1-2. a) Dapré komandman a Jézi nou ka touvé an Matyé 28:18-20, ki misyon enpòwtan toubònman Jézi ba lasanblé krétyèn la ? b) A ki kèsyon nou kay réponn adan awtik-lasa ?

APRÉ rézirèksyon a-y, Jézi mandé disip a-y vin jwenn-li asi on montangn ki ka touvé-y an Galilé. Kifè, sé apòt-la té tou kontan sanblé koté-lasa (Mat. 28:16). Sé pétèt a moman-lasa kè Jézi « parèt douvan pliski 500 frè anmenmtan » (1 Kor. 15:6). Poukwa Jézi té pran mo èvè disip a-y ? Sé pas i té vlé ba-yo on misyon entérésan toubònman. I di-yo : « Donk, alé é fè disip pawmi moun a toutkalté nasyon » (li Matyé 28:18-20).

² Sé sé disip-la ki tann sé pawòl-la Jézi té di la ki vin fè pawti a lasanblé krétyèn la lè i démaré. Misyon pli enpòwtan la Jézi ba lasanblé-lasa, sété fè plis moun vin disip a Kris *. Jòdijou, toupatou si latè, sé vré krétyen-la adan plizyè dizenn milyé lasanblé é yo ni menm misyon-la toujou. Adan awtik-lasa, nou ké réponn a sé kat kèsyon-lasa : Poukwa fè disip sé on biten ki ni onlo enpòwtans ? Fè disip, ka sa ka mandé ? Ès tout sé krétyen-la ka jouwé on wòl adan aktivité-lasa ? É poukwa fò-nou ni onlo pasyans pou akonpli misyon-lasa ?

3. Dapré sa Jan 14:6 é 17:3 ka di, poukwa fè disip sé on biten ki ni onlo enpòwtans ?

³ Poukwa fè disip sé on biten ki ni onlo enpòwtans ? Paskè pou vin zanmi a Bondyé, fò-w disip a Jézi. Anplisdisa, moun ki ka suiv Lèkris ni on vi ki méyè dépi konnyéla é yo ni lèspwa viv pou touttan plita (li Jan 14:6 é 17:3). On biten ki sèten, sé kè Jézi ban-nou on misyon ki enpòwtan toubònman. Men nou pé pa fè-y tousèl an nou. Lè lapòt Pòl palé dè limenm é dè sèwten frè ki té ka kolaboré èvè-y, mi sa i maké : « Nou ka travay ansanm-ansanm èvè Bondyé » (1 Kor. 3:9). Jéova é Jézi ka fè-nou on gran lonnè, nou ki sé dé moun enpawfè. Pa vré ?

4. Ka ègzanp a Ivan é Matilde ka aprann-nou ?

⁴ Lè nou ka fè disip, sa pé mété onlo jwa adan tchè an nou. An-nou pran ègzanp a Ivan é madanm a-y, Matilde, ki ka rété an Kolonbi. Yo té ka préché pou Davier, on jennboug, ki di-yo : « An anvi fè chanjman an vi an mwen, men an pa’a rivé fè sa. » Davier té bòksè. Sé konsa i té ka gangné vi a-y. I té ka bwè é i té ka viv èvè on madanm, non a-y sé Erika. Men i pa té mayé èvè-y. Ivan ka èspliké : « Nou koumansé étidyé Labib èvè-y. I té ka rété adan on vilaj ontijan apa. Nou té kay vwè-y a bisiklèt. Fò-nou té pédalé bon enpé tan é sé chimen-la té plen labou. Lè Erika vwè kijan konpòwtèman a Davier é mantalité a-y té ka vin pi bon, i vin jwenn-li adan étid a-y. » Aprésa, Davier arété pran dwòg, i arété bwè é i arété fè labòks. É i mayé èvè Erika. Mi sa Matilde ka di : « An 2016, lè Davier é Erika pran batèm, nou sonjé kè, byensouvan, Davier té ka di : “An anvi fè chanjman an vi an mwen, men an pa’a rivé fè sa.” Nou pa té pé anpéché dlo koulé an zyé an nou. » Pa ni pon dout asi sa, lè nou ka édé lézòt vin disip a Kris, tchè an nou ka kontan toubònman.

