ADAN Labib, ou ka touvé onlo pawòl ki sòti an fon a tchè a moun « ki té ni menm jan dè santiman ki nou » (Jak 5:17). Pa ègzanp, nou pa ni dimal a konprann sa Pòl té vlé di adan sa i maké an Women 7:21-24 : « Lè an vlé fè sa ki jis, sé sa ki mové ki andidan an mwen. [...] Pòv boug ki an yé ! » Lè nou ka débat èvè pwòp défo an nou, sa ka rékonfòwté-nou dè sav kè sé sa on moun fidèl kon Pòl té ka pansé dè limenm.

Pòl ni lokazyon palé osi dè dòt santiman kè i té ni. Lè nou ka li Galat 2:20, nou ka vwè kè Pòl té sèten kè Jézi ‘té enmé-y é kè i bay pwòp vi a-y pou-y’, pèwsonèlman ! Ès nou ni ‘menm jan dè santiman’ ki Pòl ? Pétèt kè a pa toutlè.

Si nou ni lenprésyon kè nou pa vo ayen pas nou fè péché grav dan lèpasé, délè, nou pé ni dimal a kwè kè Jéova enmé-nou é kè i padonné-nou. É sa pé pi rèd ban nou ankò dè vwè sakrifis a ranson-la kon on kado Jézi fè-nou pèwsonèlman. Ès vréman Jézi vlé kè nou vwè ranson-la kon on kado i fè-nou pèwsonèlman ? Si sé byen sa, ka ki pé édé-nou a vwè ranson-la konsa ? An-nou ègzaminé sé dé kèsyon-lasa.

Jézi vlé kè nou vwè sakrifis a-y kon on kado i fè-nou pèwsonèlman. Poukwa nou pé sèten dè sa ? Imajiné sa ki pasé adan Lik 23:39-43. On nonm maré asi on poto-siplis akoté a Jézi. Boug-la ka admèt kè i fè mové biten dan lèpasé. É sa i té fè la dwèt té grav toubònman, pas sé moun ki fè gwo krim yo té ka pini rèd konsa. Tèlman sitiyasyon a-y té ka angwasé-y, misyé-la ka sipliyé Jézi : « Sonjé-mwen lè ou ké vin adan wayòm a-w. »

Kijan Jézi réyaji ? Éséyé imajiné. Magré Jézi ka soufè bon soufè la, i ka éséyé mété tèt a-y on jan pou i gadé misyé-la an zyé. Menmsi i alagoni, Jézi ka souri ba boug-la é pou rasiré-y i ka di-y : « An ka di-w sa jòdla, ou ké èvè mwen adan paradi-la. » Jézi té’é pé fè boug-la sonjé tou senplèman kè « Gason a lòm [...] vin [...] pou bay vi a-y kon on ranson pou libéré onlo moun » (Mat. 20:28). Men olyé i fè sa, ou vwè kijan Jézi fè boug-la konprann jantiman kè sé pou-y osi pèwsonèlman i té kay bay vi a-y ? I palé konsi i té ka palé ba on zanmi lè i sèvi èvè dé mo kon « ou » é « mwen ». Lè Jézi pwomèt boug-la kè i té’é viv adan on paradi si latè, jan-la i palé ba-y la, i fè-y konprann kè sé on pwomès ki té ka konsèwné-y pèwsonèlman.

Pa ni pondout asi sa : Jézi té vlé fè boug-la konprann kè sakrifis a-y sé on kado Kris té ka fè-y pèwsonèlman. Si sé sa Jézi té vlé pou on malfétè ki poto’o ni lokazyon sèvi Bondyé, ou pa’a di kè sé sa i té’é swété pou on krétyen ki batizé é i ki ja ka sèvi Bondyé ? Alò, ka ki pé édé-nou kwè vréman kè nou pé bénéfisyé pèwsonèlman dè sakrifis a Jézi menmsi nou fè péché dan lèpasé ?

