1. Poukwa Jéova ka konparé-y a on manman ki ka ba timoun a-y tété ?

« ÈS ON madanm pé oubliyé tibébé a-y ? » An tan a Izayi, Jéova pozé pèp a-y kèsyon-lasa. Aprésa, mi sa i ajouté : « Menmsi ou vwè sé madanm-lasa té’é oubliyé, mwen, an pé’é jen oubliyé-w. » (Iz. 49:15). Adan ègzanp-lasa, Jéova ka konparé-y a on manman. A pa on biten i ka fè souvan. Men la, i ka palé dè sa ki ka pasé ant on manman é timoun a-y pou montré jan i enmé sèwvitè a-y. Nou sèten kè prèstout manman ké dakò èvè sa Jasmine * di : « Lè on manman ka ba timoun a-y tété, sa ka soudé-yo on mannyè ki vréman èspésyal. É sé on biten ki ka diré pou touttan. »

2. Ka Jéova ka rèsanti lèwvwè on timoun a-y ka lésé-y tonbé ?

² Lèwvwè on timoun a-y pa’a vin réinyon oben pa’a préché ankò, Jéova ka rann-li kont dè sa. Nou ka tou konprann jan sa ka fè-y lapenn lè i ka vwè kè ni onpakèt sèwvitè a-y ki ka vin inaktif * chak lanné !

3. Ka Jéova vé ?

³ Ni onlo frè é sè ki té inaktif ki ka woukoumansé vin lasal é ki ka woukoumansé préché osi. A pa ti kontan nou kontan vwè-yo ! (1 Pyè 2:25). Kijan nou pé édé-yo ? Avan nou réponn a kèsyon-lasa, an-nou vwè poukwa sèwten frè é sè ka arété vin an réinyon é ka arété préché.

4. Ka i ka rivé sèwten krétyen akòz dè travay a yo ?

⁴ Ni sèwten krétyen ki ka fè travay a yo pasé avan toutbiten. Hung sé on frè ki ka viv an Azi. Mi sa limenm ka di : « An té ka pasé twòp tan an travay an mwen é an té ka lasi kò an mwen an travay-la. An té ka konpranndèdi kè si an té ni plis lajan, an té’é pé sèvi Jéova pli fasilman. Lidé-lasa té sòt toubònman. É malérèzman, an mèt-mwen ka travay plis é piti-a-piti an koumansé ka raté réinyon é anfinaldikont an arété ay lasal. An ni lenprésyon kè mond-lasa fèt pou fè-w lagé Jéova piti-a-piti. »

5. On sè té ka jwenn pwoblèm si pwoblèm. Kijan i réyaji ?

⁵ Ni sèwten frè é sè ki ka néyé anba pwoblèm. Àn, sé on sè ki ka viv an Anglètè é ki ni 5 timoun. Mi sa i ka di : « Dènyé timoun an mwen fèt enfim. Aprésa, yo èskominyé on fi an mwen é ni on gason an mwen ki touvé-y malad an tèt. Tèlman tchè an mwen té an bobo, an arété vin réinyon é an arété préché osi. Anfinaldikont, an vin inaktif. » Sa ka fè-nou lapenn pou Àn é fanmi a-y kon sa ka fè-nou lapenn osi pou dòt frè é sè ki ka jwenn sé pwoblèm-lasa.

6. Kijan on moun pé rivé a lagé pèp a Jéova si i pa’a apliké Kolosyen 3:13 ?

⁶ (Li Kolosyen 3:13.) Défwa nou pé touvé-nou égri pas on frè oben on sè fè dé biten ki fè-nou mal. Lapòt Pòl admèt kè, déparfwa, nou pé rivé a plenn-nou akòz dè on frè oben dè on sè é sé pé pou on bon rézon. Pétèt kè yo mal aji èvè nou é kè nou pa’a touvé sa jis. Si nou pa fè atansyon, nou pé jous rivé a ni rankin an tchè an nou. Sé konsa déotwa touvé-yo tèlman dégouté kè yo désidé kè yo vé pa ni ayen a fè èvè Témwen a Jéova ankò. An-nou pran ègzanp a Pablo, on frè ki ka viv an Amérik di Sid. Yo manti anlè-y é akòz dè sa, i pèd rèsponsabilité i té ni adan lasanblé-la. Kijan i réyaji ? Mi sa i ka di : « An té kòlè é piti-a-piti, an koumansé lagé lasanblé-la. »

