotwa biten nou pé fè pou Jéova soutyenn-nou lè nou ka jwenn éprèv.
1-2. Ki difikilté sèwvitè a Jéova pé rivé a jwenn ?
DÉLÈ nou ka viv sèwten biten ki rèd é sa pé chanjé vi an nou bout pou bout. Pa ègzanp, yo touvé kè Luis a té ni on kansè ki té ra toubònman. Mèdsen-la di-y kè pa’a rété-y onlo tan pou viv. Monika é mari a-y té ka pòté bon mannèv pou sèvi Jéova. Mari a-y té ansyen. Men on jou, i aprann kè mari a-y té ka twonpé-y é sa té ja ka diré dépi plizyè lanné. Olivia li, sé on sè ki sélibatè é i té oblijé kité kaz a-y pas on siklòn té ka vin. É lè i viré, i pa té ni kaz ankò. Adan on ti moman, vi a sé frè é sè-lasa enn chalviré. É vou, ès ou ja viv dé biten konsa ki enn chalviré vi a-w onsèl kou ?
2 Menmsi nou sé sèwvitè a Jéova, nou ka jwenn difikilté é nou ka tonbé malad kon toutmoun. Anplisdisa, délè fò-nou andiré osi pas moun ki hay Témwen a Jéova ka mèt baton an wou an nou oben yo ka pèwsékité-nou. Jéova pa ka anpéché-nou jwenn éprèv kon séla. Men, i pwomèt-nou kè i ké édé-nou (Iz. 41:10). Grasa sa i ka fè pou édé-nou, nou pé ni tchè-kontan, nou pé pran dé bon désizyon é nou pé rété fidèl a-y menm lèwvwè nou ka jwenn éprèv ki rèd toubònman. Adan awtik-lasa, nou ké vwè 4 biten Jéova ka fè pou édé-nou lèwvwè nou ka pasé dé bout rèd. Anplisdisa, nou ké vwè ka pou nou fè pou nou pé sa pwofité dè èd-la i ka ban-nou la.
JÉOVA KÉ PWOTÉJÉ-W
3. Lè nou ka viv on sitiyasyon ki rèd menm, ki biten nou pé ni dimal a fè ?
3 Pwoblèm-la. Lè nou ka viv on sitiyasyon ki rèd menm, nou pé ni dimal a réfléchi byen konm i fo é nou pé ni dimal a pran dé désizyon osi. Poukisa ? Pas tchè an nou an bobo é sa ki ka enkyété-nou pé pran lanmen asi nou. Nou pé ni lenprésyon kè nou adan on gwo gwo nwèsè é nou pa’a vwè ola pou nou ay. An-nou vwè sa sé 2 sè-la nou palé talè la rèsanti lèwvwè yo té anba éprèv. Mi sa Olivia rakonté : « Lè an vwè jan siklòn-la krazé kaz an mwen, sa chouboulé-mwen toubònman é an pa té sav ka pou an té fè menm menm menm. » Mi sa Monika ka di anrapò èvè sa mari a-y fè-y : « Mari an mwen désèvwa-mwen onlo. Sa fann tchè an mwen. An té ka soufè bon soufè la. Menm pou an té fè sé ti biten-la an té ni labitid fè la, sa té rèd toubònman pou mwen. An pa té’é jen imajiné kè on biten konsa té’é rivé-mwen on jou. » Jéova pwomèt kè i ké édé-nou lèwvwè on biten ka chouboulé-nou. Kijan i ké fè sa ?
4. Dapré Filipyen 4:6, 7, ka Jéova pwomèt-nou ?
4 Sa Jéova ka fè. Jéova pwomèt kè i ké ban-nou sa Labib ka kriyé « lapé ki ka vin dè Bondyé » (li Filipyen 4:6, 7). Lè ou ka santi-w anpé konsa, lèspri a-w trankil davwa ou bon zanmi èvè Jéova. Lapé ki ka vin dè Bondyé « ka dépasé tousa on moun pé konprann ». Sa lontan pi byen ki tousa nou té’é pé imajiné. Pétèt kè on jou ou priyé Jéova èvè tout tchè a-w é lèwgadé ou enn santi-w anpé é voumenm a-w pa konprann. Ében sé sa yo ka kriyé « lapé ki ka vin dè Bondyé ».
