AWTIK POU ÉTIDYÉ 1
KANTIK 2 Non a-w sé Jéova
Ba Jéova lonnè
TÈKS A LANNÉ 2025 : « Ba Jéova glwa-la non a-y mérité la » (SÒM 96:8).
ON TI LIDÉ ASI SA NOU KAY VWÈ
Nou ké vwè kijan nou pé ba Jéova lonnè-la i mérité la.
1. Jòdijou dèyè ki biten onlo moun ka kouri ?
ÈS OU ja konstaté jan onlo moun égoyis ? Pa ègzanp ni onlo adan yo ki ka sèvi èvè sé rézo sosyo la pou fè moun vwè-yo é pòté-yo anlè. Pawkont, pa ni onlo moun ki ka ba Jéova lonnè. Adan awtik-lasa, nou ké vwè ka sa vé di ba Jéova lonnè é ka ki dwètèt pousé-nou fè sa. Nou ké vwè osi kijan nou pé ba Jéova lonnè-la i mérité la é kijan limenm a-y ké ba non a-y lonnè dèmen.
KA SA VÉ DI BA JÉOVA LONNÈ ?
2. Kijan Jéova montré pèp a-y jan i té ni fòs anlè mòn Sinayi la ? (gadé osi imaj-la).
2 Labib ka montré jan Jéova sé on Bondyé ki èstraòwdinè toubònman. Kèlkètan apré Jéova fè pèp a-y sòti an Éjipt, i montré-yo jan i ni fòs. An-nou imajiné sa : ni milyon é milyon Israélit ki sanblé douvan mòn Sinayi la pou kouté sa Bondyé ni a di-yo. Ni on niyaj ki nwè asi montangn-la. Lèwgadé, montangn-la ka voyé lafimé, latè ka soukré, lowaj, zéklè ka pété é yo ka tann on gwo dézòd konsi on moun ka souflé adan on kòn (Ègz. 19:16-18 ; 24:17 ; Sòm 68:8). Lèwvwè sé Israélit-la vwè tout sé biten-lasa, ou ka imajiné jan yo dwèt té èstèbèkwè.
Anlè mòn Sinayi la, Jéova montré sé Israélit-la jan i sé on Bondyé ki èstraòwdinè toubònman (gadé paragraf 2 la).
3. Ba Jéova lonnè, ka sa vé di ?
3 Nou ki toupiti douvan Bondyé, ès nou pé ba Jéova lonnè ? Asiré pa pétèt ! On mannyè nou pé fè sa, sé lè nou ka palé moun ki alantou an nou dè puisans a Bondyé ki èstraòwdinè é dè tout bèl kalité a-y. Nou pé ba-y lonnè osi lè nou ka montré kè tousa nou ka réyisi fè sé grasa-y (Iz. 26:12). Wa David ban-nou on bèl ègzanp adan domenn-lasa. Adan on priyè i fè douvan pèp a Israèl, mi sa i di Bondyé : « Jéova, ou gran, ou ni puisans, ou bèl toubònman, bèlté a-w èstraòwdinè, é ou ni onpakèt pouvwa ; pas tousa ki an syèl-la é ki asi latè, sé ta-w. » Apré i fin priyè-lasa, « tout lasanblé-la mété-y ka ba Jéova louwanj » (1 Kron. 29:11, 20).
4. Kijan Jézi ba Jéova lonnè ?
4 Lè i té asi latè, Jézi ba Pap’a-y lonnè lè i té ka fè toutmoun konnèt kè sé-y ki té ka bay fòs-la pou fè sé mirak-la i té ka fè la (Mawk 5:18-20). Jan i té ka palé dè Pap’a-y é jan i té ka aji èvè moun, sa té ka ba Jéova lonnè osi. On jou, pannan i té ka anségné sé moun-la adan on sinagòg, té ni on madanm pawmi sé moun-la ki té ni on démon asi-y dépi 18 an. Akòz dè démon-lasa, madanm-la pa té pé mété-y dwèt. Sa dwèt té ka fè malérèz-la soufè ! Lè Jézi vwè sa, sa fè-y lapenn pou-y, alò i vin owa-y é mi sa i di-y èvè onlo tandrès : « Madanm an mwen, maladi a-w géri. » Aprésa, i mèt men a-y asi madanm-la é lèwgadé madanm-la enn mété-y dwèt é i koumansé ba Bondyé lonnè. I té ni onlo rèkonésans pou Bondyé davwa i géri-y (Lik 13:10-13). Pa té ni mwayen madanm-la pa té ba Bondyé lonnè pou sa i té fè ba-y é nou osi nou ni onlo rézon pou nou ba Jéova lonnè.
KA KI KA POUSÉ-NOU BA JÉOVA LONNÈ ?
