1. Lè on moun anripaj èvè ondòt moun, ka sa pé pousé-y a fè ?

JÒDIJOU, onlo moun bizwen montré kè yo pli fò ki lézòt menmsi lézòt ka pran plon adan sa. Pa ègzanp, on moun ki ni on gwo antrèpriz paré a fè nenpòt ki biten pou i pé sa krazé sélézòt antrèpriz-la ki adan menm domenn ki-y. Oben on foutbòlè pé chèché a blésé ondòt jouwè jis pou ékip a-y pé sa gangné on match. É on moun ki ka fè étid pé rivé a triché adan on lègzamen pou i pé sa rantré adan on gwo linivèwsité. Nou, nou sé dé krétyen é nou pa dakò èvè sé kalté biten-lasa. Dayè, Labib ka di kè yo ka fè pawti a « sa lachè ka pwodui » (Gal. 5: 19-21). Men, ni sèwten frè é sè ki ka chèché a montré kè yo méyè ki lézòt é yo ka ankourajé lézòt fè menm biten ki yo. É yo ka fè sa san menm yo rann-yo kont. Fò-nou réfléchi asi sa pas si nou anripaj yonn èvè lòt, lasanblé-la pé’é soudé ankò.

2. Ka nou ké vwè adan awtik-lasa ?

² Adan awtik-lasa nou ké palé dè 2 biten ki pé pousé-nou a montré kè nou méyè ki lézòt. Nou ké vwè osi ègzanp a déotwa sèwvitè a Jéova nou ka touvé adan Labib ki pa tonbé adan pyèj-lasa. Men pou nou koumansé, an-nou vwè kijan nou pé analizé sa ki ka pousé-nou aji.

3. Ki kèsyon fò-nou pozé-nou ?

³ Sa té’é byen si tanzantan, nou analizé sa ki ka pousé-nou aji. Pou fè sa, nou pé pozé-nou sé kèsyon-lasa : « Ès an ka santi-mwen byen yenki lèwvwè an ni lenprésyon kè an méyè ki ondòt adan on sèwten domenn ? Ès an ka travay rèd adan lasanblé-la pou montré toutmoun kè sé  mwen ki pi fò la oben pou montré kè an pi fò ki entèl ? Oben ès an ka travay rèd pou ba Jéova sa an ni dè méyè ? » Poukwa sa enpòwtan kè nou pozé-nou sé kèsyon-lasa ? An-nou vwè ka Labib ka di asi sa.

4. Dapré Galat 6:3, 4, poukwa fò pa nou konparé-nou èvè lézòt ?

⁴ Labib ka di-nou kè fò pa nou konparé-nou èvè lézòt (li Galat 6:3, 4). Poukwa ? Pas si nou ka pansé kè nou pi fò ki lézòt, nou ké akwè-nou é si nou ka pansé kè lézòt méyè ki nou, sa ké dékourajé-nou. Men, sa pa saj kè nou rézonné konsa (Wom. 12:3). Katerina *, sé on sè ki ka viv an Grès é mi sa i ka di : « An té ni labitid konparé-mwen èvè sèwten sè. Kifè, an té ka touvé kè yo té pi bèl ki mwen, kè yo té ka préché myé ki mwen é kè yo té ka touvé zanmi pi fasilman ki mwen. Sa té ka ban’an lenprésyon kè an pa vo ayen. » Fò-nou toujou sonjé kè sé Jéova ki fè-nou vin owa a-y. É si i fè sa, a pa paskè nou bèl, a pa paskè nou ka palé byen oben paskè onlo moun enmé-nou men sé paskè nou enmé-y é kè nou ka kouté Gason a-y (Jan 6:44 ; 1 Kor. 1:26-31).

5. Ka ègzanp a Hyun ka aprann-nou ?

⁵ Mi ondòt kèsyon nou pé pozé-nou : « Ès pou sé frè é sè-la an sé on moun ki toujou ka chèché a antann-li byen èvè lézòt oben ès pli souvan ki rarman an ka trapé bab èvè moun ? » An-nou vwè ka ki rivé on ansyen yo ka kriyé Hyun é ki ka viv an Koré di Sid. Onlè, an tèt a-y, sélézòt frè-la ki té ni rèsponsabilité adan lasanblé-la té vé montré kè yo pi fò ki-y. Mi sa i ka di : « An té ka kritiké sé frè-la touttan é an pa janmen té dakò èvè yo. » Ki rézilta sa bay ? Mi sa i fin pa admèt : « Akòz dè konpòwtèman an mwen, lasanblé-la pa té soudé ankò. » Sèwten zanmi édé-y konprann kè atitid a-y pa té bon. I fè éfò pou chanjé é jòdila, sé on ansyen toutmoun enmé. Si nou ka rann-nou kont kè nou ni labitid konparé-nou èvè lézòt olyé nou antann-nou byen èvè yo, fò-nou pòté mannèv pou chanjé.