7. Lè konsyans a on moun ka bat-li, ka ki pé rivé a fèt ?

⁷ Men, menmsi ja ni bon tibwen tan on moun fè on péché ki grav, konsyans a-y pé ka bat-li jousalè. I pé mèt an tèt a-y kè Bondyé pa enmé-y ankò. I ja rèpanti-y é i ja mandé Bondyé padon, men magrésa, i ka èstimé kè i pa ni plas a-y an pèp a Bondyé ankò. Sé sa on frè non a-y sé Francisco té ka pansé. Mi sa i ka di : « An fè on péché sèksyèl, kifè, yo ban-mwen on disiplin. Odépa an kontinyé ay réinyon, men moral an mwen té a zéwo é an té ka santi kè an pa té ni plas an mwen an pèp a Bondyé ankò. An tèt an mwen an té koupab. An té sèten kè Jéova pa té padonné-mwen. É piti-a-piti, an arété ay réinyon é an arété préché osi. » Lè ou ka jwenn dé moun ki adan dé sitiyasyon kon sila, ka ou ka rèsanti ? Ès ou ka mété-w a plas a yo ? É on kèsyon ki pi enpòwtan ankò sé : ka Jéova ka rèsanti pou yo ?

8. Ès Jéova ka oubliyé moun ki té ka sèvi-y avan ? Bay on ti èsplikasyon.

⁸ Jéova pa ka oubliyé moun ki té ka sèvi-y avan, men ki pa’a frékanté pèp a-y ankò. I pa’a oubliyé tousa yo fè pou-y nonplis (Ébr. 6:10). Pwofèt Izayi sèvi èvè on ègzanp ki ka touché-nou pou montré kijan Bondyé ka pran swen a sèwvitè a-y.  Mi sa i maké : « I ké pran swen a twoupo a-y menmjan ki on bèwjé. I ké sanblé sé timouton-la èvè bra a-y é i ké mété-yo asi lèstonmak a-y pou i chayé-yo » (Iz. 40:11). Ka Jéova, Gran Bèwjé-la, ka rèsanti lè on sèwvitè a-y ka arété sèvi-y ? Jézi réponn a kèsyon-lasa, lè i di disip a-y : « Ka zò ka di ? Si on boug ni 100 timouton é kè yonn adan yo pèd, ès i pé’é lésé sé 99 la an montangn-la pou i ay chèché sila ki pèd la ? É siwvwè i touvé-y, i ké pi kontan davwa i touvé-y ki davwa sélézòt 99 la pa pèd » (Mat. 18:12, 13).

9. Kijan on bon bèwjé ka aji èvè timouton a-y ? (gadé imaj-la ki anlè po a jounal-la).

⁹ Poukwa nou pé konparé Jéova èvè on bèwjé ? Pas on bon bèwjé ka pran swen a timouton a-y byen. Pa ègzanp, David goumé èvè on liyon é èvè on lous pou i té pwotéjé twoupo a-y (1 Sam. 17:34, 35). Menm lè sé yenki on timouton ki té disparèt, on bon bèwjé té ka vwè sa (Jan 10:3, 14). Si i té ni 100 timouton é kè yonn pawmi yo té ka pèd, i té ka mèt sé 99 la ansékirité adan on pak oben i té ka mandé dòt bèwjé véyé-yo pou-y, é i té ka pati chèché mouton-la ki pèd la. Jézi sèvi èvè ègzanp-lasa pou aprann-nou on vérité ki enpòwtan : « Pap’an mwen ki an syèl-la vé pa ponyonn adan sé piti-lasa mò » (Mat. 18:14).

