1. « Lavérité », ka sa yé ojis ?

« KIJAN ou vin konnèt lavérité ? » « Ès yo lévé-w adan lavérité ? » « Dépi konmen tan ou adan lavérité ? » Pétèt yo ja pozé-w sé kèsyon-lasa. Oben pétèt sé voumenm a-w ki ja pozé on moun sé kèsyon-lasa. Men « lavérité », ka sa yé ojis ? An jénéral, nou ka sèvi èvè mo-lasa pou palé dè kwayans an nou, dè adorasyon-la nou ka ba Jéova la oben dè jan nou ka viv. Moun ki « adan lavérité » konnèt sa Labib ka anségné é yo ka mèt prensip a Labib an pratik an vi a yo. Kifè, yo pa’a kwè adan sa sé fo rèlijyon ka anségné-yo ankò, é vi a yo pi bèl menmsi yo ka viv adan mond a Satan (Jan 8:32).

2. Dapré Jan 13:34, 35, ki prèmyé biten ki pé ba on moun anvi vin a lavérité ?

² Ki prèmyé biten ki ba-w anvi vin a lavérité ? Pétèt kè sé pas ou té ka touvé kè sèwvitè a Bondyé té ka konpòwté-yo byen (1 Pyè 2:12). Pétèt osi kè ou vwè kijan yo enmé lézòt. Sa ki touché onlo moun prèmyé fwa yo vin réinyon, a pa sa yo tann men sé lanmou-la yo vwè la. Sa pa ka étoné-nou pas Jézi té di kè yo té’é rèkonnèt disip a-y padavwa yonn té’é enmé lòt fò (li Jan 13:34, 35). Men a pa lanmou-lasa tousèl ki ké fè-nou ni on fwa ki solid. Nou bizwen plis ki sa.

3. Si sé yenki parapòt a lanmou-la sé frè é sè-la ka ban-nou la kè nou ni lafwa, ka ki té’é pé rivé ?

³ Frè é sè an nou enmé-nou fò. Men fò pa fwa an nou bazé yenki asi lanmou-lasa. Poukwa nou ka di sa ? Pas si nou ni fwa yenki parapòt a lanmou-lasa, nou pé rivé a pèd-li fasilman. Pa ègzanp, nou pé rivé a arété sèvi Jéova  pas on frè oben on sè fè on péché ki grav, siwtou si sé on ansyen oben on pyonyé. Nou pé rivé a arété sèvi Jéova osi pas on moun fè on biten ki fè-nou mal ou pas i vin on apòsta é kè i ka di kè a pa nou ki adan lavérité. An réyalité, pou fwa an nou solid, fò pa nou sèvi Jéova parapòt a sa moun ka fè, men pas nou konstwi on lanmityé ki solid èvè-y. Sé vré kè lanmou kè nou ka vwè adan pèp a Bondyé pé édé-nou ni lafwa. Men fò-nou pran tan étidyé Labib osi, fò-nou konprann sa nou ka aprann é fò-nou fè rèchèch pou nou sèten kè sa nou ka aprann sé lavérité. Fò-nou ‘vérifyé noumenm an nou’ kè Labib ka aprann-nou lavérité asi Jéova (Wom. 12:2).

4. Dapré Matyé 13:3-6, 20, 21, kijan sèwten moun ka réyaji lèwvwè yo ka jwenn éprèv ?

⁴ Jézi té di kè ni sèwten moun ki té’é ‘kontan’ aksèpté lavérité men douvan éprèv fwa a yo té’é fébli (li Matyé 13:3-6, 20, 21). Pétèt sé moun-lasa po’o konprann kè moun ki ka suiv Jézi ké jwenn éprèv (Mat. 16:24). Pétèt yo mèt an tèt a yo kè lè ou krétyen ou pa’a jwenn pwoblèm pas Bondyé ka pwotéjé-w é kè ou ka trapé yenki bénédisyon. Men adan mond-la nou ka viv la, noutout ké jwenn pwoblèm. Sitiyasyon an nou pé chanjé, kifè, pannan on moman, nou pé rivé a pèd jwa an nou (Sòm 6:6 ; Ékl. 9:11).

5. Lamajorité a frè é sè an nou ka montré kè yo sèten kè yo adan lavérité. Kijan yo ka fè sa ?

⁵ Lamajorité a frè é sè an nou ka montré kè yo sèten kè yo adan lavérité. Poukwa nou ka di sa ? Menmsi on frè ka fè-yo on biten ki ka fè-yo mal oben ka mal aji èvè yo, apapousa fwa a yo ka fébli (Sòm 119:165). Okontrè, pi yo ka jwenn éprèv, pi fwa a yo ka vin fò (Jak 1:2-4). Ka pou ou fè pou ni on fwa solid konsa ?

