1. Kijan nou pé imité Jéova, Pap’an nou ki plen lanmou ?

JÉOVA enmé-nou onlo toubònman (Jan 3:16). Nou vlé imité Pap’an nou ki plen lanmou. Sé pousa nou ka fè éfò pou « soufrans a lézòt fè-[nou] on biten ». Nou vlé ni « on konpasyon ki plen tandrès » pou toutmoun, siwtou pou « sa ki sé frè é sè an nou adan lafwa ». Anplidisa, nou vlé « ni lanmou pou frè é sè [an nou] » (1 Pyè 3:8 ; Gal. 6:10). Lè ni moun adan fanmi èspirityèl an nou ki adan sitiyasyon ki ka angwasé-yo, nou vlé édé-yo.

2. Dè ki biten nou ké palé adan awtik-lasa ?

² Tousa ki vlé antré adan fanmi a Jéova ké jwenn éprèv ki ké istrésé-yo (Mawk 10:29, 30). Asiré pa pétèt, pi fen a mond-la ké ka pwoché, é pi nou ké jwenn éprèv. Kijan yonn pé édé lòt ? An-nou gadé ka istwa a Lòt, Jòb, é Noémi pé aprann-nou. Nou ké palé osi dè sèwten sitiyasyon difisil frè é sè an nou ka travèsé jòdijou é nou ké vwè kijan nou pé édé-yo.

3. Kon 2 Pyè 2:7, 8 ka montré, ki mové désizyon Lòt pran é ki rézilta sa pòté ?

³ Lòt pran on mové désizyon : i chwazi rété Sodòm, anmitan a enpé moun ki té ni on vyé jan dè vi toubònman (li 2 Pyè 2:7, 8). Réjyon-lasa té ka pwodui onlo, men lè Lòt désidé rété la, sa pwokiré-y onlo dézagréman (Jén. 13:8-13 ; 14:12). Madanm a-y pa obéyi Jéova, pétèt pas i té two enmé vil-lasa oben pas i té two enmé sèwten moun ki té ka rété la. I mò lè Bondyé fè on lapli difé ki té ni souf adan-y tonbé koté-lasa. É sonjé dé fi a Lòt. Yo té fyansé  èvè dé boug Sodòm. Toulédé boug-la mò. Lòt pèd kaz a-y, byen a-y é pli rèd-la, i pèd madanm a-y (Jén. 19:12-14, 17, 26). Pannan péryòd-lasa ki té angwasé Lòt onlo, ès Jéova pèd pasyans èvè-y ? Non.

4. Kijan Jéova aji èvè onlo pasyans épi Lòt ? (gadé imaj-la ki anlè po a jounal-la).

⁴ Menmsi Lòt té chwazi rété Sodòm, Jéova aji èvè konpasyon épi-y lè i voyé dé zanj pou sové-y, li é fanmi a-y. Men olyé i obéyi sé zanj-la ki té ka mandé-y lésé Sodòm vitman, Lòt « té ka tadé ». Sé zanj-la té oblijé tchenbé men a-y é fò-yo té édé, li é fanmi a-y, lésé Sodòm (Jén. 19:15, 16). Aprésa, yo di-y chapé pou ay adan montangn-la. Men olyé i obéyi Jéova, Lòt mandé-y pou i ay adan on piti vil ki té toupré (Jén. 19:17-20). Jéova kouté-y èvè onlo pasyans é i pèwmèt-li alé la i té vlé alé la. Aprésa, Lòt vin pè rété adan vil-lasa é i ay rété adan montangn-la, la Jéova té di-y alé la odépa (Jén. 19:30). Jéova ni bon pasyans toubònman ! Kijan nou pé imité-y ?

5-6. Kijan nou pé apliké 1 Tésalonisyen 5:14 é imité Bondyé ?

⁵ Kon Lòt, on moun adan fanmi èspirityèl an nou pé pran mové désizyon é trapé gwo pwoblèm akòz dè sa. Si on jou sa rivé, kijan nou ké réyaji ? Pétèt kè nou ké anvi di-y kè sé limenm ki chèché bab a-y kifè si sa ka rivé-y. É a pa manti nou té ké manti ba-y (Gal. 6:7). Men, ni on méyè biten nou pé fè. Nou pé imité jan Jéova édé Lòt. Kijan ?

