AWTIK POU ÉTIDYÉ 2
KANTIK 132 Alè nou ka fè yonn
Kijan sé mari-la pé montré madanm a yo kè yo enmé-yo é kè yo ka rèspèkté-yo ?
« Zòt sé mari-la, […] ba sé madanm-la lonnè » (1 PYÈ 3:7).
ON TI LIDÉ ASI SA NOU KAY VWÈ
On mari pé montré madanm a-y kè i ka ba-y lonnè adan sa i ka di madanm a-y é adan jan i ka aji èvè-y.
1. Lèfètkè nou pé mayé, sé on bèl kado Jéova fè-nou. Poukwa nou ka di sa ?
JÉOVA sé « Dyé-la tchè a-y kontan la » é i vé nou ni tchè-kontan osi (1 Tim. 1:11). I ban-nou enpé bèl kado pou nou pé sa ni on vi ki bèl (Jak 1:17). Yonn adan sé bèl kado-la i ban-nou la, sé lèfètkè nou pé mayé. Lèwvwè on misyé é on madanm ka mayé, yonn ka pwomèt lòt kè i ké enmé-y é kè i ké rèspèkté-y. Lèwvwè sé 2 moun-mayé-la ka fè ansòt pou yonn enmé lòt fò, yotoulédé ka ni tchè-kontan (Pwov. 5:18).
2. Poukwa onlo moun-mayé ka soufè jòdijou ?
2 Malérèzman, onlo moun-mayé pa ka rèspèkté pwomès-la yo fè la jou-la yo mayé la. Ka sa ka bay ? Ében yo pa ni tchè-kontan. Adan on rapò, dé èspésyalis montré kè onlo misyé ka fè madanm a yo vwè bon mizè. Swa yo ka lévé men asi yo, swa yo ka di-yo bétiz oben yo ka fè dòt biten ankò pou malmenné-yo. Sèwten mari ka aji èvè onlo rèspé épi madanm a yo lèwvwè yo déwò, men lè yo a kaz a yo, sé ondòt zafè. É onlo moun-mayé ka soufè davwa misyé-la ka gadé pòwnografi.
3. Poukwa on misyé pé rivé a vin méchan èvè madanm a-y ?
3 Poukwa sèwten misyé méchan èvè madanm a yo ? Sé pé pas pap’a-yo té brital èvè manman-yo, kifè pou yo sa toutafè nòwmal kè yo aji konsa èvè madanm a yo. Ni dòt osi ki brital èvè madanm a yo pas sé kilti a yo ki konsa. Kifè pou misyé-la, fò i montré madanm-la kè sé-y ki nonm an kaz-la. Ni dòt misyé osi ki pa ka rivé métrizé-yo lè yo ka fè on koudkòlè. Ni sa osi ki ka gadé pòwnografi, kifè pou yo madanm-la a dispozisyon a yo dépi yo anvi ni rèlasyon sèksyèl. Anplisdisa, sé èspésyalis-la dékouvè kè pannan pandémi a Covid-19, ni plis misyé ankò ki vin brital èvè madanm a yo. Men kèlkanswa, on misyé pa dwètèt malmenné madanm a-y anponjan.
4. Ki biten fò sé mari-la fè atansyon, é poukwa fò yo fè sa ?
4 Adan mond-la, sé moun-la pa ka ba sé madanm-la valè, kifè fò sé mari-la fè atansyon pou yo pa lésé mantalité a mond-la détenn asi mantalité a yo a. Poukisa ? Ében, sé paskè byensouvan sa on moun ni an tèt sé sa i ka fè. Lapòt Pòl avèti sé frè é sè ki té wen la adan lasanblé a Wòm pou yo ‘pa lésé mond-lasa aji asi yo’ (Wom. 12:1, 2). Lè Pòl maké sé pawòl-lasa ba lasanblé-la, sa té ja ka fè on ti moman yo té vin krétyen. Magrésa, dapré sa Pòl maké, i ka sanmsa sé frè é sè la té ka lésé mès é labitid a mond-la é mantalité a-y détenn asi yo. Sé pousa Pòl di-yo chanjé mantalité a yo é jan yo ka aji. Nou ka tou konprann kè konsèy-lasa bon pou sé mari-la jòdijou osi. Malérèzman, sèwten adan yo ka lésé mantalité a mond-la aji asi yo é yo ka jous fè madanm a yo vwè mizè b. Kijan Jéova vlé sé mari-la aji èvè madanm a yo ? Nou ka touvé répons-la adan vèwsé-la ki an tèt a awtik-la.
