1. Ka Jéova fè ba-w ?

KIJAN ou vin Témwen a Jéova ? Odépa, pétèt kè ou tann bon nouvèl-la grasa on fanmi a-w, grasa on kolèg-travay a-w, grasa on kanmarad-lékòl a-w oben pétèt grasa on moun ki vin préché akaz a-w (Mawk 13:10). Aprésa, ni on moun ki pasé onlo tan é ki fè onlo éfò pou étidyé Labib èvè-w. Grasa étid-lasa ou vin enmé Jéova é ou aprann kè i enmé-w osi. Jéova fè-w vin a lavérité, é konnyéla la, konm ou vin disip a Jézikris, ou ni lèspwa dè viv pou touttan (Jan 6:44). Sèten ou ka di Jéova mèsi davwa i sèvi èvè on moun pou fè-w konnèt lavérité é davwa i fè-w vin sèwvitè a-y.

2. Ka nou ké vwè adan awtik-lasa ?

² Konnyéla la, nou konnèt lavérité é nou asi chimen a lavi. Jéova ka ban-nou on bèl lonnè toubònman : nou pé édé dòt moun a pran chimen-lasa osi. Pou onlo adan nou, nou pa ni pon pwoblèm pou ay préché ba sé moun-la akaz a yo, men lèwvwè sé pou pwopozé on moun étidyé Labib èvè nou oben fè étid a moun-lasa, nou pé touvé sa rèd toubònman. Ès sé sa ou ka rèsanti ? Si sé sa, pétèt kè ou ké touvé sé konsèy-la ki adan awtik-lasa itil pou-w. Nou ké vwè ka ki ka ban-nou anvi édé sé moun-la vin disip a Jézi. Nou ké vwè osi kijan nou pé rivé about a sèwten difikilté ki té’é pé anpéché-nou étidyé Labib èvè on moun. Men pou koumansé, an nou vwè poukwa a pa enki préché pou nou préché men poukwa fò-nou anségné sé moun-la osi.

3. Poukwa nou ka préché ?

³ Lè Jézi té asi latè, i mandé disip a-y fè 2 biten. Prèmyèwman, i di-yo ay préché bon nouvèl a Wayòm-la é i montré-yo kijan pou fè-y osi (Mat. 10:7 ; Lik 8:1). Pa ègzanp,  Jézi di disip a-y ka pou yo té fè si on moun té ka kouté mésaj-la, men i di-yo ka pou yo té fè osi si on moun pa té vé kouté (Lik 9:2-5). Anplisdisa, Jézi èspliké kè disip a-y té’é préché pou onlo moun é onlo koté si latè lè i di konsa kè sé disip-la té’é bay on « témwagnaj ba tout sé nasyon-la » (Mat. 24:14 ; Akt 1:8). Ki sé moun-la kouté mésaj-la ki yo pa kouté-y, Jézi mandé disip a-y palé sé moun-la dè wayòm a Bondyé é palé-yo dè sa wayòm-lasa ké fè.

4. Fò noutout préché mésaj a Wayòm-la, men dapré Matyé 28:19-20, ki dòt biten fò-nou fè ?

⁴ Ki dézyèm biten Jézi mandé disip a-y fè ? I di disip a-y anségné moun pou yo pé sa fè tousa i mandé-yo fè. Sèwten moun té’é pé pansé kè sé enki sé prèmyé krétyen-la ki té dwètèt préché é anségné sé moun-la. Men ès sé konsa pou nou konprann sa ? Non, Jézi di kè aktivité enpòwtan lasa té’é kontinyé jous a jòdijou, kivédi « jiskatan fen a mond-la rivé » (li Matyé 28:18-20). Pétèt kè lè Jézi ba disip a-y misyon-lasa yo té a plis ki 500 ka kouté-y (1 Kor. 15:6). Lè Jézi ba Jan sé vizyon-la nou ka touvé adan liv a Larévélasyon, i montré on mannyè ki klè kè i té vlé kè tout disip a-y édé lézòt aprann konnèt Jéova (Rév. 22:17).

5. Dapré 1 Korentyen 3:6-9, Pòl sèvi èvè on ègzanp pou montré kè préché é anségné lyanné. Ki ègzanp ésa ?

⁵ Lapòt Pòl di kè travay a prédikasyon-la ka sanm travay a on kiltivatè. Menmjan ki on kiltivatè, fò pa nou kontanté-nou dè planté grenn sèlman, men fò-nou fè plis ki sa ankò. Mi sa Pòl fè sé Korentyen-la sonjé : « An planté, Apolòs wouzé [...] Zò sé chan-la Bondyé ka kiltivé la » (li 1 Korentyen 3:6-9). Konm nou ka travay adan ‘chan a Bondyé’, nou ka planté grenn, men anplisdisa nou ka wouzé-yo é toutlè nou ka gadé pou vwè jan yo ka pousé (Jan 4:35). Men nou ka rèkonnèt kè sé Bondyé ki ka fè sé grenn-la pousé.