⁶ Si Jéova voyé sé zanj-la owa Lòt, a pa té sèlman pou avèti-y, men sété osi pou édé-y rété vivan lè Jéova té’é détui Sodòm. Menmjan la, pétèt, fò nou ké avèti frè an nou si nou ka santi kè i kay fè on biten ki ké pwokiré-y pwoblèm. Men pétèt osi nou ké pé édé-y. Menmsi i pa ka apliké sé konsèy biblik la kè i ka rèsèvwa la tousuit, fò-nou ni pasyans èvè-y. Fò-nou fè kon sé dé zanj-la. Olyé nou lagé frè an nou é nou pran distans an nou èvè-y, an-nou chèché ki biten itil nou pé fè pou édé-y (1 Jan 3:18). Pétèt kè, adan on sans, fò-nou ké pwopozé-y dè tchenbé men a-y é fò-nou ké édé-y apliké sé bon konsèy-la kè i risivwè la (li 1 Tésalonisyen 5:14).

7. Ka nou pé fè pou nou vwè lézòt kon Jéova té ka vwè Lòt ?

⁷ Jéova té’é pé konsantré-y yenki asi défo a Lòt. Men a pa sa i fè, i pousé lapòt Pyè maké kè sété on nonm ki jis. A pa ti kontan nou kontan Jéova ka pasé si érè an nou ! (Sòm 130:3). Ès nou pé vwè lézòt kon Jéova té ka vwè Lòt ? Si nou ka konsantré-nou asi bèl kalité a frè é sè an nou, sa ké édé-nou ni plis pasyans èvè yo. Sé frè é sè la, a tou a yo, ké aksèpté èd-la nou vlé ba-yo la pli fasilman.

8. Si nou ni konpasyon, kijan nou ké aji ?

⁸ Lòt soufè padavwa i té pran on mové désizyon. Men a pa ka a Jòb. Kanmenmsa, onpakèt gwo malè rivé Jòb : i pèd byen a-y é bèl pozisyon-la i té ni la, é i tonbé malad gravman. Men sa ki té pli rèd-la, sé kè li é madanm a-y pèd tout sé timoun-la yo té ni la. Anplisdisa, ni twa fo-zanmi a Jòb ki vin akizé-y. Poukwa sé swadizan konsolatè-lasa pa aji èvè konpasyon épi Jòb ? On rézon, sé kè yo pa chèché a konprann sitiyasyon a-y vréman ; yo pa ay pli lwen ki sa yo té ka vwè. Sé konsa yo fè-yo on mové lidé asi-y é yo  jijé-y on mannyè ki té rèd. Ka nou pé fè pou nou pa fè menm érè-la ? Sonjé kè sé yenki Jéova ki konnèt sitiyasyon a on moun anplen. Kouté byen sa moun-la ki ka soufè la ka di-w. A pa enki kouté pou-w kouté-y, éséyé rèsanti penn-la i ni an tchè a-y la. Sé enki a moman-lasa ou ké pé montré kè ou ni on konpasyon ki sensè pou frè é sè a-w.

9. Ka nou pé ké fè si nou ni konpasyon, é poukwa ?

⁹ Si nou ka aji èvè konpasyon, lè on moun ni pwoblèm nou pé’é malpalé-y toupatou. On moun ki ka fè sa pa ka fè lasanblé-la vin pli fò ; okontrè, sé dézòd i ka mèt adan-y (Pwov. 20:19 ; Wom. 14:19). Lè i ka fè sa, i pa ka aji èvè bonté. I plito ka aji san réfléchi, é pawòl a-y pé blésé moun-la alòskè i ja ka soufè onlo (Pwov. 12:18 ; Éféz. 4:31, 32). Vométan nou chèché bèl kalité kè on moun ni é éséyé vwè kijan nou pé édé-y adan sé éprèv-la i ka pasé la !

10. Ka pawòl a Jòb ki maké adan Jòb 6:2, 3 ka aprann-nou ?

¹⁰ (Li Jòb 6:2, 3.) Sa rivé kè Jòb « palé san réfléchi ». Men aprésa, i ‘woté’ désèrten biten adan sa i té di (Jòb 42:6). Kon Jòb, on moun ki adan on sitiyasyon ki ka istrésé-y pé rivé a di dé pawòl san fè atansyon é i pé règrété sa pita. Kijan fò-nou réyaji adan on ka konsa ? Olyé nou kritiké-y, nou dwèt ni konpasyon pou-y. Sonjé kè odépa, Jéova pa té prévwa kè lézòm touvé-yo adan pwoblèm ki té’é istrésé-yo. Donk, nou ka konprann kè sa pé rivé kè on sèwvitè fidèl a Jéova di dé biten san réfléchi lè i angwasé. Menmsi i ka di dé biten ki pa vré asi Jéova oben asi nou, fo pa nou monté an présyon two vit, é fo pa nou jijé-y nonplis (Pwov. 19:11).