5. Pou ki rézon nou ka rèspèkté Jéova ?
5 Nou ka ba Jéova lonnè pas nou ni onlo rèspé ba-y. Nou ni onlo rézon pou nou rèspèkté-y. Sé-y ki Toupuisan-la é puisans a-y pa ni pon limit (Sòm 96:4-7). Nou ka vwè jan i ni sajès adan tousa i fè. I ban-nou lavi é i ban-nou tousa nou bizwen pou viv (Rév. 4:11). I fidèl (Rév. 15:4). Sa i ka fè toujou ka maché. É i toujou ka tchenn pwomès a-y (Joz. 23:14). Sé pousa pwofèt Jérémi di Jéova : « Pawmi tout moun ki ni sajès adan sé nasyon-la, é pawmi tout wayòm ki tini, pa ni ponmoun ki kon vou » (Jér. 10:6, 7). Nou ni onlo rézon pou nou rèspèkté Pap’an-nou ki an syèl-la. Men Jéova a pa on Bondyé ki mérité yo rèspèkté-y tousèl. I ni dé bèl kalité ki ka fè-nou enmé-y osi.
6. Pou ki rézon nou enmé Jéova ?
6 Nou ka ba Jéova lonnè pas nou enmé-y onlo toubònman. An-nou vwè déotwa kalité Jéova ni, ki ka fè-nou enmé-y. I ka aji èvè pityé èvè nou é i ni konpasyon pou nou (Sòm 103:13 ; Iz. 49:15). I sav mété-y anplas a moun é lè nou ka soufè, i ka soufè ansanm èvè nou (Zak. 2:8). Si a pa té li, nou pa té’é pé konnèt li é nou pa té’é pé vin zanmi èvè-y (Sòm 25:14 ; Akt 17:27). I ni imilité, « i ka bésé-y pou i gadé syèl-la é tè-la, é i ka woté toupiti-la an pousyè-la » (Sòm 113:6, 7). Lè nou ka gadé tousa, pa ni mwayen nou pa ba Bondyé an nou lonnè ! (Sòm 86:12).
7. Ki bèl biten nou pé fè ?
7 Nou ka ba Jéova lonnè pas nou vlé toutmoun konnèt-li. Onlo moun pa konnèt lavérité asi-y. Poukwa sa ? Paskè Satan simé onlo manti asi Bondyé é sé moun-la ka pran sa pou lajan-kontan (2 Kor. 4:4). I ka fè-yo konprann kè Jéova sé on Bondyé ki enmé vanjé-y, ki pa’a pran penn a moun é kè sé akòz dè-y si yo ka soufè. Men nou, nou sav kimoun i yé vréman é nou pé fè-yo konnèt lavérité asi-y. Konsa nou ka ba Bondyé an nou lonnè (Iz. 43:10). Sòm 96 la ka montré jan sa enpòwtan kè nou ba Jéova lonnè. Toupannan nou ké analizé sé vèwsé-la ki adan sòm-lasa, gadé pou vwè kijan ou pé ba Jéova lonnè-la i mérité la.
KIJAN NOU PÉ BA JÉOVA LONNÈ-LA I MÉRITÉ LA ?
8. Dapré Sòm 96:1-3, kijan nou pé ba Jéova lonnè ?
8 (Li Sòm 96:1-3.) Nou pé ba Jéova lonnè grasa sa nou ka di asi-y. Sé prèmyé vèwsé-la ki adan Sòm 96 la ka di kè « fò nou chanté ba Jéova », fò nou ba non a-y louwanj, fò nou « fè moun konnèt bon nouvèl a délivrans-la i ka pòté la » é fò nou « fè sé nasyon-la konnèt tout lonnè-la i ni la ». Lè nou ka fè tout sé biten-lasa, nou ka ba Pap’an-nou ki an syèl-la lonnè. Sèwvitè a Jéova ki viv an tan lontan té ka pòté bon mannèv pou fè moun konnèt kimoun Jéova yé vréman (Dan. 3:16-18 ; Akt 4:29). É nou, kijan nou pé imité-yo ?
9-10. Ka ègzanp a Angelena ka aprann-nou ? (gadé imaj-la osi).
9 An-nou vwè ka ki rivé on sè ki o Zétazini non a-y sé Angelena a. Èvè onlo kouraj i palé dè Jéova adan travay a-y. Konm yo té sòti pran-y adan travay-la, yo envité-y adan on réinyon yo fè pou sé nouvo kolèg-la. Adan réinyon-la, sé nouvo kolèg-la té pé palé dè yo é dè vi a yo. I té préparé déotwa foto pou montré jan i enmé vi-la i ka menné la konm i Témwen a Jéova. Men jis avan tou a-y té rivé, ondòt kolèg a-y prézanté-y. I èspliké i té lévé adan on fanmi a Témwen a Jéova é i koumansé fè jé èvè kwayans an nou. Mi sa Angelena ka di : « Tchè an mwen mété-y ka bat a 2 mil a lè. An di-mwen : “Ès an ké lésé-y manti konsa asi Jéova ? Oben ès an ké défann-li ?”»
