Ès ou té sav sa ?
Adan ki kalté cha fonksyonnè étyopyen la té ka vwayajé lè Filip kontré-y ?
MO-LA yo tradui la é ki bay « cha » adan Tradiksyon a nouvo mond-la pé sèvi osi pou palé dè plizyè kalté véikil diféran (Akt 8:28, 29, 38). Men, i ka sanm sa Étyopyen-la té ka vwayajé adan on cha ki té pi gran ki sé cha-la yo té ka itilizé la pou fè lagè oben pou fè kous a zannimo. An-nou vwè déotwa biten ki ka fè-nou di sa.
Étyopyen-la sé té on gwo fonksyonnè é i té fè on vwayaj ki té long toubònman. Sé té « on misyé enpòwtan ki té ka travay pou Kandas, renn a Létyopi. Sé-y ki té rèsponsab a tout trézò a renn-la » (Akt 8:27). An tan-lasa, Létyopi sé té péyi-la yo ka kriyé Soudan jòdila, men sid a péyi-la yo ka kriyé Léjipt jòdijou té ka fè pawti a Létyopi osi. Pétèt kè Étyopyen-la pa sèvi èvè menm véikil-la pannan tout vwayaj a-y, men sèten i té ni plizyè bagaj pas vwayaj-la i té ka fè la té long toubònman. O 1é syèk, yo té ka sèvi èvè diféran kalté véikil pou chayé moun é pawmi sé véikil-lasa, sèwten cha té kouvè é yo té ni 4 wou. Mi sa yo maké adan on liv a : « Grasa a sé cha-lasa, yo té pé chayé plis bagaj, vwayaj-la té pi fasil é pétèt sé moun-la ki té ka vwayajé la té pé fè plis chimen. »
Étyopyen-la té ka li lèwvwè Filip vin owa a-y. Mi sa Labib ka di : « Pannan i té ka kouri akoté a cha-la, Filip tann Étyopyen-la ka li sa ki maké adan liv a Izayi » (Akt 8:30). Sé cha-la yo té ka vwayajé adan yo la pa té fèt pou woulé vit. Sé pétèt sa ki fè si Étyopyen-la té pé li pannan cha-la té ka woulé é si Filip rivé jwenn cha-la alòskè i té apyé.
Étyopyen-la « di Filip monté sizé owa a-y » (Akt 8:31). An jénéral, adan on cha ki té fèt pou fè kous a zannimo, sé moun-la té oblijé rété doubout. Pawkont, adan on cha ki té fèt pou vwayajé, Étyopyen-la é Filip té ni plas pou sizé.
Parapòt a sa Akt chapit 8 ka di é parapòt a prèv kè Listwa ka ban-nou, adan dènyé piblikasyon an nou, nou ka rèprézanté fonksyonnè étyopyen la adan on cha ki pi gran ki sé cha-la ki fèt pou fè lagè la oben ki fèt pou fè kous a zannimo.
a C. Keener, Acts—An Exegetical Commentary, Baker Academic, 2013.