5. Ka fò-nou fè an prèmyé pou fè disip ?

⁵ Pou fè disip, fò-nou koumansé pa chèché moun tchè a yo sensè (Mat. 10:11). Nou ka montré kè nou sé dé vré Témwen a Jéova si nou ka palé dè Jéova ba toutmoun nou ka kontré. Nou ka montré kè nou sé dé vré krétyen lè nou ka fè sa Kris mandé. Sé-y ki ban-nou lòd dè préché.

6. Ka ki pé édé-nou a ni pli bon rézilta an prédikasyon ?

⁶ Sèwten moun vréman anvi konnèt sé vérité biblik la, men ni onlo moun ki ka sanm sa mésaj-la pa ka entérésé-yo. Pétèt fò-nou ké ankourajé-yo pou ba-yo anvi aprann plis biten. Pou ni pli bon rézilta an prédikasyon, fò-nou préparé-nou byen. Chwazi dé tèm ki ké pi entérésan pou sé moun-la ou ké jwenn la. Aprésa, réfléchi pou vwè kijan ou ké koumansé on ti kozé èvè yo.

7. a) Kijan ou té’é pé koumansé on ti kozé èvè on moun ? b) Dapré-w, poukwa sa enpòwtan kè nou pran tan kouté sé moun-la é kè nou rèspèkté-yo ?

⁷ Pa ègzanp ou pé mandé on moun : « Ès an pé mandé-w avi a-w asi kèsyon-lasa ? Jòdijou, toupatou si latè, ni onlo moun ki ka rankontré menm pwoblèm ki nou. Men pou réglé tout sé pwoblèm-lasa, ès ou pa’a di fò-nou té’é ni onsèl gouvènman pou dirijé toutlatè ? Ka ou ka di asi sa ? » Aprésa, ou pé pran Danyèl 2:44 é fè on ti kozé èvè moun-la asi  vèwsé-lasa. Oben ou té’é pé di : « Sèlon vou, ki méyè métòd ki ni pou ba on timoun on bon édikasyon ? An té’é byen enmé ni avi a-w asi sa. » Apré, montré-y Détéwonòm 6:6, 7. Kèlkèswa tèm-la ou chwazi la, sonjé sé moun-la ki ké kouté-w la. Éséyé imajiné ki byenfé sé moun-lasa ké ni lè yo ké konnèt sa Labib ka anségné vréman. Lè ou ka palé èvè sé moun-la, fò-w pran tan kouté-yo byen é fò-w ni rèspé pou sa yo ka di. Sa enpòwtan toubònman. Sé konsa ou ké rivé konprann sé moun-la plibyen, é sèten yomenm osi ké kouté-w pi fasilman.

8. Poukwa fò-nou kontinyé viré vwè moun nou ja vwè ?

⁸ Pétèt fò-w ké viré vwè on moun plizyè fwa avan i aksèpté étidyé Labib. Sa ka mandé onlo tan é onlo éfò. Poukisa ? Paskè sé moun-la pa toujou akaz a yo oben yo pa toujou disponib pou kouté-nou lè nou ka viré vwè-yo. Anplisdisa, pétèt ou ké oblijé viré vwè on moun plizyè fwa pou i santi-y alèz èvè-w é pou i aksèpté étidyé Labib. Sonjé : on plant ké grandi pli fasilman si ou ni labitid wouzé-y. Menmjan-la, lanmou kè on moun ni pou Jéova é pou Lèkris ké pli fasil a grandi si nou ni labitid palé dè Labib èvè-y.

9-10. Pou touvé moun ki ni on tchè ki sensè, poukwa nou pé di kè chak pwoklamatè ni wòl a-y ?

