1. Poukwa sèwten sèwvitè a Jéova ka santi-yo tousèl ?

DÉLÈ sa pé rivé-nou dè santi-nou tousèl. Ni dé moun ki ka rèsanti sa pannan on timoman men sa pa’a diré lontan. Men pou dòt aprézan, sa pa’a pati konsa. Sa pé rivé kè nou santi-nou tousèl menmsi ni onlo moun alantou an nou. Ni sèwten moun ki ni dimal a touvé nouvo zanmi lè yo pa adan menm lasanblé-la ankò. Ni dòt ki lévé adan on fanmi ki soudé toubònman, é konm yo ay viv lwen a fanmi a yo, yo ka santi-yo tousèl. Ni dòt osi ki pèd on moun yo té enmé é yo ka vwè mank a-y toubònman. Anplisdisa, ni sèwten frè é sè ki toufré adan lavérité é ki ka santi-yo tousèl pas fanmi a yo, oben zanmi yo té ni avan, ba-yo do oben yo ka pèwsékité-yo.

2. A ki kèsyon nou ké réponn adan awtik-lasa ?

² Jéova konnèt-nou byen menm, é i ka konprann-nou myé ki noumenm ankò. Lèwvwè nou ka santi-nou tousèl, i ka vwè sa é i anvi édé-nou. Men kijan i ka édé-nou ? Lè nou ka santi-nou tousèl, ka nou pé fè ? É lèwvwè frè é sè an nou ka santi-yo tousèl, ka nou pé fè pou édé-yo ? Adan awtik-lasa, nou ké réponn a sé kèsyon-lasa.

3. Kijan Jéova montré kè i té ka sousyé-y dè Éli ?

³ Jéova vé kè tout sèwvitè a-y ni tchè-kontan. Jéova tèlman bon zanmi èvè-nou, kè lèwvwè nou dékourajé i ka vwè sa tousuit (Sòm 145:18, 19). An-nou vwè kijan i pran swen a pwofèt a-y, Éli. Éli sé té on nonm ki té fidèl é an tan a-y, Izrayèl té ka viv on sitiyasyon ki té difisil. Té ni on  gwo pèwsékisyon kont sèwvitè a Jéova, é yo té ka chèché a tchouyé Éli (1 Wa 19:1, 2). Anplisdisa, Éli té ka konpranndèdi kè sèl pwofèt a Jéova ki té ka rété sété li. Nou ka tou konprann kijan sa té ka dékourajé-y (1 Wa 19:10). Onfwamenm, Jéova fè on biten pou édé-y. I voyé on zanj pou rasiré-y é zanj-la di-y kè i pa té tousèl pas té ni onlo dòt Izraélit ki té ka kontinyé adoré Jéova (1 Wa 19:5, 18).

4. Fanmi é zanmi a sèwten sèwvitè a Jéova lagé-yo. Kijan Mawk 10:29, 30 ka montré kè Jéova ka sousyé-y dè yo ?

⁴ Jéova sav kè fò sèwten moun fè onlo sakrifis pou yo pé sa sèvi-y. Pa ègzanp, i sav kè fanmi é zanmi a sèwten frè é sè ka lagé-yo. On jou, lapòt Pyè dwèt té tibwen enkyèt, kifè mi sa i mandé Jézi : « Nou kité tousa nou té ni é nou suiv-vou, ka nou ké ni anrètou ? » (Mat. 19:27). Jézi rasiré disip a-y é i di-yo kè yo té’é fè pawti a on gran fanmi ki ni plen frè é sè adan-y (li Mawk 10:29, 30). É Jéova, ki sé Chèf a fanmi-lasa, pwomèt kè i ké soutyenn tout moun ki anvi sèvi-y (Sòm 9:10). Kifè, i pé édé-w lè ou ka santi-w tousèl. Men pou bénéfisyé dè èd-lasa, ni sèwten biten kè ou pé fè. Ki biten ésa ?

5. Poukwa sa enpòwtan kè nou toujou sonjé sa Jéova ja fè pou nou ?

⁵ Pran tan réfléchi asi tousa Jéova ja fè pou-w (Sòm 55:22). Si ou fè sa, sa ké édè-w sonjé kè ou pa tousèl. Carol * sé on sè ki sélibatè, é sé-y tousèl ki Témwen a Jéova adan fanmi a-y. Mi sa i ka di : « Jéova ja édé-mwen andiré onlo éprèv. Lè an ka sonjé sa, an pa’a santi-mwen tousèl ankò. É sa ka rasiré-mwen, pas sa ka montré kè Jéova ké toujou la pou mwen. »