10 Lè kolèg a-y fin palé, Angelena priyé Jéova an tchè a-y. Aprésa mi sa i di èvè jantiyès : « Mwen osi an lévé adan on fanmi ki Témwen a Jéova. É jòdijou, mwenmenm Témwen a Jéova. » Menmsi sa pa té fasil, Angelena rété kalm. I montré sé kolèg-la déotwa foto pou yo vwè jan li é zanmi a-y kontan sèvi Jéova é i èspliké-yo kwayans a-y (1 Pyè 3:15). Ka ki pasé apré ? Lè Angelena fin palé, kolèg-la té ja vin dous. I jous di kè i ka sonjé dé bon ti moman i pasé lèwvwè i té piti èvè fanmi a-y ki Témwen. Mi sa Angelena ka di ankò : « Jéova mérité yo défann-li. Lè nou ka di lavérité asi-y, sé on lonnè pou nou. » Nou osi nou pé défann Jéova lèwvwè sèwten moun pa’a rèspèkté-y. Sé on bèl lonnè pou nou !
Nou pé ba Jéova lonnè èvè pawòl an nou b (gadé sé paragraf 9 a 10 la).
11. Toutolon a Listwa, kijan sèwvitè a Jéova suiv konsèy-la nou ka touvé adan Sòm 96:8 ?
11 (Li Sòm 96:8.) Nou pé sèvi èvè sa nou ni pou nou ba Jéova lonnè. Dépi an tan lontan, sèwvitè a Jéova sèvi èvè sa yo té ni pou yo té bay lonnè (Pwov. 3:9). Pa ègzanp, sé Israélit-la bay lajan é dòt biten ki té ni valè, pou yo té konstwi Tanp-la é pran swen a-y (2 Wa 12:4, 5 ; 1 Kron. 29:3-9). Sèwten disip a Jézi sèvi èvè sa yo té ni pou yo té ba Jézi é apòt a-y sa ki té fò yo (Lik 8:1-3). Labib ka di osi kè o 1é syèk, konm sèwten krétyen té ka soufè pas pa té ni manjé, frè é sè a yo ki té ka rété dòt koté voyé lajan ba yo (Akt 11:27-29). Jòdijou, nou pé ba Jéova lonnè lè nou ka fè ofrann.
12. Kijan sé don-la nou ka fè la pé ba Jéova lonnè ? (gadé imaj-la osi).
12 An-nou vwè on ègzanp ki ka montré kijan nou pé sèvi èvè lajan an nou pou ba Jéova lonnè. An 2020, té ni gwo séchrès o Zimbabwé. Plis ki on milyon moun té kay pèd vi a yo pas manjé vin ra an péyi-la. Pawmi sé moun-lasa té ni on sè non a-y sé Prisca. Sè an nou té abityé préché tou lé mèwkrèdi é tou lé vandrèdi é magré té ni séchrès-la, i kontinyé suiv pwogram a-y. I fè sa menm lèwvwè sé té péryòd a plantasyon. Vwazen a-y té ka fè jé èvè tèt a-y lèwvwè i té k’ay préché olyé i té rété fè jaden. Mi sa yo té ka di-y : « Kontinyé konsa ! Ou ké vwè si ou pé’é mò ! » Men i té ka di-yo : « Jéova po’o jen lagé pon sèwvitè a-y ! » Kèlkètan apré, lòwganizasyon voyé manjé ba Prisca é dòt biten i té bizwen pou viv grasa sé don-la nou ka fè la. Lè vwazen a Prisca vwè sa, sa touché-yo é mi sa yo di-y : « Prisca ou té ni rézon, Bondyé pa lagé-w. Nou té’é byen anvi konnèt plis biten asi-y. » Ni 7 adan yo ki koumansé vin lasal.
Nou pé sèvi èvè byen matéryèl an nou pou nou ba Jéova lonnè c (gadé paragraf 12 la).