⁹ Pou chèché moun ki ni on tchè sensè, chak pwoklamatè ni wòl a-y. Nou pé konparé aktivité-lasa èvè sa ki ka rivé lè yo ka chèché on timoun ki disparèt. Ankijan ? An-nou palé dè on biten ki fèt pou dè vré : On jou, on tigason ki té ni 3 an té akaz a-y é lèwgadé, i  pati é i pèd. Apépré 500 moun ay chèché-y. Anfinaldikont, apépré 20 èdtan apré tigason-la disparèt, on moun adan gwoup-la touvé-y adan on chan-mayis. Moun-lasa rèfizé kè yo di kè sété li ki té touvé tigason-la. I di konsa : « Sé paskè toutmoun travay ansanm-ansanm kè nou touvé tigason-la. »

¹⁰ Onlo moun kon timoun-lasa. Yo pa sav ka pou yo fè. Yo pa ni pon èspwa é yo té’é byen enmé yo édé-yo (Éféz. 2:12). Nou a pliski 8 milyon ka chèché moun tchè a yo sensè. Pètèt kè voumenm pé ké touvé ponmoun ki ka aksèpté étidyé Labib èvè-w. Men pétèt kè dòt pwoklamatè ki ka préché adan menm téritwa ki-w ké touvé on moun ki ké vlé konnèt sé vérité biblik la. Lè on frè oben on sè ka touvé on moun ki ka vin on disip a Kris apré, tout moun ki bay on pal pou touvé moun-la pé ni tchè-kontan osi.

11. Menmsi ou pa’a kondui pon étid biblik, kijan ou pé édé moun a vin disip a Jézi ?

¹¹ Menmsi aprézan, ou pa’a kondui pon étid biblik, vou osi, ou pé édé moun a vin disip a Jézi. Pa ègzanp, lè ou ka vwè on nouvo moun ka vin Lasal di Wayòm, ou pé akéyi-y é montré-w janti èvè-y. Si ou ka aji èvè lanmou épi-y, pétèt kè sa ké édé-y rann-li kont kè nou sé dé vré krétyen (Jan 13:34, 35). Lè ou ka bay on komantè adan sé réinyon-la, menmsi i toukout, sa pé aprann sé nouvo-la kijan pou yo palé dè fwa a yo on mannyè ki sensè é èvè rèspé. Ou pé ay préché èvè on nouvo pwoklamatè osi é ou pé édé-y sèvi èvè Labib pou anségné sé moun-la. Si ou fè sa, ou ké aprann-li imité Kris (Lik 10:25-28).

12. Ès fò-nou sé dé grangrèk pou fè disip ? Bay on ti èsplikasyon.

¹² Fò pa ponyonn adan nou kwè kè fò i sé on grangrèk pou fè disip. Poukwa nou ka di sa ? An-nou pran ègzanp a Faustina ki ka rété Bolivi. Lè i koumansé frékanté Témwen a Jéova, i pa té sav li. Dépi sa, i aprann li é i ka rivé li tibwen. Jòdijou, i batizé, é i enmé anségné lézòt. An jénéral, chak simenn, i ni 5 étid biblik i ka fè. Menmsi, pou lèmoman, majorité a étidyan a-y ka li pli byen ki-y, i ja édé 6 moun pran lèbatèm (Lik 10:21).

13. Menmsi nou byen okipé, ki byenfé sa ké pòté ban nou si nou fè disip ?

¹³ Onlo krétyen okipé toubònman pas yo ni onlo biten enpòwtan a fè. Magrésa, yo ka touvé on tan pou étidyé Labib èvè moun é sa ka pwokiré-yo onlo jwa toubònman. An-nou pran ka a Mélanie ki ka rété an Alaska. I té ni on tifi a 8 an é i té ka lévé-y tousèl a-y. Anplis, i té ni on travay aplentan é fò i té okipé dè  papa-y ki té ni on kansè. Mélanie té ka rété on koté on tijan apa é sé-y tousèl ki té Témwen a Jéova koté-lasa. I té ka priyé Jéova touttan pou mandé-y fòs pou ay préché menmsi té ka fè fwèt. A pa ti anvi i té anvi touvé on moun pou étidyé Labib èvè-y. I fin pa kontré Sara ki té kontan dékouvè toubònman kè Bondyé ni on non. Apré kèktan, Sara aksèpté étidyé Labib. Mi sa Mélanie ka di : « Lè lé vandrèdi swa té ka rivé, magré kò an mwen té krazé, mwen é fi an mwen, nou té kay fè étid-la kanmenm. Sa té ka fè-nou dibyen toubònman. Nou té enmé fè rèchèch pou touvé répons a kèsyon a Sara. É a pa ti kontan nou té kontan vwè-y vin zanmi a Jéova ! » Sara jwenn opozisyon, men i tchenbé rèd èvè onlo kouraj. I lésé Légliz a-y é i pran batèm.

