AWTIK POU ÉTIDYÉ 29
An-nou soutyenn Jézi, Chèf an nou
« Yo ban-mwen tout pouvwa an syèl-la é asi latè » (MAT. 28:18).
KANTIK 13 Christ, notre modèle
ON TI LIDÉ ASI SA NOU KAY VWÈ *
1. Ka Jéova vlé jòdijou ?
JÒDILA, sa Jéova vlé sé kè yo préché bon nouvèl a Wayòm-la toupatou asi latè (Mawk 13:10 ; 1 Tim. 2:3, 4). Tèlman sa enpòwtan ba-y, i ba Jézikris, Gason a-y kè i enmé onlo, dirijé aktivité-lasa. Nou pé sèten kè anba dirèksyon a Jézi, travay-lasa ké fèt ègzaktèman kon Jéova vlé, avan lafen rivé (Mat. 24:14).
2. Ka nou ké vwè adan awtik-lasa ?
2 Adan awtik-lasa, nou ké vwè kijan Jézi ka itilizé ‘èsklav fidèl é prévwayan a-y’ pou anségné-nou sa Pawòl a Bondyé ka di é pou fòwmé-nou pou nou pé sa pawtisipé adan on travay a prédikasyon ki poto’o jen fèt adan tout listwa a limanité (Mat. 24:45). Nou ké vwè osi kijan nouchak pé montré kè nou ka soutyenn Jézi é èsklav a-y.
JÉZI KA ÒWGANIZÉ PRÉDIKASYON-LA
3. Ki biten yo mandé Jézi fè ?
3 Jézi ka dirijé prédikasyon-la. Kijan nou fè sèten dè sa ? Kèlkètan avan i viré an syèl-la, Jézi ay jwenn sèwten disip ki té fidèl asi on montangn an Galilé é mi sa i di : « Yo ban-mwen tout pouvwa an syèl-la é asi latè. » Men gadé ka i ka di tousuit apré : « Donk, alé é fè disip pawmi moun a tout kalté nasyon » (Mat. 28:18, 19). Sa ka montré-nou kè pawmi tout sé biten-la Jézi ni a dirijé la, fò i dirijé travay a prédikasyon-la osi.
4. Poukwa nou pé sèten kè Jézi ka dirijé travay a prédikasyon-la toujou ?
4 Jézi di kè yo té ké préché é anségné « moun a tout kalté nasyon » é kè i té’é rété èvè disip a-y « touléjou, jiskatan fen a mond-la rivé » (Mat. 28:20). Sé pawòl-lasa ka montré kè prédikasyon-la té ké fèt anba dirèksyon a Jézi jis a jòdijou.
5. Sòm 110:3 ka réyalizé anba zyé an nou. Ki wòl nou ka jouwé adan sa ?
5 Jézi té sèten kè lèwvwè sé dènyé jou-la té’é rivé, té’é ni asé moun pou fè travay a prédikasyon-la. I té sav kè pwofési-la nou ka touvé an Sòm 110:3 té ké réyalizé. Mi sa pwofési-la té ka di : « Pèp a-w ké ofè-y volontyé jou-la ou ké sanblé lawmé a-w pou konba-la. » Si ou ka préché bon nouvèl-la, ou ka soutyenn Jézi é èsklav fidèl a-y. Kifè, toupannan pwofési-la ka réyalizé, ou ka jouwé on wòl adan sa. Travay a prédikasyon-la ka fèt kon Jézi té prévwa, men sa pa vé di kè nou pa té’é jwenn difikilté.
6. Ki prèmyé difikilté nou ka jwenn ?
6 On prèmyé difikilté nou ka jwenn, sé lèwvwè moun ka lévé kont nou. Tin apòsta, tin chèf a rèlijyon é tin chèf politik ki ka fè onlo manti monté é désann asi do an nou. Lèwvwè fanmi an nou, moun nou konnèt oben kolèg-travay an nou ka tann sé manti-lasa, sèwten adan yo ka pran sa pou lajan-kontan. Kifè, dépawfwa yo ka mèt présyon asi nou pou nou pé sa lagé Jéova é pou nou arété préché. Adan sèwten péyi, sé moun-la ki kont frè é sè an nou la ka chèché a fè-yo pè : yo ka mennasé-yo, yo ka arété-yo é yo jous ka mèt-yo lajòl. Men lè nou ka vwè sa, sa pa’a siwprann-nou pas mi sa Jézi té ja di : « Tout sé nasyon-la ké hay-zòt akòz dè non an mwen » (Mat. 24:9). Lèfètkè moun hay-nou konsa, sa ka montré-nou kè nou ka fè Jéova plézi (Mat. 5:11, 12). Sé Dyab-la ki dèyè do a tout sé biten-lasa. Men Jézi ni lontan plis fòs ki-y ! Jézi ka soutyenn-nou, kifè, nou ka rivé préché bon nouvèl-la ba tout kalté moun.
