1. Bay déotwa ègzanp a biten ki pé fè-nou pè.

 NESTOR é María b té vé ay on koté té ka manké pwoklamatè. Pou yo té fè sa, fò-yo té aprann viv èvè mwens lajan. Yo té on ti jan pè pas pou yo, si yo té ka gangné mwens lajan, pétèt kè yo pa té’é ni tchè-kontan kon avan. Biniam ka viv on koté Témwen a Jéova pé pa adoré Jéova kon yo vé. Lè i vin Témwen a Jéova, i té sav kè yo té’é pèwsékité-y é sa té ka fè-y pè. Men, a pa té sa ki té ka enkyété-y plis. An réyalité, lè i té ka sonjé jan fanmi a-y té’é réyaji lèwvwè yo té’é sav kè i chanjé rèlijyon, a pa ti pè i té pè ! Valérie dékouvè kè i té ni on kansè é kè kansè-lasa pa té ka jouwé èvè moun ditou-ditou. Konm Valérie pa té vé pran san, i té ni dimal a touvé on mèdsen ki té dakò pou opéré-y. Nou ka tou konprann kè i té pè mò.

2. Poukwa fò-nou fè tousa nou pé pou nou pa lésé lapè pran lanmen asi nou ?

² Ès ou ja touvé-w adan yonn adan sé sitiyasyon-lasa é kè ou té pè toubònman ? Ni onlo adan nou ki ja viv sa. Lèwvwè lafrous ka pran lanmen asi nou, si nou pa fè sa ki fo pou métrizé sa, nou ka riské dè pran mové désizyon é nou pé jous rivé a pèd lanmityé an nou èvè Jéova. É sé jistèman sa Satan vlé ! I ka mèt bon présyon asi nou pou nou pè é pou nou pa suiv lwa a Jéova. Pa ègzanp i pé mèt présyon asi nou pou nou pa ay préché, alòskè sé Jéova ki ka mandé-nou fè sa (Rév. 12:17). I mové toubònman, i ka fè dé biten pou fè moun soufè é i puisan. Men nou pé rivé about a-y. Kijan nou pé fè sa ?

3. Ka ki édé-nou janmbé sa ki ka fè-nou pè ?

 ³ Si nou sèten kè Jéova enmé-nou é kè i èvè nou, nou ké doubout douvan Satan é nou pé’é pè-y (Sòm 118:6). An-nou pran ègzanp a misyé-la ki maké Sòm 118 la. I touvé-y douvan diféran sitiyasyon é sa pa té fasil ba-y menm : I té ni onlo lènmi é pawmi yo té ni moun ki té enpòwtan (vèwsé 9, 10). Dépawfwa, moun té ka mèt bon présyon asi-y (vèwsé 13). Anplisdisa, Jéova té korijé-y é sa pa té fasil pou-y menm (vèwsé 18). Men magrésa, mi sa i chanté : « An pé’é pè. » Poukwa i té ka santi-y ansékirité konsa ? I té sav kè menmsi Jéova té korijé-y, sé té Pap’a-y ki an syèl-la é kè i té enmé-y. I té sèten kè kèlkèswa sa ki té’é rivé-y, Bondyé a-y té’é toujou soutyenn-li (Sòm 118:29).

4. Si nou sèten kè Jéova enmé-nou, ki biten ki ka fè-nou pè kè nou ké rivé janmbé ?

⁴ Fò-nou sèten kè Jéova enmé-nou. Si nou sèten dè sa, sa ké édé-nou rivé about a sa ki ka fè-nou pè. Byensouvan ni dé biten ki ka fè-nou pè é nou kay ègzaminé 3 adan yo : 1) lè nou pa sèten kè nou ké ni asé lajan pou ba fanmi an nou on dèkwa, 2) lè nou pè sèwten moun é 3) lè nou pè lanmò. An koumansman a awtik-la, nou palé dè déotwa frè é sè ki rivé janmbé sa ki té ka fè-yo pè pas yo té sèten kè Jéova té enmé-yo.

