1. Poukwa nou bizwen préparé-nou pou pèwsékisyon-la ?

 AVAN jou-la i mò la, lavèy oswa, Jézi, Ségnè an nou, té ja di kè yo té ké hay toutmoun ki té’é vlé vin disip a-y (Jan 17:14). Jous alajouné jòdi, ni moun ki pa ka adoré Jéova ki ka pèwsékité sé krétyen fidèl la (2 Tim. 3:12). É on biten nou ja sav, sé kè pli fen a mond-lasa ké toupré rivé, pli lènmi an nou ké antré an lagè èvè nou (Mat. 24:9).

2-3. a) Anrapò èvè lafrous, ka nou dwètèt sav ? b) Ka nou ké vwè adan awtik-lasa ?

² Ka nou pé fè dépi konnyéla, pou nou paré lèwvwè pèwsékisyon-la ké rivé ? Nou pa bizwen imajiné tout kalté mové biten ki pé fèt. Paskè sinon, nou pé rivé a pran pè é a ni lenprésyon kè nou ka néyé anba sitiyasyon ki ka angwasé-nou. É anfinaldikont, sé danjé-la nou pè la pé rivé a fè-nou abandoné lavérité avan menm pèwsékisyon-la rivé (Pwov. 12:25 ; 17:22). Lafrous, sé on zàm kè « lènmi [an nou], Dyab-la », ka itilizé kont nou é zàm-lasa ka maché byen toubònman (1 Pyè 5:8, 9). Ka pou nou fè, dépi aprézan, pou nou vin pli fò ?

³ Adan awtik-lasa, nou ké vwè ka nou pé fè pou konsolidé lanmityé an nou èvè Jéova é osi poukwa sa vréman enpòwtan kè nou fè sa dépi alè. Anplisdisa, nou ké palé dè sa nou pé fè pou nou pé ni plis kouraj. É pou fin, nou ké vwè kijan pou nou réyaji lè moun hay-nou.

4. Dapré sa Ébré 13:5, 6 ka di, dè ki biten nou pé sèten é poukisa ?

⁴ Mèt sa fon an tèt a-w : Jéova enmé-w é i pé’é jen lagé-w (li Ébré 13:5, 6). Ni plizyè lanné dè sa, mi sa Tou dè Gad la té ka di : « Sé sé moun-la ki konnèt Bondyé plibyen la  ki ké fè-y plis konfyans lè ké ni éprèv. » Mi on bèl vérité mi ! Pou andiré lè yo ka pèwsékité-nou, fò-nou enmé Jéova onlo, fò-nou fè-y konfyans a san pou san é fò-nou toujou sonjé kè i enmé-nou èvè onlo tandrès (Mat. 22:36-38 ; Jak 5:11).

5. Ka ki ké édé-w santi kè Jéova enmé-w ?

⁵ Li Labib chak jou pou ou pé sa rapwoché-w dè Jéova (Jak 4:8). Toupannan ou ka li Bib a-w, konsantré-w asi kalité a Jéova ki ka touché tchè a-w. Fè on éfò pou rèsanti lanmou i ni pou-w, adan sa i di é sa i fè (Ègz. 34:6). Ni dé moun ki ni dimal a kwè kè Jéova enmé-yo paskè yomenm a yo po’o jen risivwè lanmou. Si sé ka a-w, chak jou, éséyé fè on lis a tousa Jéova ja fè ba-w pou montré-w mizérikòd a-y é bonté a-y (Sòm 78:38, 39 ; Wom. 8:32). Si ou pran tan réfléchi si sa voumenm ja viv é asi sa ou li an Bib-la, pétèt ni onlo biten Jéova fè pou-w ki ké vini-w a lèspri. Pli ou ké pran tan aprésyé sa Jéova ka fè, é pli lanmityé a-w èvè-y ké vin solid (Sòm 116:1, 2).

6. Sèlon Sòm 94:17-19, si ou ka priyé èvè tout tchè a-w kijan sa pé édé-w ?

⁶ Priyé touttan. Imajiné on tigason an bra a papa-y. Tèlman i ka santi-y ansékirité i pa pè rakonté papa-y tousa ki rivé-y an jouné-la, ki sé bon biten ki sé mové biten. Ou pé ni on lanmityé kon sila èvè Jéova si, chak jou, ou ka priyé-y èvè tout tchè a-w pou rapwoché-w dè-y (li Sòm 94:17-19). « Sa ou ni an tchè a-w, vidé-y kon dlo douvan Jéova » (Lam. 2:19). Kivédi, di Papa-w, ki plen lanmou, tousa ki ka fè-w pè é tousa ki ka angwasé-w. Si ou fè sa, ka i ké rivé ? Ou ké rèsanti sa Labib ka kriyé « lapé ki ka vin dè Bondyé, ki ka dépasé tousa on moun pé konprann » (Filip. 4:6, 7). Pli ou ké priyé Jéova konsa é pli ou ké rapwoché-w dè-y (Wom. 8:38, 39).

