1. Disip a Jézi mandé on gwo foulmoun fè on biten. Ki biten ésa ?

 TÉ NI on gwo foulmoun ki vin Jérizalèm é pawmi yo té ni misyé é madanm. Sé moun-lasa té sòti adan diféran péyi é yochak té ka palé lang a péyi a yo. Lèwgadé, on biten èstraòwdinè fèt. Sèwten Juif enn mété-yo ka palé adan lang a sé moun-lasa ! Lèwvwè sé moun-la vwè sa, yo touvé sa fò. Men anplisdisa, sa sé Juif-la té ka di-yo la é sa Pyè té ka èspliké-yo siwprann-yo plis ankò. Pa ègzanp, sé moun-la aprann kè Bondyé pé sové-yo si yo ni fwa adan Jézikris. Sa touché-yo tèlman kè yo mandé : « Ka pou nou fè ? » Mi sa Pyè réponn-yo : « Fò zòchak pran lèbatèm » (Akt 2:37, 38).

2. Ka nou ké vwè adan awtik-lasa ? (gadé foto-la ki anlè po a jounal-la).

² Aprésa, on biten èstraòwdinè fèt. Apépré 3 000 moun pran lèbatèm é yo vin disip a Kris. Sé konsa travay a prédikasyon-la Jézi té mandé disip a-y fè la koumansé. É jousalè travay-lasa ka kontinyé toujou. Nou ka tou konprann kè jòdijou, nou pé pa enn palé ba on moun pou an dé tan twa mouvman moun-la paré pou pran lèbatèm. Délè, sa pé pran plizyè mwa, on lanné oben plis pou moun-la rivé a pran lèbatèm. Si ou ka étidyé Labib èvè on moun konnyéla la, sèten ou sav kè pou fè on disip sa ka mandé onlo éfò toubònman. Adan awtik-lasa, nou ké vwè ka ou pé fè pou édé moun-la ou ka étidyé Labib èvè-y la pran lèbatèm.

3. Dapré Matyé 28:19, 20, ka fò on étidyan fè pou i pwogrésé pou pran lèbatèm ?

³ Avan on étidyan pran lèbatèm, fò i ja ka mèt sa Labib ka anségné an pratik an vi a-y (li Matyé 28:19, 20). Jézi sèvi èvè on ègzanp pou montré kè on « moun ki saj » ka  fouyé fon pou konstwi kaz a-y anlè wòch-la. Si on étidyan ka mèt sa i ka aprann an pratik, i ké vin kon moun-lasa (Mat. 7:24, 25 ; Lik 6:47, 48). Kijan nou pé édé on étidyan mèt sa i ka aprann an pratik ? An-nou vwè twa biten nou pé fè.

4. Kijan nou pé édé on étidyan pwogrésé akontinyé pou i pran lèbatèm ? (gadé ti karé-la «  Édé étidyan a-w vwè ki òbjèktif i pé ni é kijan i pé atenn-yo »).

⁴ Édé étidyan a-w vwè ki òbjèktif i té’é pé ni. Poukwa sa enpòwtan ké ou fè sa ? An-nou pran on ègzanp : imajiné ou bizwen ay on koté an vwati, men pou ay la fò ou woulé onlo onlo onlo. Pétèt kè si ou fè tout chimen-la onsèl kou, ou ké touvé sa rèd é sa pé rivé a dékourajé-w. Men si dè tanzantan ou ka arété-w pou gadé dé bèl ti koté ki òbò chimen-la, sèten sa ké pi fasil pou-w dè fè vwayaj-lasa. Menmjan-la, si on moun ki ka étidyé Labib ni dé ti òbjèktif é kè i ka rivé atenn-yo piti-a-piti, sèten i ké rann-li kont kè i ké rivé pran lèbatèm osi. Pou édé étidyan a-w pwogrésé, ou pé sèvi èvè ti karé-la « On biten ou pé éséyé fè » ki adan liv-la Tchè-kontan pou touttan ! An fen a chak lèson, ou ka touvé on òbjèktif. Diskité èvè étidyan-la pou vwè kijan i pé mèt sa i ka aprann an pratik grasa òbjèktif-lasa. Si ou vwè kè étidyan-la pé ni ondòt òbjèktif, ou pé maké-y adan ti karé-la « Ondòt biten ou pé fè ». Ni sèwten òbjèktif kè étidyan-la ké rivé atenn pli fasilman é ni dòt sa ké pran plis tan. Alò, pran labitid sèvi èvè sé ti karé-lasa pou diskité èvè étidyan a-w dè tout sé òbjèktif-lasa.

