AWTIK POU ÉTIDYÉ 3
KANTIK 35 « An-nou vérifyé sa ki pli enpòwtan »
Pran désizyon ki ka fè Jéova plézi
« On moun ka koumansé ni sajès lèwvwè i ka krenn Jéova, é i ka vin entélijan lèwvwè i konnèt Sila ki Pli Sen la » (PWOV. 9:10).
ON TI LIDÉ ASI SA NOU KAY VWÈ
Nou ké vwè kijan lè ou ni konésans, entélijans é bon jijman sa ka édé-w pran désizyon ki saj.
1. Ka noutout ni a fè ?
CHAKJOU fò nou pran désizyon. Ni sèwten désizyon ki fasil a pran. Pa ègzanp nou pa ni a réfléchi onlo pou nou sav ka nou kay manjé lèmaten oben akilè nou kay kouché lèswa. Men ni dòt désizyon ki pi difisil a pran. Pa ègzanp séla ki anrapò èvè santé an nou, fanmi an nou, sa ki ké ban-nou lakontantman é sa ki anrapò èvè lanmityé an nou èvè Jéova. Sa nou anvi sé kè sé désizyon-lasa fè-nou dibyen, fè fanmi an nou dibyen osi é siwtou kè yo fè Jéova plézi (Wom. 12:1, 2).
2. Ka pou-w fè pou-w pran dé bon désizyon ?
2 Ou ké rivé pran dé bon désizyon pi fasilman 1) siwvwè ou ka chèché tout enfòwmasyon ou bizwen anrapò èvè désizyon-la ou ni a pran la, 2) siwvwè ou ka chèché a sav ka Jéova ka pansé é 3) si ou ka pran tan a-w pou-w kalkilé byen. Adan awtik-lasa, nou ké palé dè sé 3 lidé-lasa é nou ké vwè ka nou pé fè pou nou sèvi pibyen ankò èvè bon jijman an nou (Pwov. 2:11).
CHÈCHÉ TOUT SÉ ENFÒWMASYON-LA OU BIZWEN LA
3. Pou nou pran on bon désizyon, fò nou chèché a ni sé enfòwmasyon-la nou bizwen la. Bay on ègzanp ki ka montré sa.
3 On prèmyé biten nou pé fè pou nou pran on bon désizyon, sé chèché tout sé enfòwmasyon-la nou bizwen la. Poukwa sa enpòwtan ? An-nou pran on ègzanp : Imajiné on moun ki malad bon malad la kay aka on dòktè. Ès dòktè-la ké di i ka ba moun-la tèl ou tèl médikaman avan menm i ègzaminé-y oben avan menm i pozé moun-la kèsyon ? Awa. Menmjan-la, vou osi ou ké pran pibon désizyon si ou ka koumansé pa ègzaminé sé enfòwmasyon-la ou sanblé la anrapò èvè kèsyon-la. Kijan ou pé fè sa ?
4. Kijan ou pé sanblé enfòwmasyon ou bizwen ? (Pwovèb 18:13 ; gadé imaj-la osi).
4 Délè pou sanblé sé enfòwmasyon-la ou bizwen la ou pé pozé kèsyon. Pa ègzanp imajiné yo ka envité-w adan on fèt : ou k’ay oben ou pa k’ay ? Si ou pa konnèt moun-la ki ka òwganizé fèt-la, pétèt fò ou ké pozé kèsyon kon pa ègzanp : « Ola é kitan yo ké fè fèt-lasa ? Konmen moun ki envité ? Ès yo chwazi on moun ki ké la pou tout biten pasé byen ? Kimoun ki ké la ? Kijan sa ké déwoulé ? Ès i ké ni alkòl ? » Répons a sé kèsyon-lasa ké édé-w pran on désizyon ki saj (li Pwovèb 18:13).
