An fèt Ozétazini (a Saint Paul o Minésota) an 1954. Fanmi an mwen pa té rich men nou té ni tousa i té fo nou. Nou té katolik. Nou té a 5 timoun é sé mwen ki 2^èm. Lè an té piti, an té k’ay adan on lékòl katolik é an té klèwjé. An pa té konnèt granzafè asi Labib. An té ka kwè kè ni on Bondyé ki kréyé toutbiten men an pa té ka vwè-mwen ka rantré adan pon rèlijyon piskè pou mwen sa pa té’é rapòté-mwen ayen.

An té ka fè étid an dwa, é pannan 1^é lanné-la, ni on Témwen a Jéova é madanm a-y ki vin sonné akaz an mwen. Konm an té ka lavé lenj, yo di-mwen jantiman kè yo ké wouvin ondòt jou. Lèwvwè yo wouvin, an té ni 2 kèsyon mwen té pozé-yo : « Poukwa sé méchan-la ka réyisi plis ki sé bon-la ? » é « Ka nou bizwen pou tchè an nou pé sa kontan ? » Yo ban-mwen on liv La vérité qui conduit à la vie éternelle é on bib Les Saintes Écritures — Traduction du monde nouveau. A lépòk, kouvèti a Bib-la té vèw é a distans ou té sav sé-y. An aksèpté on étid osi. É sa an aprann  wouvè zyé an mwen. On lidé ki mawké-mwen sé kè limanité vréman bizwen kè wayòm a Bondyé gouvèné-y. An té ka rann-mwen kont kè dominasyon a lézòm pa té ka pòté ayen dè bon é kè an mond-lasa ni plen moun ka soufè, ni onlo enjistis é ni onlo malè ki ka rivé.

Lè 1982 koumansé, an ba Jéova vi an mwen é tibwen plita an lanné-la an pran lèbatèm pannan on lasanblé, tèm a-y sé té « La vérité du Royaume ». Yo fè lasanblé-lasa o Civic Center ki té ka touvé-y a Saint Paul. On simenn apré, an viré menm koté-la, mwen té pasé on diplòm pou vin avoka o Minésota. Lè òktòb koumansé, yo di-mwen kè an ni diplòm an mwen ; konnyéla, an té pé travay antankè avoka.

Pannan lasanblé-lasa, an jwenn on frè non a-y sé té Mike Richardson. I té bétélit a Brooklyn (a Nouyòk). I fè-mwen sav kè yo kréyé on sèwvis ki ka édé lòwganizasyon rèspèkté lwa a péyi-la é ki ka défann sé frè-la douvan tribinal. Sé la an sonjé sa fonksyonnè étyopyen la té di an Akt 8:36, é an pozé-mwen kèsyon-lasa : « Ka ki ka anpéché-mwen mandé sé frè-la si yo bizwen on pal adan sèwvis-lasa ? » Kifè, an ranpli on dèmann pou an té sèvi an Bétèl-la.

Lè fanmi an mwen vin sav kè an vin Témwen a Jéova, yo pa té dakò èvè sa ditou. Pap’an mwen mandé-mwen si sé lè an ké ay travay ba Lawatchtower an ké rivé vin on gran avoka. Men an èspliké-y kè an té’é travay antankè volontè é kè yo té’é ban-mwen 75 dola pa mwa kon tout sélézòt bétélit-la.

Avan an té koumansé travay an Bétèl-la, fò an té réglé déotwa biten adan travay an mwen. Kifè, an koumansé sèwvis an mwen a Brooklyn an 1984. Yo mèt-mwen adan sèwvis-la ki ka okipé-y dè tousa ki ni on rapò èvè lajistis. Tousa an té aprann lè an té ka travay antankè avoka, té vréman itil adan sèwvis-lasa.