5. Dapré 1 Pyè 3:7, kijan pou on mari aji èvè madanm a-y ?
5 (Li 1 Pyè 3:7.) Jéova mandé sé mari-la ba madanm a yo lonnè. Lè on moun ka ba ondòt moun lonnè, sa vé di kè i ka rèspèkté-y. Kifè, on mari ki ka ba madanm a-y lonnè janti èvè-y é i ka aji èvè lanmou èvè-y. Adan awtik-lasa nou ké vwè kijan on mari pé ba madanm a-y lonnè. Men pou nou koumansé, an-nou vwè ka on mari pa dwèt fè madanm a-y.
PA FÈ AYEN KI PÉ FÈ MADANM A-W SOUFÈ
6. Lè Jéova ka vwè on misyé ka lévé men asi madanm a-y, ka sa ka fè-y ? (Kolosyen 3:19).
6 Lévé men asi madanm a-w. Jéova hay lè moun ni vyolans an kò a yo (Sòm 11:5). É sa vré siwtou lè on misyé ka malmenné madanm a-y (Mal. 2:16 ; li Kolosyen 3:19). Kon 1 Pyè 3:7 ka di (vèwsé-la ki an tèt a awtik-la), lè on mari pa ka aji èvè madanm a-y kon Jéova ka mandé, oblijé lanmityé a-y èvè Jéova ké pran gaz adan sa. Jéova pé jous désidé kè i pé’é kouté priyè a frè-lasa.
7. Dapré Éfézyen 4:31, 32, ki pawòl pou on mari pa di madanm a-y ? (gadé osi nòt-la « Pou nou byen konprann »).
7 Palé rèd ba madanm a-w. Sèwten mari ka vougaré madanm a yo pas yo kòlè é sa ka fè madanm-la mal. Men mi sa Jéova ka di : « Woté tout kalté [...] kòlè kè zò ni andidan a zòt. Arété kriyé asi moun é las jiré moun c » (li Éfézyen 4:31, 32). Jéova ka tann tout biten. Alò i ka vwè kijan mari-la ka palé ba madanm a-y lèwvwè i akaz a-y. Si i ka palé rèd ba madanm a-y é kè i ka di-y bétiz, non sèlman sa ké aji asi mayé a yo men moun-lasa pé’é bon bon zanmi èvè Jéova ankò (Jak 1:26).
8. Ka Jéova ka pansé dè pòwnografi, é poukwa nou ka di sa ?
8 Gadé pòwnografi. Ka Jéova ka pansé dè pòwnografi ? A pa ti hay i hay sa. Kifè lè on misyé ka gadé imaj ki pa pwòp, i ka mèt lanmityé a-y èvè Jéova an danjé é i pa ni pon rèspé pou madanm a-y d. Jéova vlé sé misyé-la rété fidèl a madanm a yo. On mari ki fidèl pé’é ay dèyè pondòt madanm pou fè péché sèksyèl èvè-y. Pa menm sonjé i pé’é sonjé fè on biten konsa nonplis. Jézi di kè on nonm ki ka kontinyé gadé on madanm ki pa ta-y jiskatan i anvi kouché èvè-y, ja fè adiltè èvè-y « andidan tchè a-y » e (Mat. 5:28, 29).