6. Dapré Galat 5:26, lè on moun enmé konparé-y èvè lézòt, souvantfwa, ka ki dèyè do a sa ?

⁶ (Li Galat 5:26.) Ki mové biten ki pé pousé-nou a konparé-nou èvè dòt moun ? Sé lè nou ka chèché a fè lézòt pòté-nou anlè é lè nou jalou sa lézòt ni. Lè on moun ka chèché a fè lézòt pòté-y anlè, moun-lasa ni òwgèy an tchè a-y é i égoyis. Lè on moun jalou sa lézòt ni, si i té pé fè-yo pèd sa yo ni, i té’é kontan toubònman. Kifè, lè on moun jalou ondòt moun sé konsi sé hay i hay moun-lasa. Sé pousa, fò-nou fè tousa nou pé pou nou ba sé mové biten-lasa gran lè a yo.

7. Lè on moun bizwen fè moun vwè-y é lè on moun jalou, sa pé fè onlo déga. Ki ègzanp ki ka montré-nou sa ?

⁷ Lè on moun bizwen fè moun vwè-y é lè on moun jalou sa lézòt ni, sé 2 biten ki pé fè onlo déga. Nou pé konparé sa èvè poulbwa ki ka manjé twa a on kaz. Tout bèl twa-lasa ka parèt bèl, afòs sé poulbwa-la manjé-y, i ké fin pa tonbé. Menmjan-la osi, menmsi on moun ka sèvi Jéova dépi onpakèt lanné, i ké fin pa tonbé si i ka aji pou fè moun vwè-y oben si sé lajalouzi ki ka pousé-y aji. I ké arété sèvi Jéova (Pwov. 16:18). I ké fè limenm a-y soufè é i ké fè lézòt soufè osi. Kijan nou pé débarasé-nou dè sé vyé manni-lasa ?

8. Lèwvwè nou enmé fè lézòt pòté-nou anlè, ka nou pé fè pou arété èvè sa ?

 ⁸ Lèwvwè nou enmé fè lézòt pòté-nou anlè é kè nou anvi arété èvè sa, fò-nou suiv konsèy-la Pòl ba sé Filipyen-la. Mi sa i di-yo : « Pa fè ayen èvè lidé a babyé an tèt a zòt, ni paskè zò vlé mété-zòt pli douvan ki lézòt, men, èvè imilité, kontinyé vwè lézòt kon moun ki ni plis valè ki zòt » (Filip. 2:3). Si pou nou lézòt ni plis valè ki nou, nou pé’é anripaj èvè moun ki ni plis kapasité ki nou. Okontrè, nou ké kontan pou yo, siwtou si nou ka vwè kè yo ka sèvi èvè sé kapasité-lasa pou sèvi Jéova é pou louwé-y. Yo osi, si yo suiv konsèy a Pòl, yo ké vwè bèl kalité an nou é yo ké aprésyé-yo. Kifè, grasa éfò a chakmoun, ké ni on bon anbyans adan lasanblé-la é lasanblé-la ké rété soudé.

9. Ka nou pé fè pou nou pa lésé lajalouzi pran lanmen asi nou ?

⁹ Si nou ka rèkonnèt limit an nou, nou pé’é lésé lajalouzi pran rasin an tchè an nou é nou pé ké éséyé montré kè nou pibon ki ponmoun nonplis. Okontrè, nou ké chèché a fè moun ki ni plis kapasité ki nou aprann-nou dé biten. Pa ègzanp, si on frè ka fè bon diskou, nou pé mandé-y kijan i ka fè lè i ka préparé-y. Si kò a on sè bon adan zafè a kuit manjé, nou pé mandé-y dé ti konsèy. É si on jenn frè pa’a rivé ni zanmi, i pé ay chèché dé ti konsèy owa on moun ki sé moun a toutmoun. Konsa nou pé ké lésé lajalouzi pran lanmen asi nou é kò an nou ké vin pibon adan dòt domenn.