Pozé-w déotwa kèsyon pou ni tout sé enfòwmasyon-la (gadé paragraf 4 la). a
5. Lè ou ni tout sé enfòwmasyon-la, ka pou-w fè apré ?
5 Aprésa, dépi ou ni sé enfòwmasyon-la ou bizwen la, pran tan réfléchi asi tout sitiyasyon-la. Pa ègzanp, imajiné ou ka vin sav kè pawmi moun yo envité an fèt-la, ni sa ki pa’a suiv prensip a Labib oben ou ka aprann kè yo ké sèvi alkòl é kè moun ké pé bwè alèz a yo pas pa ni ponmoun ki ké la pou kontwolé sa. Ès sa pé’é pozé pwoblèm ? (1 Pyè 4:3). Ondòt biten ankò, imajiné kè jou-la yo ka fè fèt-lasa, sé jou a réinyon a-w oben kè si ou k’ay ou pé’é pé ay préché apré ? Lè ou ké pran tan réfléchi asi tout sé biten-lasa, sa ké édé-w pran bon désizyon-la. Men a pa sa tousèl pou-w fè. Konnyéla la ou ni lidé a-w ki ta-w asi sitiyasyon-la. Men on biten pou-w mandé-w sé ka Jéova li ka pansé dè sa ? (Pwov. 2:6).
CHÈCHÉ A SAV KA JÉOVA KA PANSÉ
6. Sèlon sa Jak 1:5 ka di, poukwa fò nou priyé pou Jéova édé-nou ?
6 Mandé Jéova édé-w konprann ka i ka pansé dè sitiyasyon-la. I pwomèt-nou i ké ban-nou sajès-la nou bizwen la pou nou sav si on désizyon ka fè-y plézi oben si i pa’a fè-y plézi. Konm « i donan èvè toutmoun é i pa ka babyé », i ké ban-nou sajès (li Jak 1:5).
7. Si ou bizwen sav ka Jéova ka pansé asi on biten, ka ou pé fè ? Bay on ègzanp.
7 Apré ou mandé Jéova gidonné-w, gadé pou vwè kijan i ka réponn-vou. Pa ègzanp, imajiné ou vwayajé é ou ka pèd on koté. Ou ka mandé on moun ki ka rété an sèktè-la pou i ba-w bon chimen-la. Ès ou ké pati avan i fin palé ba-w ? Awa ! Ou ké kouté pou tann sa i ka di-w. Menmjan-la, apré ou fin priyé Jéova pou i ba-w sajès, éséyé vwè kijan i ka réponn-vou, é chèché ki lwa é ki prensip adan Labib ki ké édé-w adan sitiyasyon a-w. Pa ègzanp, avan ou désidé si ou k’ay adan on fèt oben si ou pa k’ay, ou té’é pé gadé ka Labib ka di asi bòdé-apiyé, asi mové frékantasyon, é asi jan sa enpòwtan pou nou mèt Wayòm-la prèmyé douvan adan vi an nou (Mat. 6:33 ; Wom. 13:13 ; 1 Kor. 15:33).
8. Si ou bizwen on pal pou touvé lwa é prensip ki ké gidé-w, ka pou-w fè ? (gadé imaj-la osi).
8 Délè, pétèt ou ké bizwen yo édé-w pou touvé sé prensip-la é sé lwa-la ou ka chèché la. Si ou vé, ou pé mandé on moun ki byen doubout adan lavérité déotwa ti konsèy. Men sa enpòwtan osi kè voumenm a-w fè rèchèwch a-w. Ou pé touvé enfòwmasyon ou bizwen adan Zouti pou Témwen a Jéova fè rèchèch oben adan liv-la Versets pour la vie chrétienne. É pa oubliyé ka ki òbjèktif a-w : pran on désizyon ki ké fè Jéova plézi.