9. Poukwa Jéova hay lèwvwè on mari ka fòsé madanm a-y fè on biten i vé pa fè lè yo ni rèlasyon sèksyèl ?
9 Fòsé madanm a-w fè on biten i vé pa fè lè zò ni rèlasyon sèksyèl. Sèwten mari ka mèt présyon asi madanm a yo pou yo fè sèwten biten lè yo ni rèlasyon sèksyèl. Sé biten-lasa ka fè madanm a yo santi kè i pa vo ayen oben sé dé biten konsyans a-y pa’a pèwmèt-li fè. Lè on moun ka aji konsa, i égoyis é i pa’a tchenn kont dè sa lézòt ka rèsanti. Jéova hay atitid-lasa toubònman. I vé on mari enmé madanm a-y, kè i janti èvè-y é kè i montré-y kè i ka rèspèkté konsyans a madanm a-y (Éféz. 5:28, 29). Men vinvwè on frè ka di madanm a-y dé biten ki ka fè-y santi kè i pli ba ki tè oben i méchan èvè madanm a-y ? Oben vinvwè i ka gadé pòwnografi ? Ka pou i fè pou chanjé mantalité a-y é pou i aji ondòt jan ?
KIJAN ON MARI PÉ ARÉTÉ NI ON MOVÉ KONDUIT
10. Kijan ègzanp a Jézi pé itil pou sé mari-la ?
10 Siwvwè on mari ka malmenné madanm a-y oben siwvwè i ka méprizé-y é i bizwen arété èvè sa, ka ki pé édé-y ? Ében sa ki pé édé-y sé suiv ègzanp a Jézi. Menmsi Jézi pa jen mayé, jan-la i té ka aji èvè disip a-y pé sèvi sé mari-la ègzanp (Éféz. 5:25). An-nou vwè kijan Jézi aji èvè apòt a-y, kijan i palé ba yo é ka sa pé aprann sé mari-la.
11. Kijan Jézi té ka aji èvè sé apòt-la ?
11 Jézi té janti èvè sé apòt-la é i té ni onlo rèspé ba yo. I pa jen montré-y rèd èvè yo. Menmsi Jézi té Ségnè a yo é Mèt a yo, i pa jen sèvi èvè fòs a-y pou fè-yo konprann kimoun ki chèf-la oben pou fè-yo pè. Okontrè, èvè onlo imilité, i toujou té ka chèché a fè on biten pou édé-yo (Jan 13:12-17). I ni lokazyon di disip a-y : « Lésé-mwen anségné-zòt. Konsa, zò ké ni fòs piskè an dous é an ni imilité » (Mat. 11:28-30). Nou ka vwè kè Jézi sé té on moun ki té dous. On moun ki dous a pa on féba. Si on moun ka rivé métrizé-y, sa ka montré i fò. Lè yo ka tigonné-y, i ka rété kalm é i ka métrizé-y.
12. Kijan Jézi té ka palé ba moun ?
12 Jézi té ka di dé biten pou konsolé é ankourajé moun. I pa té ka palé rèd ba disip a-y (Lik 8:47, 48). Lè moun ki té kont li té ka jiré-y é lè yo té ka chèché-y tren, « i pa té ka viré jiré-yo » (1 Pyè 2:21-23). É délè, olyé i té réponn-yo on mannyè ki rèd, i té pisimé pa di-yo ayen (Mat. 27:12-14). Mi on bèl ègzanp pou sé frè-la ki mayé la !
13. Dapré Matyé 19:4-5, kijan on mari pé « rété èvè madanm a-y » ? (gadé imaj-la osi).
13 Jézi di sé mari-la kontinyé rété fidèl a madanm a yo. I répété sa Pap’a-y di : ‘On nonm dwèt rété èvè madanm a-y’ (li Matyé 19:4-6). Mo grèk la yo tradui la é ki bay « rété èvè » vlé di « rété kolé èvè ». Sa ka montré kijan lanmou-la adan mayé-la dwètèt fò : sé konsidiré ni on lakòl ki ka kolé mari-la é madanm a-y. Si lanmou-la ka étenn, yo toulédé ké pran plon adan sa. On mari ki enmé madanm a-y ké ba pòwnografi gran lè a-y. I pa ka « rété ka gadé sa ki pa vo ayen » (Sòm 119:37). Kon Jòb, i byen désidé a pa jen gadé pon madanm on mannyè ki pa pwòp (Jòb 31:1).
