1. Pannan lé dènyé lanné ki pasé, ki chanjman ki fèt adan sèwten péyi ?

 PANNAN plizyè milyé lanné, près toutmoun té adan on rèlijyon. Men dépi kèlkè dizenn dè lanné, ni on gwo chanjman ki fèt. Pi nou kay, é pi ni moun ki ka di kè yo pa adan pon rèlijyon. É adan onlo péyi b, sé lamajorité a sé moun-la ki an ka-lasa (Mat. 24:12).

2. Pou ki rézon ni tousa moun ki pa adan pon rèlijyon ?

² Poukwa ni dèplizanpli moun ki pa adan pon rèlijyon ? Ni sèwten, sé bòdé-apiyé ki an tèt a yo, é ni sa, lèspri a yo chajé èvè pwoblèm (Lik 8:14). Ni dòt ki pa’a kwè an Bondyé ankò. Ni dòt ankò ki ka kwè an Bondyé, men pou yo, rèlijyon sé on biten ki ja pasé dimòd. Pou yo sé on biten ki initil, ki pa ni pon lojik adan-y, é ki pa annakò èvè lasyans. Pétèt kè yo ka tann zanmi, pwofésè, moun an télé-la oben an radyo-la ka di kè si nou la, sé grasa Lévolisyon. Men yo pa gè ka tann ayen ki té’é pé pousé-yo a kwè kè Bondyé ka ègzisté. Ni sa osi, konpòwtèman a moun ki antèt a sé rèlijyon-la ka dégouté-yo padavwa ni onlo adan yo, sé pouvwa é lajan yo ka chèché. É adan sèwten péyi, gouvènman-la pa’a pèwmèt moun adoré Bondyé kon yo vlé.

3. Ka awtik-lasa ké édé-nou fè ?

³ Jézi mandé-nou fè disip « pawmi moun a toutkalté nasyon » (Mat. 28:19). Alò, kijan nou pé édé on moun ki pa adan pon rèlijyon pou i aprann enmé Bondyé é vin on disip a Jézi ? Fò-nou rèkonnèt kè lè nou ka préché mésaj-la ba on moun, jan-la i ka réyaji la pé ka dépann dè kilti a péyi-la i lévé adan-y la. Pa ègzanp, on moun ki grandi an Éwòp pé’é réyaji menmjan ki on moun ki lévé an Azi.  Poukwa ? Pas an Éwòp, ni onlo moun ki konnèt Bib-la tibwen, é yo ja tann-di kè sé Bondyé ki kréyé tout biten. Men pawkont an Azi, lamajorité a sé moun-la pa konnèt granzafè asi Labib oben yo pa konnèt ayen menm asi-y. É ni sa ki pa’a kwè kè ni on Kréyatè ka ègzisté. Awtik-lasa fèt pou édé-nou touché tchè a toutmoun nou ka jwenn an prédikasyon, kèlkèswa la yo sòti é kèlkèswa kwayans a yo.

4. Poukwa nou pé rété pozitif ?

⁴ Fò-w pozitif. Chak lanné, ni moun ki pa té adan pon rèlijyon avan é ki ka vin Témwen a Jéova. Onlo adan yo té ja ni on vi ki pwòp, é tout pakèt ipokrizi a sé moun-la ki antèt a sé rèlijyon-la té ka ba-yo malotchè. Ni dòt, ki té ka menné on vyé jan dè vi é fò-yo té fè éfò pou lagé tout vyé mès a yo. Jéova la èvè nou, kifè nou pé sèten kè i ké édé-nou touvé toutmoun ki ni « mantalité-la ki fo la pou ni lavi étèwnèl » (Akt 13:48 ; 1 Tim. 2:3, 4).

