1. Poukwa nou pé di kè Jéova enmé-nou ?

 JÉOVA fè-nouchak vin owa a-y (Jan 6:44). Pran on ti tan pou réfléchi asi sa. Ou ka imajiné-w : pawmi milya é milya moun ki asi latè, Jéova vwè on bon biten adan tchè a-w. I vwè kè ou enmé-y fò, kifè, ou ni onlo valè pou-y (1 Kron. 28:9). Jéova konnèt-vou, i ka konprann-vou é i enmé-w onlo. Lè nou ka sonjé sa, sa ka fè-nou dibyen toubònman !

2. Jézi ka sèvi èvè on ègzanp pou montré-nou kè Jéova ka sousyé-y dè nou. Ki ègzanp ésa ?

² Jéova ka sousyé-y dè-w men i ka sousyé-y dè tout frè é sè a-w osi. Pou nou byen konprann lidé-lasa, Jézi konparé Jéova èvè on bèwjé. Si on bèwjé ni 100 mouton é kè yonn adan yo pèd, ka i ké fè ? I ké « lésé sélézòt 99 la an montangn-la pou i ay chèché sila ki pèd la ». É lèwvwè i ké touvé-y, i pé ké fè kòlè èvè-y. Okontrè i ké kontan toubònman ! Ka sa ka aprann-nou ? Pou Jéova, tout ti mouton a-y kon koko a zyé a-y. Mi sa Jézi di : « Pap’an mwen ki an syèl-la vé pa ponyonn adan sé piti-lasa mò » (Mat. 18:12-14).

3. Ka nou ké vwè adan awtik-lasa ?

³ Nou vé pa dékourajé frè é sè an nou. Alò, ka nou pé fè pou nou pa fè-yo bigidi ? Lè on moun ka fè-nou lapenn, kijan pou nou réyaji ? Adan awtik-lasa nou ké réponn a sé kèsyon-lasa. Men pou nou koumansé, an-nou vwè kimoun yo ka kriyé ‘sé piti-la’ an Matyé chapit 18.

4. Kimoun yo ka kriyé ‘sé piti-la’ ?

⁴ Lè Jézi palé dè ‘sé piti-la’ i té ka palé dè disip a-y. Kèlkèswa laj a yo, yo kon dé « jenn timoun » kivédi yo paré  pou lésé Jézi anségné-yo (Mat. 18:3). Yochak ni pèwsonalité a yo, kilti a yo, mantalité a yo é yo ka vin dè plizyè koté diféran men yotout ni fwa an Jézi. É Jézi enmé-yo fò toubònman (Mat. 18:6 ; Jan 1:12).

5. Lèwvwè Jéova ka vwè on moun ka malmenné sèwvitè a-y oben ka fè-y bigidi, ka i ka rèsanti ?

⁵ Tout sé piti-la ni onlo valè pou Jéova. Pou nou konprann sa, nou pé réfléchi si sa nou ka rèsanti lè nou ka vwè on timoun. Nou enmé sé timoun-la ! Nou anvi pwotéjé-yo pas nou sav kè yo pa konnèt granzafè adan lavi é yo pi frajil ki on granmoun. Lèwvwè on moun ka fè ondòt moun soufè sa ka fè-nou mal ! Men si sé on timoun yo ka malmenné, a pa ti kòlè nou ka kòlè é sa ka raché tchè an nou ! Ében pou Jéova sé menm biten : i vé pwotéjé-nou. Lè i ka vwè on moun ka fè sèwvitè a-y soufè, i pa’a pran sa menm menm menm. É si on sèwvitè a-y ka fè ondòt bigidi, i pa’a pran sa nonplis (Iz. 63:9 ; Mawk 9:42).

6. Dapré 1 Korentyen 1:26-29, kijan mond-la ka vwè disip a Jézi ?

⁶ Pou ki dòt rézon ankò nou pé di kè yo ka kriyé disip a Jézi ‘sé piti-la’ ? An-nou réfléchi asi sa : adan mond-lasa, lè on moun ni pouvwa, lè i ni lajan oben lè toutmoun konnèt-li, yo ka di kè sé on granjan dè moun. Men sèwvitè a Jéova pa konsa ! Kifè, pou mond-la, yo sé dé ti kakazwa kivédi yo sé dé « piti » (li 1 Korentyen 1:26-29). Men a pa konsa Jéova ka vwè-yo.