5. Lèwvwè ou ni on fanmi anba rèsponsabilité a-w, ki biten ki pé enkyété-w ? (gadé imaj-la ki anlè po a jounal-la).

⁵ On moun ki ni on fanmi anba rèsponsabilité a-y ka fè tousa i pé pou ba fanmi a-y sa yo bizwen pou viv (1 Tim. 5:8). Si sé ka a-w, ès dépawfwa ou on ti jan pè pèd travay-la ou ni la akòz dè Covid-19 la ? Èskè ou té pè pa ni asé lajan pou ba fanmi a-w manjé oben pou péyé lwayé a-w oben pou péyé kaz-la ou achté la ? Ès ou té enkyèt pas ou té ka mandé-w ès ou ké rivé touvé on travay siwvwè ou pèd tala ou ni la ? Oben ès ou té anvi fè chanjman adan vi a-w men kè ou té ka mèt an tèt a-w kè ou pé’é rivé viv èvè mwens lajan menmjan ki Nestor é María nou palé talè la ? Malérèzman, Satan ka rivé détouné sèwten moun ki ka sèvi Jéova pas yo lésé dé biten konsa fè-yo pè é pran tèt a yo.

6. Ka Satan vé fè-nou kwè ?

⁶ Satan vé fè-nou kwè kè Jéova pa’a sousyé-y dè nou é kè nou pé pa fè fon asi-y pou ba fanmi an nou on dèkwa. Kifè, nou pé rivé a mèt an tèt an nou kè fò-nou fè tousa nou pé pou nou rété adan travay-la nou adan-y la, menmsi yo ka mandé-nou fè dé biten ki pé anpéché-nou rété bon bon zanmi èvè Jéova.

7. Ki garanti Jézi ka ban-nou ?

⁷ Jézi konnèt Pap’a-y myé ki pondòt moun, é mi garanti-lasa i ka ban-nou parapòt a Bondyé : I « sav sa zò bizwen avan menm zò mandé-y li » (Mat. 6:8). I sav kè non sèlman Jéova konnèt sa nou bizwen, men kè i toujou paré pou ban-nou sé biten-lasa. Anplisdisa, antankè krétyen, nou ka fè pawti a fanmi a Bondyé é konm sé-y ki rèsponsab a fanmi a-y, nou pé sèten kè Jéova ké rèspèkté prensip-la i ban-nou la adan 1 Timoté 5:8.

8. a) Lè nou pa sèten ni asé lajan pou ba fanmi an nou on dèkwa sa pé fè-nou pè. Kijan nou pé rivé about a sa ? (Matyé 6:31-33). b) Asi foto-la ki k’ay èvè paragraf 8 la, ka frè-la é madanm a-y ka fè é kijan nou pé imité-yo ?

⁸ Lè nou sèten kè Jéova enmé ki nou ki fanmi an nou, nou sav kè ayen pé ké manké-nou é nou pa ni pon dout asi sa (li Matyé 6:31-33). Jéova vé ban-nou sa nou bizwen pou viv é i ka fè sa pas i enmé-nou  é pas i donan. Lèwvwè i kréyé latè, i pa ban-nou enki sa nou té bizwen, men i fè ansòt pou sé biten-la i kréyé pou nou la fè-nou plézi (Jén. 2:9). Délè, lajan-la on ti jan kout é nou ka pé ni enki sa nou bizwen pou viv. Men fò pa nou oubliyé kè si nou ni sé biten-lasa sé enki grasa Jéova (Mat. 6:11). On biten pou nou toujou sonjé sé kè kèlkèswa sa nou lagé pou nou ba Jéova sa nou ni dè méyè, sa pa ayen koté tousa Jéova ka ban-nou dépi konnyéla. É talè, i ké ban-nou lavi pou touttan adan paradi-la. Sé sa Nestor é María ni lokazyon konstaté (Iz. 65:21, 22).

