AWTIK POU ÉTIDYÉ 5
KANTIK 108 L’amour fidèle de Dieu
Davwa Jéova enmé-nou, ki byenfé sa ka pwokiré-nou ?
« Kris Jézi vin adan lèmond pou sové moun ki péchè » (1 TIM. 1:15).
ON TI LIDÉ ASI SA NOU KAY VWÈ
Nou ké vwè ki byenfé ranson-la ka pwokiré-nou é kijan nou pé montré Jéova rèkonésans an nou pou bèl kado-lasa.
1. Kijan nou pé fè Jéova plézi ?
IMAJINÉ ou ka fè on moun ou enmé on bèl ti kado. Non sèlman kado-lasa bèl, men ou ka fè ansòt pou kado-lasa itil ba moun-la osi. Sèten sa ké fè-w lapenn si moun-la ka enki fèmé kado-la ou fè-y la adan on lanmwa é kè i pa menm ka sonjé-y ankò. Pawkont, si i ka sèvi èvè kado-la ou fè-y la é kè i ka vin di-w mèsi, sèten sa ké fè-w plézi. Ka ègzanp-lasa ka aprann-nou ? Jéova bay gason a-y pou nou. A pa ti kontan Jéova dwèt kontan lèwvwè nou ka montré nou ni rèkonésans pou ranson-la é pou tout lanmou-la i montré-nou la lèwvwè i fè-nou bèl kado-lasa ! (Jan 3:16 ; Wom. 5:7, 8).
2. Ka nou ké vwè adan awtik-lasa ?
2 Men afòs tan pasé, nou pé rivé a oubliyé kè ranson-la sé on bèl kado toubònman. A moman-lasa, sé konsi nou té ka fèmé kado-la Bondyé ban-nou la adan on lanmwa. Sé vré nou kontan ni-y, men konm i fèmé adan lanmwa-la é kè nou pa’a vwè-y, nou pa’a sonjé-y ankò. Pou nou pa touvé-nou adan on sitiyasyon konsa, fò nou pran labitid sonjé tousa Jéova é Jézi ja fè pou nou. Awtik-lasa ké édé-nou adan domenn-lasa. Nou ké vwè ki byenfé ranson-la ja ka menné ban-nou dépi konnyéla é ki byenfé i ké menné ban-nou dèmen. Nou ké vwè osi ka pou nou fè pou nou montré jan nou ni rèkonésans pou lanmou-la Jéova ka ban-nou la siwtou pannan péryòd a Mémoryal-la.
KI BYENFÉ RANSON-LA KA PROKIRÉ-NOU DÉPI KONNYÉLA
3. Ki byenfé ranson-la ka pwokiré-nou dépi konnyéla ?
3 Sakrifis a Jézi ka pwokiré-nou byenfé dépi konnyéla. Pa ègzanp, grasa ranson-la, Jéova ka padonné péché an nou. I pa té oblijé fè-y, men sé anvi i anvi fè-y. Mi sa David chanté èvè onlo rèkonésans an tchè a-y : « Pas vou, o Jéova, ou enmé sa ki byen é ou paré a padonné » (Sòm 86:5 ; 103:3, 10-13).
4. Ba kimoun Jéova bay ranson-la ? (Lik 5:32 ; 1 Timoté 1:15).
4 Sèwten adan nou pé pansé kè yo pa mérité Jéova padonné-yo. Men lè ou byen gadé, ponmoun pa mérité sa. Lapòt Pòl té sav byen kè i pa té « mérité kè yo kriyé-y apòt ». Poutan mi sa i di : « Sé favè a Bondyé kè an pa mérité la ki fè si an vin sa an yé la » (1 Kor. 15:9, 10). Lè nou ka rèpanti-nou lèwvwè nou fè on péché, Jéova ka padonné-nou. Poukwa nou ka di sa ? Jéova pa ka padonné-nou pas nou mérité-y, men sé pas i enmé-nou i ka fè sa. Siwvwè ou ka santi-w tris pas ou ka pansé ou pa mérité Jéova padonné-w, sonjé kè Jéova pa bay ranson-la pou moun ki pa jen ka péché. I bay ranson-la pou moun ki enpawfè é ki ka santi-yo koupab akòz dè péché a yo, é ki vlé chanjé (li Lik 5:32 ; 1 Timoté 1:15).
5. Ès Jéova oblijé padonné nou ? Bay on ti èsplikasyon.