5. Byensouvan, pou ki rézon on moun ka byen vlé kouté-nou lè nou ka préché ba-y ?

⁵ Fò-nou janti é fò-nou fè atansyon a jan nou ka palé. Byensouvan, lè sé moun-la ka pran tan kouté-nou, a pa parapòt a sa nou ka di-yo, men sé parapòt a jan nou ka palé ba yo. Lè nou janti èvè yo é nou pa’a palé nenpòt jan ba yo, yo ka aprésyé sa. É yo enmé lè nou ka sousyé-nou dè yo vréman. Nou pa’a fòsé-yo kouté mésaj-la nou ka pòté ba yo la. Okontrè, lè yo ka ban-nou avi a yo asi larèlijyon, nou ka éséyé konprann poukwa sé konsa yo ka rézonné. Pa ègzanp, ni moun ki pa enmé palé dè rèlijyon èvè moun yo pa konnèt. Pou dòt, sa pa’a fèt dè mandé on moun adan ki biten i ka kwè. Ni dòt ankò ki vé pa yo vwè-yo ka li Labib, siwtou si sé èvè on Témwen a Jéova. Men kèlkèswa ka-la, nou ka éséyé konprann sa chak moun ka rèsanti (2 Tim. 2:24, nòt).

6. Kijan Pòl té ka adapté-y lè i té ka préché, é kijan nou pé imité-y ?

⁶ Ka nou pé fè si on moun pa alèz lè nou ka itilizé dé mo kon « Bib », « kréyasyon », « Bondyé » oben « rèlijyon » ? Nou pé fè kon lapòt Pòl. Nou pé adapté-nou lè nou ka palé ba yo. Lè Pòl té ka palé ba sé Juif la, i té ka sèvi èvè Lézékriti pou rézonné èvè yo. Men lè i té Laréopaj é kè i té ka kozé èvè sé filozòf grèk la, i pa fè-yo sav kè sa i té ka di té ka sòti adan Lézékriti (Akt 17:2, 3, 22-31). Kijan nou pé imité Pòl ? Si ou jwenn on moun ki pa’a kwè adan Labib, pétèt kè sa té’é myé kè ou pa di-y kè sé an Bib-la ou pran sa ou ka di la. Si ou ka santi kè moun-la ké jenné si yo vwè-y ka li on vèwsé a Labib èvè-w, fè sa onjan pou ponmoun pa suiv sa zò ka fè, pa ègzanp asi on tablèt.

7. An 1 Korentyen 9:20-23, Pòl lésé on bèl ègzanp ban nou. Ka nou té’é pé fè pou imité-y ?

⁷ Éséyé konprann sé moun-la é kouté-yo. Fò-nou éséyé konprann poukwa sé moun-la nou ka jwenn la ka rézonné kon yo ka rézonné la (Pwov. 20:5). An-nou pran ègzanp a Pòl. I lévé èvè sé Juif-la. Kifè, lè i té ka préché ba moun ki pa té Juif, sèten fò i té adapté-y, pas sé moun-lasa pa té konnèt granzafè, é délè ayen menm, asi Jéova é asi Lézékriti. Pétèt délè, fò-nou ké fè rèchèch oben palé èvè frè é sè a lasanblé an nou ki ni plis èkspéryans. Konsa, nou ké pé mété-nou an plas a sé moun-la ki an téritwa-la é nou ké konprann-yo pli byen (li 1 Korentyen 9:20-23).

8. Kijan nou pé koumansé on ti kozé asi Labib ?

⁸ Òbjèktif an nou sé dè touvé ‘moun ki byen dispozé pou kouté mésaj an nou’ (Mat. 10:11). É pou nou rivé fè sa byen,  fò-nou ankourajé sé moun-la a di-nou sa yo ka pansé é fò-nou kouté byen sa yo ka di. An Anglètè, ni on frè ki ka mandé sé moun-la avi a yo asi sa 2 moun-mayé pé fè pou vi a yo bèl. Oben i ka mandé-yo ka léparan pé fè pou lévé timoun a yo byen oben ankò ka ki pé édé on moun andiré lè i ka sibi on enjistis. I ka kouté répons a yo é apré i ka di : « Ka ou ka pansé dè konsèy-lasa, ki ni prèskè 2 000 an ? » É aprésa, san i sèvi èvè lèmo « Bib », asi téléfòn a-y i ka montré moun-la détwa vèwsé kè i té ja pran tan chwazi byen.