An novanm 1983, Témwen a Jéova achté on téat a Jersey City. Non a téat-lasa sé Stanley. Konm sé frè-la té ni lentansyon woufè tout élèktrisité-la é tout plonbri-la, yo mandé lanméri lotorizasyon pou yo fè sé travo-la. Yo pran randévou èvè moun a lanméri é sé frè-la èspliké-yo ké yo té ni lentansyon fè téat-la vin on Sal dasanblé. Men té ni on pwoblèm pas a Jersey City lwa-la té ka di kè ou pa ni dwa mété on batiman pou adoré Bondyé anmitan on vil. É téat a Stanley té ka touvé-y anmitan vil-la, on koté té ni enpé magazen. Sé pousa, Lanméri rèfizé sé dèmann-la nou té fè la. Alò, sé frè-la fè lanméri sav kè yo pa té dakò èvè désizyon-la i pran é yo mandé-y  ègzaminé dèmann a yo on dézyèm fwa. Men malérèzman, lanméri pa aksèpté fè sa.

Pannan prèmyé simenn an mwen o Bétèl, lòwganizasyon ay tribinal pou dépozé plent. Konm an rété 2 an ka travay an tribinal a Saint Paul é kè an té toufré lésé travay-lasa, an té ja ni labitid okipé-mwen dè biten konsa. Ni on avoka an nou ki fè-yo sonjé kè yo té ja fè diféran évènman an téat-lasa. Pa ègzanp, yo té ja ni lokazyon fè téat-lasa sèvi sinéma é yo jous sèvi èvè-y pou yo fè konsè a mizik. Alò, poukwa nou pa té’é ni dwa fè on lasanblé koté-lasa ? Tribinal-la trété afè an nou é i di kè vil a Jersey City té antò davwa i bizwen anpéché-nou adoré Bondyé kon nou vlé alòskè sé on biten nou andwa fè. I fè lanméri ban-nou tout sé lotorizasyon-la nou té mandé la. Jou-lasa, an koumansé vwè kijan Jéova ka béni tout éfò lòwganizasyon ka fè pou défann entéré a-y douvan lajistis. Jéova sèvi èvè mwen pou travay asi afè-lasa é a pa ti kontan an té kontan !

Sé frè-la fè on gwo travay pou yo té ranjé téat-la. Kifè, yo woumèt zélèv a 79^èm klas a Galaad diplòm a yo adan téat-lasa é lè 8 sèptanm 1985, téat-la vin sal dasanblé a Jersey City. Sa pa menm pran on lanné pou yo té fin sé travo-la. A pa ti kontan an té kontan kolaboré èvè Jéova adan domenn-lasa ! Konnyéla, tchè an mwen pi kontan ki lè an té ka travay an sistèm-la. An pa jen imajiné kè sé té koumansé an té ka koumansé travay pou Jéova ! Pas aprésa, Jéova itilizé-mwen pou travay asi onlo dòt afè.

Adan lézanné 80, souvantfwa, sé dòktè-la é sé lopital-la pa té ka rèspèkté volonté a sé Témwen-la. Sé Témwen-la té vé yo swagné-yo men yo pa té vé pran san. É sa té pi rèd ankò pou madanm ansent pas sé jij-la té ka di kè lè on madanm ansent i pa ni dwa rèfizé yo ba-y san. Pas pou yo, si manman-la té ka mò davwa i pa pran san, tibébé-la té’é touvé-y san manman.

Lè 29 désanm 1988, sè Denise Nicoleau touvé-y ka pèd onpakèt san lè i fè tigason a-y. Konm vi a-y té an danjé, sé dòktè-la té vé i aksèpté pran san. Men sè Nicoleau rèfizé. Lèlandèmen maten, lopital-la mandé on jij lotorizasyon pou yo ba sè-la san menmsi i pa dakò. Jij-la pa ba sè-la tan èspliké poukwa i vé pa pran san. I pa lésé mari a-y di pon mo nonplis. É i pa menm di-yo kè i otorizé lopital-la ba sè-la san.

