AWTIK POU ÉTIDYÉ 4
KANTIK 18 Mèsi pou ranson-la
Ka ranson-la ka aprann-nou ?
« Mi konsa lanmou a Bondyé vin klè » (1 JAN 4:9).
ON TI LIDÉ ASI SA NOU KAY VWÈ
Nou ké vwè ka ranson-la ka montré-nou anrapò èvè bèl kalité Jéova é Jézi ni ki ka ban-nou anvi enmé-yo pi fò ankò.
1. Poukwa sé on bon biten lèwvwè nou k’ay adan Mémoryal-la chak lanné ?
SÈTEN ou ké dakò pou di kè pa ni pi bèl kado ki ranson-la ! (2 Kor. 9:15). Sé enki pas Jézi bay vi a-y an sakrifis kè nou pé vin bon zanmi èvè Bondyé é kè nou ni èspwa kè nou ké pé viv pou touttan. Si Jéova péyé ranson-la pou nou, sé pas i té enmé-nou onlo é nou pé’é jen las di-y mèsi pousa (Wom. 5:8). Pou nou kontinyé montré rèkonésans an nou pou tousa Jéova é Jézi fè é pou nou pa jen oubliyé tousa yo fè, Jézi mandé-nou sélébré Mémoryal a mò a-y chak lanné (Lik 22:19, 20).
2. Ka nou ké vwè adan awtik-lasa ?
2 Lanné-lasa, nou ké sélébré Mémoryal-la lè sanmdi 12 avril 2025. Sèten noutout ké òwganizé-nou pou nou la jou-lasa. Si pannan péryòd a Mémoryal nou ka pran tan médité a asi sa Jéova é Jézi fè ban-nou, sa ké pwokiré-nou onlo byenfé. Adan awtik-lasa, nou ké vwè ka ranson-la ka aprann-nou asi Jéova é asi Gason a-y. É adan awtik-la ki ka vin apré la, nou ké vwè ki byenfé ranson-la ka pwokiré-nou é kijan nou pé montré rékonésans an nou pou bèl kado-lasa.
SA RANSON-LA KA APRANN-NOU ASI JÉOVA
3. Kijan mò a onsèl nonm pèwmèt kè konmen milyon moun sové ? (gadé imaj-la osi).
3 On rézon ki fè si Jéova voyé Jézi asi latè pou i mò pou nou, sé pas i enmé fè sa ki jis (Dét. 32:4). An-nou réfléchi on biten : Adan dézobéyi Bondyé é akòz dè-y noutout ka péché é noutout ka mò (Wom. 5:12). Pou Jéova woté-nou anba jouk a péché-la é anba jouk a lanmò-la, i voyé Jézi asi latè pou i mò ban nou. Men kijan sakrifis a onsèl nonm pawfè té pé sové vi a milyon moun. Lapòt Pòl ka ban-nou répons-la. Mi sa i : « Pas, menmjan onlo moun vin péchè pas nonm-lasa tousèl [kivédi Adan] pa obéyi, menmjan-la osi, onlo moun ké vin jis pas moun-lasa tousèl [kivédi Jézi] obéyi » (Wom. 5:19 ; 1 Tim. 2:6). Kon Pòl èspliké, si nou èsklav a péché-la é a lanmò-la, sé akòz dè onsèl nonm pawfè ki dézobéyi. Men grasa a ondòt nonm ki té pawfè é ki obéyi, nou pé sòti anba jouk a péché-la é a lanmò-la.
Sé fòt a onsèl nonm si nou anba jouk a péché-la é a lanmò-la. É sé grasa onsèl nonm si nou pé sòti anba jouk a péché-la é a lanmò-la (gadé paragraf 3 la).
4. Poukwa Jéova pa enki désidé lésé timoun a Adan ki té rété fidèl a-y, viv pou touttan ?
4 Ès Jéova té oblijé voyé Gason a-y mò pou nou ? Ès i pa té pé enki lésé timoun a Adan viv pou touttan, siwvwè yo té’é rété fidèl a-y ? Pétèt kè pou nou, si i té fè sa sa té’é réglé pwoblèm-la. Men Jéova ki sé on Bondyé ki jis pa’a vwè sa konsa. Si i té aji konsa, sé té ké konsi Adan pa té jen fè pon péché ki grav é kè timoun a-y té pawfè. É sa sé on manti.
5. Poukwa nou pé sèten kè Jéova ké toujou fè sa ki jis ?
5 Vinvwè Jéova pa té ba-y ranson-la é kè i té pèwmèt désandan a Adan ki enpawfè viv pou touttan, i pa té ké aji èvè jistis ankò. Pétèt nou té’é mandé-nou : « Èskè i pé’é mèt jistis a-y akoté adan dòt domenn ankò ? Ès i ké tchenn tout pwomès a-y ? » Men nou pa bizwen pè. Poukwa nou ka di sa ? Pas Jéova sakrifyé pwòp Gason a-y pou i fè sa ki jis. Kifè, nou pé sèten i toujou ké fè sa ki jis.