9. Ka nou pé fè pou édé on moun ki pa abityé palé dè Bondyé ?

⁹ Pou nou touché tchè a moun ki pa abityé palé dè Bondyé, nou pé palé-yo dè on sijé ki ka touché-yo vréman. Pa ègzanp, ni onlo moun ki ka rété èstèbèkwè lè yo ka vwè bèl biten ki adan lanati. Donk nou pé di-yo : « Sèten ou okouran kè byensouvan, lè on syantifik ka envanté on nouvo biten, sé kopyé i ka kopyé sa ki té ja ka ègzisté adan lanati. Pa ègzanp, moun ki ka fè mikro ka étidyé kijan zorèy an nou fèt. É sa ki ka fè kaméra ka étidyé kijan zyé an nou fèt. Lanati èstraòwdinè toubònman ! Sèlon vou, ka ki dèyè do a tousa ? Ès ou ka di sa parèt tousèl a-y, sé on moun ki kréyé-y, oben ni ondòt èsplikasyon ? » Apré nou pran tan kouté répons a moun-la, nou pé di-y : « Lè sé enjényè-la ka kopyé asi zòrèy an nou oben asi zyé an nou, nou pé mandé-nou asi kimoun yo ka kopyé an réyalité ? Ni on poèt ki viv an tan lontan é ki maké on biten an touvé vréman entérésan : “Sila ki fè zorèy-la, ès i pa’a tann ? Sila ki fè zyé-la, ès i pa’a vwè ? [...] Sé-y ki ka ba lézòm konésans-la !” (Sòm 94:9, 10). Sèwten syantifik tonbé dakò èvè pawòl a poèt-lasa. » Pou fin, nou pé montré moun-la on vidéo ki asi jw.org^® é ki ka touvé-y adan « Points de vue sur l’origine de la vie » (i adan PUBLICATIONS > VIDÉOS > INTERVIEWS ET TÉMOIGNAGES). Oben nou pé ba-y on bwochi La vie a-t-elle été créée ?, oben on bwochi Cinq questions à se poser sur l’origine de la vie.

10. Kijan nou pé koumansé on ti kozé èvè on moun ki pa enmé palé dè Bondyé ?

¹⁰ Près toutmoun té’é byen enmé kè lavi vin pli bèl. Men onlo moun pè kè Latè disparèt oben kè pa ni mwayen viv asi-y ankò. An Nòwvèj, ni on rèsponsab a siwkonskripsyon ki konstaté kè byensouvan, menmsi on moun pa enmé palé dè Bondyé,  sa pa’a déranjé-y dè palé dè sa ki ka fèt asi Latè. Apré i di moun-la bonjou, mi sa i ka di-y : « Ka ou ka pansé : Ou ka di on jou sitiyasyon-la ké vin pi bèl ? Pou sa fèt, asi kimoun pou nou konté : sé politisyen-la, sé syantifik-la oben asi ondòt moun ? » I ka pran tan kouté répons a moun-la byen é apré, i ka li oben i ka palé dè on vèwsé ki ka montré kè ni bèl biten ki ké fèt dèmen. Ni moun ki étoné lè yo ka li an Bib-la kè Latè pé’é jen disparèt é kè toutmoun ki bon ké viv anlè-y pou touttan (Sòm 37:29 ; Ékl. 1:4).