5 Fò pa nou mèt an tèt an nou kè pas nou ka sèvi Jéova dépi onpakèt lanné, sa toutafè nòwmal kè i padonné-nou. Sé vré kè tout sé lanné-la nou rété fidèl a Jéova ni onlo valè ba-y (Ébr. 6:10). Men lèwvwè Jéova voyé gason a-y mò ban nou, sé on kado i fè-nou. A pa pou tout sé bon biten-la nou ja fè la kè Jéova fè sa. Donk sa pa té’é byen ditou si nou té ka mèt an tèt an nou kè nou mérité kè Jéova padonné-nou pas nou ja fè onlo bon biten ba-y. Pas si nou ka kwè sa, sa vé di nou pa bizwen ranson-la menm (konparé èvè sa ki maké adan Galat 2:21).
6. Poukwa Pòl té ka sèvi Jéova èvè tousa balan ?
6 Lapòt Pòl té sav kè a pa pas i té fè onpakèt biten pou sèvi Jéova, kè Jéova té oblijé padonné-y. Alò poukwa i té ka sèvi Jéova èvè tousa balan ? I fè sa pou montré i té ni onlo rèkonésans pou Jéova, davwa Jéova té janti èvè-y é i té padonné-y (Éféz. 3:7). Kon Pòl, an-nou kontinyé sèvi Jéova èvè onlo balan. Nou pé’é fè sa èvè lidé Jéova ké oblijé padonné-nou, men pou montré-y jan nou ni rèkonésans ba-y.
7. Ki dòt byenfé ranson-la ka pwokiré-nou dépi konnyéla ? (Women 5:1 ; Jak 2:23).
7 Ki dòt byenfé ranson-la ka pwokiré-nou dépi konnyéla ? Grasa sakrifis a Jézi, nou pé vin bon bon zanmi èvè Jéova a. Kon nou vwè-y adan awtik-la ki té avan la, lè nou ka fèt nou pa’a fèt adan fanmi a Jéova. Men grasa ranson-la, nou pé viv « anpé èvè Bondyé » é nou pé vin zanmi a-y (li Women 5:1 ; Jak 2:23).
8. Poukwa nou pé ni rèkonésans pou Jéova davwa nou pé priyé ?
8 Lèwvwè nou ka priyé Jéova, sé on biten èspésyal nou ka rivé fè pas nou bon bon zanmi èvè-y. Mi on bèl lonnè mi ! Men Jéova pa ka kouté yenki sé priyè-la yo ka fè lè nou réinyon oben lè nou èvè dòt moun. I ka pran tan kouté sa nouchak ka di-y adan priyè an nou lè nou tousèl an nou. Lèwvwè nou ka priyé, sa ka trankilizé-nou é nou ka santi-nou anpé. Men a pa enki sa lapriyè ka fè. I ka édé-nou vin bon bon zanmi èvè Jéova (Sòm 65:2 ; Jak 4:8 ; 1 Jan 5:14). Lèwvwè Jézi té asi latè, i toujou té ka priyé Pap’a-y, pas i té sav Pap’a-y té ka kouté-y, é kè grasa sa, yo té pé rété kon bag é dwèt (Lik 5:16). Nou ni onlo rèkonésans pou Jéova toubònman pas nou sav kè grasa sakrifis a Jézi, nou pé vin bon zanmi èvè Bondyé é nou pé jous priyé-y.
KI BYENFÉ RANSON-LA KÉ PWOKIRÉ-NOU DÈMEN
9. Dè ki biten sèwvitè a Jéova ki fidèl ké pé pwofité grasa ranson-la ?
9 Talè, ki byenfé ranson-la ké pwokiré sèwvitè a Jéova ki fidèl ? An-nou palé dè viv pou touttan asi latè. Pou onlo moun sa pa posib pas sa ka fè konmen milyé lanné moun ka mò. Men sa Jéova té prévwa sé kè lézimen viv pou touttan. Si Adan pa té péché, noutout té’é ka viv pou touttan, kifè lèwvwè yo té’é palé dè lavi étèwnèl, ponmoun pa té’é di kè sé on lèspwa a mal papay. Pétèt nou pé ni dimal a imajiné kè viv pou touttan sé on biten ki posib. Men nou pé sèten sa ké fèt, pas Jéova bay vi a Gason a-y, moun-la ki té ni plis valè ba-y (Wom. 8:32).