5. Dapré Mawk 10:17-22, ki konsèy Jézi ba boug rich la, é poukwa i fè sa ?

⁵ Édé étidyan a-w fè chanjman an vi a-y (li Mawk 10:17-22). Jézi té sav kè sa té’é difisil pou on moun rich dè vann tousa i ni (Mawk 10:23). Men poutan lè boug  rich la vin pozé-y kèsyon, sé konsèy-lasa i ba-y. Poukwa Jézi mandé-y fè on gwo chanjman konsa ? Pas i té enmé-y. Délè, sa pé rivé kè nou pa ka ankourajé on étidyan a fè sèwten chanjman an vi a-y pas pou nou i po’o paré a fè sé chanjman-lasa. Sé vré, pou on moun pèd mové labitid kè i ni é pou i mèt nouvo pèwsonalité-la anlè-y, sa pé pran tibwen tan (Kol. 3:9, 10). Men fò ou palé franchman ba étidyan-la dè sé chanjman-la i ni a fè la. É pi ou ké fè sa bonnè, pi i ké pwogrésé vit. Lè ou ka palé èvè étidyan-la konsa, ou ka montré-y kè ou ka sousyé-w dè-y (Sòm 141:5 ; Pwov. 27:17).

6. Poukwa sa enpòwtan kè ou pozé étidyan a-w kèsyon pou sav sa i ka pansé ?

⁶ Lè zò ka palé dè on sijé, sa enpòwtan kè ou pozé étidyan a-w kèsyon pou sav sa i ka pansé vréman. Sa ké édé-w vwè si i ka konprann sa i ka aprann é ou ké sav osi adan ki biten i ka kwè. Si nou ni labitid palé franchman èvè étidyan-la, nou ké pé palé èvè-y pli fasilman dè sijé ki difisil pou-y. Adan liv-la Tchè-kontan pou touttan ! nou ka touvé onlo kèsyon pou édé étidyan-la di sa i ka pansé. Pa ègzanp, adan lèson 4 la nou ka touvé kèsyon-la : « Sèlon vou, ka Jéova ka rèsanti lè ou ka sèvi èvè non a-y ? » Oben adan lèson 9 la ni kèsyon-la : « Ka ou té’é enmé mandé Bondyé adan priyè a-w ? » Pétèt kè odépa, étidyan-la ké ni dimal a réponn a sé kèsyon-lasa. Fò ou ké ba-y tibwen tan pou i réponn. Ou ké pé édé-y di sa i ka pansé si ou ka aprann-li rézonné asi sé vèwsé-la ki k’ay èvè sé paragraf-la é asi sé imaj-la.

