1. On ti moman apré Adan é Èv péché, ka Jéova fè ? (Jénèz 3:15).

 ON TI moman apré Adan é Èv péché, Jéova ba tout désandan a yo on bèl èspwa é i sèvi èvè on pwofési ki enpòwtan toubònman pou fè sa. Nou ka touvé pwofési-lasa adan Jénèz 3:15 (li-y).

2. Poukwa pwofési-lasa enpòwtan konsa ?

² Nou ka touvé pwofési a Jénèz 3:15 adan prèmyé liv-la ki an Bib-la men adan on sans tout sélézòt liv-la ki an Bib-la lyanné èvè pwofési-lasa. Sé konsi pwofési-lasa sé poto-mitan a Bib-la piskè nou ka touvé menm mésaj-la adan tout sélézòt liv a Bib-la : Jéova ké voyé on moun pou sové-nou é moun-lasa ké détwi Dyab-la é tout sé moun-la ki ka soutyenn-li la *. Mésyé, a pa ti bèl sa ké bèl pou moun ki enmé Jéova !

3. A ki kèsyon nou ké réponn adan awtik-lasa ?

³ Adan awtik-lasa, nou ké réponn a 3 kèsyon anrapò èvè pwofési-la nou ka touvé an Jénèz 3:15. Mi yo : Dè kimoun pwofési-lasa ka palé ? Kijan pwofési-lasa té ké réyalizé ? É ki byenfé sa ké pwokiré-nou lèwvwè i ké réyalizé ?

4. Kimoun ki « sèpan-la » é ka ki ka pèwmèt-nou di sa ?

⁴ Adan Jénèz 3:14, 15 yo ka palé-nou dè plizyè moun. Yo ka palé dè on « sèpan », dè « pitit a pitit » a sèpan-la, dè on « madanm » é dè « pitit a pitit » a madanm-lasa. Bib-la ka édé-nou vwè kimoun yo yé vréman *. Pou koumansé, an-nou palé dè « sèpan-la ». On vré sèpan pa té’é pé konprann sa Jéova di adan Jadendéden-la. Donk,  lèwvwè Labib di kè Jéova palé ba sèpan-la pou kondanné-y, nou ka tou konprann kè i té ka palé ba on kréyati ki té pé konprann sa i té ka di. Kimoun kréyati-lasa yé vréman ? Lè nou ka gadé Révélasyon 12:9, nou ka touvé on répons ki klè. I ka di-nou kè « prèmyé sèpan-la » sé Satan Lèdyab. Men lè yo ka palé dè pitit a pitit a sèpan-la, dè kimoun yo ka palé ojis ?

5. Lèwvwè yo ka palé dè pitit a pitit a sèpan-la, dè kimoun yo ka palé ?

⁵ Adan Labib, dépawfwa, lèwvwè yo ka palé dè pitit a pitit a on moun sé pou palé dè on moun ki ka sanm-li pas i ni menm mantalité ki-y, i ka aji kon-y é tèlman yo ka sanm ou té’é di sé papa é pitit. Donk, menmjan-la osi, lèwvwè yo ka palé dè pitit a pitit a sèpan-la sé pou palé dè zanj ki pa rété fidèl a Bondyé é dè moun ki ba Bondyé do é ki kont sèwvitè a-y osi. A moman-lasa, yo ka aji kon Satan. Pawmi yo, ni zanj ki lagé Jéova dépi an tan a Noé, é ni moun osi ki méchan é ki ni menm konpòwtasyon ki pap’a yo Dyab-la (Jén. 6:1, 2 ; Jan 8:44 ; 1 Jan 5:19 ; Jid 6).

6. Lè yo ka palé dè « madanm-la », a pa dè Èv yo ka palé. Poukwa nou ka di sa ?

⁶ An-nou palé dè « madanm-la » aprézan. Lè yo ka palé dè madanm-lasa, a pa dè Èv yo ka palé. Mi on rézon ki ka montré sa : pwofési-la té ka anonsé kè pitit a pitit a madanm-la té ké « krazé » tèt a sèpan-la. É kon nou vwè-y, sèpan-la sé on zanj ki ba Jéova do ; sé Satan. Alò, pon pitit a pitit a Èv pa té’é kapab krazé sèpan-lasa pas on moun pé pa krazé on zanj. Men alò, kijan yo té’é détwi Satan ?

7. Dapré Révélasyon 12:1, 2, 5 é 10, kimoun ki madanm-la Jénèz 3:15 ka palé la ?

⁷ Adan dènyé liv a Labib, yo ka di-nou  kimoun madanm-la yé (li Révélasyon 12:1, 2, 5, 10). A pa nenpòt ki madanm ! Lalin-la anba pyé a-y é i ni on kouwòn asi tèt a-y ki fèt èvè 12 zétwal. Anplisdisa, i ka fè on timoun é timoun-lasa, a pa on timoun kon lézòt. Sé wayòm a Bondyé. Men konm Wayòm-la an syèl-la, madanm-lasa dwèt ka touvé-y an syèl-la osi. I ka rèprézanté pawti a òwganizasyon a Jéova ki an syèl-la é adan pawti-lasa, nou ka touvé sé zanj-la ki fidèl la (Gal. 4:26).