10. Adan ki sitiyasyon Jédéon touvé-y ?

¹⁰ Aprézan, an-nou palé tibwen dè sa ki rivé Jédéon on nonm ki té ka fè pawti a tribi a Manasé. I touvé-y adan on sitiyasyon ki pa té fasil. Li é 300 sòlda a-y té ay goumé kont lènmi a Bondyé é grasa Jéova yo gangné lagè-lasa. Yo té pé fè moun pòté-yo anlè pousa, men a pa sa yo fè. Aprésa, sé boug a tribi a Éfrayim la vin dèyè Jédéon. A pa té pou félisité-y men sé té pou chèché-y tren pas, dépi odépa,  Jédéon pa té mandé-yo vin èvè-y adan lagè-lasa é yo pa pran sa. Yo té’é anvi kè toutmoun pòté-yo anlè é kè yo di kè tribi a Éfrayim té la osi pou gangné konba-lasa. Men yo pa fè atansyon a sa ki té pi enpòwtan : Jédéon té sòti ba non a Jéova glwa é i té pwotéjé pèp-la (Jij 8:1).

11. Kijan Jédéon réponn boug a tribi a Éfrayim ?

¹¹ Jédéon réponn boug a tribi a Éfrayim èvè onlo imilité. Mi sa i di-yo : « Sa an fè, sa pa ayen parapòt a sa zò fè. » I fè yo sonjé kijan Jéova té sèvi èvè yo pou fè dé biten èstraòwdinè é kè sa té ka pwouvé kè yo té ni bénédisyon a Bondyé. Labib ka di kè « apré i té palé ba-yo konsa, yo vin kalm » (Jij 8:2, 3). Jédéon réponn èvè imilité pas i té paré a fè tousa i té pé pou ni lapé adan pèp a Bondyé.

12. Ka ègzanp a sé boug Éfrayim la é ta Jédéon ka aprann-nou ?

¹² Ka istwa-lasa ka aprann-nou ? Jan-la sé boug Éfrayim la réyaji la ka fè-nou sonjé kè sa ki pi enpòwtan a pa chèché a fè moun pòté-nou anlè men sé ba Jéova glwa. Si sé-w ki ka dirijé fanmi a-w oben si ou sé on ansyen, ka ègzanp a Jédéon pé aprann-vou ? Siwvwè ou fè on biten é kè on moun pa dakò èvè sa ou fè la, fò ou éséyé konprann poukwa moun-la ka réyaji konsa. Ou pé félisité-y osi pou bon biten i ka fè. Fò ou ké ni onlo imilité pou aji konsa, siwtou si ou ka vwè byen kè moun-la pa ni rézon. Men vométan ou antann-vou byen èvè frè a-w oben sè a-w olyé ou chèché a montré kè ou ni rézon.

13. Ki sitiyasyon difisil Àn jwenn é kijan i rivé about a-y ?

¹³ Alèla, an-nou palé dè ègzanp a Àn. I té mayé èvè on Lévit yo té ka kriyé Èlkana é mari a-y té enmé-y toubònman. Men Èlkana té mayé osi èvè on madanm yo ka kriyé Pénina. I té enmé Àn plis ki Pénina, men « Pénina té ni timoun alòskè Àn pa té ni ». Pénina ‘pa té ka arété fè jé’ èvè Àn. Kijan Àn té ka viv sitiyasyon-lasa ? ‘I té ka pléré gwo-dlo é i pa té ka manjé’ tèlman sa té ka dékourajé-y (1 Sam. 1:2, 6, 7). Labib pa’a di kè Àn éséyé vanjé-y akòz dè sa Pénina té ka fè-y la. Okontrè, Labib ka di kè Àn wouvè tchè a-y ba Jéova, kè i fè-y konfyans é kè i lésé sitiyasyon-lasa an men a-y. Ès Pénina chanjé ? Nou pa sav, men sa nou sav sé kè sa pa té ka trakasé lèspri a Àn ankò « é figi a-y pa té tris ankò » (1 Sam. 1:10, 18).

14. Ka ègzanp a Àn ka aprann-nou ?

¹⁴ Ka ègzanp a Àn ka aprann-nou ? Siwvwè on jou, on moun bizwen montré-w kè i pli fò ki-w, ou pa oblijé rantré an jé a-y. Okontrè, olyé ou rann lè mal pou lè mal, fè éfò pou antann-vou byen èvè moun-lasa (Wom. 12:17-21). Menmsi  i vé pa chanjé, men vou, lèspri a-w ké trankil.

15. Adan ki domenn Pòl é Apolòs té ka sanm ?

¹⁵ Pou fin, an-nou palé dè ègzanp Apolòs é Pòl. Yo toulédé té konnèt Lézékriti byen menm. Onlo moun té konnèt-yo é yo té ka di kè yo té ka anségné byen. Yo toulédé té ja fè onlo disip osi. Men yo pa té anripaj yonn èvè lòt.