10. Sèlon Ézékyèl 34:11-16, ka Jéova pwomèt i ké fè pou timouton a-y ki pèd ?

¹⁰ Jéova enmé nouchak. I enmé sé « piti »-la ki pa’a maché èvè twoupo-la osi. Jéova sèvi èvè pwofèt Ézékyèl pou i té fè on pwomès. I pwomèt kè i té ay chèché tout timouton a-y ki pèd é kè i té’é édé-yo wouvin bon bon zanmi èvè-y. I èspliké sa i té’é fè ègzaktèman pou sové-yo. An réyalité, i té’é aji menmjan ki on bon bèwjé izraélit ki pèd on timouton a-y (li Ézékyèl 34:11-16). Prèmyèwman, on bèwjé té k’ay chèché  timouton a-y é défwa, sa té ka mandé-y onlo tan é onlo éfò. É dépi ou vwè i té touvé-y, i té ka menné-y viré an twoupo-la. É si bèt-la té blésé oben i té fen, i té ka okipé dè-y èvè onlo lanmou. Konm ti bèt-la té fèb, i té ka pran swen a-y : i té ka pansé bobo a-y, i té ka chayé-y asi zépòl a-y oben an dé bra a-y é i té ka ba-y manjé. Sé ansyen-la ki adan lasanblé-la, sé bèwjé a « twoupo a Bondyé » (1 Pyè 5:2, 3). Si on timouton pa’a maché èvè lasanblé-la ankò, fò sé bèwjé-la ay chèché-y, fò-yo édé-y viré an twoupo-la é fò-yo montré-y kè yo enmé-y. É lanmou-lasa ké pousé-yo édé-y pou i wouvin zanmi èvè Jéova *.

11. Ka on bon bèwjé té sav byen ?

¹¹ On bon bèwjé té sav kè on timouton té’é pé rivé a pèd li. É lèwvwè on timouton té ka kité twoupo-la, bèwjé-la pa té ka pini-y. An-nou vwè ki ègzanp Jéova lésé ban-nou lèwvwè sèwten sèwvitè a-y arété maché èvè-y pannan on ti moman.

12. Kijan Jéova aji èvè Jonas ?

¹² Pwofèt Jonas pa kouté Jéova é i pa ay Niniv kon Jéova té mandé-y. Men Jéova pa lagé-y. I aji èvè-y kon on bon bèwjé ka fè. I woté-y adan sitiyasyon-la i té yé la é i ba-y fòs pou i té pé sa akonpli misyon a-y (Jonas 2:7 ; 3:1, 2). Tibwen tan apré, i sèvi èvè on plant pou i té fè Jonas konprann kè chakmoun asi Latè ni onlo valè pou-y (Jonas 4:10, 11). Ka sa ka aprann-nou ? Fò pa sé ansyen-la lagé on moun ki inaktif. Olyé dè sa, fò-yo éséyé konprann poukwa moun-la pa’a maché èvè twoupo-la ankò. É lè timouton-lasa ka wouvin an bra a Jéova, fò-yo kontinyé montré-y kè yo enmé-y é kè yo ka konsidéré-y.

13. Lè Jéova tann sa nonm-la ki maké Sòm 73 la di, kijan i réyaji ?

¹³ Nonm-la ki ékri Sòm 73 la té dékourajé toubònman lè i vwè jan sé méchan-la  té alèz a yo. I té ka mandé-y si sa ka vo lapenn dè fè volonté a Bondyé (Sòm 73:12, 13, 16). Kijan Jéova réyaji ? I pa kondanné nonm-la. An réyalité, Jéova té vé yo maké pawòl a sèwvitè a-y an Bib-la. Anfinaldikont, nonm-la ki maké Sòm-lasa konprann kè sa pou on nonm fè pasé an prèmyé an vi a-y sé lanmityé a-y èvè Jéova (Sòm 73:23, 24, 26, 28). Ka sa ka aprann-nou ? Si on moun ni lenprésyon kè lè ou ka sèvi Jéova ou pa ni pon entéré adan sa, fò pa sé ansyen-la jijé-y two vit. Olyé yo kondanné-y, fò-yo éséyé konprann poukwa i ka rézonné konsa é poukwa i ka aji kon i ka fè la. Sé yenki apré yo fè sa, yo ké pé sèvi èvè Labib pou ankourajé-y.

