Pou nou fè Jéova plézi, fò-nou ni lafwa. Men Labib ka di kè « lafwa a pa on biten toutmoun ni » (2 Tés. 3:2). Lè lapòt Pòl maké sa, i té ka palé dè « moun ki malfétè é ki méchan » é ki té ka pèwsékité-y. Men sa i di asi lafwa pé konsèwné dòt moun ankò. Sèwten moun ka rèfizé kwè kè tin on Bondyé ki kréyé tout biten (Wom. 1:20). Ni dòt ki ka di kè yo ka kwè kè ni on biten oben on moun ki pi puisan ki lézimen. Men menmsi yo ka kwè adan sa, sa pa ka sifi pou fè Jéova plézi.

Fò-nou sèten kè Jéova ka ègzisté é kè i sé sila ki ka rékonpansé moun ki ni on fwa ki solid (Ébr. 11:6). Pou nou pé sa ni on fwa konsa, nou bizwen lèspri sen a Bondyé. É pou Jéova ban-nou lèspri sen a-y, fò-nou priyé-y pou nou mandé-y li (Lik 11:9, 10, 13). É sa enpòwtan kè nou li Pawòl a-y osi, pas sé èvè lèspri sen a-y i sèvi pou fè-yo maké Labib. Aprésa, fò-nou médité asi sa nou li é fò-nou éséyé mèt sa nou aprann an pratik. Si nou ka fè sa, nou ké lésé lèspri sen a Jéova aji adan vi an nou é sa ké édé-nou ni on fwa ki kon tala Bondyé ka aksèpté la.