6. Kijan 1 Pyè 5:9, 10 pé ankourajé frè é sè an nou ki ka santi yo tousèl ?

⁶ Pran tan sonjé kijan Jéova ka ankourajé sèwvitè a-y ki ka soufè pas yo ka santi yo tousèl, oben pas yo ka jwenn dòt pwoblèm ankò (li 1 Pyè 5:9, 10). Dépi plizyè lanné, sé Hiroshi tousèl ki Témwen a Jéova adan fanmi a-y. Mi sa i ka èspliké : « Adan lasanblé-la, chakmoun ni ti  pwoblèm a-y. Men sa pa ka anpéché-yo fè tousa yo pé pou yo sèvi Jéova. Lidé-lasa pé ankourajé-nou lèwvwè sé nou tousèl ki Témwen a Jéova adan fanmi an nou. »

7. Kijan lapriyè pé édé-w ?

⁷ Fò ou priyé toutlè, fò ou li Bib a-w é fò ou vin an réinyon. On prèmyé biten ou pé fè, sé priyé Jéova é di-y tousa ou ni asi tchè a-w (1 Pyè 5:7). Massiel sé on jenn ti sè. Lèwvwè i désidé sèvi Jéova, i té ka santi-y tousèl, pas fanmi a-y pa té ka sèvi Jéova. Mi sa i ka di : « An té ka di Jéova tousa an té ni asi tchè an mwen, é sé sa ki édé-mwen lèwvwè an té ka santi-mwen tousèl. Jéova sé té on vré Papa pou mwen. An té ka priyé Jéova touléjou, an té ka jous fè sa plizyè fwa adan jouné-la, konsa an té pé di-y tousa an té ka rèsanti. »

8. Lèwvwè ou ka li Bib a-w é kè ou ka médité asi sa ou ka li, kijan sa pé édé-w ?

⁸ Ondòt biten ou pé fè, sé li Pawòl a Bondyé touléjou, é pran tan réfléchi asi sèwten istwa ki ka montré kè Jéova enmé-w. Bianca sé on sè ki ka sipòté onlo, pas fanmi a-y ka di-y enpé biten pou dékourajé-y. Mi sa i ka rakonté : « Ni onlo sèwvitè a Bondyé ki an Bib-la é onlo frè é sè ki jwenn menm pwoblèm ki mwen. An ka pran tan li istwa a yo adan Bib-la é adan sé piblikasyon-la, é an ka rann-mwen kont kè sa ka édé-mwen toubònman. » Ni sèwten frè é sè osi ki ka aprann déotwa vèwsé patchè é sa ka ankourajé-yo. Pa ègzanp, yo ka aprann Sòm 27:10 oben Izayi 41:10. Ni dòt ankò ki ka kouté lèkti a Labib oben ki ka kouté sa nou kay étidyé an réinyon. Konsa, yo pa’a santi-yo tousèl lè yo ka li Bib a yo oben lèwvwè yo ka préparé réinyon a yo.

9. Ki byenfé sa ka pwokiré-w lè ou k’ay réinyon ?

⁹ On dènyé biten ou pé fè, sé ay an réinyon chak simenn. Ansègnman-la kè ou ké rèsèvwa la ké ankourajé-w é ou ké vin pibon zanmi èvè frè é sè a-w (Ébr. 10:24, 25). Talè la nou palé dè Massiel. Mi sa i ka di : « An té timid toubònman, men an té byen désidé a vin réinyon chak simenn é a bay on ti komantè a chakfwa. Konsa, sa édé-mwen vin pibon zanmi èvè sé frè é sè-la. »

10. Poukwa sa enpòwtan kè nou vin bon bon zanmi èvè frè é sè a lasanblé-la ?

¹⁰ Vin bon bon zanmi èvè frè é sè a-w. Fò ou chèché a vin bon bon zanmi èvè frè é sè a-w, pas yo pé aprann-vou onlo biten. Yo pa oblijé ni menm laj ki-w, é yo pa oblijé ni menm kilti ki-w. Labib ka di kè ‘moun ki ni on bèl laj ni sajès’ (Jòb 12:12). Sé jenn-la pé aprann  sé granmoun-la onlo biten osi. Pa ègzanp, David té lontan pli jenn ki Jonatan, men sa pa anpéché-yo vin bon bon zanmi (1 Sam. 18:1). Yonn édé lòt pou yo kontinyé sèvi Jéova menmsi yo jwenn onlo difikilté (1 Sam. 23:16-18). Irina, sé on sè ki pa ni ponmoun an fanmi a-y ki Témwen. Mi sa i ka di : « Sé frè é sè a lasanblé-la pé vin kon papa pou nou, kon manman pou nou é kon frè é sè an nou. Jéova pé sèvi èvè yo pou édé-nou. »