9. Ka ègzanp a Nestor é María ka aprann-nou ?

⁹ Nestor é María té ka viv an kolonbi é yo té ka viv alèz a yo. Mi sa yo ka rakonté : « Nou té anvi ni on vi ki senp pou nou pé sa fè plis an prédikasyon. Men nou té ka di-nou kè si nou té ka gangné mwens lajan, nou pa té’é ni tchè-kontan kon avan é sa té ka fè-nou pè. » Ka ki édé-yo pa lésé lapè pran lanmen asi-yo ? Yo sonjé kijan Jéova montré-yo adan vi a yo kè i enmé-yo. Konm yo té sèten kè Jéova té’é pran swen a yo, yo lagé travay a yo alòskè yo té ka gangné on bèl lajan. Yo vann kaz a yo é yo ay enstalé-yo on koté té ka manké pwoklamatè. Ès yo règrété désizyon-la yo té pran la ? Mi sa Nestor ka di : « Nou rann-nou kont kè sa Matyé 6:33 ka di a pa pawòl anlè ! Nou té ni tousa nou té bizwen. É an réyalité, nou lontan pli kontan ki avan. »

10. Jòdijou yonn pè lòt. Poukwa sa pa ka étoné-nou ?

¹⁰ Dépi Adan é Èv ba Jéova do, moun ka fè moun soufè konsa (Ékl. 8:9). Pa ègzanp, ni sèwten moun ki ka sèvi èvè otorité-la yo ni la pou fè lézòt ditò. Ni dòt ki ka aji èvè onlo vyolans é ki ka fè dé biten ki pa annakò èvè lalwa. Jous ni sèwten timoun, ki toujou dèyè do a kanmarad-lékòl a yo, yo ka jiré-yo é yo ka fè-yo bon méchansté. É ni sèwten moun osi ki ka malmenné fanmi a yo. Nou ka tou konprann poukwa jòdijou moun pè moun ! É Satan ka pwofité dè sa. Kijan i ka fè sa ?

11-12. Siwvwè nou ka tranblé douvan moun, kijan Satan pé sèvi èvè sa pou fè-nou ditò ?

¹¹ Satan sav kè dépawfwa nou ka tranblé douvan moun é i ka sèvi èvè sa pou fè-nou fè dé biten ki pa annakò èvè prensip a Labib é i ka sèvi èvè sa osi pou fè-nou  arété préché. I ka pousé sé gouvènman-la entèwdi aktivité an nou é i ka fè-yo pèwsékité-nou (Lik 21:12 ; Rév. 2:10). Adan mond a Satan, ni onlo moun ki ka fè pawòl monté é désann asi do an nou pou fè-nou ditò alòskè sa yo ka di la pa menm vré. É dépawfwa ni sèwten moun ki ka bwè sé pawòl-lasa é ki ka fè jé èvè tèt an nou oben ki ka jous malmenné-nou (Mat. 10:36). Men lèwvwè Satan ka fè sé biten-lasa, ès sa ka étoné-nou ? Awa ! Pas i té ja ni lokazyon fè sa o 1^é syèk (Akt 5:27, 28, 40).

¹² Satan pa’a sèvi enki èvè sé gouvènman-la pou fè-nou pè. I ka sèvi èvè dòt biten ankò. Sèwten moun pè jan fanmi a yo ké réyaji si yo vin Témwen a Jéova. Délè, yo plis pè fanmi a yo ki moun ki té’é pé ba-yo kou. Yo enmé fanmi a yo ; yo anvi fanmi a yo aprann konnèt Jéova é kè yo vin enmé-y. É sa ka fè-yo lapenn, lèwvwè yo ka vwè kè lè fanmi a yo ka palé, yo pa ni pon rèspé, ni pou vré Bondyé-la ni pou sèwvitè a-y. Sé vré, dépawfwa, moun ki té kont fanmi a yo vin Témwen a Jéova apré. Men, kijan nou té’é réyaji si moun an fanmi an nou pa té ka lévé-nou digad ankò paskè nou vin Témwen ?

13. Lèwvwè nou ka mèt fon an tèt an nou kè Jéova enmé-nou, kijan sa pé édé-nou andiré lèwvwè fanmi an nou kont nou ? (Sòm 27:10).

¹³ An Sòm 27:10 nou ka touvé dé bèl ti pawòl é lèwvwè fanmi an nou kont nou sé pawòl-lasa ka ban-nou on bèl fòs menm ! (li-y). Si nou ka sonjé jan Jéova enmé-nou fò, nou pé’é enkyèt parapòt a sa ki pé rivé-nou. Men on biten nou ké sèten sé kè Jéova ké ban-nou on bèl rékonpans siwvwè nou ka kontinyé andiré. I ké ban-nou tousa nou bizwen pou viv. I ké édé-nou rété kalm é i ké édé-nou ni tchè-kontan. I ké édé-nou osi pou nou toujou rété bon bon zanmi èvè-y. Sé sa Biniam, nou palé dè-y talè la ni lokazyon konstaté.

