Jéova vlé kè moun ki mayé ni tchè-kontan é kè yo rété bon bon zanmi tout vi a yo (Mat. 19:4-6). Si ou vlé mayé, ki koté ou ké touvé on moun ki ké ay byen èvè-w ? Konm sé Jéova ki kréyé-nou, i sav sa ki ké édé-nou réyisi mayé an nou. Sé pousa, si ou ka suiv sé prensip-la i ka ban-nou la, asiré sèten ou ké ni tchè-kontan. An-nou vwè déotwa adan sé prensip-lasa.

Dabò pou yonn, fò-nou mèt fon an tèt an nou kè : « Tchè-la pli trèt ki pondòt biten é i pé fè-w fè nenpòt biten » (Jér. 17:9). Lèwvwè 2 moun ki bizwen mayé ka koumansé frékanté-yo, yonn pé enmé lòt fò granbonnè, é sa pé anpéché-yo rézonné konm i fo. Siwvwè yo lésé sé santiman-lasa pran lanmen asi yo é kè yo ka désidé mayé, pétèt yo ké soufè toubònman (Pwov. 28:26). On moun ki ni sajès é ki po’o byen konnèt moun-la i vlé mayé èvè-y la pé ké di-y sa i ka rèsanti two vit é i pé’é pwomèt-li pon biten two granbonnè nonplis.

Mi sa Pwovèb 22:3 ka di : « On nonm ki ka pran prékosyon a-y ka kaché-y lè i ka vwè on danjé, men on nonm ki pa ni èkspéryans ka kontinyé fè douvan é aprésa i ka pòté chaj a sa i fè la. » Lè on moun ka sèvi èvè Entèwnèt pou touvé on moun pou mayé èvè-y, poukwa sa danjéré ? Sèwten moun rankontré on moun yo pa té konnèt asi Entèwnèt, yo koumansé frékanté-y, é malérèzman tibwen tan apré yo rann-yo kont kè moun-lasa kouyonné-yo. Anplisdisa, ni sèwten moun ki malonnèt ki fè-yo pasé pou dòt moun pou yo té pé sa volé lajan a moun ki pa ni èkspéryans adan domenn-lasa. É dépawfwa sé moun-lasa jous té ka di kè yo Témwen a Jéova.

An-nou palé dè ondòt danjé. Ni sèwten sit Entèwnèt ki fèt pou fè moun rankontré-yo ki ka sèvi èvè pwogram enfòwmatik pou kalkilé kimoun ki ké ay byen èvè kimoun. Men pa ni ayen ki ka bay laprèv kè sa ka maché poudèbon. Chwazi èvè kimoun ou ké mayé sé on désizyon ki enpòwtan toubònman. Ès ou ka di on moun ki saj ké fè fon asi on pwogram lézimen kréyé pou pran on gwo désizyon konsa ? Ès ou ka di on pwogram enfòwmatik pé pi éfikas ki prensip a Labib ? (Pwov. 1:7 ; 3:5-7).

An Pwovèb 14:15 nou ka touvé ondòt prensip. Mi sa i ka di : « On moun ki pa ni èkspéryans ka kwè tousa moun ka di, men nonm-la ki ka pran prékosyon a-y ka véyé chak pa i ka fè. » Avan ou mèt an tèt a-w kè ou pé mayé èvè on moun, fò ou konnèt-li byen menm. Men sa pé’é fasil si sé enki  asi Entèwnèt zò ka palé. Sé vré, asi sé sit-lasa zòchak pé bay déotwa enfòwmasyon asi zòt. Menmsi ou pé gadé sa i mèt, kè li osi pé fè menm biten-la é kè yonn ka voyé mésaj ba lòt toutlè, ès ou ka di kè ou konnèt moun-lasa vréman ? Sèwten moun té ka konpranndèdi kè yo té touvé on bon moun pou yo té pé sa mayé, men lèwvwè yo jwenn moun-lasa poudèvré yo pran on bèl kalòt.

Mi sa David maké : « An pa’a frékanté moun ki ka kouyonné moun é an ka ba moun ki ka kaché sa yo yé gran lè a yo » (Sòm 26:4). Pou onlo moun, sa toutafè nòwmal kè yo kaché sa yo yé pou fè lézòt enmé-yo. Ni sèwten moun ki ka kaché défo a yo é ni sa aprézan lè ou ka gadé mésaj a yo, ou pa té’é jen di yo ni sèwten défo. Pétèt kè on moun pé di kè i Témwen a Jéova, men ès i ja jen pran lèbatèm ? Ès sé on krétyen ki byen doubout adan lavérité ? Ès i ni on bon répitasyon adan lasanblé a-y ? Oben ès i sé on moun ki ni on mové konpòwtasyon, oben ès a pa on « mové frékantasyon » ? (1 Kor. 15:33 ; 2 Tim. 2:20, 21). Dapré Labib, ès i andwa mayé ? Sa enpòwtan kè ou ni tout sé enfòwmasyon-lasa. Ou ké ni dimal a ni sé enfòwmasyon-lasa si ou pa’a palé èvè sé frè é sè-la ki konnèt moun-la ou ka frékanté la (Pwov. 15:22). Nou ka tou konprann kè on moun ki ka sèvi Jéova èvè tout tchè a-y pé’é vlé mayé èvè on moun ki pa Témwen a Jéova pas yonn pa k’ay èvè lòt (2 Kor. 6:14 ; 1 Kor. 7:39).

Nou byen konprann kè si nou k’ay asi Entèwnèt pou touvé on moun pou nou mayé, sa danjéré toubònman. Vométan nou chèché ondòt mwayen pou nou pé sa touvé on moun pou nou mayé. Ki koté ou ké pé jwenn on moun pou mayé èvè-y ? Lè ayen pa ka anpéché-nou réini-nou, on frè oben on sè pé fè konésans èvè on moun lè i k’ay Lasal di Wayòm, lè i k’ay lasanblé oben lè i ka pasé on ti moman èvè déotwa zanmi.

Lèwvwè nou pé pa réini-nou akòz dè sèwten biten kon Covid-19 la, nou ka sèvi èvè Entèwnèt pou pran réinyon an nou é ou pé pwofité pou fè konésans èvè déotwa frè é sè ki sélibatè kon vou. Pétèt ou pé kouté-yo lèwvwè yo ka fè on diskou oben lèwvwè yo ka fè on sijé é ou pé vwè jan yo ni fwa an Jéova lè ou ka kouté komantè a yo (1 Tim. 6:11, 12). Konm nou ka sèvi èvè vidéokonférans pou réini-nou, apré sé réinyon-la, yo ka fè dé ti gwoup pou nou pé sa palé é ou pé pwofité dè sa pou palé èvè frè é sè ki sélibatè. Défwa nou ka sèvi èvè Entèwnèt pou pasé on ti moman èvè frè é sè an nou, é a moman-lasa ou ka pé vwè kijan moun-la ki ka entérésé-w la ka aji èvè sélézòt frè é sè-la. Konsa, ou ka ni lokazyon vwè kijan dè moun i yé (1 Pyè 3:4). Pi zò ké aprann konnèt-zòt é pi ou ké vwè si òbjèktif a zòt k’ay an menm sans-la é si zò ké antann-zòt byen.

On moun ki sélibatè é ki ka tchenn kont dè prensip a Labib ké ni plis chans pou touvé on bon madanm oben on bon mari. É mi sa ki ké rivé-y : « On moun ki ka touvé on bon madanm [oben on bon mari] ka touvé on trézò, é i ka ni favè a Jéova » (Pwov. 18:22).