6. Poukwa nou pé di kè ranson-la ka montré kè Jéova enmé-nou ? (1 Jan 4:9, 10).
6 Ondòt kalité ki fè si Jéova voyé Jézi asi latè, sé pas i enmé-nou (Jan 3:16 ; li 1 Jan 4:9, 10). Jéova voyé gason a-y mò ban nou nonsèlman pas i vlé nou viv asi latè pou touttan, men osi pas i vlé nou fè pawti a fanmi a-y. Ou ka sonjé lè Adan péché ? I pa té pé rété adan fanmi a Jéova ankò. É dépi sa, pa ni ponmoun ki ka fèt adan fanmi-lasa. Men grasa ranson-la, Jéova ka padonné péché an nou, é on jou, tout moun ki ni fwa adan-y é ki ka obéyi-y ké fè pawti a fanmi a-y. Anplisdisa, dépi konnyéla nou pé vin bon zanmi èvè Jéova, men osi èvè sélézòt moun-la ki ka adoré-y la. Vréman, nou pé di Jéova enmé-nou ! (Wom. 5:10, 11).
7. Jézi soufè bon soufè la pou i té péyé ranson-la. Ka sa ka montré-nou asi lanmou-la Jéova ni pou nou la ?
7 Lè nou ka sonjé jan sa dwèt fè Jéova lapenn lè i vwè gason a-y soufè, sa ka fè-nou vwè jan i enmé-nou. Satan di kè anba éprèv, pon sèwvitè a Jéova pé’é rété fidèl a-y. Alò pou montré kè Satan ka manti, Jéova lésé gason a-y soufè joustan i mò (Jòb 2:1-5 ; 1 Pyè 2:21). Jéova vwè kijan moun té ka fè jé èvè gason a-y, i vwè kijan sé sòlda-la ba-y bon fwèt é kijan yo maré-y asi on poto. I vwè Gason a-y soufè bon soufè-la joustan i rann dènyé souf a-y (Mat. 27:28-31, 39). Jéova té’é pé arété sa a nenpòt ki moman. Pa ègzanp lèwvwè sèwten moun di : « Si i ka fè Bondyé plézi, fò Bondyé sové-y », Jéova té’é pé fè on biten (Mat. 27:42, 43). Men si Jéova té fè sa, Jézi pa té’é péyé ranson-la é lèwgadé nou pa té’é ni pon èspwa pou dèmen. Sé pousa Jéova lésé Gason a-y soufè joustan i mò.
8. Lè Jéova vwè gason a-y ka soufè, ès sa fè-y lapenn ? (gadé imaj-la osi).
8 Fò pa nou konpranndèdi kè pas Bondyé toupuisan i pa’a rèsanti ayen ! Jéova fè-nou pòtré a-y. Donk si nou kapab rèsanti dé biten, li osi kapab rèsanti dé biten an tchè a-y. Labib ka di kè délè, ni dé moun oben dé biten ki ka fè-y « lapenn » (Sòm 78:40, 41). An-nou pran ègzanp a Abraam é Izaak. Nou ka sonjé kè Jéova té mandé Abraam sakrifyé sèl gason-la i té ni la (Jén. 22:9-12 ; Ébr. 11:17-19). Imajiné jan Abraam dwèt té tris é jan i dwèt té angwasé bon angwasé la lèwvwè i té k’ay tchouyé pwòp gason a-y. Si sa rivé Abraam, alò jijé Jéova ! Sa dwèt raché tchè a-y lèwvwè moun ki pa té ni fwa fè gason a-y bon abominasyon jistan i mò (gadé vidéo-la Imité fwa a yo : Abraam (2èm pati) asi jw.org.
Vwè Gason a-y ka soufè konsa, sa fè Jéova lapenn toubònman (gadé paragraf 8 la).
9. Ka Women 8:32, 38, 39 ka édé-w konprann anrapò èvè lanmou Jéova ni pou vou é pou frè é sè a-w ?
9 On biten ranson-la ka pèwmèt-nou konprann, sé kè ponmoun pa enmé-nou fòs Jéova enmé-nou, pa menm fanmi an nou oben plibon zanmi an nou (li Women 8:32, 38, 39). Jéova jous enmé-nou plis ki noumenm. Ès ou anvi viv pou touttan ? Jéova vlé sa ba-w plis ankò. Ès ou vlé Jéova padonné péché a-w ? Jéova vlé fè sa ba-w plis ankò. Sèl biten i ka mandé, sé kè nou aksèpté bèl kado-la i fè-nou la. Kijan ? Nou pé fè sa si nou ka montré nou ni fwa adan-y é si nou ka obéyi-y. Ranson-la sé on bèl kado ki ka montré fòs Jéova enmé-nou. É adan nouvo mond-la, nou ké aprann plis biten ankò asi sa Jéova fè ban nou pas i enmé-nou (Ékl. 3:11).