Lè vandrèdi 30 désanm, moun a lopital-la ba sè-la san alòskè mari a-y é tout fanmi a-y ki té owa-y pa té dakò ditou-ditou. Lèswa-la menm, yo arété sèwten ansyen é plizyè moun an fanmi a sè Nicoleau pas dapré sa lopital-la di, tout sé moun-lasa mété-yo alantou a kouch a sè-la pou anpéché-yo ba-y san. Lèlandèmen menm a Nouyòk, yo té ja ka palé dè sa an tout kalté jounal kivédi an télé-la, an radyo-la é asi papyé.

Lèlendi maten, an ay vwè Milton Mollen, ki té  prézidan a pli gran tribinal-la. An rakonté-y sa i pasé é an byen fè-y konprann kè jij-la signé on otorizasyon pou ba sè-la san alòskè yo pa menm réyini toutmoun avan. Alò, jij-la di-mwen rèpasé adan biwo a-y laprémidi, koté 4 è-5 è, pou nou pé sa diskité dè sa ki pasé é pou nou ègzaminé sé lwa-la ki té ka konsèwné sitiyasyon-lasa. Rèsponsab an mwen, frè Philip Brumley, ay vwè jij-la èvè mwen. Jij Mollen mandé avoka-la ki té ka défann lopital-la vin an randévou-la osi. Lèwgadé, sa koumansé chofé ! Rivé onlè, frè Brumley maké on ti biten ban mwen asi kayé a-y ; i di-mwen ‘kalmé-mwen’. Lè an ka réfléchi, an ka rann-mwen kont kè sé té on bon konsèy, pas pi lòt avoka-la té ka palé, pi an té ka lévé cho mwen té montré-y kè i té antò.

Inè-d-tan apré, jij-la di-nou kè sé 1^é dosyé yo ké ègzaminé lèlandèmen menm. Pannan nou té ka sòti an biwo a jij-la, i di-nou kè lòt avoka-la té kay pran bon gaz lèlandèmen-la. Savédi kè lòt avoka-la té’é ni dimal a plédé afè-lasa. Sé konsi Jéova té ka trankilizé-mwen ; i té ka fè-mwen konprann kè nou té’é pé rivé a gangné pwosé-lasa. Jéova té ka itilizé-nou pou fè volonté a-y. É sa touché-mwen toubònman !

Nou té ka travay ta lannuit pou préparé sa nou té kay di. Konm tribinal-la pa té two lwen Bétèl a Brooklyn, lamajorité a moun ki té ka travay èvè nou ay apyé. Lèwvwè yo fin tann sa nou té ni a di, sé 4 jij-la èstimé kè fò pa yo té ba sè-la san. Kifè, Pli Gran Tribinal-la ba sè Nicoleau rézon. Anplisdisa, i montré kè on tribinal pa andwa réini-y pou trété on afè si sé moun-la ki konsèwné la pa la. I montré osi kè on tribinal pa ni dwa pran pon désizyon touttan i pa kouté sa malad-la ni a di. Sinon, sa té’é vé di kè i pa’a rèspèkté dwa a moun-la.

Tibwen tan apré, pi gran tribinal ki ni a Nouyòk ba sè-la rézon osi é i di kè i té andwa swagné-y san i pran san. An ni lokazyon défann sé Témwen-la 4 fwa adan dé gran tribinal pas yo pa té vé pran san. Sé tribinal-lasa té ka touvé-yo diféran koté Ozétazini. É a chakfwa, yo ban-nou rézon (gadé ti karé-la «  Plizyè afè nou gangné adan sé gran Tribinal-la »). Prèmyé afè-la nou gangné la sé ta sè Nicoleau. An Bétèl-la, an ni lokazyon travay èvè dòt avoka pou réglé pwoblèm a divòs oben pou sav ki paran ki ké gadé sé timoun-la. Nou travay ansanm osi pou té réglé pwoblèm a tè é pwoblèm ki ka konsèwné batiman.