11. Kijan sé ansyen-la pé imité Éliyou lè yo ka bay konsèy ?

 ¹¹ Délè, on moun ki ka travèsé on boutrèd bizwen yo ba-y désèrten konsèy oben kè yo édé-y korijé jan i ka vwè léchòz (Gal. 6:1). Kijan pou sé ansyen-la fè adan on ka kon sila ? Yo pé imité Éliyou, ki kouté Jòb èvè onlo konpasyon (Jòb 33:6, 7). Sé sèlman apré Éliyou konprann sa Jòb té ka pansé kè i ba Jòb konsèy. Sé ansyen-la ki ka suiv ègzanp a Éliyou ka pran tan kouté on moun ki ni pwoblèm byen menm é yo ka éséyé konprann sitiyasyon a-y. Konsa, lè yo ké ba-y konsèy, yo ké rivé touché tchè a-y pli fasilman.

12. Ka Noémi rèsanti lè mari a-y é dé gason a-y mò ?

¹² Noémi té on madanm ki té enmé Jéova é ki té fidèl a-y. Men apré mari a-y é dé gason a-y mò, i pa té vlé yo kriyé-y « Noémi » ankò. I té ka di : « Kriyé-mwen Mara », kivédi « anmè » (Rit 1:3, 5, 20, nòt, 21). Rit, bèlfi a Noémi, rété ansanm èvè-y pannan tout sé éprèv-la Noémi pasé la. I édé-y on mannyè ki itil, men anplisdisa, i palé ba-y on jan pou pé sa konsolé-y. Rit montré Noémi kè i enmé-y é kè i ka soutyenn-li lè i palé ba-y èvè dé pawòl ki té senp é sensè (Rit 1:16, 17).

13. Poukwa on moun ki pèd mari a-y oben madanm a-y bizwen nou soutyenn-li ?

¹³ Lè on moun adan fanmi èspirityèl an nou ka pèd mari a-y oben madanm a-y, i bizwen nou soutyenn-li. Dé moun-mayé ka touvé-yo kon 2 pyébwa ki ka pousé yonn owa lòt. Piti-a-piti, rasin a yo ka mélanjé. Lè yo ka déchouké yonn adan sé dé pyébwa-la é kè i ka mò, sa pé fè lòt pyébwa-la soufè toubònman. Menmjan-la, lè dé moun mayé, é lènmi an nou lanmò chayé yonn adan yo, sila ki ka rété la pé ka soufè onlo toubònman pannan on bon moman. Paula *, ki pèd mari a-y on mannyè sibit, ka èspliké : « Vi an mwen chalviré, é an santi an pa té pé ankò. An té pèd méyè zanmi an mwen. An té ka palé mari an mwen dè nenpòt biten. I té ka pawtajé jwa kè an té ni é i té ka soutyenn-mwen adan lé mové moman. An té pé pléré asi zépòl a-y. An té vréman ni lenprésyon kè yo té raché on mosò anlè mwen. »

14-15. Kijan nou pé konsolé on moun ki pèd mari a-y oben madanm a-y ?

¹⁴ Kijan nou pé konsolé on moun ki pèd mari a-y oben madanm a-y ? On prèmyé biten enpòwtan nou pé fè, sé palé èvè-y, menmsi nou pa’a santi-nou alèz oben menmsi si nou pa sav ka pou nou di. Paula, nou palé dè-y talè la, di : « An pé konprann kè sa pa toujou fasil dè palé ba on moun ki sòti pèd on moun i té enmé. Sa pé fè-nou pè, pas nou pa anvi di-y on biten pou fè-y lapenn. Men sa ki pli rèd, sé lè ou pa’a tann ayen ditou. » On moun ki andèy sav kè byensouvan, sé moun-la pé ké di-y granjan dè pawòl. Paula ka ajouté : « Sa té ka touché-mwen lèwvwè zanmi an mwen té ka di-mwen tou senplèman : “Sa ka fè-mwen lapenn pou-w !” »