11. Ka ou pé fè pou-w ni dé bon bon zanmi adan lasanblé-la ?

¹¹ Pou ou vin zanmi èvè on moun, a pa on biten ki fasil, siwtou si ou sé on moun ki timid. Ratna, sé on sè ki timid é lèwvwè i té vlé vin a lavérité, yo pèwsékité-y onlo. Mi sa i ka di : « An té oblijé admèt kè an té bizwen kè frè é sè a lasanblé-la soutyenn-mwen. » Pou rivé di on moun sa ou ka rèsanti, a pa on biten ki fasil. Men pou vin bon bon zanmi èvè moun-lasa, fò ou fè éfò-lasa. Zanmi a-w vé ankourajé-w é vé soutyenn-vou, men pou yo pé sa fè sa, fò ou di-yo ka yo pé fè pou édé-w.

12. Kijan travay a prédikasyon la pé édé-nou touvé bon zanmi ?

¹² Lè nou ka sòti èvè frè é sè an nou an prédikasyon, sé on bèl mwayen nou ni pou vin bon bon zanmi èvè yo. Talè la nou palé dè Carol. Mi sa i ka èspliké : « An vin zanmi èvè plizyè sè, pas nou té ka préché onlo ansanm é nou té ka fè dòt aktivité ankò pou sèvi Jéova ansanm. Pi tan-la té ka pasé é pi an té ka rann-mwen kont kè Jéova té ka sèvi èvè sé zanmi-lasa pou soutyenn-mwen. » Sé vré, pou nou ni bon zanmi adan lasanblé-la, sa ka mandé éfò. Men sa ka pwokiré-nou onlo bénédisyon. Lè malè ka rivé, Jéova ka sèvi èvè zanmi an nou ki adan lasanblé-la pou édé-nou. Pa ègzanp, i ka sèvi èvè yo lèwvwè nou ka santi-nou tousèl (Pwov. 17:17).

13. Ka fò-noutout fè adan lasanblé-la ?

¹³ Adan lasanblé-la, fò-noutout fè sa ki fo pou nou antann-nou byen yonn èvè lòt. Fò-nou montré lézòt osi kè nou enmé-yo, konsa ponmoun pé’é ni lenprésyon kè yo abandoné-y (Jan 13:35). Sa nou ka di é sa nou ka fè pé ankourajé frè é sè an nou onlo ! Mi sa on sè di : « Lè an vin konnèt lavérité, lasanblé-la vin fanmi an mwen. É si a pa té yo, an pa té’é jen pé vin Témwen a Jéova. » Ni onlo frè é sè ki pa ni ponmoun an fanmi a yo ki Témwen a Jéova. Ka nou pé fè pou montré-yo kè nou enmé-yo ?

14. Lèwvwè ni on nouvo moun adan lasanblé-la, ka ou pé fè pou vin zanmi èvè-y ?

¹⁴ Éséyé vin zanmi èvè nouvo moun ki ka vin adan lasanblé-la. Pou koumansé, nou pé akéyi-yo èvè onlo jantiyès (Wom. 15:7). Men fò pa nou kontanté-nou dè di-yo kè nou kontan vwè-yo. Fò-nou fè plis ki sa. Fò-nou byen désidé a vin bon zanmi èvè yo. Alò lè on nouvo moun ka vin adan lasanblé a-w, chèché a konnèt-li. Éséyé konprann ki difikilté i ka jwenn, men pa rantré two fon adan vi a-y. Ni sèwten moun ki ni dimal a palé dè sa yo ka rèsanti. Alò, si ou ka santi kè moun-la jenné, pa ensisté. Pozé-y kèsyon ki ké mété-y alèz a-y, é pran tan kouté-y lè i ka palé. Pa ègzanp, ou té’é pé mandé-y kijan i fè pou konnèt lavérité.

15. Ka sé krétyen-la ki ni onlo èkspéryans la pé fè pou édé moun a lasanblé-la ?

¹⁵ Lèwvwè frè é sè ki ni èkspéryans é  sé ansyen-la an pawtikilyé ka entérésé-yo a moun a lasanblé-la, sa ka fè tout lasanblé-la pwogrésé. Melissa sé on ti sè é manman-y lévé-y tousèl adan lavérité. Mi sa i ka di : « An ni onlo rèkonésans pou sèwten frè a lasanblé-la, pas yo entérésé-yo a mwen. Yo té ka pasé tan èvè mwen é yo vin kon dé papa pou mwen. Kifè, lè an bizwen palé, an sav an pé konté asi yo. » Mauricio, sé on jenn ti frè é moun-la ki té ka fè étid a-y la vin inaktif. Mi sa i ka rakonté : « Si an rivé pwogrésé adan lavérité, sé pas sé ansyen-la té ka entérésé-yo a mwen. Yo té ka pran tan palé èvè mwen. Yo té ka préché èvè mwen é yo té ka palé-mwen dè biten entérésan kè yo té ka touvé adan étid pèwsonèl a yo. Yo jous té ka fè ispò èvè mwen. » Jòdijou, Melissa é Mauricio ka sèvi Jéova aplentan.