10. Ka sé krétyen wen la é sélézòt mouton-la présé vwè ?
10 Talè, Jéova ké fè-nou viv pou touttan adan paradi-la. Men i vlé kè dépi konnyéla nou mèt-nou ka imajiné jan sa ké yé é kè sa mèt onlo jwa adan tchè an nou. Sé krétyen wen la ké ni on vi ki entérésan toubònman lèwvwè yo ké an syèl-la é yo ké gouvèné latè èvè Jézikri (Rév. 20:6). Sélézòt mouton-la ké viv asi latè adan on paradi. Adan paradi-lasa, pé’é ni ni doulè ni ayen pou fè-w soufè ankò (Rév. 21:3, 4). Ès ou ka fè pawti a sélézòt mouton-la é ou ka èspéré viv pou touttan asi latè ? Rékonpans-lasa a pa on rékonpans ki ni mwens valè ki prèmyé la ! An réyalité, nou té fèt pou nou té viv pou touttan asi latè. Kifè, lè nou ké ni vi-lasa nou ké adoumanman.
11-12. Bay déotwa ègzanp a bèl biten nou ké pé fè adan paradi-la é kè nou pé ja ka imajiné dépi konnyéla (gadé sé imaj-la osi).
11 Pran ti ban a-w, sizé é imajiné jan vi-la ké yé adan paradi-la (Iz. 25:8 ; 33:24). Ou pé’é enkyèt ankò pou pon maladi pa fè-w pèd vi a-w. Tousa ou té’é byen anvi ni Jéova ké ba-w li ; Alò ka ou té’é anvi aprann fè ? Aprann jouwé mizik ? Aprann désiné ? Nou ka tou konprann nou ké bizwen awchitèk, nou ké bizwen moun ki sav konstwi kaz, men nou ké bizwen moun ki sav fè jaden pou ni sa ki fo pou nou manjé, é nou ké bizwen moun ki sav kuit manjé osi, ki sav fè zouti é ki sav planté flè (Iz. 35:1 ; 65:21). Dè tout fason ou ké ni tout tan a-w pou aprann fè sa ou anvi fè, pas a moman-lasa ou ké ka viv pou touttan.
12 A pa ti bèl sa ké bèl lè nou ké akéyi sé résisité-la ! (Akt 24:15). É sé ké on plézi osi pou nou aprann plis biten asi Jéova ankò, lè nou ké étidyé tout sé bèl biten-la ki adan kréyasyon a-y ! (Sòm 104:24 ; Iz. 11:9). É pi bèl-la, sé kè konm nou pé’é fè pon mové biten ankò, nou ké pé adoré Jéova san nou santi-nou koupab ! Ès ou ka di sa vo lapenn kè nou lagé tout sé bèl biten-la ki ka atann-nou la « pou pran plézi pannan on ti tan adan péché-la » ? (Ébr. 11:25). Awa ! Pou nou trapé tout sé bénédisyon-lasa, nou paré a fè nenpòt ki sakrifis. É sonjé on biten : a pa enki èspéré nou ké èspéré sa tout vi an nou, on jou sa ké fèt pou dè bon ! Men tousa pa té ké posib si Jéova pa té enmé-nou kon i enmé nou la é kè i pa té sakrifyé vi a gason a-y !
Pawmi sé bénédisyon-la nou ké ni adan paradi-la, kilès ou pi présé vwè an 2 zyé a-w ? (gadé sé paragraf 11 é 12 la).
MONTRÉ JÉOVA OU NI RÈKONÉSANS POU TOUT LANMOU-LA I NI POU-W LA
13. Kijan nou pé montré Jéova rèkonésans an nou pou ranson-la i ban-nou la ? (2 Korentyen 6:1).
13 Kijan nou pé montré Jéova rèkonésans an nou pou ranson-la ? Nou pé fè sa lèwvwè nou ka mèt sèwvis an nou prèmyé douvan adan vi an nou (Mat. 6:33). An-nou sonjé kè Jézi mò « pou moun ki ka viv pa kontinyé viv pou yomenm, men pou yo pé sa viv pou sila ki mò pou yo la é ki résisité » (2 Kor. 5:15). Èvè onlo bonté, Jéova padonné-nou. Lèwvwè nou ka fè tousa nou pé pou nou sèvi-y, nou ka montré nou ka ba sa i fè la onlo valè é kè nou ni onlo rèkonésans pou-y (li 2 Korentyen 6:1).
14. Kijan nou pé montré kè nou ka fè Jéova konfyans ?
14 Nou pé montré Jéova kè nou enmé-y osi lè nou ka fè-y konfyans é kè nou ka suiv sé konsèy-la i ka ban-nou la. Délè nou ni sèwten désizyon a pran anrapò èvè lékòl an nou oben èvè travay an nou. Pa ègzanp nou pé ka mandé-nou ès nou ké fè gran étid, oben nou pé ka mandé-nou ki kalté travay nou ké fè. A moman-lasa an-nou mandé-nou ka Jéova anvi nou fè (1 Kor. 10:31 ; 2 Kor. 5:7). Lèwvwè nou ka pran sèwten désizyon parapòt a fwa an nou, ni dé bèl biten ki ka fèt : nonsèlman, sa ka konsolidé fwa an nou, men nou ka vin plibon zanmi èvè Jéova osi. Anplisdisa, èspwa-la nou ni la dè viv pou touttan ka vin pli klè an tèt an nou (Wom. 5:3-5 ; Jak 2:21, 22).