7. Kijan nou pé sèvi èvè ègzanp a frè é sè an nou pou édé étidyan-la ?

⁷ Lè ou ka rann-vou kont kè étidyan-la byen konprann sa i dwètèt fè, pétèt ou pé sèvi èvè ègzanp a frè é sè an nou pou ankourajé-y fè sé chanjman-la i ni a fè la. Adan sé pawti-la « An-nou fouyé pli fon » é « Ay gadé sa osi » ki adan liv Tchè-kontan pou touttan !, ou pé touvé dé bèl ti ègzanp konsa b. Si étidyan a-w ni dimal a vin réinyon pétèt kè zò pé gadé on vidéo ki adan pawti-la « Ay gadé sa osi » adan lèson 14 la. Non a vidéo-lasa sé Jéhovah a pris soin de moi. Nou ka tou konprann kè nou pé’é ay di étidyan-la dé biten kon « Si i rivé fè sa, ou pé rivé osi » pas sé konsi sé konparé ou ka konparé-y èvè ondòt moun. Men préféré étidyan-la konprann sa limenm a-y. Pawkont, ou pé montré-y ka ki édé frè-la oben sè-la mèt sa i aprann an Bib-la an pratik. Pétèt kè ou ké pé montré-y on vèwsé an pawtikilyé oben on lidé ki ké itil ba-y. Men siwtou, dépi sa posib, montré-y kijan Jéova édé moun-lasa.

8. Ka nou pé fè pou édé étidyan an nou enmé Jéova pi fò ?

⁸ Édé étidyan a-w enmé Jéova pi fò. Kijan ou pé fè sa ? Ou pé sèvi èvè tout lokazyon kè ou ni pou édé étidyan-la vwè ki jan dè moun Jéova yé vréman. Fò ou édé-y vwè kè Jéova sé on Bondyé ki ni tchè-kontan é kè i toujou la pou moun ki enmé-y (1 Tim. 1:11 ; Ébr. 11:6). Montré-y ki byenfé i ké jwenn si i ka mèt sa i ka aprann an pratik, é èspliké-y kè sé byenfé-lasa ka montré kè Jéova enmé-y (Iz. 48:17, 18). Pi i ké enmé Jéova fò é pi i ké anvi fè chanjman an vi a-y pou fè Jéova plézi (1 Jan 5:3).

9. Dapré Mawk 10:29, 30, ka ki pé édé on moun fè sakrifis pou pran lèbatèm ?

⁹ Pou on étidyan pwogrésé pou pran lèbatèm, fò i ké fè sakrifis. Menmjan ki nonm rich-la nou palé dè-y talè la, sèwten étidyan ké ni a lagé sèwten biten. Pétèt kè fò yo ké touvé ondòt travay si tala yo ni la pa annakò èvè prensip a Labib. É pétèt kè sèwten ké oblijé arété frékanté sèwten zanmi, pas sé zanmi-lasa pa enmé Jéova. Anplisdisa ni dòt osi, fanmi a yo ké lagé-yo pas fanmi a yo pa enmé Témwen a Jéova. Jézi té sav byen osi kè pou sèwten moun sa té’é rèd dè fè sé sakrifis-lasa. Men i pwomèt kè moun ki té’é suiv-li pa té’é règrété tout sé sakrifis-la yo té’é fè la. Okontrè, Jéova té’é vidé onpakèt bénédisyon anlè yo. I té pwomèt osi kè adan pèp a-y, yo té’é touvé on gran fanmi ki té’é enmé-yo fò (li Mawk 10:29, 30). Kijan ou pé édé étidyan a-w pou i pé sa pwofité dè bèl kado-lasa ?

10. Manuel di on biten entérésan. Ka sa ka aprann nou ?

¹⁰ Vin bon zig èvè étidyan a-w. Sa enpòwtan toubònman kè ou montré étidyan a-w kè ou ka sousyé-w dè-y. Poukwa nou ka di sa ? Manuel, sé on frè ki ka rété o Mèksik, é i ka di on biten entérésan asi sa. I ka sonjé lè i té ka étidyé Labib, é mi sa i ka di : « Frè-la ki té ka fè étid an mwen la té ni labitid pran nouvèl an mwen avan nou té koumansé étid-la. Sa té ka mèt-mwen alèz, kifè an té pé palé èvè-y dè onlo biten. An té ni lenprésyon kè i té ka sousyé-y dè mwen vréman ».