5. Kijan lapé ki ka vin dè Bondyé ka pwotéjé tchè an nou é lèspri an nou ?
5 Adan sé menm vèwsé-lasa nou ka li kè lapé ki ka vin dè Bondyé ‘ké pwotéjé tchè an nou é lèspri an nou’. Mo-la yo tradui-la é ki bay « ké pwotéjé » sé té on mo kè sé militè-la té ka itilizé. Yo té ka sèvi èvè-y pou palé dè sòlda ki té ka pwotéjé on vil sianka moun té ka vin ataké-y. Sé moun-la ki té ka rété adan vil-lasa té ka dòmi trankilman pas yo té sav kè té ni sòlda ki té la pou pwotéjé-yo. Menmjan-la, lèwvwè lapé ki ka vin dè Bondyé ka pwotéjé tchè an nou é lèspri an nou, nou ka santi-nou kalm pas nou sav nou ansékirité (Sòm 4:8). Menmsi sitiyasyon an nou pa’a chanjé tousuit, nou pé santi-nou anpé kon Àn (1 Sam. 1:16-18). É lè nou ka santi-nou anpé konsa, nou ka rézonné pibyen é nou ka rivé pran bon désizyon pi fasilman.
Priyé joustan ou santi kè « lapé-la ki ka vin dè Bondyé » ka pwotéjé tchè a-w é lèspri a-w (gadé sé paragraf 4 a 6 la).
6. Ka pou nou fè pou nou ni lapé-la Bondyé ka bay la ? (gadé imaj-la osi).
6 Sa pou nou fè. Lèwvwè dé biten ka chouboulé lèspri a-w, mandé Jéova pwotéjé-w. Kijan ou pé fè sa ? Priyé joustan ou santi kè i trankilizé-w (Lik 11:9 ; 1 Tés. 5:17). Nou palé dè Luis talè la é i ka èspliké kijan li é madanm a-y, Ana, réyaji lè yo vin aprann kè pa té ka rété Luis onlo tan a viv ankò. Mi sa i di : « Adan on sitiyasyon konsa, ou ni enpé désizyon a pran, ki sé anrapò èvè trètman a-w oben anrapò èvè dòt biten. É pou ou pran on désizyon, sa pa fasil ditou-ditou. Men konm nou té ka priyé Jéova, sa trankilizé-nou. » Luis é madanm a-y èspliké kè yo priyé bon priyé la pou mandé Jéova trankilizé lèspri a yo é tchè a yo é pou i té pé sa ba-yo sajès pou yo té pran bon désizyon. É yo vwè men a Jéova. Si ou ka jwenn on éprèv, priyé Jéova toutlè é ou ké vwè jan lapé-la Jéova ka bay la ké pwotéjé tchè a-w é lèspri a-w (Wom. 12:12).
JÉOVA PÉ’É LÉSÉ AYEN SOUKWÉ-W TWO FÒ
7. Lèwvwè nou ka jwenn éprèv, ka nou pé rèsanti ?
7 Pwoblèm-la. Lèwvwè nou ka pran bon gaz, nou pa’a pansé é nou pa’a aji kon nou abityé fè-y. Sa nou ka rèsanti osi, a pa sa nou abityé rèsanti. Délè nou pé rèsanti onlo biten diféran andidan an nou é nou pé ni lenprésyon kè nou ka néyé anba a sa. Sé sa Ana rèsanti apré mari a-y Luis mò. Mi sa i di : « Délè, moral an mwen té a zéwo é an té ka pléré lè an té ka sonjé tousa ki té ka rivé-mwen. Dépawfwa, an té ka kòlè toubònman pas Luis pa té la ankò. » Dòt moman, Ana té ka santi-y tousèl é i té kòlè pas fò i té pran sèwten désizyon kè Luis té ka pran avan é Luis té ka fè sa byen. Sèwten jou i té ni lenprésyon kè i té anmitan on tanpèt. Lèwvwè sa nou ka rèsanti ka pran lanmen asi nou, kijan Jéova ka édé-nou ?