6. Lè nou ka étidyé Labib èvè on moun, ka pou nou édé-y fè ?

⁶ Nou ka chèché moun ki ni « mantalité-la ki fo la pou ni lavi étèwnèl » (Akt 13:48). Pou édé sé moun-lasa vin disip a Jézi, fò-nou édé-yo 1) konprann sé vérité-la ki adan Labib, 2) kwè adan-yo é 3) mèt sa yo ka aprann an pratik (Jan 17:3 ; Kol. 2:6, 7 ; 1 Tés. 2:13). Noutout adan lasanblé-la pé édé sé étidyan-la : nou pé ba-yo on bèl ègzanp, nou pé montré-yo kè nou enmé-yo, é nou pé akéyi-yo byen lèwvwè yo ka vin lasal (Jan 13:35). Sa pé rivé kè on étidyan ka kwè adan sèwten biten dépi toupiti oben kè i ni sèwten labitid ki pa annakò èvè sa Labib ka di. Kifè, sa pé mandé moun-la ki ka étidyé èvè-y la pran onlo tan pou édé-y chanjé é sa pé mandé-y onlo énèwji osi (2 Kor. 10:4, 5). Lè nou ka étidyé Labib èvè on moun, sa pé pran plizyè mwa avan i pran i lèbatèm. Men sa vo lapenn kè on anségnan fè sé sakrifis-lasa.

7. Ka ki ka ba-w anvi préché é fè disip ?

⁷ Poukwa nou ka préché é poukwa nou ka anségné moun pou yo vin disip a Jézi ? Prèmyèwman, sé pas nou enmé Jéova. Lè nou ka fè tousa nou pé pou préché é fè disip, kon Jézi mandé-nou, nou ka montré Bondyé kè nou enmé-y (1 Jan 5:3). An-nou pran on ti tan pou réfléchi asi sa : konm ou enmé Jéova onlo, sa ba-w anvi préché dè kaz-an-kaz. Men ès sa té fasil  pou-w dè fè sa ? Pétèt kè non. Lè ou rivé douvan prèmyé pòt-la pétèt ou té ontijan pè ! Men konm ou té sèten kè ou té ka fè sa Jézi mandé-w fè, ou désidé suiv komandman-lasa. Pétèt kè piti-a-piti, ou koumansé préché dè kaz-an-kaz pi fasilman. Men imajiné aprézan kè fò ou étidyé Labib èvè on moun. Ka ou ka rèsanti ? Lè ou ka sonjé sa, ès ou ja ka swé kon banbou a sèl ? Pétèt sé ka a-w, men mandé Jéova édé-w. Mandé-y kouraj pou ou pé sa pwopozé on moun étidyé Labib èvè-w. É si ou fè sa, Jéova ké ba-w anvi fè disip.

8. Dapré Mawk 6:34, ki dòt biten ki ka ban-nou anvi anségné lézòt ?

⁸ Dézyèmman, konm nou enmé sé moun-la nou anvi anségné-yo lavérité. Pa ègzanp, on jou Jézi é disip a-y té las bon las la pas yo té préché onlo menm. Yo té touvé on ti koté pou pozé kò a yo, lèwgadé on gran foulmoun vin jwenn-yo. Jézi pran penn a sé moun-la, kifè i mété-y ka anségné-yo « onlo biten » (li Mawk 6:34). Magré i té las i pòté bon mannèv pou anségné-yo. Poukwa i fè sa ? Pas i té sav ka sé moun-la ki té an foul-la té ka rèsanti. I té vlé édé-yo pas i vwè jan yo té ka soufè é jan yo té bizwen on èspwa. Jòdla osi, sé moun-la ni pwoblèm é yo bizwen on èspwa menmsi lè ou ka gadé-yo ou pa té’é jen di sa. Yo kon mouton ki pèd é ki pa ni pon bèwjé pou gidé-yo. Pòl di kè dé moun konsa pa konnèt Bondyé é kè yo pa ni pon èspwa (Éféz. 2:12). Yo asi « chimen-la ki ka menné a ladèstriksyon » ! (Mat. 7:13). Lè nou ka sonjé jan sé moun-la an téritwa-la bizwen konnèt Bondyé, nou anvi édé-yo pas nou enmé-yo é pas nou ni konpasyon pou yo. É méyè biten nou pé fè pou édé-yo, sé pwopozé-yo kè nou étidyé Labib èvè yo.