7. Poukwa ou sèten kè sé pawòl-la nou ka touvé an Révélasyon 14:6, 7 ka réyalizé ?
7 An-nou palé dè ondòt difikilté nou ka jwenn : noutout pa’a palé menm lang-la. Adan on vizyon, Jézi montré lapòt Jan kè sé moun-la ki té’é préché bon nouvèl a Wayòm-la té’é rivé about a difikilté-lasa (li Révélasyon 14:6, 7). Kijan yo té’é fè sa ? Yo té’é pèwmèt on maksimòm dè moun tann mésaj a Wayòm-la. Jòdila, kèlkèswa koté-la yo ka viv la, sé moun-la pé aprann plis biten asi Labib lè yo k’ay asi sit an nou jw.org. Asi sit-lasa, yo pé touvé piblikasyon an plis ki 1 000 lang. Anplisdisa, Komité santral la bay akò a-y pou tradui liv-la Ou pé ni tchè-kontan pou touttan ! an plis ki 700 lang. Nou ka sèvi èvè liv-lasa pou nou fè étid biblik é pou fè disip. Nou ni vidéo osi ki bazé asi Labib pou moun ki soud é piblikasyon an bray pou moun ki avèg. Sa klè, sé pwofési-la ki an Bib-la ka réyalizé. Moun ‘ki sòti adan tout nasyon é ki ka palé tout kalté lang’ ké aprann palé ‘lang-la ki pwòp la’ ki ka rèprézanté sé vérité-la ki an Bib-la (Zak. 8:23 ; Sof. 3:9). Si tousa posib, sé pas nou ka travay anba dirèksyon a Jézi.
8. Ki bon biten travay a prédikasyon an nou ka pòté jis alajouné jòdi ?
8 Adan pèp a Bondyé, ni plis ki 8 000 000 moun ki ka viv adan 240 péyi é téritwa é chak lanné ni plis ki 100 000 moun ki ka pran lèbatèm. Sé vré ni onlo moun ki ka vin a lavérité, men sa ki pli enpòwtan sé kè sé frè é sè lasa ka fè éfò pou yo pé sa ni sé kalité-la on krétyen dwètèt ni la. Sé sa Labib ka kriyé « nouvo pèwsonalité-la » (Kol. 3:8-10). Pa ègzanp, ni onlo adan yo ki té ka fè péché sèksyèl avan, ki té ka aji èvè onlo vyolans, ki té ni mové lidé asi moun ki pa menm ras ki yo oben ki té ka pansé kè pa ni pibon nasyon ki ta yo men aprézan yo chanjé é yo mèt sa dèyè do a yo. Anplisdisa, Izayi 2:4 té ja anonsé kè sèwvitè a Jéova pa té’é aprann « fè lagè ankò » é sé sa ki ka fèt. Lè nou ka fè éfò pou mèt nouvo pèwsonalité-la asi nou, sa ka édé onlo moun pou yo pé sa vin adan òwganizasyon a Jéova pas yo ka konstaté kè nou ka suiv Jézikris (Jan 13:35 ; 1 Pyè 2:12). Poukwa nou ka rivé fè tout sé biten-lasa ? Sé pas Jézi ka édé-nou.
JÉZI CHWAZI ON ÈSKLAV
9. Dapré Matyé 24:45-47, ka Jézi té’é fè an tan a lafen ?
9 (Li Matyé 24:45-47.) Jézi té ja anonsé kè an tan a lafen, i té’é chwazi on « èsklav fidèl é prévwayan » pou ba tout pèp a-y nouriti-la i bizwen la, kivédi tousa i bizwen pou rété bon bon zanmi èvè Jéova. Sé pousa, jòdijou nou pé atann-nou a vwè èsklav-lasa pòté bon mannèv pou fè travay-lasa. É sé ègzaktèman sa ki ka fèt ! Jéova voyé lèspri sen a-y asi sèwten moun pou yo vin wen é Jézi ka sèvi èvè sèwten adan yo pou ba pèp a Bondyé é pou ba moun lavérité ka entérésé « manjé a yo a bon moman-la ». Men apapousa sé nonm-lasa ka dominé asi fwa a lézòt (2 Kor. 1:24). Okontrè, yo ka rèkonnèt kè sé Jézi ki ka gidé disip a-y é kè sé-y ki chèf a yo (Iz. 55:4).