7. Poukwa fò-w sèten kè sa Bondyé pwomèt i ké fè, grasa wayòm a-y, ké vin on réyalité ?

⁷ Fò-w sèten kè Bondyé ké réyalizé sa i pwomèt grasa wayòm a-y (Nonb 23:19). Si ou ka douté dè sa, Satan é sé moun-la ki èvè-y la ké pé fè-w pè pli fasilman (Pwov. 24:10 ; Ébr. 2:15). Ka ou pé fè, dépi konnyéla, pou-w ni plis konfyans adan sa wayòm a Bondyé ké fè ? Pannan ou ka étidyé Labib dè koté a-w, pran on tan pou fè rèchèch asi sé pwomès-la Bondyé ké réyalizé la grasa wayòm a-y. Fè rèchèch osi asi sa ki ka fè kè ou sèten kè sé pwomès-lasa ké réyalizé. Ka sa ké pòté ba-w ? An nou pran ka a Stanley Jones b. Akòz dè fwa a-y, yo fè-y fè sèt lanné lajòl. Ka ki édé-y andiré sitiyasyon-lasa é rété fidèl ? Mi sa i ka èspliké : « Konm an té sèten kè Wayòm a Bondyé té ké vini, é  konm an pa jen douté dè sa, yo pa jen rivé raché sé vérité-la an tchè an mwen. » Si ou vréman sèten kè pwomès a Bondyé ké réyalizé, ou ké rapwoché-w dè Jéova é ou pé ké lésé lafrous pran lanmen asi-w (Pwov. 3:25, 26).

8. Ka nou pé aprann asi noumenm lè nou ka analizé jan nou ka vwè sé réinyon-la ? Bay on ti èsplikasyon.

⁸ Pran labitid ay réinyon. Réinyon an nou ka édé-nou rapwoché-nou dè Jéova. Valè-la nou ka ba-yo la pé édé-nou vwè si nou ké pé andiré pèwsékisyon-la ki ka vin la (Ébr. 10:24, 25). Poukwa nou ka di sa ? Ében, si nou ka lésé mwenn ti biten anpéché-nou ay réinyon jòdijou, ka nou ké fè jou-la sa ké vin danjéré pou nou dè réini-nou èvè frè é sè an nou ? Pawkont, si nou byen désidé ay réinyon, menmsi ni moun ka mennasé-nou pou anpéché-nou réini-nou, nou pé’é lésé-yo frenné-nou. Sé dépi alè pou nou kiltivé on lanmou ki fò pou réinyon an nou. Si nou enmé réinyon an nou, menmsi gouvènman-la mété on lwa ki ka défann-nou réini, ayen pé ké anpéché-nou kouté Bondyé olyé nou kouté lézòm (Akt 5:29).

9. Poukwa lè ou ka aprann sèwten vèwsé pa tchè, sé on bon mwayen pou-w préparé-w pou pèwsékisyon-la ?

⁹ Aprann pa tchè sé vèwsé-la ou pi enmé la (Mat. 13:52). On biten ki sèten, sé kè mémwa a-w pa pawfè, men Jéova pé sèvi èvè lèspri a-y ki puisan pou i édé-w sonjé sé vèwsé-lasa (Jan 14:26). Mi sa on frè yo té mété lajòl an Almagn dè Lès, é kè yo té fèmé tousèl a-y apré, ka di : « Érèzman an té ja aprann plizyè santenn vèwsé pa tchè ! Konm an té tousèl, an té pé pasé jouné an mwen ka réfléchi asi toutkalté sijé biblik. » Sé vèwsé-lasa édé frè-lasa rété toupré Jéova é andiré éprèv-la i jwenn la fidèlman.