13. Kijan konpòwtasyon an nou pé ba Jéova lonnè ? (Sòm 96:9).
13 (Li Sòm 96:9.) Nou pé ba Jéova lonnè grasa konpòwtasyon an nou. Fò sé prèt-la ki té ka sèvi adan tanp a Jéova té lavé-yo é fò yo té pwòp (Ègz. 40:30-32). Nou osi fò nou pwòp. Men a pa enki kò an nou sa ka konsèwné, sa ka konsèwné konpòwtasyon an nou osi. Fò pa nou fè dé biten Jéova hay (Sòm 24:3, 4 ; 1 Pyè 1:15, 16). Fò nou fè onlo éfò pou nou lagé « vyé pèwsonalité-la » é pou nou mèt « nouvo pèwsonalité-la » asi nou. Sa vé di nou ka fè tousa nou pé pou mèt vyé lidé ki ka vin an lèspri an nou a koté é pou nou mèt konpòwtasyon ki pa’a fè Jéova plézi a koté osi. Anmenmditan, nou ka fè éfò pou nou imité Jéova é pou nou fè sa ki bèl (Kol. 3:9, 10). Grasa Jéova, menm sé moun-la ki fè onlo mové biten pé rivé chanjé é mèt nouvo pèwsonalité-la asi yo.
14. Ka ègzanp a Jack ka aprann-nou ? (gadé imaj-la osi).
14 An-nou palé dè ègzanp a Jack. Tèlman misyé-lasa té ni bon vyolans an kò a-y é kè i té danjéré, yo té ka kriyé-y démon-la. Parapòt a kantité krim i fè, yo kondanné-y a mò. Men pannan i té ka atann jou-la yo té kay tchouyé-y la, on frè ki té ka vizité sé prizonyé-la pwopozé-y on étid a Labib, alò i aksèpté. Magré Jack té ja fè onpakèt mové biten, i chanjé é déotwa tan apré i pran lèbatèm. Jack pa té menm moun-la ankò, kifè jou-la yo té k’ay tchouyé-y la, sèwten gad a lajòl-la mèt pléré atè lè yo té ka di-y ovwa. Mi sa on chèf ki té ka travay an lajòl-la di : « Avan, Jack sé té pi mové prizonyé ki té an lajòl-la men alèla i pawmi sé pi bon moun-la. » On simenn apré Jack mò, frè-la ki té fè étid a-y viré adan lajòl-la pou fè sé réinyon-la yo té ni labitid fè la chak simenn. Ni on prizonyé, sé prèmyé fwa i té ka vin réinyon. Ka ki ba-y gou fè sa ? Lè i vwè jan Jack té chanjé, sa mawké-y é i té anvi sav ka pou i fè pou i sèvi Jéova. Bèl ègzanp-lasa ka montré jan nou pé ba Bondyé lonnè èvè konduit an nou (1 Pyè 2:12).
Nou pé ba Jéova lonnè èvè konpòwtasyon an nou d (gadé paragraf 14 la).
KIJAN JÉOVA KÉ BA NON A-Y LONNÈ TALÈ
15. Talè, kijan Jéova ké fè ansòt pou toutmoun ba non a-y lonnè ? (Sòm 96:10-13).
15 (Li Sòm 96:10-13.) Sé dènyé vèwsé-la ki adan Sòm 96 la ka palé dè Jéova é ka montré kè i sé on jij ki ka jijé èvè jistis é kè i sé on wa. Kijan Jéova ké ba non a-y lonnè talè ? Sé lèwvwè i ké fè ansòt pou ni jistis asi latè. Pousa i ké détwi Gran Babilòn-la pas i sali non a-y ki sen (Rév. 17:5, 16 ; 19:1, 2). Pétèt sèwten moun ki ké vwè sa ké mété-yo ka adoré Jéova ansanm èvè nou. Aprésa pannan Awmagédon, Jéova ké détwi mond a Satan. I ké détwi moun ki hay li é ki ka sali non a-y men i ké sové moun ki enmé-y, ki ka obéyi-y é ki vé ba-y lonnè (Mawk 8:38 ; 2 Tés. 1:6-10). Lè sé 1 000 an la ké fin, apré dènyé éprèv-la, Jéova ké ba non a-y tout lonnè-la i mérité la (Rév. 20:7-10). Jou-lasa, « menmjan lanmè-la plen èvè dlo, sé menmjan-la osi toutmoun asi latè ké sav kè Jéova ni glwa » (Abak. 2:14).
16. Ka nou byen désidé a fè ? (gadé imaj-la osi).
16 Sa ké bèl toubònman lèwvwè toutmoun ké ba Bondyé lonnè-la i mérité la ! Dépi alè, an-nou fè tousa nou pé pou nou palé sé moun-la dè Jéova é pou nou aji on mannyè ki ka ba-y lonnè. Pou nou pa jen oubliyé rèsponsabilité-lasa ki enpòwtan toubònman, Komité santral la désidé kè tèks a lanné 2025 sé ké Sòm 96:8. Mi sa i ka di : « Ba Jéova glwa-la non a-y mérité la. »
On jou, tousa ki vivan ké ba non a Jéova lonnè-la i mérité la ! (gadé paragraf 16 la).
KANTIK 12 Jéhovah, Dieu magnifique
a Yo chanjé sèwten non.
