On biten ki klè sé kè Jézi vin Gran Prèt an lan 29, lè i pran lèbatèm. Poukwa nou ka di sa ? Lè Jézi pran lèbatèm, sé konsi i té ka di Jéova : « Mi mwen ! An paré pou fè “volonté” a-w. » Sa té vé di kè i té dakò pou bay vi a-y pou péyé on ranson (Gal. 1:4 ; Ébr. 10:5-10). Yo ka konparé volonté a Jéova èvè on lotèl kivédi èvè lotèl-la ki an gran tanp èspirityèl la. Lè Jézi bay vi a-y sé té konsi i té ka sakrifyé vi a-y asi lotèl-lasa. Lotèl-lasa ka ègzisté dépi ou vwè Jézi pran lèbatèm. Kifè, gran tanp èspirityèl la osi ka ègzisté dépi batèm a Jézi pas lotèl-lasa ka fè pawti a tanp-la. Tanp-la ka rèprézanté tout dispozisyon Jéova pran grasa sakrifis a Jézi pou nou pé sa adoré-y konm i fo. Konm lotèl-la sé on biten ki ni onlo enpòwtans adan tanp-la, nou ka tou konprann kè volonté a Jéova sé on biten ki ni onlo enpòwtans adan gran tanp èspirityèl la osi (Mat. 3:16, 17 ; Ébr. 5:4-6).

Konnyéla, fò té mété on gran prèt adan gran tanp èspirityèl la. Sé pousa Jéova voyé ‘lèspri sen a-y é puisans a-y’ asi Jézi pou chwazi-y antankè gran prèt (Akt 10:37, 38 ; Mawk 1:9-11). Men ka ki ka pèwmèt-nou di kè Jézi vin gran prèt avan mò a-y é avan rézirèksyon a-y ? Ègzanp a Aawon é ta sélézòt gran prèt-la ki vin apré-y la ké édé-nou réponn a kèsyon-lasa.

Dapré sa Lwa a Moyiz té ka di, sé yenki gran prèt-la ki té ni dwa rantré an Pyès-la ki Pi Sen la an tabèwnak-la. É plita, sé konsa sa té ka pasé an Tanp-la osi. Té ni on rido ki té ka séparé Pyès-la ki Pi Sen la é Pyès-la ki Sen la. Sé yenki jou a Rékonsilyasyon-la kè gran prèt-la té ka pasé dèyè rido-lasa (Ébr. 9:1-3, 6, 7). Avan Aawon é sé prèt-la ki vin apré-y la té ‘travèsé rido-la’ ki té adan tabèwnak-la, fò Jéova té ja chwazi-yo é fò yo té ja ka fè travay a gran prèt a yo. Menmjan-la osi, fò yo té chwazi Jézi antankè Gran Prèt avan i té mò é sé lè i mò i travèsé ‘rido-la kivédi chè a-y’, pou i té ay viv an syèl-la (Ébr. 10:20). Sé pousa lapòt Pòl di kè, adan on prèmyé tan, Jézi vin ‘antankè gran prèt’ é kè sé aprésa ‘i rantré adan tant-la ki pli gran la é ki pli pawfè la ki pa fèt èvè men a nonm’, kivédi i rantré an ‘syèl-la limenm’ (Ébr. 9:11, 24).

Lè Jéova aksèpté nouvo alyans-la, alyans-lasa démaré tousuit. Lè Jézi monté an syèl-la, i parèt douvan Jéova èvè valè a vi pawfè la i ofè pou nou la. I té oblijé fè 1^é biten-lasa pou Bondyé té aksèpté nouvo alyans-la. Men té ni dòt biten a fè ankò. An-nou vwè tout sé biten-lasa ansanm !

On 1^é biten nou sòti vwè sé kè Jézi parèt douvan Jéova ; aprésa, i ofè Jéova valè a sakrifis-la i fè la ; é pou fin, Jéova aksèpté valè a san-la Jézi vèwsé la. Fò tout sé biten-lasa té fèt pou nouvo alyans-la té pé sa démaré.

Adan Labib, yo pa’a di-nou a ki moman ègzaktèman Jéova aksèpté valè a sakrifis a Jézi. Kifè, nou pé pa di ègzaktèman kitan Jéova aksèpté alyans-lasa é kitan i démaré. Pawkont, nou sav kè Jézi monté an syèl-la 10 jou avan Lapannkòt (Akt 1:3). Pannan ti moman-lasa, rivé onlè, i ofè Jéova valè a sakrifis a-y é Jéova aksèpté (Ébr. 9:12). Sa ki pasé pannan Lapannkòt 33 montré on mannyè ki klè kè Jéova aksèpté nouvo alyans-la (Akt 2:1-4, 32, 33). Nouvo alyans-lasa démaré an menm balan-la é a moman-lasa yo koumansé tchenn kont dè-y.

Pou nou rézimé, lè Jéova aksèpté valè a san a Jézi, i aksèpté nouvo alyans-la. Alyans-lasa démaré é sé a moman-lasa i fè sé krétyen wen-la rantré adan alyans-lasa. Kifè, sé a moman-lasa yo koumansé tchenn kont dè alyans-lasa ; Jéova sèvi èvè Jézi pou i té fè alyans-lasa èvè sé krétyen wen la. Sé Jézi ki sé Gran Prèt-la (Ébr. 7:25 ; 8:1-3, 6 ; 9:13-15).