8. Ka Jéova ka pwomèt-nou an Sòm 62:2 ?
8 Sa Jéova ka fè. I ka pwomèt-nou kè i pé’é lésé ayen soukwé-nou two fò (li Sòm 62:2). Lèwvwè on bato ka jwenn on tanpèt an lanmè, i pé kanté adwat, kanté agòch, é sa pé danjéré toubònman. Pou anpéché bato-la kanté twòp, yo ka mèt dé biten yo ka kriyé an fransé ailerons stabilisateurs asi chak bò a bato-la, anba dlo-la. Jòdila, ni onlo bato ki ni sa, é grasa sa, sé bato-la ka soukwé mwens, sé moun-la ki òbò a yo la pi alèz é yo pi ansékirité. Men pi souvan ki rarman, sistèm-lasa ka maché pibyen lè bato-la ka fè douvan. Menmjan-la, Jéova ké fè ansòt pou ayen pa soukwé-nou two fò si nou ka kontinyé rété fidèl a-y é si nou ka kontinyé fè douvan magré sé éprèv-la nou ka jwenn la.
Sèvi èvè zouti pou fè rèchèch pou ou wouvin kalm (gadé sé paragraf 8 é 9 la).
9. Kijan sé zouti-la ki fèt pou fè rèchèch la pé édé-nou lèwvwè ni sèwten biten ki ka chouboulé-nou ? (gadé imaj-la osi).
9 Sa pou nou fè. Lèwvwè ou ka rèsanti onpakèt biten diféran é kè sa ka chouboulé-w, fè tousa ou pé pou ou kontinyé priyé, ay réinyon é préché. Sé vré, pétèt kè ou pé’é pé fè tousa ou té ka fè avan, men fò pa ou jen oubliyé kè Jéova sé on Bondyé ki rézonab (konparé èvè sa ki maké adan Lik 21:1-4). Pran on ti tan osi pou-w étidyé tousèl a-w é pou-w médité. Jéova ka ban-nou onlo bèl vidéo é awtik ki pé édé-w pou sa ou ka rèsanti pa pran lanmen asi-w. Pou ou touvé sa ki ké fè-w dibyen, sèvi èvè sé zouti-la nou ni la pou fè rèchèch, kon JW Library®, Index des publications des Témoins de Jéhovah é Guide de recherche pour les Témoins de Jéhovah. Sé sa Monika nou palé dè-y talè la fè. Dépi i té ka rann-li kont kè sa i té ka rèsanti té ka pran lanmen asi-y, i té ka sèvi èvè sé zouti-lasa pou fè rèchèch. Pa ègzanp, adan koté-la ki fèt pou fè rèchèch la i mèt « colère », « trahison » oben « fidélité ». Aprésa, i té ka li sé awtik-la i té touvé la joustan i té ka santi-y myé. Mi sa i ka rakonté : « Lè an té ka koumansé fè sé rèchèch-la, an té angwasé bon angwasé la men aprésa, an té ni lenprésyon kè Jéova té ka pran-mwen an 2 bra a-y. Pi an té ka li sé awtik-lasa é pi an té ka vwè kè Jéova té ka konprann tousa an té ka rèsanti byen menm é kè i té la èvè mwen. » Vou osi, Jéova pé édé-w pou sa ou ka rèsanti pa pran lanmen asi-w é i pé fè sa joustan ou vin kalm (Sòm 119:143, 144).
JÉOVA KÉ SOUTYENN-VOU
10. Lèwvwè nou viv on biten ki angwasé-nou bon angwasé la, kijan nou pé santi-nou ?
10 Pwoblèm-la. Apré nou viv on biten ki angwasé-nou bon angwasé la, ni sèwten jou nou ké santi-nou fèb é moral an nou ké a zéwo. A moman-lasa nou ké sanm on kourè ki ni labitid kouri vit, men konm i blésé alèla i ka bwété. Pétèt avan, ni sèwten biten nou té ka fè fasilman men alèla a pa sa ankò. Nou ni lenprésyon kè nou pé’é jen rivé fè sé biten-lasa. Ni sèwten biten osi nou té enmé fè toubònman men alèla nou pa anvi fè sa ankò. Pou nou sòti adan kabann an nou sé on konba é onsèl biten nou anvi fè sé dòmi kon Éli (1 Wa 19:5-7). Jéova pwomèt kè i ké édé-nou lè nou ka santi-nou fèb konsa. Kijan i ké fè sa ?