14. Ka ègzanp a Biniam ka aprann-nou ?

¹⁴ Biniam vin Témwen a Jéova alòskè i té sav byen kè yo té’é pèwsékité-y bon pèwsékité la. I té sav kè Jéova té enmé-y é konm i té sèten dè sa, an-nou vwè kijan sa édé-y pou i pa lésé lapè pran lanmen asi-y. Mi sa i ka di : « Sé pèwsékisyon-la an sibi la, té pi rèd ki sa an té ka imajiné. Men an té pi pè kè fanmi an mwen kont mwen ki sé pèwsékisyon-la gouvènman-la té’é fè-mwen sibi la. An désidé kè an té’é vin Témwen a Jéova, men an té pè kè sa fann  tchè a papa é kè fanmi an mwen di kè an pa vo ayen. » Men Biniam té mèt fon an tèt a-y kè Jéova toujou ka pran swen a moun kè i enmé. Mi sa i ka èspliké : « An sonjé jan Jéova édé moun ki té ni pwoblèm a lajan oben moun yo té ka pèwsékité parapòt a nasyonalité a yo oben parapòt a koulè a po a yo, oben moun yo té ka aji èvè onlo vyolans èvè yo. An konstaté kè siwvwè nou ka rété fidèl a Jéova anba éprèv, i toujou ka soutyenn-nou. » Jéova té on papa pou Biniam, é sé frè é sè la té kon on fanmi pou-y.

15. Nou pè mò, poukwa sé on biten ki toutafè nòwmal ?

¹⁵ Labib ka di kè lanmò sé on lènmi (1 Kor. 15:25, 26). Lanmò pé ka angwasé-nou siwtou siwvwè on moun nou enmé oben noumenm an nou ni on maladi ki grav. Men poukwa lanmò ka fè-nou pè ? Paskè lè Jéova kréyé-nou, i ban-nou anvi viv pou touttan (Ékl. 3:11). Délè, lè nou pè mò sa pé pwotéjé-nou. Pa ègzanp, sa pé pousé-nou manjé dé ti manjé ki bon pou santé an nou, fè ispò, ay vwè on mèdsen, oben pran on médikaman lèwvwè sa nésésè é sa pé édé-nou osi a pa fè nenpòt biten pou nou pa mèt vi an nou an danjé.

16. Konm Satan sav kè nou pè mò, kijan i ka sèvi èvè sa pou pyéjé-nou ?

¹⁶ Satan sav kè vi an nou ni onlo valè pou nou. I ka di kè nou paré a fè tout kalté sakrifis é kè nou jous paré a lagé Jéova, zanmi an nou, pou nou pé sa rété an vi (Jòb 2:4, 5). Men i ka pèd fil a-y ! Konm Satan sav kè i pé tchouyé-nou é kè i sav osi kè natirèlman nou pè mò, i ka sèvi èvè sa pou fè-nou ba Jéova do (Ébr. 2:14, 15). Dépawfwa, i ka pousé sèwten moun mennasé-nou pou fè-nou ba Jéova do. É dòt fwa osi, lèwvwè vi an nou an danjé, i ka pwofité dè sa pou fè-nou fè dé biten ki pa annakò èvè prensip a Labib. Pa ègzanp, i pé pousé sé mèdsen-la mèt présyon asi nou. I pé pousé fanmi an nou mèt présyon asi nou osi pou nou pé sa pran san. Men si nou té ka fè sa, sa té’é vé di kè nou pa ka rèspèkté lwa a Bondyé asi sa. Oben, i pé pousé on moun pran tèt an nou pou nou pé sa aksèpté on rimèd ki pa annakò èvè prensip a Labib.