10. Poukwa fò-w aprann pa tchè kantik é chanson ki ka ba Jéova louwanj ?

¹⁰ Aprann kantik é chanson ki ka louwé Jéova pa tchè é chanté-yo. Lè Pòl é Silas té lajòl, adan on vil yo té ka kriyé Filip, yo chanté louwanj kè yo té konnèt pa tchè pou yo té louwé Jéova (Akt 16:25). Frè é sè an nou ki té ka viv an Risi é kè yo té chayé pa fòs an Sibéri, ka lésé on bèl ègzanp pou nou osi. Kijan yo konsolidé fwa a yo ? Mi sa sè Maria Fedoun ka rakonté : « Nou chanté tout sé kantik-la  nou té ka sonjé la, séla ki té adan liv a kantik la. » I èspliké kè sé kantik-la ankourajé tout sé frè-la é édé-yo santi-yo pli pré Jéova. Ès sa ka ba-w plis fòs lè ou ka chanté sé kantik-la é sé chanson-la ou pi enmé la ? Alò, aprann-yo pa tchè dépi konnyéla ! (gadé ti karé-la «  Ban-mwen kouraj »).

11-12. a) Sèlon sa nou ka li an 1 Samiyèl 17:37, 45-47, poukwa David aji èvè kouraj ? b) Ki lèson enpòwtan ègzanp a David ka aprann-nou ?

¹¹ Pou nou tchenbé lè yo ka pèwsékité-nou, fò-nou ni kouraj. Si ou ka touvé ka manké-w kouraj, ka ou pé fè ? Sonjé kè véritab kouraj-la pa ka dépann dè hotè an nou, dè fòs an nou oben dè kapasité an nou. Sonjé lè David té jenn, i goumé èvè Golyat. Si sé pou nou konparé David èvè gran jéan-lasa, nou ké di kè David té toupiti, i té tou fèb é i pa té ni granzafè a zàm. I pa menm té ni on épé. Men, i té plen kouraj toubònman. Kifè, i pa fè ni yonn ni dé, i kouri pou ay goumé èvè jéan-lasa, ki té ni on manni blagè.

¹² Poukwa David té ni tousa kouraj ? Sé pas i té vréman sèten kè Jéova té èvè-y (li 1 Samiyèl 17:37, 45-47). David pa rété gadé kè Golyat té lontan pli ho ki-y. Sa i rété gadé sé kè Golyat sété on ti grennpousyè parapòt a Jéova. Ka istwa-lasa ka aprann-nou ? Nou ké ni kouraj si nou ni konfyans kè Jéova èvè nou é kè lènmi an nou sé ti grennpousyè parapòt a Jéova (2 Kron. 20:15 ; Sòm 16:8). Ka nou pé fè pou nou ni plen kouraj dépi konnyéla ?

13. Ka nou pé fè pou nou ni plis kouraj ? Bay on ti èsplikasyon.

¹³ On biten nou pé fè pou nou ni plis kouraj sé préché bon nouvèl a wayòm a Bondyé an piblik. Poukwa nou ka di sa ? Paskè lè ou ka préché, ou ka aprann fè Jéova konfyans é sa ka édé-w pa tranblé douvan lézòm (Pwov. 29:25). Menmjan kò an nou ka vin pli anfòm lè nou ka fè ispò, menmjan-la osi nou ka ni plis kouraj lè nou ka préché dè kaz-an-kaz, la ni moun ka pasé, adan alé-é-vini an nou oben on koté ni biwo èvè magazen. Dépi konnyéla, fò-nou fè sa ki fo pou nou ni plis kouraj pou nou préché. Konsa, si on jou gouvènman-la ka entèwdi aktivité an  nou, nou ké paré pou sitiyasyon-lasa é nou ké kontinyé préché (1 Tés. 2:1, 2).

14-15. Ka ègzanp a Nancy Yuen é ta Valentina Garnovskaïa ka aprann-nou ?

¹⁴ Ni 2 sè an nou ki fidèl é ki ni lokazyon aji èvè onlo kouraj toubònman. Nou pé aprann onlo dè ègzanp a yo. Yonn adan yo, sé sè Nancy Yuen c. I pa té ka miziré pliski on mèt 50, men a pa pousa i té pè moun. I té ka rèfizé arété préché bon nouvèl a wayòm la. Akòz dè sa, yo fè-y fè pliski 20 an lajòl an Chin. On jou, lapolis té ka entérojé-y é yo di-y kè, an tout péyi-la, « pa té ni ponmoun ki pli wòs ki-y ».

¹⁵ An Risi, yo mété Valentina Garnovskaya d lajòl a twa rèpriz. I fè 21 lanné lajòl antout. Pou ki rézon ? Konm i té byen désidé a kontinyé préché, sé otorité-la di kè i sé « on délenkan ki vréman danjéré ». Poukwa sé dé madanm fidèl lasa té ni kouraj konsa ? Sé paskè yo té sèten kè Jéova té èvè yo.