11. Kijan Jéova ka édé-nou ankò ? (Sòm 94:18).
11 Sa Jéova ka fè. I ka pwomèt-nou kè i ké soutyenn-nou (li Sòm 94:18). On kourè ki blésé bizwen tchenbé on moun oben sa ki alantou a-y pou i pé sa maché. Menmjan-la pétèt nou ké bizwen kè on moun soutyenn-nou pou nou pé sa kontinyé pòté bon mannèv adan travay-la nou ka fè la pou Jéova. Lèwvwè sa ka rivé-nou, mi pwomès-la Jéova ka fè-nou : « Mwen, Jéova Bondyé a-w, an ka tchenn men dwat a-w, é sé mwen ki ka di-w : “Pa pè, an ké édé-w” » (Iz. 41:13). Sé sa wa David viv lèwvwè i jwenn onpakèt éprèv é lèwvwè i té ni onpakèt lènmi. Mi sa i di Jéova : « Ou ka soutyenn-mwen èvè men dwat a-w » (Sòm 18:35). Men an réyalité, kijan Jéova ka soutyenn-nou ?
Lésé fanmi a-w, zanmi a-w é sé ansyen-la édé-w (gadé sé paragraf 11 a 13 la).
12. Lèwvwè nou pa ni fòs ankò, kimoun Jéova pé itilizé pou soutyenn-nou ?
12 Souvantfwa Jéova ka soutyenn-nou lè i ka pousé dòt moun édé-nou. Pa ègzanp, on jou, David té ka santi kè i pa té ni fòs ankò é jou-lasa, zanmi a-y Jonathan ay vwè-y pou ankourajé-y é pou ba-y fòs (1 Sam. 23:16, 17). Jéova sèvi èvè Élizé osi pou édé Éli (1 Wa 19:16, 21 ; 2 Wa 2:2). Jòdijou Jéova pé sèvi èvè fanmi an nou, èvè zanmi an nou oben èvè sé ansyen-la pou soutyenn-nou. Men lèwvwè nou ka soufè bon soufè la, pétèt nou anvi rété tousèl an nou ; nou pa anvi vwè ponmoun é sa toutafè nòwmal. Men ka nou pé fè pou Jéova soutyenn-nou ?
13. Ka pou nou fè pou Jéova édé-nou ? (gadé imaj-la osi).
13 Sa pou nou fè. Menmsi ou anvi rété tousèl a-w, fè éfò pou ou pa fè sa. Lèwvwè nou ka rété dè koté an nou, nou ka koumansé sonjé enki nou é pwoblèm an nou. Si sé konsa nou ka rézonné, sa pé fè-nou pran mové désizyon (Pwov. 18:1). Sé vré kè noutout bizwen tibwen tan pou nou rété tousèl an nou, siwtou lè nou ka pasé bout-rèd. Men si nou ka pran sa pou labitid, pétèt nou pé ké aksèpté kè moun édé-nou alòskè sé yo Jéova voyé pou soutyenn-nou. Alò si fanmi a-w, zanmi a-w oben ansyen a lasanblé a-w vé édé-w, menmsi sa rèd, aksèpté. É sa pou-w vwè, sé kè sé Jéova ki ka sèvi èvè yo pou soutyenn-vou (Pwov. 17:17 ; Iz. 32:1, 2).