17. Dapré Women 8:37-39, pou ki rézon nou pa dwètèt pè lanmò ?

¹⁷ Sa sèten, nou pa anvi mò men nou sav kè si sa té ka rivé, Jéova pa té’é jen arété enmé-nou (li Women 8:37-39). Lèwvwè zanmi a-y ka mò, Jéova ka sonjé-yo konsi yo té vivan toujou (Lik 20:37, 38). A pa ti présé i présé résisité-yo ! (Jòb 14:15). Pou nou té pé sa « ni lavi étèwnèl », i péyé sa chè toubònman ! (Jan 3:16). Sa ka montré-nou jan i enmé-nou é jan i ka sousyé-y dè nou. Alò, olyé nou lagé-y lèwvwè nou malad oben lèwvwè vi an nou an danjé, nou ka kouri owa a-y pou i pé sa konsolé-nou, pou i pé sa ban-nou sajès é pou i pé sa ban-nou fòs. Sé ègzaktèman sa Valérie é mari a-y fè (Sòm 41:3).

18. Ka ègzanp a Valérie ka aprann-nou ?

¹⁸ Valérie té ni 35 an lèwvwè yo dékouvè kè i té ni on kansè ki té ra toubònman. Kansè-lasa pa té ka jouwé èvè moun. Valérie té pè mò ; men an-nou vwè kijan lanmou-la i té ni la pou Jéova édé-y janmbé sa ki té ka fè-y pè. Mi sa i ka rakonté : « Lè an aprann kè an té ni on kansè, sa fè ki mwen ki mari an mwen on chòk. Si yo pa té ka opéré-mwen an té’é mò. An vwè plizyè dòktè, men yo pa té dakò pou opéré-mwen pas an pa té vé pran san. A pa ti pè an té pè ! Men an té vé rèspèkté lwa a Bondyé. Alò, an té byen désidé a pa pran san. Toutolon a vi an mwen, Jéova  montré-mwen kè i enmé-mwen é i montré-mwen sa plizyè fason diféran. Aprézan, an té ni lokazyon montré Jéova kè an enmé-y osi. Chakfwa on mèdsen té ka vin vwè-mwen pou ban-mwen on mové nouvèl, sa té ka ban-mwen plis balan pou an té chèché a fè Jéova plézi. An pa té vé lésé Satan gangné. Anfinaldikont, yo opéré-mwen é yo pa ban-mwen san. Opérasyon-la réyisi. Sé vré, tout sé pwoblèm-la an té ni la pa disparèt, men Jéova toujou ban-nou sa ki té fo-nou. Pa ègzanp, on wikenn avan yo té di-mwen kè an té ni on kansè, nou vwè awtik-la “Affrontons les difficultés de la vie avec courage c” adan réinyon a lasanblé-la. A pa ti byen awtik-lasa fè-nou dibyen ! Nou li-y é nou rèli-y. Grasa dé bon ti awtik konsa é grasa sé bon labitid-la nou té ni la pou rété bon bon zanmi èvè Jéova, mwen é mari an mwen nou rété kalm é sa édé-nou pran bon désizyon. »

19. Ka ki ké rivé talè ?

¹⁹ Onlo krétyen ki ka viv toupatou asi latè jwenn dé sitiyasyon ki té rèd toubònman. É grasa Jéova yo rivé about a sé sitiyasyon-lasa, kifè yo pa démòd douvan Satan (1 Pyè 5:8, 9). Vou osi ou pé rivé fè sa ! Talè, Jéova ké mandé Jézi é séla ki ka dirijé èvè-y la « détwi travay a Dyab-la » (1 Jan 3:8). A moman-lasa, sèwvitè a Bondyé pé’é pè ayen é ayen « pé ké fè-yo pè » nonplis (Izayi 54:14 ; Miché 4:4). Men annatandan, fò-nou fè tousa nou pé pou nou pa lésé sa ki ka fè-nou pè pran lanmen asi nou.

20. Ka pou nou fè pou janmbé sa ki ka fè-nou pè ?

²⁰ Nou sèten kè Jéova enmé-nou é kè i vé pwotéjé-nou. Fò-nou mèt sa fon an tèt an nou é fò-nou fè tousa nou pé pou nou kwè adan sa a san pou san. Pou sa, an-nou pran tan réfléchi asi sa Jéova fè pou édé sèwvitè a-y an tan lontan é an-nou palé dè sa alantou an nou. Anplisdisa, an-nou fè tousa nou pé pou sonjé sa Jéova ja fè pou nou pèwsonèlman, lèwvwè nou té anba éprèv. Wi, Jéova pé édé-nou janmbé sa ki ka fè-nou pè (Sòm 34:4).