6. Grasa ki biten sé prèmyé disip-la té ni fwa ?

⁶ O 1^é syèk, sé disip-la té ni fwa grasa konésans-la yo té ni la asi Lézékriti é grasa ansègnman a Jézi kivédi « vérité a bon nouvèl-la » (Gal. 2:5). Vérité-lasa sé tout sé biten-la nou ka kwè la antankè krétyen. Pawmi sé kwayans-lasa, nou ka touvé sa yo aprann-nou asi ranson-la é asi rézirèksyon-la. Lapòt Pòl té sèten kè sé ansègnman-lasa sé lavérité. Kijan nou fè sav sa ? Pas i té ka sèvi èvè déotwa ‘pasaj ki adan Lézékriti’ pou ‘montré kè sa té nésésè kè Jézikris soufè é kè yo résisité-y’ (Akt 17:2, 3). Sé prèmyé disip-la té dakò èvè sé ansègnman-lasa é yo té ka mandé Bondyé lèspri sen a-y pou édé-yo konprann Pawòl a-y. Yo té ka pran tan vérifyé yomenm a yo kè sa yo té ka aprann-yo la té ka vin dè Pawòl a Bondyé (Akt 17:11, 12 ; Ébr. 5:14). A pa yenki paskè té ni lanmou adan pèp a Bondyé kè yo té ni fwa. É a pa paskè yo té ka antann-yo byen èvè sélézòt krétyen-la kè yo té ka sèvi Jéova. Men sé plito grasa « konésans a Bondyé, ki ègzak » kè yo té ni fwa (Kol. 1:9, 10).

7. Si nou ni fwa adan sa Labib ka anségné, kijan sa ké édé-nou ?

⁷ Vérité ki adan Pawòl a Bondyé pa’a chanjé (Sòm 119:160). Yo pa’a chanjé lè on moun fè-nou on biten ki fè-nou mal oben lè i fè on péché grav. É yo pa’a chanjé nonplis lèwvwè nou ka jwenn éprèv. Sé pousa, fò nou pran tan aprann sa Labib ka anségné é fò nou sèten kè sa i ka di sé lavérité. Menmjan on bato ki  byen maré pa’a chaviré menmsi ni tanpèt, si nou ni on fwa ki solid nou pé’é bigidi lèwvwè nou ké jwenn difikilté. Kijan nou pé fè pou nou pé sa sèten kè sa nou ka kwè sé lavérité ?

8. Dapré 2 Timoté 3:14, 15, Timoté té sèten kè i té adan lavérité. Kijan i fè sav sa ?

⁸ Timoté té sèten kè i té adan lavérité. Kijan i fè sav sa ? (li 2 Timoté 3:14, 15). Manman-y é gran-manman-y té aprann-li « sa ki [té] maké adan sé liv sakré la ». Men limenm osi dwèt pasé onlo tan ka étidyé sa ki té maké adan sé liv-lasa é sa dwèt mandé-y onlo fòs osi. Sé sa ki fè si i té sèten kè sé lavérité « ki [té] maké adan sé liv sakré la ». Tibwen plita, Timoté, manman-y é gran-manman-y vin konnèt sa Jézi té anségné. Lèwvwè Timoté vwè lanmou disip a Jézi té ni yonn pou lòt i dwèt touvé sa èstraòwdinè ! É a pa ti anvi i té anvi pasé on moman èvè sé frè é sè a lasanblé-la é i dwèt té anvi ankourajé-yo osi ! (Filip. 2:19, 20). An réyalité, a pa parapòt a moun i té ni fwa, men sé pas i té sèten kè sa i té ka aprann adan Labib sé té lavérité é sa ba-y anvi vin bon bon zanmi èvè Bondyé. Vou osi, fò ou étidyé Labib é fò sa klè an tèt a-w kè sa Labib ka anségné asi Jéova sé lavérité.

9. Ni omwen 3 vérité enpòwtan pou ou vérifyé voumenm a-w. Ki vérité ésa ?

⁹ Pou koumansé, ni omwen 3 vérité enpòwtan pou ou vérifyé voumenm a-w : 1) sé Jéova ki kréyé toutbiten (Ègz. 3:14, 15 ; Ébr. 3:4 ; Rév. 4:11) ; 2) sé Jéova ki sé lotè a Labib é i fè-y pou nou (2 Tim. 3:16, 17) ; 3) Jéova ni on pèp asi latè ki ka adoré-y é i chwazi Jézi pou dirijé-y. Pèp-lasa sé sé Témwen a Jéova la (Iz. 43:10-12 ; Jan 14:6 ; Akt 15:14). Pou ou pé sa sèten dè tout sé biten-lasa, ou pa oblijé konnèt tout Labib patchè ! Men sa ki pi enpòwtan sé kè ou pran labitid « rézonné » pou ou pi sèten ankò kè ou adan lavérité (Wom. 12:1).