10. Asi imaj-la nou ka vwè diféran piblikasyon. Kilès ki ba-w anvi koumansé sèvi Jéova ?
10 Dépi 1919, « èsklav fidèl é prévwayan la » ka pwodui diféran piblikasyon pou édé-moun ki anvi konnèt lavérité aprann sa Labib ka di. Pa ègzanp an 1921 (1923 an fransé), i pibliyé liv-la La Harpe de Dieu pou édé sé moun-la konnèt ansègnman ki fondal adan Bib-la. Piti-a-piti, yo pibliyé dòt liv. É vou ? Ki piblikasyon ki édé-w konnèt Pap’an nou ki an syèl-la é ki édé-w enmé-y ? Èskè sé té liv-la « Que Dieu soit reconnu pour vrai ! », oben La vérité qui conduit à la vie éternelle, oben Vous pouvez vivre éternellement sur une terre qui deviendra un paradis ? Oben ès sé té liv-la La connaissance qui mène à la vie éternelle, oben Qu’enseigne réellement la Bible ?, oben Ka Labib ka aprann-nou ? Pétèt osi kè ou vin a lavérité grasa Ou pé ni tchè-kontan pou touttan !, dènyé liv-la nou ka sèvi èvè-y la pou étidyé Labib èvè moun. Chakfwa yo fè yonn adan sé piblikasyon-lasa sòti, sé té ègzaktèman sa sé moun-la té bizwen pou vin disip a Jézi.
11. Poukwa noutout bizwen aprann konnèt Jéova é Bib-la pibyen ?
11 A pa enki sé moun-la ki sòti koumansé aprann konnèt lavérité ki bizwen aprann konnèt Jéova pibyen é ki bizwen aprann konnèt Pawòl a-y pibyen osi. Noutout nou bizwen sa. Dayè, mi sa lapòt Pòl maké : « Manjé solid sé pou moun mi. » Aprésa, i di osi kè sé afòs nou sèvi èvè kapasité an nou pou konprann on sitiyasyon kè nou ké rivé « fè ladiférans antrè sa ki byen é sa ki mal » (Ébr. 5:14). Jòdijou ni onlo moun ki ni on vi ki pa pwòp alantou an nou. Kifè, nou pé ni di mal a suiv sé prensip-la Jéova ka ban-nou la. Men Jézi ka fè ansòt pou nou aprann konnèt sé biten-la nou bizwen la pou fwa an nou rété fò. Ansègnman-lasa ka sòti adan Pawòl a Bondyé, Labib. Èsklav fidèl la ka préparé-y é ka distribiyé-y anba dirèksyon a Jézi.
12. Jézi ba non a Bondyé onlo valè. É nou, ki valè nou ka ba non a Bondyé ?
12 Kon Jézi, nou ka ba non a Bondyé tout lonnè-la i mérité la (Jan 17:6, 26). Pa ègzanp, an 1931, nou chanjé non an nou é nou vin Témwen a Jéova. Nou pran non-lasa adan Pawòl a Bondyé Labib. Lèwvwè nou fè sa, nou montré kè non a Pap’an nou ki an syèl-la enpòwtan pou nou toubònman (Iz. 43:10-12). É dépi òktòb 1931 osi, nou mèt non a Bondyé asi po a jounal a chak niméwo a Tou dè Gad la. Anplisdisa, adan Bib-la, la Traduction du monde nouveau, nou mèt non a Bondyé tout sé koté-la i té yé la odépa, kivédi nou mété-y an plas a-y ki ta-y. Jan-la nou aji la pa menm biten ki jan-la sé Légliz-la ki ka di kè yo krétyen la aji pas yo yo woté non « Jéova » adan onlo tradiksyon a Labib yo té ni.
JÉZI KA GIDÉ DISIP A-Y
13. Poukwa ou sèten kè Jézi ka sèvi èvè « èsklav fidèl é prévwayan la » jòdijou ? (Jan 6:68).
13 Jézi sèvi èvè « èsklav fidèl é prévwayan la » pou mèt on bèl òwganizasyon anplas asi latè. Òwganizasyon-lasa ka fè ansòt pou nou pé sa adoré Bondyé kon i ka mandé. Lèwvwè ou ka sonjé òwganizasyon-lasa, ka ou ka rèsanti ? Pétèt ou ka rèsanti menm biten ki lapòt Pyè. Mi sa i di Jézi : « Owa kimoun nou té’é ay ? Ou ni pawòl ki ka bay lavi étèwnèl » (Jan 6:68). Ola nou té’é yé jòdijou si nou pa té konnèt òwganizasyon a Jéova ? Grasa òwganizasyon-lasa, Jézi ka fè ansòt pou nou ni tousa ki fo pou nou pé sa rété fidèl a Jéova. I ka fòwmé-nou pou nou pé sa vin pi filé an prédikasyon. Anplisdisa, i ka édé-nou mèt « nouvo pèwsonalité-la » anlè nou, kifè nou ka fè Jéova plézi (Éféz. 4:24).