16. Ka ki nésésè pou ni vré kouraj-la ?

¹⁶ Kon nou ni lokazyon vwè talè-la, pou ni plis kouraj, fo pa nou konté asi pwòp fòs an nou oben anlè kapasité an nou. Olyé dè sa, fò-nou sèten kè Jéova èvè nou é kè sé-y ki ka goumé pou nou (Dét. 1:29, 30 ; Zak. 4:6). Mi sé sa ki nésésè pou ni vré kouraj-la.

17-18. Ki avèwtisman Jézi bay nou ka touvé adan Jan 15:18-21 ? Bay on ti èsplikasyon.

¹⁷ Nou byen enmé lè moun ka rèspèkté-nou, men fo pa nou mèt an tèt an nou kè nou pa vo ayen pas sèwten moun pa enmé-nou. Jézi di : « Tchè-kontan pou zòt lè moun hay-zòt, lè yo vé pa vwè-zòt ankò, lè yo ka jiré-zòt é yo ka sali non a zòt, akòz dè Gason a lòm » (Lik 6:22). Ka Jézi té vlé di pa la ?

¹⁸ Jézi pa té vlé di kè sé krétyen-la té’é kontan pas moun hay-yo. Non. Men i té sav byen ka i té’é fèt. Nou pa’a fè pawti a mond-lasa. Adan vi an nou, nou  ka apliké sa Jézi anségné é nou ka préché menm mésaj ki-y. Akòz dè sa, lèmond hay-nou (li Jan 15:18-21). Men nou, nou vlé fè Jéova plézi. Alò, si lézòm hay-nou pas nou enmé Pap’an nou, sa sé pwoblèm a yo.

19. Kijan nou pé imité ègzanp a sé apòt-la ?

¹⁹ Fo pa ou hont pòté non a Jéova akòz dè sa lézòm ka fè oben ka di (Mich. 4:5). Nou pé aprann a pa tranblé douvan lézòm lè nou ka pran tan pou ègzaminé ègzanp a sé apòt-la. On ti moman apré Jézi mò, yo té Jérizalèm. Yo té sav kè sé chef a rèlijyon juif la té hay-yo toubònman (Akt 5:17, 18, 27, 28). Men magrésa, yo té ka kontinyé ay an tanp-la chak jou é yo té ka fè moun konnèt kè yo sé disip a Jézi (Akt 5:42). Yo pa té ka lésé lafrous paralizé-yo. Nou osi, ni mwayen nou arété tranblé douvan lézòm si nou ka fè moun sav kè nou Témwen a Jéova ki sé an travay an nou, lékòl oben adan vwazinaj an nou (Akt 4:29 ; Wom. 1:16).

20. Poukwa tchè a sé apòt-la té kontan alòskè ni moun ki té hay-yo ?

²⁰ Poukwa tchè a sé apòt-la té kontan konsa ? Sé paskè yo té sav byen poukwa sé moun-la té hay-yo konsa. É pou yo, sété on lonnè, lè yo té ka maltrété-yo padawva yo té ka fè volonté a Bondyé (Lik 6:23 ; Akt 5:41). Plita, mi sa lapòt Pyè maké : « Menmsi zò ka soufè akòz dè sa ki jis, tchè a zòt kontan » (1 Pyè 2:19-21 ; 3:14). Si nou ka konprann byen kè sé paskè nou ka fè sa ki byen kè sé moun-la hay-nou, nou pé’é jen arété sèvi Jéova paskè moun hay-nou.

21-22. a) Ka ou byen désidé a fè pou préparé-w pou pèwsékisyon-la ? b) Ka nou ké vwè adan awtik-la ki ka vin la ?

²¹ Nou po’o sav kitan pèwsékisyon-la ké démaré ni kitan yo ké entèwdi aktivité an nou. Sèlman, sa nou sav sé kè nou pé préparé-nou dépi konnyéla é pousa, fò-nou konsolidé lanmityé an nou èvè Jéova, fò-nou fè ansòt pou nou ni plis kouraj é fò-nou aprann réyaji byen lè moun hay-nou. Sa nou ka fè konnyéla pou préparé-nou ké édé-nou kontinyé sèvi Jéova.

²² Men vinvwè yo ka entèwdi rèlijyon an nou ? Adan awtik-la ki ka vin la, nou ké ègzaminé déotwa prensip biblik ki ké édé-nou kontinyé sèvi Jéova menmsi yo entèwdi rèlijyon an nou.