10. Konnèt lavérité sé on biten, men, ki dòt biten pou nou fè ?

¹⁰ Lè ou ké sèten dè sé 3 vérité-la nou sòti vwè la, fò ou ké èspliké moun sa èvè Labib. Konsa, yo osi ké kwè adan sé vérité-lasa. Poukwa fò-nou ba-yo sé prèv-lasa ? Pas antankè disip a Jézikris, nou ni on rèsponsabilité. Fò-nou fè moun ki anvi kouté-nou konnèt sé vérité-la nou aprann la * (1 Tim. 4:16). Anplisdisa, pi nou ké fè moun konnèt sé vérité-lasa é pi nou ké ni fwa adan yo osi.

11. Ki ègzanp lapòt Pòl lésé ban-nou lè i té ka anségné moun lavérité ?

¹¹ Lè lapòt Pòl té ka anségné sé moun-la, i té ka sèvi èvè ‘Lwa a Moyiz é ta sé pwofèt-la’ pou ‘ba moun prèv pou yo kwè an Jézi’ (Akt 28:23). Kijan nou pé imité Pòl lè nou ka anségné sé moun-la lavérité ? Fò pa nou kontanté-nou dè montré-yo sa Labib ka di. Fò-nou édé étidyan an nou vin bon bon zanmi èvè Jéova é pousa, fò-nou édé-yo rézonné èvè Bib-la. Nou vé pa yo aksèpté sa Labib ka di pou fè-nou plézi, men sa nou vé, sé kè yo aksèpté mésaj-la pas yo vérifyé yomenm a yo kè sa yo aprann asi Bondyé an nou ki plen lanmou sé vréman lavérité.

12-13. Kijan sé paran-la pé édé timoun a yo rété adan lavérité ?

¹² Paran, nou sèten zò anvi timoun a zòt rété adan lavérité. É pétèt zò ka di-zòt kè si sé timoun-la ni bon frékantasyon adan lasanblé-la, yo ké fè pwogré. Men a pa paskè yo ké ni bon zanmi adan lòwganizasyon ké yo ké sèten kè yo adan lavérité. Fò-yo ni on lanmityé ki solid èvè Bondyé é fò-yo sèten kè sa Labib ka di sé lavérité.

¹³ Si zò vé fè timoun a zòt konnèt lavérité asi Bondyé, fò zòmenm a zòt ba sé timoun-la lègzanp, kivédi fò sé timoun-la vwè-zòt ka rantré an nannan a Bib-la. Anplisdisa, fò zò pran tan réfléchi asi sa zò ka aprann adan Labib. Konsa, zò ké pé aprann timoun a zòt fè menm biten. Fò-zò montré sé timoun-la osi kijan pou sèvi èvè zouti pou fè rèchèch kon JW Library pa ègzanp, menmjan zò té’é fè èvè on moun ki ka étidyé Labib èvè zòt. Konsa, zò ké aprann-yo enmé Jéova é zò ké édé-yo ni onlo rèkonésans pou èsklav fidèl é prévwayan la ki ka édé-nou konprann Labib (Mat. 24:45-47). A pa yenki montré pou montré sé timoun-la sé vérité enpòwtan la ki an  Bib-la ! Fò-zòt aprann sé timoun-la « biten a Bondyé ki fon » pou yo pé sa ni on fwa ki solid. É lè zò ké fè sa, fò zò ké tchenn kont dè laj a sé timoun-la é dè sa yo pé konprann (1 Kor. 2:10).

14. Poukwa fò-nou étidyé sé pwofési la ki an Bib-la ? (gadé ti karé-la «  Ès ou ké pé èspliké sé pwofési-lasa ? »).

¹⁴ Sé pwofési biblik la ni onlo enpòwtans adan Pawòl a Bondyé pas yo ka édé-nou ni on fwa ki solid an Jéova. Ki pwofési ki ka fè fwa a-w vin pi fò ? Pétèt ou ka sonjé séla ki ka palé dè « sé dènyé jou-la » (2 Tim. 3:1-5 ; Mat. 24:3, 7). Men ki dòt pwofési ki pé fè fwa a-w vin pi fò ? Pa ègzanp, ès ou té’é pé èspliké kijan sé pwofési-la ki an Danyèl chapit 2 é chapit 11 réyalizé é kijan yo ka kontinyé réyalizé jousalè * ? Si sé Labib ki édé-w ni on fwa ki solid, fwa a-w pé’é jen bigidi ! Sé sa ègzanp a frè an nou yo pèwsékité an Almagn ka aprann-nou. Yo fè-yo vwè onlo mizè pannan 2^èm Gè mondyal la. Menmsi yo pa té ka konprann pwofési a Labib anrapò èvè sé dènyé jou-la a san pou san, yo té ka fè Labib konfyans toubònman.