On mari ki ka rété fidèl a madanm a-y ka ba pòwnografi gran lè a-y g (gadé paragraf 13 la).
14. Ka pou on mari fè pou wouvin byen èvè Jéova é èvè madanm a-y ?
14 Fò on mari ki ka lévé men asi madanm a-y oben ki ka di-y bétiz pou fè-y mal fè sèwten biten pou i wouvin byen èvè madanm a-y é èvè Jéova. Ki biten ésa ? Prèmyèwman, fò limenm a-y rèkonnèt kè sa i ka fè la pa byen. Jéova ka vwè tousa i ka fè é i ka tann tousa i ka di madanm a-y (Sòm 44:21 ; Ékl. 12:14 ; Ébr. 4:13). Dézyèmman, fò i arété fè madanm a-y soufè é fò i chanjé konpòwtasyon a-y (Pwov. 28:13). Twazyèmman, fò i mandé ki madanm a-y ki Jéova padon é fò i montré i sensè (Akt 3:19). I pé sipliyé Jéova pou an fon a tchè a-y i anvi chanjé é pou i édé-y métrizé sa i ka pansé, sa i ka di é kijan i ka aji (Sòm 51:10-12 ; 2 Kor. 10:5 ; Filip. 2:13). Katriyèmman, fò i aji annakò èvè sa i mandé Jéova adan priyè a-y é fò i fè tousa i pé pou i hay tout kalté vyolans é tout kalté vyé pawòl (Sòm 97:10). Senkyèmman, fò pa i pèd tan pou i ay vwè sé ansyen-la pou mandé-yo édé-y (Jak 5:14-16). Sizyèmman, fò i pran dispozisyon pou i pa wouviré adan sé vyé labitid-la i té ni la. Siwvwè mari-la ka gadé pòwnografi, i pé fè osi tousa nou sòti vwè la pli ho. Jéova ké béni tout sé éfò-la i ka fè la pou chanjé (Sòm 37:5). Men a pa arété pou i arété èvè mové konpòwtasyon-la i té ni la tousèl. Fò i aprann osi kijan pou i montré madanm a-y lonnè. Kijan i pé fè sa ?
KIJAN OU PÉ MONTRÉ MADANM A-W KÈ OU ENMÉ-Y É KÈ OU KA RÈSPÈKTÉ-Y
15. Kijan on mari pé montré madanm a-y kè i enmé-y ?
15 Montré-y ou enmé-y. Pawmi sé frè-la ki ni lakontantman adan mayé a yo, ni sa ki pran labitid montré madanm a yo touléjou kè yo enmé-y (1 Jan 3:18). On mari pé montré madanm a-y i enmé-y èvè dé ti jès tousenp, kon pa ègzanp kenbé men a-y oben pran-y an dé bwa a-y. I pé voyé on ti mésaj ba-y pou di-y : « An ka vwè mank a-w » oben pou mandé-y : « Kijan ti jouné-la ka pasé ? ». É dètanzantan i pé menm achté on ti kado ba-y. On mari ki ka aji konsa ka ba madanm a-y lonnè, é i ka fè mayé a-y vin pli solid.
16. Poukwa on mari dwèt di madanm a-y kè i ni onlo valè ba-y ?
16 Montré-y kè ou ni rèkonésans. On mari ki ka ba madanm a-y lonnè ka ankourajé-y é i ka di-y kè i ni valè. I pa ka oubliyé di-y mèsi pou tousa i ka fè pou édé-y (Kol. 3:15). Lè on mari ka di madanm a-y sa i enmé adan-y, sa ka touché-y an fon a tchè a-y. Madanm-la ka santi-y ansékirité, i ka santi mari a-y enmé-y é kè i ni valè (Pwov. 31:28).