SA RANSON-LA KA APRANN-NOU ASI JÉZI
10. a) Ka ki fè Jézi lapenn toubònman ? b) Kijan Jézi montré kè Pap’a-y sé on moun ki jis ? (gadé osi ti karé-la « Sakrifis a Jézi ka montré kè Jéova sé on Bondyé ki jis »).
10 Sa ki té pi enpòwtan pou Jézi, sé sa moun té ka pansé asi Pap’a-y (Jan 14:31). Lèwvwè Jézi té ka sonjé kè moun té’é di i dérèspèkté Pap’a-y, sa té ka fann tchè a-y. Dayè, mi sa i ni lokazyon di Pap’a-y adan on priyè : « Papa, si sa posib, fè koup-lasa pasé lwen an mwen » (Mat. 26:39). Konm Jézi rété fidèl a Jéova joustan i mò, i montré kè tout sé manti-la Satan simé asi Pap’a-y pa té vré menm.
11. Kijan Jézi montré i té enmé lézimen fò ? (Jan 13:1).
11 Ranson-la ka aprann-nou ondòt biten ankò. Tousa ki ka konsèwné lézimen enpòwtan ba Jézi, é siwtou sa ki anrapò èvè disip a-y (Pwov. 8:31 ; li Jan 13:1). Jézi té sav kè i té kay pasé dé moman ki té rèd toubònman asi latè. Pa ègzanp, jan-la i té’é mò la té’é fè-y soufè toubònman. I pa fè sa enki pas fò i té fè-y, men sé pas i té enmé sé moun-la. Tousa i té ka fè, i té ka fè-y èvè tout tchè a-y, ki sé lè i té ka préché, ki sé lè i té ka anségné oben ki sé lè i té ka édé moun. Menmjou-la i té kay mò la i pran tan lavé pyé a sé apòt-la, i pran tan ankourajé-yo é i pran tan fòwmé-yo (Jan 13:12-15). Lèwvwè i té asi poto-siplis-la i okipé-y dè sa manman-y té bizwen, é i ba malfétè-la ki té koté a-y dé ti pawòl ki plen èspwa (Lik 23:42, 43 ; Jan 19:26, 27). Nonsèlman Jézi montré kijan i enmé lézimen lè i bay vi a-y pou yo, men i montré sa osi lèwvwè i aji èvè lanmou é jantiyès èvè sé moun-la pannan tout tan-la i viv asi latè la.
12. Poukwa nou pé di kè Jézi ka kontinyé travay ban nou ?
12 Menmsi Jési mò ban nou onsèl fwa, i ka kontinyé fè onlo biten ban nou (Wom. 6:10). Kijansa ? I ka fè-nou bénéfisyé dè sé byenfé-la ranson-la ka pwokiré-nou la. Enn gadé tousa i kafè. I Wa, i sé on Gran Prèt, é i sé chèf a lasanblé-la (1 Kor. 15:25 ; Éféz. 5:23 ; Ébr. 2:17). I ka sanblé sé krétyen-la ki ka fè pawti a sé wen-la, é séla ki ka fè pawti a gran-foulmoun-la, é travay-lasa, fò i fin li avan gwo tribilasyon-la bout b (Mat. 25:32 ; Mawk 13:27). Pannan sé dènyé jou-la, Jézi ka sèvi èvè Èsklav fidèl é prévwayan la pou i ba disip a-y sa yo bizwen pou yo rété fidèl a Jéova (Mat. 24:45). É lè i ké ka dirijé pannan sé 1000 an la, i ké kontinyé pòté mannèv ban nou. Lè Jéova voyé gason a-y, i pa fè sa enki pou Jézi té mò ban nou, men i voyé-y pou i té fè onpakèt biten ban nou.
PA JEN ARÉTÉ APRANN DÉ NOUVO BITEN
13. Kijan ou pé kontinyé aprann dé biten anrapò lanmou-la Jéova é Jézi ni pou nou la ?
13 Pi ou ké pran tan réfléchi asi sa Jéova é Jézi fè ba-w, pi ou ké vwè jan Jéova é Jézi enmé-w. Pétèt kè lanné-lasa, pannan péryòd a Mémoryal-la, ou té’é pé li on Évanjil oben plizyè adan yo. Ka ou ka pansé ? Lè ou ka fè lèkti a-w, ou pa oblijé li onpakèt vèwsé onsèl kou. Vométan ou li atètipo pou touvé dé nouvo biten ki ké fè-w enmé Jéova é Jézi pi fò ankò. Aprésa, éséyé palé dè sa èvè dòt moun.