15-17. Lèwvwè gouvènman nazi la té ka pèwsékité frè an nou, yo té ja ni labitid étidyé Labib. Kijan sa édé-yo ?

¹⁵ Lè gouvènman nazi la té ka dirijé Lalmagn, yo voyé plizyè milyé adan frè é sè an nou adan déotwa kan nazi. Hitler é Himmler, ki té on gwo fonksyonnè, té hay Témwen a Jéova. Dapré sa on sè rakonté, on jou, mi sa Himmler di déotwa sè ki té adan on kan nazi : « Pétèt kè Jéova a zòt la ka gouvèné an syèl-la men asi latè sé nou ki ka menné ! Nou ké vwè kimoun ki ké lagé an prèmyé, si sé zòt oben si sé nou ! » Ka ki édé sèwvitè a Jéova rété fidèl ?

¹⁶ Étidyan a Labib té sav kè gouvènman a Jéova koumansé dirijé an 1914. Kifè,  yo pa té étoné lè yo jwenn gwo pèwsékisyon. Men yo té sèten kè pon gouvènman asi latè pa té’é anpéché Bondyé réyalizé pwojé a-y. Hitler pa té’é jen rivé fè vré adorasyon-la disparèt. I pa té’é jen rivé mèt on gouvènman ki pi puisan ki wayòm a Bondyé anplas. Frè an nou té sèten kè on jou, gouvènman a Hitler té’é disparèt.

¹⁷ Frè é sè an nou té byenfèt kwè sa, piskè kèlkè lanné apré, gouvènman nazi la fin pa disparèt. É Himmler ki té di kè sé yo ki ka menné asi latè té oblijé ay kaché kò a-y. Pannan i té ka chapé, i jwenn frè Lübke, on ansyen prizonyé é Himmler rèkonnèt-li. Moral a Himmler té a zéwo é mi sa i di frè-la : « Alò étidyan a Labib, ka i kay fèt konnyéla ? » Frè Lübke di-y kè sé Témwen-la té ja sav byen kè gouvènman nazi la té’é disparèt é kè yo té’é fin pa libéré sèwvitè a Jéova. Dabitid, Himmler té toujou ni on biten a di asi Témwen a Jéova, men kou-lasa i pé sèk. Tibwen tan apré, i suisidé-y. Ka sa ka aprann-nou ? Lèwvwè nou ka étidyé Labib, siwtou lè nou ka étidyé sé pwofési-la, sa ka édé-nou ni on fwa ki solid é lè nou ké douvan pèwsékisyon nou pé’é bigidi (2 Pyè 1:19-21).

18. Dapré Jan 6:67, 68, poukwa fò nou ni « on konésans ki ègzak » é poukwa fò nou « konprann tout biten byen menm » ?

¹⁸ Fò noutout aji èvè lanmou pas sé on kalité ki ka montré kè nou sé dé vré krétyen. Anplisdisa, nou bizwen « on konésans ki ègzak » é nou bizwen « konprann tout biten byen menm » (Filip. 1:9). Sansa, nou pé rivé a lésé ‘moun ki vé kouyonné-nou èvè ansègnman a yo’ pran tèt an nou é pawmi sé moun-lasa nou ka touvé apòsta osi (Éféz. 4:14). O 1^é syèk, ni plizyè disip a Jézi ki arété suiv-li, men lè sa fèt, lapòt Pyè té sèten kè sé Jézi ki té « ni pawòl ki ka bay lavi étèwnèl » é i di sa douvan toutmoun (li Jan 6:67, 68). Menmsi a épòk-lasa, i po’o té ka konprann tousa Jézi té ka anségné, i rété fidèl pas i té sav kè sé Bondyé ki té voyé Jézi. Vou osi, ou pé fè ansòt pou ni plis fwa adan sa Labib ka anségné. Si ou fè sa, fwa a-w ké rété solid kèlkèswa sa ki rivé é ou ké pé édé lézòt ni on fwa solid osi (2 Jan 1, 2).