16. Kijan dè moun Apolòs té yé ?

¹⁶ Apolòs ‘fèt Alèksandri’. Toutmoun té konnèt vil-lasa pas onlo moun té kay la pou yo té enstwi-yo. I ka sanm sa i té ka fè bèl diskou é ‘i té konnèt Lézékriti byen menm’ (Akt 18:24). Apolòs pasé déotwa tan a Korent é sèwten frè é sè ki té adan lasanblé-lasa montré-y kè yo té enmé-y plis ki Pòl é plis ki dòt frè (1 Kor. 1:12, 13). Ès sa vé di kè Apolòs té ka mèt zizanni adan lasanblé-la ? Nou pé pa pansé dè-y menm menm menm. Dayè, kèlkè tan apré Apolòs kité Korent, Pòl mandé-y si i té pé viré adan vil-lasa (1 Kor. 16:12). Pòl pa té’é jen mandé-y fè sa si i té ka pansé kè i té ka mèt zizanni adan lasanblé-la ! An réyalité, Apolòs té ka sèvi èvè kapasité a-y pou fè bon biten. I té ka sèvi èvè kapasité a-y pou préché bon nouvèl-la é pou fè frè é sè a-y dibyen. Anplisdisa, nou pé sèten kè Apolòs té ni onlo imilité. Pa ègzanp, Labib pa ka di-nou kè i fè kòlè lè ‘Akilas é Prisil èspliké-y Pawòl a Bondyé pibyen’ (Akt 18:24-28).

17. Ka Pòl fè pou lasanblé-la rété soudé ?

¹⁷ Pòl té sav byen kè Apolòs té ka fè on bon travay toubònman. É menm lè sèwten moun té ka di kè Apolòs méyè ki-y, sa pa té ka enkyété-y. Pòl té ni imilité, i té ka  rèkonnèt limit a-y é i té rézonab. Dayè, sé konsèy-la i ba sé frè é sè Korent la ka montré sa byen. Pòl pa té kontan lè i té ka tann sèwten moun ki té ka di : « Mwen, sé pou Pòl an yé ». Okontrè, i toujou fè ansòt pou sé frè é sè-la ba Jéova é Jézi lonnè olyé yo pòté-y anlè (1 Kor. 3:3-6).

18. Dapré 1 Korentyen 4:6, 7, ka ègzanp a Pòl é Apolòs ka aprann-nou ?

¹⁸ Ka ègzanp a Pòl é Apolòs ka aprann-nou ? Pétèt kè nou ka travay rèd pou Jéova é kè nou ja fè onlo moun konnèt lavérité. Men on biten nou toujou ka mèt an tèt an nou sé kè si nou ka rivé fè tousa, sé yenki pas Jéova ka béni-nou. Men ègzanp a Apolòs é Pòl ka aprann-nou ondòt biten ankò : pli nou ni rèsponsabilité adan lasanblé-la, pli nou pé fè ansòt pou lasanblé-la rété soudé. Nou kontan toubònman lèwvwè sé frè-la ki ni rèsponsabilité ka fè ansòt pou nou rété soudé é pou toutmoun antann-yo byen adan lasanblé-la. Yo ka fè sa lèwvwè yo ka pran sé konsèy-la yo ka bay la adan Bib-la é lè yo ka édé toutmoun adan lasanblé obéyi Jézi é suiv ègzanp a-y olyé yo pòté-yo anlè (li 1 Korentyen 4:6, 7).

19. Ka fò-nouchak fè ? (gadé ti karé-la «  Fè atansyon pou ou pa touvé-w anripaj èvè ponmoun »).

¹⁹ Jéova ban-nouchak sèwten don. Fò-nou sèvi èvè sé « don-lasa pou yonn fè lòt dibyen » (1 Pyè 4:10). Nou pé ni lenprésyon kè sa nou ka fè pa ni onlo valè. Men chak sé ti jès-la nou ka fè la pou lasanblé-la rété soudé ka touvé-yo kon chak koudzégui yo ka ba on lenj pou koud chak mòso a-y ansanm. Fò-nou fè bon éfò pou nou pa fè pon biten pou montré lézòt kè nou pi fò ki yo. É fò-nou byen désidé a fè tousa nou pé pou nou antann-nou byen èvè frè é sè an nou é pou lasanblé-la rété soudé (Éféz. 4:3).