7. Kijan Jéova vé nou vwè frè é sè an nou ?

⁷ Ki on moun toufré adan lavérité ki i ka sèvi Jéova dépi onpakèt lanné, Jéova enmé-y. Tout frè é sè an nou ni onlo valè pou-y é sé konsa pou nou vwè sa osi. A pa déotwa frè é sè tousèl pou nou enmé, fò-nou ‘enmé tout frè é sè an nou’ (1 Pyè 2:17). Fò-nou montré-yo kè nou enmé-yo é kè nou ka sousyé-nou dè yo. Si nou vin sav kè sa nou di on moun oben kè sa nou fè-y fè moun-lasa lapenn, fò pa nou di nou kè sé on biten ankouyonnad é kè fò moun-lasa pasé asi sa é mèt-sa dèyè do a-y. Men, fò nou chèché a konprann poukwa sa nou di-y la oben sa nou fè-y la malpasé-y. Pa ègzanp, pou sèwten moun, yo pa ni onlo valè parapòt a sa yo ja viv oben parapòt a koté-la yo fèt la. Ni dòt osi ki toufré adan lavérité é ki po’o byen konprann kè fò-yo pasé asi défo a lézòt. Men kèlkèswa rézon-la, fò-nou fè tousa nou pé pou nou antann-nou byen èvè lézòt. Pawkont, nou ka tou konprann kè fò on moun ki sisèptib rèkonnèt kè jan-la i ka aji la pa bon é kè i ni on biten a chanjé. Si i fè sa, sa ké fè ki limenm ki lézòt dibyen.

8. An tan a Jézi, sé moun-la té ni on mantalité ki té ka détenn asi disip a-y. Ki mantalité ésa ?

⁸ Men ofèt, poukwa Jézi palé dè ‘sé piti-la’ ? Mi sa disip a-y té mandé-y : « Kimoun ki pi gran adan wayòm-la ki an syèl-la ? (Mat. 18:1). An tan a Jézi, onlo Juif té vé yo pòté-yo anlè. Mi sa on boug ki maké déotwa liv asi Labib ka di : « Ni sèwten moun ki té vé kè moun pòté-yo anlè é kè toutmoun konnèt-yo. É yo pasé tout vi a yo ka kouri dèyè sa. »

9. Ka pou disip a Jézi té fè ?

⁹ Jézi té sav kè lamajorité a sé Juif-la té anripaj yonn èvè lòt pas sé konsa yo té lévé-yo. Kifè, konm sé disip-la té lévé adan sa osi, fò-yo té travay rèd pou  chanjé mantalité a yo. Mi sa i di-yo : « Fò moun-la ki pi gran la pawmi zòt vin kon sila ki pi jenn la é fò moun-la ki ka dirijé la vin kon sila ki ka sèvi la » (Lik 22:26). Pou nou vin kon sé pli jenn la, fò-nou « kontinyé vwè lézòt kon moun ki ni plis valè » ki nou (Filip. 2:3). Si nou pa’a fè éfò pou nou ni mantalité-lasa, nou ka riské dè fè lézòt bigidi.

10. Pòl ban-nou on bon ti konsèy é fò-nou tchenn kont dè sa. Ki konsèy ésa ?

¹⁰ Fò-nou rèkonnèt kè kò a frè é sè an nou pibon ki tan nou adan onlo domenn. Si nou ka pran tan gadé bèl kalité a yo nou pé’é ni dimal a rèkonnèt sa. Pòl ba sé Korentyen-la on bon ti konsèy é nou osi fò-nou tchenn kont dè sa. Mi sa i di-yo : « Pas ka ki rann-vou diféran dè ondòt moun ? Wi, ka ou ni é kè ou pa risivwè ? An réyalité, si sa ou ni la sé risivwè ou risivwè-y, poukwa ou ka akwè-w konsi a pa risivwè ou risivwè-y ? » (1 Kor. 4:7). Nou pa‘a chèché a fè lézòt pòté-nou anlè é nou vé pa akwè-nou nonplis. Si on frè ka fè bèl diskou oben si on sè ni onlo étid, fò-yo toulédé rèkonnèt kè si yo ka rivé fè sa, sé yenki grasa Jéova.