9. Dapré Filipyen 2:13, kijan Jéova pé édé-w ?

⁹ Pétèt ou byen anvi mandé on moun étidyé Labib èvè-w, men ou an 2 lidé pas ou sav kè sa ké mandé-w onlo tan. Si sé ka a-w, di Jéova sa ou ka rèsanti. Mandé-y ba-w anvi touvé on étid é mandé-y édé-w pou ou pé sa kondui-y (li Filipyen 2:13). Lapòt Jan di-nou kè nou pé sèten kè Bondyé ké réponn a priyè an nou dépi yo annakò èvè volonté a-y (1 Jan 5:14, 15). Asiré sèten, Jéova ké ba-w anvi fè disip.

10-11. Ka ki té’é pé anpéché-nou étidyé Labib èvè on moun ?

¹⁰ Nou sav kè fè disip sa enpòwtan, men dépawfwa sa pé on jan rèd pou nou dè fè sa. An nou vwè ki difikilté nou pé jwenn é kijan nou pé rivé about a sé difikilté-lasa.

¹¹Lè nou pé pa fè sa nou té’é vé fè. Pa ègzanp, ni sèwten pwoklamatè ki ja ni on bèl laj oben santé a yo pa two flanbo. Ès sé ka a-w ? Si sé sa, sa ki rivé pannan péryòd a Covid-19 la pé aprann-vou onlo biten. Pannan péryòd-lasa, nou vwè kijan nou pé étidyé Labib èvè sèwten moun grasa téléfòn an nou oben grasa Entèwnèt ! Kifè, pétèt kè ou pé koumansé étidyé Labib èvè on moun toupannan ou akaz a-w trankilman. Anplisdisa, ni sèwten moun ki té’é byen vlé étidyé men lèwvwè sé frè é sè-la ka préché an jouné-la, yo, yo pa disponib. Men, pétèt yo disponib granbonnè maten oben ta lèswa. Ès ou té’é pé étidyé Labib èvè on moun a sé moman-lasa ? Konm sé lèswa Nikodèm té disponib, sé a moman-lasa Jézi pwofité pou anségné-y (Jan 3:1, 2).

12. Poukwa ou pé sèten kè ou ké pé rivé anségné ?

 ¹²Lè nou ka pansé kè nou pé’é jen rivé fè on étid èvè on moun. Pétèt kè nou ka konprann kè pou étidyé Labib èvè on moun, fò-nou konnèt Labib byen é fò-nou sav anségné byen menm. Si sé ka a-w, an-nou vwè 3 biten ki pé édé-w kwè kè ou pé rivé étidyé Labib èvè on moun. Prèmyèwman, pou Jéova ou kapab anségné lézòt (2 Kor. 3:5). Dézyèmman, Jézi ki ni tout pouvwa an syèl-la é asi latè ba-w dwa anségné (Mat. 28:18). É twazyèmman, ou pé konté asi Jéova é asi frè é sè a-w pou édé-w. Jézi té ka fè fon asi Pap’a-y é Jéova montré-y ka pou i té di lè i té k’ay préché. É vou osi, ou pé fè menm biten-la (Jan 8:28 ; 12:49). Anplisdisa, ou pé mandé rèsponsab a gwoup a prédikasyon a-w oben on pyonyé oben on pwoklamatè ki ni onlo èkspéryans édé-w pou ou pé sa koumansé on étid oben édé-w pou ou pé sa kondui on étid. Ondòt biten ki pé édé-w sé mandé on pwoklamatè ki ni èkspéryans ay èvè-w adan étid a-y pou ou pé sa vwè kijan i ka fè.

13. Poukwa fò-nou paré a chanjé mannyè nou ka anségné ?

¹³Lè sa ontijan rèd pou sèvi èvè sé nouvo métòd-la é sé nouvo zouti-la lòwganizasyon ka ban-nou la. Alèla, nou pa ka anségné menmjan ki avan. Nou ka sèvi èvè on nouvo zouti. Non a-y sé Tchè kontan pou touttan ! Kifè, fò nou préparé-nou ondòt jan é fò-nou fè étid-la ondòt jan osi. Adan piblikasyon-lasa, nou ka li mwens paragraf èvè moun-la, kifè, nou pé diskité plis èvè-y. Pannan étid-la, nou ka sèvi èvè vidéo é èvè dòt biten ki asi jw.org é adan JW Library^®. Men si ou ka santi kè kò a-w po’o bon adan sa, pa ézité mandé on frè oben on sè édé-w. Souvantfwa, lè nou ja abityé èvè on biten, pou chanjé, défwa sé on bab ! É pou fè kò èvè on nouvo métòd, a pa on biten ki fasil ditou-ditou ! Men grasa Jéova é grasa sé frè é sè-la, nou ké fè kò èvè sé métòd-lasa pi fasilman é lèwvwè nou ké étidyé Labib èvè on moun nou ké touvé sa pi bèl ankò. Kon on pyonyé té ka di : « nouvo métòd-lasa frèch menm é i ka fè ki étidyan-la ki anségnan-la dibyen ».