16-17. Ki biten itil ou pé fè pou édé frè é sè a-w ?

¹⁶ Fè on biten ki itil pou édé frè é sè a-w (Gal. 6:10). Leo sé on misyonè é i ka viv lwen a fanmi a-y. Mi sa i ka di : « Pli souvan ki rarman, sa nou bizwen sé kè on moun aji èvè jantiyès èvè nou o bon moman. » Mi sa i ka ajouté : « On jou, an fè on aksidan. Lè an fin pa rivé akaz an mwen, a pa ti istrésé an té istrésé ! Men on frè é madanm a-y envité-mwen manjé akaz a yo. An pa’a sonjé sa nou manjé, men sa an ka sonjé sé kè yo kouté-mwen èvè onlo jantiyès. Aprésa, an santi-mwen myé ! »

¹⁷ Lèwvwè nou k’ay lasanblé a pa ti kontan nou kontan pas nou ka pé pasé tibwen tan èvè frè é sè an nou é nou ka pé palé èvè yo dè sa nou tann an lasanblé-la. Talè la nou palé dè Carol. Mi sa i ka di-nou : « Lè an k’ay lasanblé, sé la an ka santi-mwen tousèl menm. » Poukwa Carol ka di sa ? Mi sa i ka èspliké : « Sé vré kè lè an k’ay lasanblé, alantou an mwen ni onpakèt frè é sè, men pli souvan ki rarman, yo sizé ansanm èvè fanmi a yo, kifè, lè an ka gadé-yo sa ka fè-mwen santi-mwen tousèl menm. » Ni dòt frè é sè ki pèd moun-la yo té mayé èvè-y la, kifè lè yo k’ay lasanblé, sa on ti jan rèd pou-yo. Ès ou konnèt on moun ki adan sitiyasyon-lasa ? Pwochen kou ou k’ay lasanblé,  pétèt ou té’é pé envité-y sizé owa a-w èvè fanmi a-w.

18. Kijan nou pé apliké sa nou ka touvé an 2 Korentyen 6:11-13 lèwvwè nou ka envité frè é sè an nou ?

¹⁸ Pasé tibwen tan èvè frè é sè a-w. Ou pé envité diféran frè é sè a pasé on ti moman èvè-w, é lè ou ka fè sa, sonjé frè é sè a-w ki tousèl a yo. Nou vé « wouvè tchè an nou gran », siwtou pou frè é sè an nou ki ka santi-yo tousèl (li 2 Korentyen 6:11-13). Talè la, nou palé dè Melissa. Mi sa i ka di : « A pa ti kontan nou té ka kontan lèwvwè sé frè é sè la té ka envité-nou akaz a yo, oben lèwvwè yo té ka menné-nou an vakans èvè yo. » Adan lasanblé a-w, ès ni on moun an pawtikilyé kè ou té’é pé envité ?

19. A ki moman an pawtikilyé pou nou pasé tibwen tan èvè frè é sè an nou ?

¹⁹ Ni sèwten péryòd an lanné-la ki pi rèd a sipòté pou frè é sè an nou, é yo té’é byen kontan si nou té ka pasé tibwen tan èvè yo. Pa ègzanp, nou ka tou konprann kijan yo pé tris lèwvwè sé péryòd a fèt é kè fanmi a yo pa Témwen oben lè sé anivèwsè a mò a on moun yo té enmé. Si nou ka pasé tibwen tan èvè frè é sè an nou lèwvwè yo tris konsa, sa ka montré-yo kè nou ka « sousyé-nou dè yo toubònman » (Filip. 2:20).

20. Kijan sa Jézi di an Matyé 12:48-50 ka édé-nou lèwvwè nou ka santi-nou tousèl ?

²⁰ Nou pé ka santi-nou tousèl pou plizyè rézon diféran. Men fò pa nou jen oubliyé kè Jéova ka konprann sa nou ka rèsanti. É byensouvan, Jéova ka sèvi èvè frè é sè an nou pou édé-nou lè nou bizwen (li Matyé 12:48-50). Nou ké montré nou ni onlo rèkonésans pou fanmi-la Jéova ban-nou la si nou toujou la pou frè é sè an nou. Fò-nou toujou sonjé kè kèlkèswa sitiyasyon-la nou ka jwenn-la, Jéova toujou la èvè-nou, i pa jen ka lésé-nou tousèl.