11. Si nou ka pasé tibwen tan èvè étidyan an nou, ki byenfé sa ké pwokiré-yo ?

¹¹ Jézi té ni labitid pasé tan èvè disip a-y (Jan 3:22). Vou osi ou pé fè menm biten èvè étidyan a-w. Si sa posib é si étidyan a-w ja ka fè pwogré, pétèt kè ou pé envité-y akaz a-w pou bwè on ti kafé  èvè-w oben pou manjé on ti biten. Oben pétèt ou pé envité-y gadé JW Télédifizyon a mwa-la èvè-w. Sèten sa ké fè-y plézi si ou envité-y, siwtou lèwvwè moun alantou a-y ka fété é kè sa pa annakò èvè Pawòl a Bondyé. Konsa, a moman-lasa i pé’é santi-y tousèl. Kazibwe sé on frè ki ka viv an Ouganda. Mi sa i ka di : « An ka rann-mwen kont kè an aprann menm kantité biten asi Jéova lè an té ka fè étid an mwen é lè frè-la ki té ka fè étid an mwen la té ka pasé tibwen tan èvè mwen. Sa pèwmèt-mwen vwè kijan Jéova enmé sèwvitè a-y é kijan sèwvitè a-y ni tchè-kontan osi. Sé on vi konsa an té vlé ni. »

12. Si nou ni on étid biblik, poukwa fò nou ay èvè diféran pwoklamatè ?

¹² Vin èvè diféran pwoklamatè adan étid-la. Si nou ni on étid, pétèt nou pé di konsa kè sa pli fasil pou nou dè ay tousèl an nou oben dè toujou ay èvè menm moun-la. Sé vré sa pé ni bon koté a-y, men si nou ka envité dòt pwoklamatè dè tanzantan a vin fè étid-la èvè nou, sèten sa ké pwokiré étidyan an nou onlo byenfé. Dmitri sé on frè ki ka viv an Mòldavi é mi sa i ka di : « Chak pwoklamatè ki té ka vin fè étid an mwen èvè frè-la té ka èspliké-mwen sé lidé-la èvè pwòp mo a-yo. Sa té ka édé-mwen vwè kijan an té pé mèt sa an té ka aprann an pratik plizyè fason diféran. É lèwvwè an vin lasal pou prèmyé fwa, konm an té ja konnèt onlo frè é sè, an santi-mwen pli alèz. »

13. Poukwa fò-nou édé étidyan an nou vin réinyon ?

¹³ Édé étidyan a-w vin réinyon. Poukwa sa enpòwtan ? Pas Jéova ka mandé sèwvitè a-y réini-yo pou adoré-y (Ébr. 10:24, 25). Anplisdisa, frè é sè an nou adan lasanblé-la sé fanmi an nou. Lè nou réinyon èvè yo sé konsi nou té ka pawtajé on bon ti manjé ansanm. Si ou ka édé étidyan a-w vin réinyon, ou ka édé-y fè on biten ki vréman enpòwtan pou i pé sa pran lèbatèm. Men sé on biten ki pé difisil ba-y. Adan ka-lasa, kijan liv-la Tchè-kontan pou touttan ! pé édé-y ?

14. Ka nou pé fè pou ankourajé étidyan an nou vin réinyon ?

¹⁴ Sèvi èvè lèson 10 a liv-la Tchè-kontan pou touttan ! pou ankourajé étidyan a-w vin adan réinyon an nou. Avan liv-lasa sòti, yo mandé sèwten pwoklamatè ki ni onlo èkspéryans sèvi èvè lèson-lasa pou envité étidyan a yo. Sa pòté bon rézilta toubònman. Men ou pa oblijé atann lèson 10 la pou envité étidyan a-w vin réinyon. Dépi sa posib, envité-y é pran labitid fè sa chak simenn. Chak étidyan ni difikilté a-y ki ta-y, alò chèché a sav ka étidyan a-w bizwen é mandé-w ka ou pé fè pou édé-y. Si i pa vin réinyon tousuit, pa dékourajé-w. Aji èvè pasyans èvè-y é kontinyé envité-y.