¹⁵ William pèd madanm a-y ni kèlkè lanné dè sa. Mi sa i ka di : « An byen enmé lè lézòt ka palé-mwen dè madanm an mwen é kè yo ka rakonté-mwen lé bon moman yo pasé èvè-y. Sa ka fè-mwen  dibyen dè sav kè yo té enmé ti madanm an mwen é kè yo té ka rèspèkté-y. Jan-la yo ka ankourajé-mwen la ka édé-mwen toubònman. Sa ka rann tchè an mwen kontan, padavwa an té enmé madanm an mwen onlo é kè i té ni on gran plas an vi an mwen toubònman. » Bianca, on sè ki vèv, ka èspliké : « Lè yo ka priyé èvè mwen é yo ka li yonndé vèwsé ban mwen, sa ka rékonfòwté-mwen. É lè an ka tann dòt moun palé dè mari an mwen oben lè yo ka kouté-mwen lè an ka palé dè-y, sa ka édé-mwen onlo osi. »

16. a) Ki kalté èd nou pé pòté pou on moun ki pèd on moun i té enmé ? b) Sèlon Jak 1:27, ki rèsponsabilité nou ni ?

¹⁶ Menmjan Rit rété toupré Noémi, a pa dé jou tousèl pou nou édé on moun ki pèd on moun i té enmé. Paula, nou palé dè-y talè la, ka rakonté : « Tousuit apré mari an mwen mò, yo soutyenn-mwen onlo. Piti-a-piti, vi a lézòt wouvin kon avan. Men pawkont vi an mwen té chouboulé a san pou san. Sa ka édé-w vréman lèwvwè lézòt ka konprann kè on moun ki andèy bizwen yo soutyenn-li pannan plizyè mwa é menm plizyè lanné. » Chakmoun diféran, sa sèten. Ni sèwten moun ki ka adapté-yo a nouvo sitiyasyon a yo asé rapidman. Men ni dòt, chaklè yo fè on biten yo té ka fè èvè mari a yo oben madanm a yo, sa ka fè-yo sonjé kè moun-la pa la ankò, é sa ka fè-yo lapenn. Toutmoun pa’a viv on dèy menmjan la. Fò-nou sonjé kè Jéova ka fè-nou on bèl lonnè lè i ka ban-nou rèsponsabilité-la  dè okipé-nou dè sa ki pèd mari a yo oben madanm a yo (li Jak 1:27).

17. Poukwa sa ki pèd mari a yo oben madanm a yo bizwen nou soutyenn-yo ?

¹⁷ Ni désèrten moun ki ka angwasé é ki ka istrésé onlo toubònman padavwa mari a yo oben madanm a yo lésé-yo. Mari a Joyce pati èvè ondòt madanm. Mi sa Joyce ka di : « Divòs an nou fè-mwen soufè onlo. An ni lenprésyon kè si mari an mwen té mò, an té’é soufè mwens. Si i té mò akòz dè on aksidan oben dè on maladi, a pa té’é fòt a-y. Men la, sé-y ki té chwazi dè lésé-mwen. An santi konsi sé méprizé yo té ka méprizé-mwen. »

18. Kijan nou pé édé on moun ki pa ni mari oben ki pa ni madanm ankò ?

¹⁸ Lè nou ka fè on ti jès plen jantiyès ba sa ki pèd mari a yo oben madanm a yo oben ba sa mari a yo oben madanm a yo lésé-yo, nou ka fè-yo sonjé kè nou enmé-yo. Sé alè yo bizwen ni vré zanmi akoté a yo (Pwov. 17:17). Kijan ou pé montré kè ou sé on vré zanmi ? Ou pé envité frè a-w oben sè a-w manjé on ti biten tou senp èvè-w. Ou pé pwopozé-y dè ay drivé oben dè préché èvè-w. Oben ou pé envité-y dè tanzantan a vin adan étid familyal a-w. Si ou fè sa, ou ké fè Jéova plézi, pas i « toupré a sa tchè a yo fann » é i sé « sila ki ka pwotéjé sé vèv-la » (Sòm 34:18 ; 68:5).

19. Dapré 1 Pyè 3:8, ki biten ou byen désidé a fè ?

¹⁹ Talè, lè wayòm a Bondyé ké dirijé latè, « nou pé ké sonjé détrès ki ja pasé ». A pa ti anvi nou anvi viv épòk-lasa : lè « nou pé ké sonjé biten ki ja pasé » é lè « yo pé ké malmenné tchè an nou ankò » (Iz. 65:16, 17). Annatandan, an-nou soutyenn-nou yonn lòt é an-nou montré, ki sé èvè pawòl an nou, ki sé èvè sa nou ka fè, kè nou enmé toutmoun ki adan fanmi èspirityèl an nou (li 1 Pyè 3:8).