14. Ki dispozisyon òwganizasyon a Jéova pran pannan pandémi a Covid-19 la ?
14 Jézi la osi pou gidé-nou lèwvwè sitiyasyon-la difisil. Nou vwè sa byen lèwvwè pandémi a Covid-19 la koumansé. Alòskè onlo moun alantou an nou pa té sav ka pou yo fè, Jézi fè ansòt pou nou sav on mannyè ki klè ka pou nou fè pou pwotéjé-nou. Yo ankourajé-nou mèt on mas lèwvwè nou té ka sòti é pa rété kolé yonn èvè lòt lè nou a plizyè. Anplisdisa, yo fè sé ansyen-la sonjé jan sa enpòwtan dè rété an kontak èvè tout sé frè é sè la adan lasanblé-la. Yo fè-yo sonjé osi kè sa enpòwtan kè yo chèché a sav sa sé frè é sè la bizwen pou yo ansékirité, pou santé a yo é pou rété bon bon zanmi èvè Jéova (Iz. 32:1, 2). Yo ban-nou dòt enstriksyon é yo ankourajé-nou grasa sé nouvèl-la Komité santral la ka ban-nou la.
15. Kijan nou rivé ni réinyon an nou é préché pannan pandémi-la, é ki bon biten sa pòté ban nou ?
15 Pannan pandémi-la, yo di-nou ègzaktèman kijan pou nou té fè réinyon an nou é kijan pou nou té préché. Adan on batzyé, nou koumansé fè réinyon an nou é lasanblé an nou grasa vidéokonférans. Anplisdisa, nou koumansé préché pa téléfòn é nou fè lèt osi pou nou té pé sa jwenn sé moun-la. É sé près enki konsa nou ka préché konnyéla la. Jéova béni éfò an nou. Onlo filyal di konsa kè ni lontan plis pwoklamatè ki avan adan sèwten lasanblé ki asi téritwa a yo. Anplisdisa, pannan péryòd-lasa, ni onlo pwoklamatè ki viv dé sitiyasyon ki ankourajé-yo toubònman (gadé ti karé-la « Jéova ka béni prédikasyon an nou »).
16. Dè ki biten nou pé sèten ?
16 Pétèt kè ni sèwten adan nou ki té ka pansé kè sa lòwganizasyon té ka mandé-nou fè pannan pandémi-la té on tijan two karé. Men nou rann-nou kont kè a chakfwa lòwganizasyon té ka mandé-nou fè on biten, sé té dé konsèy ki té plen sajès (Mat. 11:19). Lèwvwè nou ka pran tan réfléchi asi jan Jézi ka gidonné disip a-y, nou pi sèten ankò kè li é Pap’an nou ki an syèl-la ké toujou èvè nou kèlkèswa sa ki té’é pé fèt dèmen (li Ébré 13:5, 6).
17. Poukwa nou kontan travay anba dirèksyon a Jézi ?
17 A pa ti kontan nou kontan kè Jézi sé chèf an nou ! Nou ka fè pawti a on òwganizasyon ki soudé menmsi noutout pa ni menm kilti-la, pa’a sòti adan menm péyi-la é kè nou pa’a palé menm lang-la. Yo ka ban-nou tousa ki fo nou pou nou rété bon bon zanmi èvè Jéova é nou ni onlo bon zouti pou édé-nou fè travay a prédikasyon-la. Nouchak ka aprann mèt nouvo pèwsonalité-la asi nou é aji yonn èvè lòt épi lanmou. A pa ti kontan nou kontan nou ni Jézi konm Chèf ! A pa rézon ka manké pou nou di sa.
KANTIK 16 Louez Jéhovah et son Fils, l’Oint
^ Alèkilé, ni milyon é milyon misyé, madanm é timoun ki ka pòté bon mannèv pou préché bon nouvèl-la. Ès vou osi ou ka fè pawti a sé moun-lasa ? Si sé sa, sé kè ou ka travay anba dirèksyon a Jézikris Ségnè an nou. Adan awtik-lasa, nou ké vwè déotwa biten ki ka montré kè sé Jézi ki ka òwganizé prédikasyon-la. Lèwvwè nou ké ègzaminé sé biten-lasa, sa ké ban-nou plis balan pou kontinyé sèvi Jéova anba dirèksyon a Jézikris.