Chèché a sav ka Jéova ka pansé (gadé paragraf 8 la). b
9. Kijan nou pé sèten kè désizyon-la nou ké pran la ké fè Jéova plézi ? (Éfézyen 5:17).
9 Kijan nou pé sèten désizyon an nou ké fè Jéova plézi ? Dabò, fò nou konnèt Jéova byen. Labib ka di kè ‘on moun ka vin entélijan lèwvwè i konnèt Sila ki Pli Sen la’ (Pwov. 9:10). Kifè pou on moun konprann byen on sitiyasyon, fò i konnèt ki kalité Jéova ni, ka ki pwojé a-y, ka i enmé é ka i pa enmé. Alò mi sa ou pé mandé-w : « Dapré sa an konnèt asi Jéova, ès désizyon-lasa ké fè-y plézi ? » (li Éfézyen 5:17).
10. Poukwa sé prensip-la ki an Bib-la pli enpòwtan ki tradisyon a fanmi an nou oben ki kilti an nou ?
10 Délè, pou fè Jéova plézi, ou oblijé fè on biten ki ké désèvwa fanmi a-w oben zanmi a-w. Pa ègzanp, sa pé rivé kè sèwten paran mèt présyon asi tifi a yo pou i mayé èvè on frè ki ni lajan é ki pé mété-y alèz a-y. Pwoblèm-la, sé kè lanmityé a-y èvè Jéova pa tèlman solid. Sé paran-la pa ni pon mové lentansyon, yo vlé tifi a yo ni tousa ki fo é sa toutafè nòwmal, men fi-la pé mandé-y : « Si an mayé èvè frè-lasa, ès i ké édé-mwen vin pi bon zanmi èvè Jéova ? » Ka Jéova ka pansé dè sa ? Nou ka touvé répons-la adan Matyé 6:33. Adan vèwsé-lasa, Jézi ka ankourajé disip a-y ‘kontinyé chèché Wayòm-la an prèmyé’. Menmsi on krétyen ka rèspèkté fanmi a-y é moun ki ni menm kilti ki-y, sa ki pli enpòwtan ba-y, sé fè Jéova plézi.
KALKILÉ BYEN POU VWÈ KI DÉSIZYON OU KA PRAN
11. Filipyen 1:9, 10 ka palé dè on kalité ki pé édé-w kalkilé pou vwè ki désizyon ou ka pran. Ki kalité ésa ?
11 Dépi ou rivé vwè ki prensip ki k’ay èvè sitiyasyon a-w, gadé ki diféran chwa ou pé fè (li Filipyen 1:9, 10). Lè ou ni bon jijman, sa ka édé-w imajiné ka ki ké pasé siwvwè ou ka pran tèl ou tèl désizyon. Délè ou ké pé pran désizyon a-w fasilman. Men délè sa ké pi rèd, é a moman-lasa, sé bon jijman ki ké édé-w pran on bon désizyon.
12-13. Si ou ka chèché on travay, kijan bon jijman-la ké édé-w chwazi byen ?
12 Imajiné ou ka chèché on travay pou ba fanmi a-w on dèkwa. Ou ka vin touvé 2 travay, alò ou ka gadé kilès adan yo ki pi entérésan. Pou chak sé travay-lasa, ou ka gadé ka yo ké mandé-w fè, konmen lè fò ou ké fè adan on jouné, é konmen tan sa ké pran-w pou ay travay. Lè ou ka gadé, sé 2 travay-lasa pa ka pozé pon pwoblèm pou on krétyen. É pétèt ou ka touvé kè yonn adan yo pi entérésan, swa parapòt a sa yo ka mandé-w fè la, oben swa parapòt a sa ou ké touché. Men avan ou pran désizyon a-w ni dòt biten pou-w gadé.
13 Pa ègzanp ès lè ou ké lagé an fen a jouné-la ou ké ni tan pran réinyon a-w adan lasanblé a-w ? Ès ou ké ni asé tan pou pran swen a fanmi a-w pou yo kontan é pou lanmityé a yo èvè Jéova rété solid ? Adoré Jéova é pran swen a fanmi a-w, sé sa ki pi enpòwtan é sé asi sa pou-w konsantré-w, olyé ou chèché a gangné plis lajan. Konsa ou ké pran on bon désizyon é Jéova ké béni-y.