14. a) Poukwa nou pé di kè moun ki ka fè disip ka touvé-yo kon maren-péchè ? b) Ki éfé pawòl a Pòl kè nou ka touvé adan 2 Timoté 4:1, 2 ni asi-w ?

¹⁴ Menmsi ou ni lenprésyon kè ou pa ni rézilta lè ou ka préché, pa dézèspéré. Sonjé kè Jézi di kè on moun ki ka fè disip ka touvé-y kon on maren-péchè. Moun ki maren-péchè pé rété ka atann bon enpé tan avan yo rivé trapé on ti pwason. Byensouvan, yo ka travay ta lèswa oben granbonnè maten, é pawfwa, fò-yo fè plizyé kilomèt an lanmè (Lik 5:5). Menmjan-la, sèwten pwoklamatè ka pasé bon enpé tan ka fè « lapèch » èvè onlo pasyans. Yo ka fè-y a diféran moman é diféran koté. Poukisa ? Pou yo pé jwenn moun pli fasilman. Séla  ki ka fè tout sé éfò-lasa ka ni tchè-kontan pas yo ka kontré moun kè mésaj-la ka entérésé. Ès ou té’é pé préché on koté é on moman an jouné-la sa ké pli fasil pou-w dè jwenn moun ? (li 2 Timoté 4:1, 2).

15. Poukwa fò-nou aji èvè pasyans lè nou ka étidyé Labib èvè on moun ?

¹⁵ Poukwa fò-nou ni pasyans lè nou ka étidyé Labib èvè on moun ? Paskè non sèlman fò-nou édé étidyan-la konnèt sa Labib ka anségné é enmé sa i ka aprann, men anplisdisa, fò-nou édé-y konnèt Jéova ki sé Lotè a Labib. Nou ké anségné-y sa Jézi komandé disip a-y fè, men anplis fò-nou édé-y konprann kijan i pé apliké komandman a Jézi an vi a-y. Lè i ka fè éfò pou mété prensip a Labib an pratik, fò-nou soutyenn-li èvè pasyans. Sèwten moun ka pran déotwa mwa sèlman pou yo rivé chanjé mantalité a yo é labitid a yo. Ni dòtmoun ki bizwen plis tan.

16. Ka ègzanp a Raúl ka aprann-vou ?

¹⁶ O Pérou, on misyonè aji èvè onlo pasyans épi on étidyan a Labib, é sa pèwmèt-li trapé bon rézilta. Mi sa i ka di : « An té ja étidyé 2 liv èvè Raúl. Magrésa, i po’o té jen rivé about a sèwten difikilté. I té ka jwenn gwo pwoblèm an mennaj a-y, i té enmé di vyé pawòl é timoun a-y té ni dimal a rèspèkté-y. Men konm i té ka vin réinyon chak simenn, an kontinyé pasé vwè-y pou édé-y, li èvè fanmi a-y. Pliski 3 an apré prèmyé fwa-la nou jwenn la, i fin pa fè sa ki fo pou pran batèm. »

17. Ka nou kay vwè adan pwochen awtik-la ?

¹⁷ Jézi di-nou « alé é fè disip pawmi moun a toutkalté nasyon ». Pou akonpli misyon-lasa, byensouvan, fò-nou palé èvè moun ki pa’a pansé kon nou ditou-ditou. Sèwten adan yo pa adan pon rèlijyon oben yo pa’a kwè an Bondyé. Adan awtik-la ki ka vin la, nou ké vwè kijan nou pé palé dè bon nouvèl-la èvè moun konsa.