11. Ka ègzanp a èsklav-la ki té méchan la ka aprann-nou ?

¹¹ Kèlkè tan apré Jézi té di disip a-y kè fò pa yo té fè lézòt bigidi, i rakonté-yo istwa a on wa èvè èsklav a-y. Èsklav-la té ka doué wa-la onpakèt lajan é i pa té pé ranbousé-y. Men wa-la aji byen èvè-y é i di-y konsa kè i pa oblijé ranbousé-y. Tibwen tan apré, wa-la aprann kè menm èsklav-lasa fè présyon asi on boug pas i té ka doué-y lajan. É poutan a pa granzafè boug-lasa té ka doué-y ! Anfinaldikont, konm sé méchan èsklav-lasa té méchan, wa-la mété-y lajòl. Ka sa ka aprann-nou ? Mi sa Jézi di : « Sé konsa Pap’an mwen ki an syèl ké aji èvè zòchak si zò pa padonné frè a zòt èvè tout tchè a zòt » (Mat. 18:21-35).

12. Si nou vé pa padonné, kimoun ki ké pran plon adan sa ?

¹² Èsklav méchan la fè ki li ki lézòt soufè pas i mal aji. I fè lòt boug-la soufè lèwvwè i fè-yo mété-y lajòl é sa aji osi asi sé-la ki té ka gadé sa. Mi sa Labib ka di : « Lèwvwè sélézòt èsklav-la vwè sa ki fèt, sa fè-yo lapenn toubònman ». Nou osi, mannyè nou ka aji èvè lézòt pé aji asi yo. Si on moun fè-nou on biten ki fè-nou mal é kè nou vé pa padonné-y, ka ki pé rivé ? Pétèt kè konm nou vé pa padonné-y, nou pé’é lévé-y digad ankò é nou pé ké montré-y kè nou enmé-y. Kifè nou ka riské dè fè-y bigidi. Anplisdisa, lèwvwè sé frè é sè-la ké rann-yo kont kè nou ni on pwoblèm èvè on moun an lasanblé-la, sa ké chouboulé-yo.

13. Ka sa Crystal viv ka aprann-nou ?

¹³ Lè nou ka padonné frè é sè an nou, nou ka santi-nou myé é nou ka fè-yo dibyen osi. Sé sa Crystal b on sè ki pyonyé konstaté. On sè ki an lasanblé a-y té ka fè-y soufè toubònman. Mi sa i ka sonjé :« I té ka di-mwen onlo biten ki té ka fè-mwen mal ; sé konsi sé koudkouto i té ka ban-mwen. Lè nou té k’ay préché, an pa menm té vlé monté an menm vwati ki-y ankò. An pa té ni balan kon avan mwen ay préché é an pa té ni tchè-kontan ankò. » Crystal té ka èstimé kè i té ni rézon é kè i té andwa fè kòlè. Men i désidé pa lésé rankin rantré an tchè a-y  é pa sonjé yenki li. Adan Tou dè Gad a 15 òktòb 1999 té ni on awtik tèm a-y sé té « Pardonnez de tout votre cœur ». I touvé déotwa konsèy adan-y é èvè imilité, i mèt sé konsèy-lasa an pratik. Sa édé-y padonné sè a-y. Mi sa i ka di : « Alèla, an ka rann-mwen kont kè sé goumé noutout ka goumé pou mèt nouvo pèwsonalité-la asi nou é kè Jéova toujou paré a padonné-nou. É i ka fè sa touléjou. Sé konsi yo té woté on gwo chaj asi zépòl an mwen. Konnyéla la an ni tchè-kontan kon avan. »

14. a) Dapré Matyé 18:21, 22, ki biten lapòt Pyè té ni dimal a fè ? b) Si nou ni dimal a padonné, ka pou nou fè ?