17. Kijan on mari pé montré i ni rèspé pou madanm a-y ?
17 Montré-w janti èvè madanm a-w é montré ou ni rèspé ba-y. On mari ki enmé madanm-y ka pran swen a-y é i ka ba-y onlo valè. Pou-y sé on bèl kado ki ka vin dè Jéova (Pwov. 18:22 ; 31:10). I ka aji èvè bonté é rèspé èvè-y, menm lèwvwè yo ni rèlasyon sèksyèl. I pa ka fòsé-y fè dé biten ki ka mété-y malalèz, ki ka fè-y wont, oben dé biten konsyans a-y pa’a pèwmèt-li fè pannan yo ni rèlasyon sèksyèl f. É limenm a-y mari-la, i pa’a fè pon biten konsyans a-y pa’a pèwmèt-li fè nonplis (Akt 24:16).
18. Ka pou on mari byen désidé a fè ? (gadé ti karé-la « Kat biten ou pé fè pou montré madanm a-w kè ou ka rèspèkté-y »).
18 Sé mari-la, zò pé sèten Jéova kontan-zòt, davwa zò ka ba madanm a zòt lonnè lè zò ka palé ba yo é lè zò ka aji èvè yo. Fò ou byen désidé a pa jen fè madanm a-w pon biten pou fè-y santi kè i pa vo ayen. Okontrè, fò ou janti èvè-y, fò ou ni rèspé ba-y é fò ou fè dé biten pou montré-y ou enmé-y. Lè ou ka fè sa, ou ka montré madanm a-w kè ou enmé-y é kè i ni valè ba-w. Ba madanm a-w lonnè, konsa ou ké pwotéjé ondòt lanmityé ou ni ki pi enpòwtan ankò : lanmityé a-w èvè Jéova (Sòm 25:14).
KANTIK 131 « Ce que Dieu a uni »
a Sa té’é byen kè sé mari-la ay li awtik-la tèm a-y sé « Ès ou ka aji èvè sé madanm-la kon Jéova ka fè-y ? », ki sòti adan niméwo a janvyé 2024 a Tou dè Gad la.
b Si moun-la ou mayé èvè-y la ka malmenné-w, sa té’é byen si ou té ka li awtik-la « De l’aide pour les victimes de violences conjugales », ki sòti adan ribrik-la « Divers » asi jw.org é JW Library®.
c POU NOU BYEN KONPRANN : Lè nou ka palé dè on « jiré » sé pou palé dè pawòl ki ka fè on moun wont, dè pawòl yo ka voyé toutlè pou kritiké é dè pawòl ki ka fè on moun mal. Kifè tousa on mari ka di pou fè madanm a-y mal oben pou fè-y santi i pa ni pon valè sé on jiré.
d Ay gadé awtik-la « La pornographie peut briser votre couple », asi jw.org oben adan JW Library.
e On madanm mari a-y ka gadé pòwnografi pé li awtik-la « Lè moun-la ou mayé èvè-y la ka gadé biten pòwno », ki adan niméwo a out 2023 a Tou dè Gad la.
f Labib pa’a di kijan pou on mari é madanm a-y ni rèlasyon sèksyèl, é i pa’a di ka ki pwòp é ka ki pa pwòp adan domenn-lasa nonplis. Kifè sé sé moun-mayé-la ki dwètèt pran désizyon ki ka montré kè yo vlé onoré Jéova, kè yonn vlé fè lòt-la plézi, é kè yo vlé konsyans a yo rété nèt. Yo pé ké fè piblisité a sa yo ka fè adan domenn-lasa.
g SA NOU KA VWÈ ASI IMAJ-LA : Kolèg-travay a on frè bizwen fè-y gadé imaj ki pa pwòp adan on jounal.