15. Ki biten ki té’é pé fè étidyan an nou pè ?

¹⁵ Ès ou pa té on ti jan pè vin Témwen a Jéova ? Pétèt kè ou té ka di : « Préché ? An pé’é jan pé fè sa ! » Oben pétèt kè ou té on ti jan pè kè fanmi a-w oben zanmi a-w anpéché-w sèvi Jéova. Si sé sa ou viv, sèten kè ou ka rivé konprann sa étidyan a-w ka rèsanti. Jézi té sav byen kè sèwten disip té’é pé rèsanti sa. Sé pousa i ankourajé-yo a pa lésé lafrous anpéché-yo sèvi Jéova (Mat. 10:16, 17, 27, 28). Kijan Jézi édé-yo pou yo pa lésé lafrous pran lanmen asi yo ? É kijan nou pé imité Jézi adan domenn-lasa ?

16. Ka nou pé fè pou édé étidyan an nou palé dè sa yo ka aprann ?

 ¹⁶ Piti-a-piti, aprann étidyan a-w palé dè sa i ka aprann. Lèwvwè Jézi voyé disip a-y préché, yo té on ti jan pè. Men i édé-yo : i di-yo ba kimoun pou yo té préché é i di-yo ka pou yo té di osi (Mat. 10:5-7). Kijan ou pé imité Jézi ? Ou pé di étidyan a-w ba kimoun i pé préché. Pa ègzanp, lè zò ka étidyé on sijé, ou pé mandé-y ès i ka vwè on moun ki té’é byen kontan konnèt sa i ka aprann la. Aprésa, ou pé édé-y préparé-y. Ou pé montré-y kijan i pé palé dè sa on mannyè ki senp é pousa ou pé sèvi èvè sé ti karé-la « Mi sa moun ka di » é « Mi sa yo té’é pé mandé-w ». Ou ké touvé sé ti karé-lasa adan liv-la Tchè-kontan pou touttan ! Lèwvwè zò ka antréné-zòt, aprann étidyan a-w sèvi èvè Bib-la pou réponn moun-la on mannyè ki senp é aprann-li palé èvè onlo dousè.

17. Kijan nou pé sèvi èvè Matyé 10:19, 20, 29-31 pou édé étidyan an nou fè fon asi Jéova ?

¹⁷ Édé étidyan a-w fè fon asi Jéova. Jézi pwomèt disip a-y kè Jéova té’é édé-yo pas i té enmé-yo (li Matyé 10:19, 20, 29-31). Toujou fè étidyan a-w sonjé kè Jéova ké édé-y osi. Ou pé édé-y fè fon asi Jéova lèwvwè ou ka priyé èvè-y é kè ou ka palé dè òbjèktif kè i ni adan priyè a-w. Franciszek, sé on frè ki ka viv an Pològn. Mi sa i ka èspliké : « Pli souvan ki rarman, moun-la ki té ka fè étid an mwen la té ka palé dè òbjèktif an mwen adan priyè a-y. Lè an vwè kè Jéova té ka réponn a priyè a-y, mwen osi an pran labitid priyé. An vin ni on nouvo travay é an vwè kijan Jéova édé-mwen lèwvwè fò an té mandé déotwa jou mwen té pé sa ay adan on lasanblé é lè fò mwen té mandé patron an mwen chanjé lè a travay an mwen, mwen té pé sa ay réinyon. »

18. Ka Jéova ka rèsanti lè i ka vwè tout sé éfò-la nou ka fè la pou anségné étidyan an nou ?

¹⁸ Jéova enmé étidyan an nou toubònman. É i ka vwè tousa nou ka fè pou édé-yo vin bon bon zanmi èvè-y. Tout sé éfò-la nou ka fè la ka ban-nou plis valè ankò pou Jéova (Iz. 52:7). Si ou pa ni on étid pou lèmoman, ou pé édé sé étidyan-la pwogrésé kanmenm lèwvwè ou k’ay èvè dòt pwoklamatè adan étid a yo.