Jézi té ba Pòl on misyon : i di-y préché. Sa pèwmèt Pòl konprann kè Jézi té mò pou-y. Kijansa ? Mi sa Pòl èspliké : « An ni rèkonésans pou Jézikris, Ségnè an nou, li ki ban-mwen puisans. Pas  i vwè-mwen kon on moun ki fidèl lè i chwazi-mwen pou préché, alòskè a lèpòk, an té on moun ki ka di bétiz asi Bondyé, on moun ki ka pèwsékité moun é on nonm ki pa ni pon rèspé pou ponmoun » (1 Tim. 1:12-14). Magré tout bétiz Pòl té ja fè, Jézi bay misyon-lasa kanmenm. Kifè, sa rasiré Pòl toubònman. I konprann kè Jézi té ka padonné-y, kè i té enmé-y é kè i té ka fè-y konfyans pèwsonèlman. Menmjan-la, Jézi ba nouchak pèwsonèlman on misyon pou nou akonpli : préché bon nouvèl la (Mat. 28:19, 20). Ès misyon-lasa ka édé-nou konprann kè Jézi mò pou nou pèwsonèlman osi ?

Albert rété èskominyé pannan prèskè 34 lanné, é pa ni lontan dè sa, i wouvin aka Jéova. Mi sa i ka èspliké : « An pa ka rivé oubliyé mové biten an fè dan lèpasé. Men lè an ka préché, an ni menm santiman ki lapòt Pòl. An ka santi kè Jézi ban-mwen misyon-lasa pèwsonèlman. Sa ka ban-mwen fòs é sa ka édé-mwen vwè-mwen, vwè vi an mwen é vwè dèmen on mannyè ki pozitif » (Sòm 51:3).

Avan Allan té vin konnèt lavérité, i té ka fè onlo krim é i té vyolan toubònman. Mi sa i ka admèt : « Jousalè, an ka sonjé tout mové biten kè an fè moun. Délè, sa ka kasé dé bra an mwen. Men an ka di Jéova mèsi padavwa i ka pèwmèt kè on péchè kon mwen anonsé dòt moun bon nouvèl-la. Lè an ka vwè jan moun ka réyaji lè yo ka tann bon nouvèl-la, sa ka fè-mwen vwè kijan Jéova bon é kijan i plen lanmou. An ka santi kè i ka sèvi èvè mwen pou édé moun ki ka soufè pas yo té ka menné menm jan dè vi ki mwen. »

Lè nou ka préché, nou ka fè on bon biten é sa ka pèwmèt-nou ni dé bèl lidé an tèt an nou. Sa ka rasiré tchè an nou pas sa ka montré-nou kè Jézi padonné-nou, kè i enmé-nou é kè i ni konfyans adan nou.

Touttan ou vwè sistèm a Satan ké la, pétèt kè tchè an nou ké kontinyé kondanné-nou pou érè nou fè dan lèpasé. Ka ki ké édé-nou goumé èvè sé mové santiman-lasa ?

On sè, non a-y sé Jean, ka soufè pas i ka santi-y koupab parapòt a sa i fè lè i té jenn. Lè i té èvè fanmi a-y é lè i té kay Lasal, sété on zanj, alòskè lè i té déwò, i té ka menné on vyé jan dè vi. Mi sa i di : « Ni on lidé an enmé onlo. Sé sila ki ka di kè “Jéova pli gran ki tchè an nou”. » (1 Jan 3:19, 20). Nou osi nou pé santi-nou myé pas nou sav kè Jéova é Jézi ka konprann kè nou sé dé péchè. Pa jen oubliyé sa : yo bay ranson-la èvè onlo lanmou ba moun ki rèpanti-yo, a pa ba moun pawfè (1 Tim. 1:15).

Lè nou ké sonjé bèl vérité-lasa, sa ké trankilizé tchè an nou. Pou nou rivé fè sa, toupannan nou ka priyé, an-nou pran tan réfléchi asi jan Jézi té ka aji èvè moun enpawfè. É an-nou fè tousa nou pé pou fè travay a prédikasyon-la i ban-nou la afon. Konsa, kon Pòl, nou ké pé di : « Jézi “té enmé-mwen é i bay vi a-y pou mwen”. »