JÉOVA ka dirijé pèp a-y é i ka bay sa i bizwen pou i pé sa rété bon bon zanmi èvè-y « pannan sé dènyé jou-la ». Nou sèten dè sa ! (2 Tim. 3:1). Men fò nou suiv dirèksyon-la i ka ban-nou la. Nou pé konparé sitiyasyon an nou èvè ta sé Izraélit-la lè yo té an dézè-la. Lè sé prèt-la té ka sonné twonpèt, fò-yo té mèt-yo an mouvman.

Jéova té mandé Moyiz fè 2 twonpèt an awjan kè yo té travay èvè on mawto ‘pou konvoké tout pèp-la é pou fè-yo sav kè fò-yo té maré paké a yo pou yo té déplasé’ (Nonb 10:2). Sèlon jan sé prèt-la té ka sonné twonpèt-la, pèp-la té ka sav ka pou i fè (Nonb 10:3-8). Jòdijou, Jéova ka gidé pèp a-y menmjan-la ; é i ka fè-y an plizyè fason diféran. Adan awtik-lasa, nou ké palé dè 3 mwayen Jéova ka itilizé pou dirijé pèp a-y é nou ké konparé-yo èvè sé koud twonpèt-la ki té ka fèt an tan a Izrayèl. Sé 3 mwayen-lasa ka korèsponn èvè 3 biten Jéova ka fè jòdijou : i ka envité-nou lasanblé oben pou on évènman èspésyal, i ka fòwmé sé ansyen-la é délè i ka ban-nou on nouvo dirèksyon.

Lè Jéova té vé kè « tout pèp-la » sanblé douvan antré a tabèwnak-la, ki té a lès, sé prèt-la té ka fè toulédé twonpèt-la sonné (Nonb 10:3). Tout sé tribi-la té séparé an 4, yo té ka kanpé alantou a tabèwnak-la é yotout té pé tann koud twonpèt-lasa. Moun ki té ka rété toupré antré a tabèwnak-la té pé rivé tousuit. Pawkont, moun ki té ka rété pli lwen té ka pran plis tan é té ka fè plis éfò pou yo té rivé. Men kèlkèswa la yo té ka rété, Jéova té vlé kè yotout sanblé pou yo té tann sa i té vlé yo fè.

Jòdijou, Bondyé pa ka mandé-nou sanblé douvan on tabèwnak ankò. Men jousalè, i ka ankourajé-nou a rasanblé-nou, pa ègzanp lè ni on lasanblé réjyonal oben on réinyon èspésyal. Pannan sé évènman-lasa, yo ka anségné-nou é yo ka ban-nou dé bèl ti konsèy. Toupatou si latè nou ka bénéfisyé dè menm pwogram-la. Touséla ki ka aksèpté envitasyon-lasa ni tchè-kontan toubònman pas yo ka touvé-yo èvè moun ki ka adoré Bondyé kon yomenm. Ni sèwten adan yo ki ka fè plis chimen ki dòt pou yo vin adan sé lasanblé-lasa. Men kèlkèswa, yotout kontan paskè yo fè tousa yo té pé pou vin.

É si ni dé frè é sè ki ka rété two lwen a sé gran lasanblé-lasa, kijan yo ka fè ? Konm alèkilé, ni onpakèt zouti ki ka pèwmèt frè é sè an nou bénéfisyé dè pwogram-la menmsi yo lwen, nou ka sèvi èvè sé mwayen-lasa. Konsa, yo jous ni lenprésyon kè yo sizé ansanm èvè nou. Pa ègzanp, o Bénen, pou vizit a rèprézantan a biwo mondyal la, filyal-la òwganizé on réinyon èspésyal é yo montré pwogram-lasa anmenmtan o Nijè adan on vil yo ka kriyé Arlit. Vil-lasa ka touvé-y o Saara é sé on koté ni onpakèt moun ka travay adan  min. Jou-lasa ni 21 moun ki suiv pwogram-lasa. Pawmi yo té ni 5 Témwen a Jéova é rèstan-la té ka étidyé Labib. Menmsi yo té a plizyè santenn kilomèt dè sé 44 131 moun-la ki té o Bénen, sé konsi yo té sizé èvè yo. Mi sa on frè maké : « Nou ka di-zòt mèsi, mèsi anpil, pas zò pèwmèt-nou suiv pwogram-lasa. Sa ka montré zò enmé-nou fò toubònman ! »

An Izrayèl, lèwvwè prèt-la té ka fè onsèl twonpèt sonné, ‘sé yenki sé chèf-la ki té antèt a on gwoup ki té ni 1000 Izraélit adan-y’ ki té k’ay douvan tabèwnak-la (Nonb 10:4). Moyiz té ka ba-yo sèwten enfòwmasyon é i té ka fòwmé-yo pou yo té fè travay-la yo té ni a fè la adan tribi a yo. Si ou té chèf a épòk-lasa, sèten ou té’é fè tousa ou pé pou ay an réinyon-lasa é pou trapé fòwmasyon-lasa !