15. Kijan nou pé montré rèkonésans an nou pou Jéova pannan péryòd a Mémoryal-la ?
15 Ni ondòt biten nou pé fè pou nou montré jan nou ka aprésyé lanmou a Jéova. Nou pé pwofité dè péryòd a Mémoryal-la pou montré-y rèkonésans an nou pou ranson-la. Nonsèlman nou ké pran dispozisyon pou nou vin adan Mémoryal-la, men nou ké envité on maksimòm dè moun pou yo pé sa vin osi (1 Tim. 2:4). Nou pé èspliké-yo kijan Mémoryal-la ké pasé. Pou nou fè sa, nou ké pé sèvi èvè sé vidéo-la Poukwa Jézi mò ? é Sonjé sakrifis a Jézi, kè nou ka touvé asi jw.org. Sé ansyen-la ké fè ansòt pou yo envité sé frè é sè-la ki pa’a vin lasal ankò. Imajiné jwa-la i ké ni an syèl-la si déotwa ti mouton ki té pèd chimen a Jéova, ka santi yo anvi wouviré adan lasanblé-la ! (Lik 15:4-7). Alò sé vré, jou a Mémoryal-la nou ké kontan di-nou bonjou kon nou ni labitid fè-y. Men ni sèwten moun sé prèmyé fwa yo ké vin adan on sal di Wayòm oben lontan yo pa vin lasal, an-nou sonjé akéyi-yo. Nou vlé toutmoun santi-yo alèz a yo ! (Wom. 12:13).
16. Poukwa sé on bon biten si ou ka fè plis pou Jéova pannan péryòd a Mémoryal-la ?
16 Ès ou té’é pé fè plis adan sèwvis a-w pou Jéova pannan sé simenn-la ki avan Mémoryal-la é séla ki ka vin apré-y la ? Sé on bon fason pou montré kè ou ni rèkonésans pou tousa Jéova é Jézi fè pou-w. Adan sèwvis a Jéova, pi nou ké bay adan, pi nou ké santi i ka soutyenn-nou, é pi nou ké ni konfyans adan-y (1 Kor. 3:9). Anplisdisa, pran on tan pou suiv pwogram a lèkti a Labib pannan péryòd a Mémoryal-la. I ka touvé-y adan bwochi-la An-nou ègzaminé Lézékriti chakjou oben adan Kayé Vi é Ministè. Ou jous pé ay an nannan a sé pasaj-la ou sòti li la.
17. Ka ki ka fè Jéova plézi ? (gadé karé-la osi « Nou pé montré Jéova rèkonésans an nou »).
17 Pétèt sitiyasyon a-w pé’é pèwmèt-vou fè plis adan sèwvis a Jéova. Men ni on biten pou ou sonjé, sé kè Jéova pa ka konparé sa ou ka fè èvè sa lézòt ka fè. Sa i ka gadé sé sa ou ni adan tchè a-w. É lè i ka vwè jan ou ni rèkonésans pou bèl kado-la i ban-nou la kivédi ranson-la, a pa ti kontan i ka kontan ! (1 Sam. 16:7 ; Mawk 12:41-44).
18. Poukwa nou ni rèkonésans ba Jéova é ba Jézi ?
18 Si Bondyé ka padonné péché an nou, si nou pé vin bon zanmi èvè Jéova, é si nou ni lèspwa dè viv pou touttan, sé enki grasa ranson-la. Alò an-nou toujou montré rèkonésans an nou pou lanmou a Jéova, pas sé lanmou-lasa kifè si nou pé trapé sé bénédisyon-lasa ! É an-nou montré rèkonésans an nou pou Jézi osi, pas tèlman i té enmé-nou, i sakrifyé vi a-y ban nou (Jan 15:13 ; 1 Jan 4:19).
KANTIK 154 L’amour ne disparaît jamais
a Jéova ni lokazyon padonné péché a moun ki té ka sèvi-y avan menm Jézi bay vi a-y ban nou. I té pé fè sa pas i té sèten kè Gason a-y té’é rété fidèl jistan i mò. Pou-y, sé konsi i té ja péyé ranson-la (Wom. 3:25).