14. Si nou ni bon jijman é kè nou enmé lézòt, kijan nou ké aji ?
14 Anplisdisa, lè ou ni bon jijman, sa ka édé-w fè atansyon pou désizyon-la ou ké pran la pa aji asi lézòt, pas ou « vé pa fè ponmoun tribiché » (Filip. 1:10). Sa enpòwtan siwtou lèwvwè ou ni désizyon a pran ki ka konsèwné-w. Sé pé désizyon ki anrapò èvè jan ou ka abiyé oben anrapò èvè istil a-w. Pa ègzanp, pétèt ou ni istil a-w ki ta-w oben ou enmé sèwten istil. Men imajiné kè istil-lasa ka choké moun adan lasanblé-la oben moun ki pa Témwen. Si ou ni bon jijman, sa ké édé-w tchenn kont dè sa yo ka rèsanti. É konm ou ni lanmou, ou ké fè entéré a lézòt pasé avan ta-w é ou ké aji èvè modèsti (1 Kor. 10:23, 24, 32 ; 1 Tim. 2:9, 10). Si nou fè sa, nou ké pran on désizyon ki ka montré kè nou enmé lézòt é kè nou ka rèspèkté-yo.
15. Ki konsèy ki pé itil lèwvwè nou ni on désizyon a pran ki enpòwtan ?
15 Si ou ni on désizyon a pran ki enpòwtan, sonjé sa ou ké ni a fè pou rivé a fè sa ou désidé. Jézi di disip a-y kè avan yo fè on biten fò yo ‘sizé pou kalkilé konmen sa ké kouté-yo’ (Lik 14:28). Alò, avan ou pran désizyon a-w, sa byen kè ou mandé-w konmen tan sa ké pran-w pou-w rivé jous an bout a-y, konmen lajan sa ké kouté-w, é ki éfò sa ké mandé-w. Adan sèwten ka, sa té’é byen kè ou palé èvè fanmi a-w dè sa yochak pé fè pou soutyenn désizyon a-w. Poukwa sé ké on bon biten si ou ka fè sé biten-la nou sòti vwè la ? Pétèt sa ké wouvè zyé a-w asi dé ti biten ou ni a chanjé oben pétèt ou ké rann-vou kont kè sa té’é pibon si ou té ka pran ondòt désizyon. É si ou ka palé èvè fanmi a-w dè pwojé-la ou ni la é si ou ka kouté sa yo ni a di-w asi sa, sa ké ba-yo anvi soutyenn-vou (Pwov. 15:22).
PRAN ON DÉSIZYON KI KÉ MENNÉ BON BITEN
16. Ka ki ké édé-w pran on désizyon ki ké menné bon biten ba-w ? (gadé ti karé-la « Kijan pou-w pran bon désizyon »).
16 Ès ou suiv sé konsèy-la nou sòti vwè la ? Ès ou chèché sé enfòwmasyon-la ou té bizwen la ? Ès ou suiv sé prensip-la ki ké édé-w pran on désizyon ki ké fè Jéova plézi ? Si sé sa ou paré pou pran désizyon a-w. Konnyéla ou pé mandé Jéova édé-w, é pou i fè ansòt pou sa maché ba-w.
17. Pou-w pran dé bon désizyon, ka pou-w fè ?
17 Menmsi ou ja ni lokazyon pran dé bon désizyon an vi a-w, pa jen oubliyé kè a pa pas ou ni entélijans oben kè ou ni èkspéryans kè ou ké rivé pran enki bon désizyon. Ou ké rivé pran dé bon désizyon toutlè, si ou ka fèfon asi Jéova é asi sajès a-y. Sé-y tousèl ki ké ba-w konésans, entélijans é bon jijman ki fyab, pas san sé biten-lasa ou ou pé pa ni vré sajès-la (Pwov. 2:1-5). Ou pé sèten Jéova ké édé-w pran désizyon ki ka fè-y plézi (Sòm 23:2, 3).
KANTIK 28 O Jéova, kimoun ké zanmi a-w ?