11. Poukwa fò-nou itilizé diféran prézantasyon, é kijan nou pé imité ègzanp a Pòl kè nou ka touvé an Women 1:14-16 ?

¹¹ Sa té’é byen kè nou sèvi èvè diféran prézantasyon pou koumansé on ti kozé èvè sé moun-la nou ka kontré la. Poukwa ? Pas chak moun diféran. Sa ki ka entérésé on moun pa oblijé entérésé ondòt. Ni dé moun sa pa’a pozé-yo pon pwoblèm dè palé dè Bondyé é dè Labib. Men ni dòt, fò-w ké palé dè dòt biten èvè yo avan ou palé dè Bondyé é avan ou wouvè Bib-la. Men kèlkanswa, fò-nou chèché a palé ba tout sòt dè moun (li Women 1:14-16). Fò pa nou oubliyé kè sé Jéova ki ka fè vérité-la grandi an tchè a toutmoun ki enmé sa ki byen (1 Kor. 3:6, 7).

12. Sèwten moun ki lévé an Azi pò’ò jen mandé-yo ès ni on Kréyatè ki ka ègzisté. Ka nou pé fè pou touché tchè a-yo ?

¹² Toupatou si latè, ni onlo pwoklamatè ki ka jwenn èvè moun ki sòti an Azi. Pawmi sé moun-lasa, ni sa ki té ka viv on koté gouvènman-la pa ka lésé moun adoré Bondyé kon yo vlé. Adan onlo péyi an Azi, onlo moun pò’ò jen chèché a sav si ni on Kréyatè ki ka ègzisté. Ni sa ki ka byen anvi konnèt plis asi Labib é ki ka aksèpté on étid biblik tousuit. Pawkont, ni dòt ki ka méfyé-yo, kifè yo on tijan pè entérésé-yo a sèwten lidé ki nouvo pou yo. Ka nou pé fè pou édé-yo ? Ni dé pwoklamatè ki plen èkspéryans ki touvé on bon métòd pou préché ba yo : yo ka koumansé kozé trankilman èvè-yo, yo ka montré-yo kè yo ka sousyé-yo dè yo vréman, é lè yo ka vwè kè sé lè bon moman, yo ka rakonté-yo kijan prensip a Labib édé-yo ni on vi ki pli bèl.

13. Ka ki pé ba sé moun-la anvi konnèt Labib ? (gadé imaj-la ki anlè po a jounal-la).

¹³ Ni onlo moun, prèmyé biten ki ka atiré-yo, sé sajès a sé konsèy-la ki an Bib-la é itilité a yo (Ékl. 7:12). On sè ki ka vizité moun ki ka palé chinwa mandaren a Nouyòk ka di : « An ka éséyé sousyé-mwen dè sé moun la é an ka pran tan kouté-yo. Si an vin sav kè pa ni lontan yo la, an ka mandé-yo : “Dépi ou déménajé, kijan ou ka santi-w ? Ès ou ja touvé travay ? Ès moun-isi ka aji byen èvè-w ?” » Déotwa ti kèsyon konsa pé ban-nou lokazyon palé dè sa Labib ka di. É lè sè-la ka vwè kè sé bon moman-la, mi sa i ka ajouté délè : « Sèlon vou, ki méyè biten nou pé fè pou nou antann-nou byen èvè lézòt ? Ès an pé montré-w on pwovèb ki an Bib-la ? I ka di : “Lè ou ka lévé on babyé, sé kon lè ou ka wouvè on vàn ; avan on gwo dézòd pété, woté kò a-w la jantiman.” Ès ou ka pansé kè konsèy-lasa pé édé-nou antann-nou byen èvè lézòt ? » (Pwov. 17:14). Dé ti konvèwsasyon konsa pé édé-nou vwè kimoun ki té’é dakò pou nou viré vwè-yo.