Prèmyé fwa an jwenn Denise, madanm an mwen, i té divòsé é i té ka lévé 3 timoun tousèl a-y. I té ka travay pou i té pran swen a fanmi a-y é anmenmditan i té pyonyé. Lavi pa té fasil pou-y men i té byen désidé a sèvi Jéova. Sé on biten ki mawké-mwen toubònman ! An 1992, i ay a Nouyòk adan on lasanblé tèm a-y sé té « Porteurs de lumière ». Sé la an mandé-y si i té dakò pou nou té aprann konnèt-nou. É on lanné apré, nou mayé. Madanm an mwen té enmé Jéova é i té enmé ri osi. Sé vréman on bèl kado Jéova té fè-mwen. Touléjou Denise té ka fè-mwen dibyen (Pwov. 31:12).

Lè nou mayé, timoun a Denise té ni 11, 13, é 16 an. Konm an té vé vin on bon papa pou yo, an pran tan fè rèchèch adan piblikasyon an nou. An touvé bon ti konsèy pou moun ki mayé é ki té ja ni timoun èvè dòt moun avan. An fè tousa an té pé pou mèt sé konsèy-lasa an pratik. Tan-la pasé é nou jwenn difikilté men sé timoun-la fin pa konsidéré-mwen kon on zanmi yo té pé fè konfyans é kon on papa ki plen lanmou. A pa ti kontan an té kontan ! Lè zanmi a timoun an nou té ka vin akaz, nou toujou té ka kontan akéyi-yo. É sé té on plézi dè vwè kaz-la plen èvè jennmoun ki ni tout jénès a yo an kò a yo.

An 2013, Denise é mwen nou déménajé é nou ay viv o Wisconsin pou okipé dè paran an nou ki té ja ni on bèl laj. An konpranndèdi kè yo pa té’é gadé-mwen an Bétèl-la pas sitiyasyon an mwen chanjé. Men lèwgadé, yo di-mwen kè an ké pé kontinyé travay adan sèwvis-la an té yé la. Yo té ka kriyé-mwen dè tanzantan é an pa té k’ay pou lontan.

An sèptanm 2018, an konstaté kè an té toujou ni on biten an gòj an mwen ki té ka graté-mwen. Mèdsen an nou vizité-mwen men i pa té ka vwè ka i té ka fan’an sa. Kèktan apré, ondòt mèdsen di-mwen ay vwè on mèdsen a nèw. An janvyé 2019, mèdsen-lasa di-mwen kè an dwèt ni on maladi ki ra, é kè rivé onlè, sa té’é aji asi tout kò an mwen.

Twa jou apré, pannan an té ka fè paten a glas, an pran on so é pongnèt a men dwat an mwen kasé. Poutan, an té ja fè paten a glas tout vi an mwen ; an té on mèt-a-mannyòk adan sa. A moman-lasa, an rann-mwen kont kè kò-la té ka koumansé lagé-mwen. An pa té ka rivé kontwolé misk an mwen ankò. Maladi-la pa jouwé èvè mwen. Adan on ti moman, an pa té annéta palé, an té ni dimal a valé é pou déplasé-mwen sé té tout on bab.

An sèvi èvè èkspéryans an mwen antankè avoka pou soutyenn òwganizasyon a Jéova é an kontan sa toubònman ! An ékri plizyè awtik adan jounal ki fèt pou dòktè, avoka é jij. Anplisdisa, an fè enpé diskou onlo koté asi latè pou défann Témwen a Jéova pou yo ni dwa chwazi on trètman ki pa ni san adan é pou yo ni dwa rèfizé pran san lè yo ka fè on opérasyon. Men menmsi an ni lokazyon fè tousa, kon Lik 17:10 ka di, ‘an sé on èsklav, an pa mérité ayen. An fè sa pou an té fè’.