14. Lè nou ka préché adan on téritwa pa gè ni moun ka kouté-nou, ka pou nou sonjé é kijan 1 Korentyen 3:6, 7 ka ankourajé-nou ?

¹⁴Lè la nou ka rété la sa rèd dè koumansé on étid. Mésaj-la nou ka préché la pa ka entérésé sèwten moun é jous ni déotwa adan yo ki pa dakò ditou-ditou èvè mésaj-lasa. Si nou adan on téritwa konsa, ka ki pé édé-nou rété pozitif ? Fò nou toujou sonjé kè mond-lasa an boulvès é kè sitiyasyon a sé moun-la pé rivé a chanjé adan on batzyé. Kifè, sé moun-la ki pa té entérésé la pé rann-yo kont kè yo bizwen Bondyé adan vi a yo (Mat. 5:3). Konnyéla la, ni sèwten moun ki ka étidyé Labib èvè nou alòskè avan, yo pa menm té ka pran piblikasyon an nou. Anplisdisa, nou sav kè sé Jéova ki Mèt a rékòlt-la (Mat. 9:38). I vé nou kontinyé planté é wouzé toupannan i ka fè sé grenn-la pousé (1 Kor. 3:6, 7). Alèla, si nou pé pa kondui on étid, fò pa sa dékourajé-nou pas Jéova pa ka gadé èvè konmen moun nou ka étidyé Labib oben konmen piblikasyon nou ka ba sé moun-la men dépi nou ka fè éfò, i ka béni-nou. Lè nou ka sonjé sa, sa ka fè-nou dibyen toubònman * !

15. Lè on moun dakò pou étidyé Labib é kè i ka mèt sa i ka aprann an pratik, ka Jéova ka rèsanti ?

¹⁵ Jéova kontan lèwvwè on moun ka aksèpté lavérité é kè i ka fè dòt moun konnèt mésaj-la osi (Pwov. 23:15, 16). A pa ti kontan i ka kontan lèwvwè i ka vwè travay-la ki ka fèt jòdijou ! Pa ègzanp, magré Covid-19 la, lanné pasé 7 705 765 moun étidyé Labib èvè nou é 241 994 moun ba Jéova vi a yo é pran lèbatèm. Sé nouvo disip-lasa ké étidyé Labib èvè moun é ké fè dòt disip osi (Lik 6:40). Nou pé sèten kè nou ka fè tchè a Jéova kontan lè nou ka anségné moun é lè nou ka édé-yo pou yo pé sa vin disip a Jézi.

16. Ki bèl objèktif ou pé ni ?

¹⁶ Pou fè disip, sa ka mandé onlo éfò men si nou ka fè fon asi Jéova, nou ké pé édé dòt moun konnèt-li é enmé-y. Ki òbjèktif ou té’é pé ni ? Pétèt kè ou té’é pé koumansé on étid èvè omwen on moun ? Si ou ka pwofité dè tout lokazyon pou pwopozé sé moun-la ou ka jwenn la étidyé Labib èvè-w, lè ou ké vwè jan yo ka réyaji, sèten sa ké siwprann-vou ! On biten ou pé sèten, sé kè Jéova ké toujou béni tout sé éfò-la ou ké fè la.

17. Ka nou ké rèsanti si nou ka étidyé Labib èvè on moun ?

¹⁷Préché é anségné sé vérité-la ki an Bib-la, sé on bèl lonnè toubònman ! Travay-lasa ka ban-nou tchè-kontan menm ! Lapòt Pòl édé onlo moun ki té ka rété Tésalonik vin disip a Jézi. Lè i té ka palé dè sa i té ka rèsanti, mi sa i di : « Ka ki èspérans an nou ? Ka ki jwa an nou ? Ka ki ké rékonpans an nou douvan Jézi Ségnè an nou lè i ké la ? An réyalité, ès a pa zòt ? Wi, sé zòt ki sé glwa an nou é jwa an nou » (1 Tés. 2:19, 20 ; Akt 17:1-4). Jòdijou, onlo adan nou ka rèsanti menm biten-la. Stéphanie é mari a-y édé onlo moun pran lèbatèm. Mi sa Stéphanie ka di : « Lè ou ka édé on moun ba Jéova vi a-y, a pa ti kontan ou ka kontan !»