14. An Azi, ka on frè ka fè pou i édé moun ki pa’a kwè an Bondyé ?

¹⁴ É si on moun ka di-nou kè i pa’a kwè an Bondyé ? Ka nou pé di-y ? An Azi, ni on frè ki ka préché dépi on bèl moman pou moun ki pa adan pon rèlijyon. Mi sa  i ka èspliké : « Isi, lè on moun ka di-w kè i pa’a kwè an Bondyé, sa vlé di kè i pa’a kwè adan sé dyé-la kè moun a péyi-la ka adoré la. Kifè an ka èspliké-y kè an dakò pou di kè sé dyé-lasa, sé dé nonm kon noumenm ki fabriké-yo é kè yo pa ka ègzisté. Souvan, an ka li Jérémi 16:20 ba-y. Vèwsé-lasa ka di : “Ès on nonm pé fè pwòp dyé a-y ? A pa dyé sa !”. Aprésa, an ni ondòt kèsyon an ka pozé moun-la : “Kijan nou ka fè sav si on dyé ka ègzisté vréman oben si sé lézòm ki envanté-y ?” An ka kouté répons-la byen é la, an ka li Izayi 41:23 : “Di-nou ka ki ké fèt plita, konsa nou ké sav si zò sé dé dyé.” Aprésa, an ka pran on pwofési ki ka montré kè Jéova ka di ka ki ké fèt plita. »

15. Ka ègzanp a on frè ki ka viv an Azi dè Lès ka aprann-nou ?

¹⁵ An Azi dè Lès, ni on frè, lè i ka viré vwè on moun, i ka sèvi èvè prézantasyon-lasa. I ka di : « An ka montré-yo on konsèy plen sajès ki an Bib-la, déotwa pwofési ki ja akonpli oben sèwten lwa kè nou ka touvé adan linivè. Apré, an ka fè-yo rézonné asi sa, pou montré-yo kè dwèt ni on Kréyatè ki plen sajès. Dépi on moun ka konswa kè sé on biten ki posib, an ka koumansé montré-y ka Labib ka di asi Jéova. »

16. Dapré sa ki maké an Ébré 11:6 poukwa on moun ki ka étidyé Labib bizwen ni Lafwa, é ka nou pé fè pou édé-y konsolidé fwa-lasa ?

¹⁶ Lè nou ka étidyé Labib èvè on moun ki pa adan pon rèlijyon, fò-nou kontinyé édé-y kwè kè ni on Kréyatè (li Ébré 11:6). Anplisdisa, fò-nou édé-y ni on fwa solid adan Labib. Sa vlé di kè fò-nou ké répété sèwten vérité biblik plizyè fwa. Chakfwa nou ké ka fè étid a moun-la, pétèt kè fò-nou ké ba-y prèv ki ka montré kè Labib sé Pawòl a Bondyé. Kivédi, nou pé prévwa on ti moman pou palé dè on pwofési a Labib ki ja akonpli é dè itilité a sé konsèy-la ki adan-y la. Nou pé montré-y osi kè Labib toujou ka di lavérité lè i ka palé dè listwa é dè lasyans.

17. Si nou enmé sé moun-la, ki éfé sa pé ni asi yo ?

¹⁷ Nou ka édé sé moun-la vin disip a Kris lè nou ka montré-yo kè nou enmé-yo, ki yo adan on rèlijyon, ki yo pa adan ponyonn (1 Kor. 13:1). Lè nou ka anségné-yo, òbjèktif an nou sé montré-yo kè Bondyé enmé-nou é kè i vlé kè nou enmé-y osi. Chak lanné, plizyè milyé moun ka pran lèbatèm pas yo aprann enmé Bondyé, alòskè odépa, larèlijyon pa té ka gè entérésé-yo oben pa té ka entérésé-yo ditou. Alò rété pozitif, é kèlkèswa sé moun-la ou ka kontré la, montré-yo kè ou ka sousyé-w dè yo vréman. Pran tan kouté-yo. Éséyé konprann-yo. Èvè bèl ègzanp-la ou ka ba-yo la, montré-yo ka ki on disip a Kris.