14. Poukwa Éli té bizwen on èd, é ka Jéova fè pou i té édé-y ?

¹⁴ Pwofèt Éli ay kaché kò a-y pou rèn Jézabèl pa té tchouyé-y (1 Wa 19:1-3). I té ka konpranndèdi kè sé-y tousèl ki té ka sèvi Jéova antankè pwofèt é kè tousa i té fè avan té initil. Tèlman i té dékourajé i té préféré mò pito (1 Wa 19:4, 10). Men olyé Jéova té kondanné-y, i fè-y sav kè a pa li tousèl ki té ka sèvi-y é sa konsolé-y. I fè-y sav osi kè i té pé konté asi-y pou ba-y fòs-la i bizwen la é kè i té ni onlo travay a ba-y fè ankò (1 Wa 19:11-16, 18). Ka sa ka aprann-nou ? Fò noutout, siwtou sé ansyen-la, pran swen a timouton a Jéova èvè onlo bonté. Si on moun ka di sé ansyen-la kè i kòlè oben si i ni  lenprésyon kè Bondyé pé’é jen padonné-y, sé ansyen-la ké lésé-y di sa i ni an fon a tchè a-y é yo ké pran tan kouté-y byen. Aprésa, yo ké édé-y konprann kè Jéova enmé-y.

15. Dapré sa Jan 6:39 ka di, kijan Jézi té ka konsidéré timouton a Pap’a-y ?

¹⁵ Lè on timouton a Jéova pèd, kijan Jéova vé nou konsidéré-y ? Jézi ban-nou on bèl ègzanp an domenn-lasa. Jézi té sav kè Jéova ka ba tout timouton a-y onlo valè. Sé pousa i fè tousa i té pé pou édé tout ‘timouton a nasyon a Izrayèl ki té pèd’ viré owa Jéova (Mat. 15:24 ; Lik 19:9, 10). Konm Jézi sé bon bèwjé-la, i fè tousa i té pé pou i pa té pèd pon timouton a Jéova (li Jan 6:39).

16-17. Ka pou sé ansyen-la pa jen oubliyé si yo vé édé on moun ki pa’a maché èvè pèp a Jéova ankò ? (gadé ti karé-la «  Sa on timouton ki pèd ka rèsanti »).

¹⁶ Adan lasanblé a Éfèz, té ni déotwa ansyen. Lapòt Pòl ankourajé-yo a pran ègzanp asi Jézi. Mi sa i di-yo : « Fò-zòt édé séla ki fèb la é fò-zòt sonjé sa Jézi, Ségnè-la, limenm a-y té di : “On moun ka pli kontan lè i ka bay ki lè i ka rèsèvwa” » (Akt 20:17, 35). Vèwsé-lasa ka montré, on mannyè ki klè, kè sé ansyen-la ni on gwo rèsponsabilité toubònman. Salvador sé on ansyen ki ka viv an Èspagn. Mi sa i ka èspliké : « Lè an ka sonjé jan Jéova enmé timouton a-y ki pèd, sa ka ban-mwen anvi fè tousa an pé mwen édé-yo. Konm an sé on bèwjé, fò-mwen pran swen a yo. An sav kè sé sa Jéova vé an fè. »

¹⁷ Adan awtik-lasa, nou palé dè déotwa frè é sè ki té inaktif é ki wouvin an bra a Jéova grasa èd-la yo rèsèvwa la. Men jousalè, ka rété onlo ki anvi wouvin osi. Adan awtik-la ki ka vin la, nou ké vwè ka nou pé fè pou édé-yo wouvin an bra a Jéova.