JÉOVA KÉ KONSOLÉ-W
14. Ki sitiyasyon ki pé fè-nou pè ?
14 Pwoblèm-la. Ni sèwten sitiyasyon ki pé ka fè-nou pè toubònman. Sèwten sèwvitè a Jéova ki té fidèl é ki viv antan a Labib touvé-yo adan dé sitiyasyon ki té ka fè-yo pè toubònman é ki té ka angwasé-yo bon angwasé la. Sé té akòz dè lènmi a yo oben akòz dè dòt pwoblèm ankò (Sòm 18:4 ; 55:1, 5). Jòdila, nou pé jwenn pwoblèm akòz dè moun ki kont nou adan lékòl an nou oben adan travay an nou. Sé pé osi présyon fanmi an nou oben sé otorité-la ka mèt asi nou. Oben nou ni on maladi é pétèt nou pè mò. Adan tout sé sitiyasyon-lasa nou pé ni lenprésyon kè nou kon on tibébé ki bizwen yo édé-y. Kijan Jéova ka édé-nou adan dé sitiyasyon konsa ?
15. Dapré Sòm 94:19, ka Jéova ké fè pou nou ?
15 Sa Jéova ka fè. I ka konsolé-nou é i ka trankilizé-nou (li Sòm 94:19). Sòm-lasa pé fè-nou sonjé on tifi ki pa’a rivé dòmi pas ni on gwo loraj ki ka pété é sa ka fè-y pè toubònman. Nou ka imajiné kè pap’a-y ka vin an chanm a-y pou rasiré-y é kè i ka pran-y an 2 bra a-y joustan i woupran sonmèy. Menmsi loraj-la ka pété toujou, i ka santi-y ansékirité pas i an 2 bra a pap’a-y. Lèwvwè nou adan on sitiyasyon ki ka fè-nou pè toubònman, pétèt kè nou ké bizwen kè Pap’an nou ki an syèl-la pran nou an 2 bra a-y joustan nou vin kalm. Ka pou nou fè pou Jéova konsolé-nou ?
Lésé Pap’a-w ki an syèl-la konsolé-w grasa Pawòl a-y (gadé sé paragraf 15 é 16 la).
16. Ka pou nou fè pou nou lésé Jéova konsolé-nou ? (gadé imaj-la osi).
16 Sa pou nou fè. Fè ansòt pou pasé tibwen tan èvè Jéova. Pousa pran on tan pou priyé-y é pou li Pawòl a-y (Sòm 77:1, 12-14). Konsa, lèwvwè ou ké anba présyon, prèmyé biten ou ké fè sé kriyé Pap’a-w ki an syèl-la pou i édé-w. Di-y ka ki ka fè-w pè é ka ki ka enkyété-w pou i édé-w. Aprésa, lésé Jéova palé ba-w pou i konsolé-w grasa Pawòl a-y (Sòm 119:28). Pétèt kè si ka ou li sèwten pawti a Labib, sa ké konsolé-w. Pa ègzanp ou té’é pé li liv a Jòb, a Sòm oben a Pwovèb é ou té’é pé li osi sé pawòl-la Jézi di la adan Matyé chapit 6. Lè ou ka priyé é kè ou ka li Bib a-w, sé konsolé ou ka lésé Jéova konsolé-w.
17. Dè ki biten nou pé sèten ?
17 Nou pé sèten kè Jéova ké toujou la pou nou lèwvwè nou ké ka viv dé moman difisil. Nou pé’é jen tousèl (Sòm 23:4 ; 94:14). Jéova pwomèt kè i ké pwotéjé-nou, kè i pé’é lésé ayen soukwé-nou two fò, kè i ké soutyenn-nou é kè i ké konsolé-nou. Mi sa Izayi 26:3 ka di asi Jéova : « Ou ké pwotéjé tout moun ki ka konté asi-w atout ; ou ké ba-yo lapé akontinyé, padavwa yo ka fè-w konfyans. » Alò fè Jéova konfyans é fè tousa ki fo pou i pé sa édé-w. Si ou ka fè sa, ou ké woupran fòs menm lè ou ké ka jwenn éprèv.
KA OU TÉ KÉ RÉPONN ?
-
Pétèt a ki moman nou ké vréman bizwen Jéova édé-nou ?
-
Bay 4 biten Jéova ka fè pou édé-nou lèwvwè nou ka jwenn éprèv.
-
Ka pou nou fè pou Jéova édé-nou ?
KANTIK 12 Jéhovah, Dieu magnifique
a Yo chanjé sèwten non.