¹⁴ Nou sav byen kè fò-nou padonné frè é sè an nou é sé méyè biten nou pé fè. Men sa pa toujou fasil a fè. Menm pou lapòt Pyè sé té on biten ki pa té fasil a fè (li Matyé 18:21, 22). Men ka ki pé édé-nou ? Prèmyèwman, fò-nou pran on ti tan pou réfléchi a tout érè kè nou ja fè é kè Jéova ja padonné (Mat. 18:32, 33). Apapoudi kè nou mérité kè i padonné-nou, men i ka fè-y èvè plézi (Sòm 103:8-10). Alò, « noumenm osi, nou oblijé ni lanmou yonn pou lòt ». Nou ka tou konprann kè nou pé pa fè dòt biten ki padonné frè é sè an nou (1 Jan 4:11). Dézyèmman, an-nou réfléchi a tout byenfé sa ké pòté si nou ka padonné frè é sè an nou. Nou ké fè moun-la ki fè-nou lapenn la dibyen, lasanblé-la ké rété soudé, nou ké kontinyé rété bon bon zanmi èvè Jéova é sa ké woté on gwo chaj anlè zépòl an nou (2 Kor. 2:7 ; Kol. 3:14). Twazyèmman fò-nou priyé Jéova pas sé-y ki ka mandé-nou padonné frè é sè an nou. Fò pa nou lésé Satan anpéché-nou antann-nou byen èvè frè é sè an nou (Éféz. 4:26, 27). Nou bizwen Jéova édé-nou pou nou pa pri adan pyèj a Dyab-la.

15. Dapré Kolosyen 3:13, ka pou nou fè si on frè oben on sè fè on biten ki fè-nou mal ?

¹⁵ Ka pou ou fè si on frè oben on sè fè-w on biten ki fè-w mal toubònman ? Fè tousa ou pé pou antann-vou byen èvè-y. Di Jéova sa ou ka rèsanti. Mandé-y béni moun-la ki fè-w lapenn la é mandé-y édé-w vwè ka i enmé aka moun-lasa (Lik 6:28). Si ou pa’a rivé oubliyé sa frè a-w oben sè a-w fè-w, gadé pou vwè kijan ou té’é pé ay palé ba-y. Vométan ou toujou mèt an tèt a-w kè a pa pa èspré i fè sa é kè i pa té ni pon mové lentansyon (Mat. 5:23, 24 ; 1 Kor. 13:7). É si i vé pa fè lapé aprézan ? Kontinyé sipòté-y é kontinyé ni pasyans èvè-y (li Kolosyen 3:13). É pi enpòwtan la, pa lésé rankin pran rasin en tchè a-w pas sa ké anpéché-w rété bon bon zanmi èvè Jéova. Pa lésé ayen ni ponmoun fè-w bigidi. Konsa, ou ké montré kè ou enmé Jéova plis ki pondòt biten (Sòm 119:165).

16. Noutout nou ni on rèsponsabilité. Kilès ?

¹⁶ A pa ti kontan nou kontan sèvi Jéova èvè frè é sè an nou ! Nou sé « onsèl twoupo » é nou « ni onsèl bèwjé » (Jan 10:16). Adan liv-la Organisés pour faire la volonté de Jéhovah, mi sa nou ka li an paj 165 la : « Pèp a Bondyé soudé é konm ou ka bénéfisyé dè sa, fò ou fè pa a-w pou i rété konsa. » Sé pousa fò-nou fè éfò pou nou « vwè frè é sè an nou menmjan ki Jéova ». Pou Jéova, noutout ka fè pawti a sé ‘piti-la’ é nou ni onlo valè pou-y. Ès sé konsa kè ou ka vwè frè é sè a-w ? Ou pé sèten kè Jéova ka vwè é kè i ka aprésyé tousa ou ka fè pou édé-yo é pou fè-yo dibyen (Mat. 10:42).

17. Ka nou byen désidé a fè ?

¹⁷ Nou enmé frè é sè an nou onlo. Sé pousa ‘nou byen désidé a pa mèt pon wòch oben pon biten douvan yo ki té’é pé fè-yo bigidi’ (Wom. 14:13). Pou nou, frè é sè an nou ni plis valè ki nou é nou vé padonné-yo èvè tout tchè an nou. Fò pa nou lésé ponmoun fè-nou bigidi. Okontrè, an-nou « kouri dèyè biten ki ka mété lapé é dèyè biten ki ka fè yonn fòwtifyé lòt » (Wom. 14:19).