14. Kijan sé rèchèwch-la ou ka fè la pé édé-w aprann dé nouvo biten asi ranson-la é asi dòt sijé osi ? (Sòm 119:97 ; gadé imaj-la osi).
14 Si sa ja ka fè bon tibwen tan ou adan lavérité, pétèt ou ka mandé-w si sa posib ou dékouvè dé nouvo biten asi dé sijé ou konnèt byen, kon jistis a Jéova, lanmou a-y, oben asi ranson-la. On biten ki sèten sé kè nou pé’é jen fin aprann dé biten asi sé sijé-lasa oben asi dòt sijé. Alò ka ou pé fè ? Pran tan li é étidyé piblikasyon an nou, é lè ou ka tonbé asi on pasaj ou pa byen konprann, fè rèchèwch. Aprésa, pannan jouné-la pran tan réfléchi asi sa ou sòti dékouvè, é asi sa sa ka aprann-vou asi Jéova asi gason a-y, é asi jan yo enmé-w (li Sòm 119:97 é nòt-la ki adan Bib-la ki fèt pou étidyé la an fransé).
Menmsi sa ka fè lontan nou adan lavérité, nou pé fè rèkonésans an nou pou ranson-la vin pli fò (gadé paragraf 14 la).
15. Poukwa fò pa nou arété chèché sé ti trézò-la ki an Bib-la ?
15 Pa dékourajé-w si chakfwa ou ka étidyé Labib ou pa’a touvé dé nouvo biten oben dé biten ou poto’o jen vwè avan. Ou on ti jan kon sé moun-la ki ka chèché lò an sab-la. Fò yo ni pasyans. Yo pé pasé konben lè oben konben jou ka chèché an sab-la pou yo touvé enki on ti grennpousyè an lò. Men yo pa ka lagé, pas ti grennpousyè an lò lasa ni valè ba yo. Sé menm biten ban nou, chak ti vérité nou touvé an Bib-la ni plis valè ban nou ki lò ! (Sòm 119:127 ; Pwov. 8:10). Alò aji èvè pasyans é kontinyé ti pwogram a lèkti a Labib a-w (Sòm 1:2).
16. Kijan nou pé imité Jéova é Jézi ?
16 Lèwvwè ou ka étidyé, éséyé vwè kijan ou pé mèt sa ou aprann an pratik. Pa ègzanp, Jéova sé on Bondyé ki jis é ou pé imité-y lèwvwè ou pa’a fè préférans lè ou ka aji èvè lézòt. Ou pé montré ou enmé Jéova kon Jézi té enmé Pap’a-y si ou paré à fè tousa Jéova ka mandé-w, é si ou paré a édé frè é sè a-w menmsi ou ka soufè adan sa. Ou pé imité Jézi osi lèwvwè ou ka fè sé moun-la konnèt tout sé bèl biten-la Jéova ja fè pou limanité. Konsa, yo ké ni laposibilité montré yo ni fwa adan ranson-la.
17. Dè ki biten nou ké palé adan awtik-la ki ka vin la ?
17 Pli nou ké aprann dé biten asi ranson-la, pli nou ké enmé Jéova é Jézi. É konm nou ké enmé-yo pli fò, yo osi yo ké enmé-nou pli fò osi (Jan 14:21 ; Jak 4:8). Alò an-nou pwofité dè tousa Jéova mèt a dispozisyon an nou pou nou toujou aprann plis biten asi ranson-la. Adan awtik-la ki ka vin la, nou ké vwè ki byenfé ranson-la ka pwokiré-nou. Nou ké vwè osi kijan nou pé montré Jéova rèkonésans an nou pou tout lanmou-la i ni ban nou la.
KANTIK 107 Modèl lanmou la Jézi ban nou la
a POU NOU BYEN KONPRANN : Lè on moun ka « médité », i ka pran tan réfléchi asi on biten é i k’ay an nannan a-y.
b Adan Éfézyen 1:10, Pòl ka palé dè Jéova ki ka ‘sanblé biten ki an syèl-la’. An Matyé 24:31 é an Mawk 13:27 Jézi ka palé dè moun i chwazi é kè i ka « sanblé ». Pòl é Jézi pa ka palé dè menm biten-la. Pòl té ka palé dè lè Jéova ka chwazi moun pou ay gouvèné èvè Jézi, é pou sa i ka voyé lèspri sen a-y asi yo. Li Jézi ka palé dè ondòt biten. Avan gwo tribilasyon-la bout, Jézi ké sanblé an syèl-la tout sé krétyen wen la ki asi latè toujou.