Jòdijou, adan sé lasanblé-la pa ni « chèf ». Bondyé ba sé ansyen-la okipé dè twoupo a-y men apapousa yo ka komandé-y konsi sé ta yo (1 Pyè 5:1-3). Yo ka fè tousa yo pé pou pran swen a-y byen. Sé pousa, lè yo ka pwopozé-yo ay adan on fòwmasyon kon Lékòl pou ministè a Wayòm-la, a pa ti kontan yo ka kontan ! Lékòl-lasa ka édé-yo pran swen a lasanblé-la pibyen. É grasa fòwmasyon-lasa, sé ansyen-la é toutmoun ki an lasanblé-la ka vin pibon zanmi èvè Jéova. Menmsi ou po’o jen ay an lékòl-lasa, vou osi ou ka bénéfisyé dè-y pas sé ansyen-la ka sèvi èvè sa yo aprann pou édé lasanblé-la.

Pawfwa, sé prèt Izraélit la té ka fè twonpèt-la fè plizyè son diféran. Sé koud twonpèt-lasa té ka fè pèp-la sav kè fò yo té maré paké a yo pou yo té déplasé (Nonb 10:5, 6). Yo pa té ka déplasé anpangal, é nou ka tou konprann kè pou chak fanmi, a pa té on ti afè ! Pawfwa, sèwten Izraélit pa dwèt té anvi ay ondòt koté. Poukwa ?

Pétèt yo té ka touvé kè sé twonpèt-la té ka sonné tibwen twòp é byensouvan lè yo té ka sonné yo pa té ka atann-yo a sa. Mi sa Labib ka di : « Touttan ou vwè niyaj-la té ka rété anlè tabèwnak-la, sé Izraélit-la pa té ka déplasé. » Men ‘pawfwa, lèswa-la, niyaj-la té la é lèlandèmen maten i pa té la ankò’. É délè, i té ka rété « 2 jou, on mwa oben pi lontan ankò » (Nonb 9:21, 22). É konmen fwa yo déplasé kan-la ? Adan Nonb chapit 33, yo ka di-nou kè sé Izraélit-la kanpé 40 koté diféran.

Pawfwa, sèwten Izraélit té ka touvé on ti koté ki té ni on ti lonbraj. Nou ka tou konprann kè sa té ka tonbé byen pas yo té adan ‘on sakré dézè ki té ka ba moun anvi pran pyé a kouri a yo !’ (Dét. 1:19). Kifè, yo té’é pé rivé a pansé kè si yo ka chanjé koté, yo pa té’é alèz a yo kon la yo yé konnyéla.

Lè sé tribi-la té ka déplasé, pétèt kè ni sèwten pawmi yo ki té ni dimal a atann tou a yo. Yotout té ka tann koud twonpèt-la, men yotout pa té pé pati anmenmtan. 1^é koud twonpèt la té vé di kè fò Jida, Isaka é Zabilon té koumansé déplasé. Sé sé 3 tribi-lasa ki té ka kanpé a lès (Nonb 2:3-7 ; 10:5, 6). Apré sé tribi-lasa pati, sé prèt-la té ka sonné on 2^èm koud twonpèt é a moman-lasa, sé sé 3 tribi-la ki té ka kanpé o Sid ki té dwèt déplasé. Sé prèt-la té ka fè sa joustan tout pèp-la té pati.

Ès ou té ni dimal a aksèpté sèwten chanjman kè lòwganizasyon fè ? Pétèt ou touvé kè ni tibwen twòp chanjman é ou pa té ka atann-vou a sa. Oben ou té byen kontan sa i té ja la é ou té’é préféré sa rété konsa touttan. Kèlkanswa, pétèt ou santi kè pou aksèpté tout sé chanjman-lasa, fò ou té’é ni onlo pasyans. É pétèt osi ou pran onlo tan pou té fè kò èvè sé chanjman-lasa. Antouka, si nou ka fè éfò pou réyaji byen lè ni on chanjman, sèten nou ké ni lokazyon konstaté kè Bondyé ka béni-nou.

An tan a Moyiz, Jéova gidé plizyè milyon moun an dézè-la é pawmi yo té ni misyé, madanm é timoun. Siwvwè Jéova pa té ka gidé pèp a-y èvè onlo lanmou, yotout té’é mò an dézè-la. Jòdijou, nou ka viv dènyé jou a sistèm-lasa. Kifè, Jéova ka ban-nou konsèy pou nou rété bon bon zanmi èvè-y é pou fwa an nou toujou rété fò. Kidonk, fò noutout byen désidé a kouté Jéova menmjan ki sé Izraélit-la ki té ka mèt-yo an mouvman lèwvwè yo té ka tann koud twonpèt a sé prèt-la !