8. Pawmi pitit a pitit a madanm-la, kilès la ki pi enpòwtan la é a ki moman i parèt ? (Jénèz 22:15-18).

⁸ Pawòl a Bondyé ka édé-nou konprann kilès adan sé pitit a pitit a madanm-la ki pi enpòwtan la. Dapré pwofési a Jénèz 22:15-18 (li-y), fò pitit-lasa té fè pawti a désandan a Abraam é sé sa ki pasé pou Jézi pas i ka fè pawti a désandan a Abraam (Lik 3:23, 34). Fò pitit a pitit a madanm-la té lontan pi puisan ki nonm ki asi latè pas fò i té rivé détwi Dyab-la. Lèwvwè Jézi trapé 30 an apépré, Jéova voyé lèspri sen a-y asi-y pou i vin wen. Kifè, a moman-lasa, i vin désandan-la ki té pi enpòwtan la pawmi pitit a pitit a madanm-la (Gal. 3:16). Aprésa, lèwvwè Jézi mò é lèwvwè i résisité, Bondyé ba-y glwa é lonnè konm kouwòn é i ‘ba-y tout pouvwa an syèl-la é asi latè’. Pa ègzanp, sa vé di kè i ‘ba-y pouvwa pou i pé sa détwi travay a Dyab-la’ (Ébr. 2:7 ; Mat. 28:18 ; 1 Jan 3:8).

9-10. a) Kimoun ankò ki ka fè pawti a pitit a pitit a madanm-la é ka ki ka fè kè yo ka fè pawti a sé pitit-lasa ? b) Dè ki biten nou ké palé aprézan ?

⁹ Aprézan, an-nou palé dè sélézòt désandan a madanm-la. Lapòt Pòl èspliké kimoun sé désandan-lasa yé. Lèwvwè i palé ba sé krétyen juif la é ba sé krétyen-la ki pa té juif la é ki té wen la, mi sa i di-yo : « Konm zò sé byen a Kris, zò sé désandan a Abraam poudèbon, zò sé érityé parapòt a on pwomès » (Gal. 3:28, 29). Lè Jéova ka voyé lèspri sen a-y asi on krétyen pou i vin wen, moun-lasa ka fè pawti a pitit a pitit a madanm-la. Alò, lè yo ka palé dè piti a pitit a madanm-la, yo ka palé dè Jézi é dè sé 144 000 krétyen-la wen la ki ké gouvèné èvè-y la (Rév. 14:1). Yochak ka fè éfò pou aji kon Pap’a yo, Jéova é pou ni menm mantalité ki-y.

¹⁰ Aprézan nou sav dè kimoun yo ka palé an Jénèz 3:15, an-nou vwè ka Jéova ja fè pou réyalizé pwofési-lasa é kijan sa ka édé-nou jòdijou.

11. Lèwvwè pwofési-la ka di kè yo ké blésé pitit a pitit a madanm-la ‘an talon a-y’, ka sa vé di ?

¹¹ Pwofési-la nou ka touvé an Jénèz 3:15 té ka anonsé kè sèpan-la té’é blésé pitit a pitit a madanm-la an talon a-y. Pwofési-lasa réyalizé lèwvwè Satan pousé sé Juif-la é sé Women-la tchouyé Jézi, Gason a Bondyé (Lik 23:13, 20-24). Lè on moun ni on bobo an talon a-y, swa i pa’a rivé maché byen oswa i pé pa maché ditou pannan on ti moman. Menmjan-la osi, konm Jézi té an tonm-la, pannan on ti moman, i pa té pé fè ayen (Mat. 16:21).

12. Yo ké krazé tèt a sèpan-la. Kijan sa ké fèt é kitan ?

¹² Pou pwofési-la nou ka touvé an Jénèz 3:15 réyalizé, fò pa Jézi té rété an tonm-la. Poukwa nou ka di sa ? Pas pwofési-lasa té ka di kè fò pitit a pitit a madanm-la té krazé tèt a sèpan-la. Sa té  vé di kè fò Jézi té résisité. É sé sa ki fèt pas Jéova résisité-y 3^èm jou-la apré i mò la pou i viv an syèl-la san janmé mò. Lèwvwè moman-la Jéova prévwa la ké rivé, Jézi ké fè Satan fè pach (Ébr. 2:14). Jézikris é sé moun-la ki ké gouvèné èvè-y la ké détwi lènmi a Bondyé kivédi yo ké détwi pitit a pitit a sèpan-la * (Rév. 17:14 ; 20:4, 10).

13. Ki byenfé nou ka jwenn davwa pwofési-lasa ka réyalizé ?

¹³ Si ou sé on sèwvitè a Jéova, lèfètkè pwofési-lasa ka akonpli, sa ka pwokiré-w onlo byenfé. Jézi vin asi latè antankè nonm é i imité kalité a Pap’a-y on mannyè ki pawfè (Jan 14:9). Grasa sa, nou aprann konnèt Jéova é nou aprann enmé-y osi. Nou ka jwenn onlo byenfé osi grasa sa Jézi anségné é grasa mannyè-la i ka dirijé lasanblé-la jòdijou. I montré-nou kijan pou nou viv pou nou pé sa fè Jéova plézi. É davwa yo blésé Jézi an talon a-y, kivédi kè i mò, sa ka pwokiré noutout onlo byenfé. Kijansa ? Lèwvwè Jéova résisité-y, Jéova aksèpté sakrifis a Gason a-y ki té pawfè é sakrifis-lasa « ka lavé-nou dè tout péché » (1 Jan 1:7).

14. Kijan nou fè sav kè pwofési-la Jéova té anonsé la an Édèn pa té’é réyalizé onsèl kou ? Bay on ti èsplikasyon.

¹⁴ Lè nou ka gadé pwofési-la Jéova té anonsé la an Édèn, nou ka byen vwè kè i pa té’é réyalizé tousuit. Nou ka di sa pas a pa onsèl kou tout pitit a pitit a madanm-la té’é vin é a pa onsèl kou kè Dyab-la té’é sanblé tout bannélo a-y. Anplisdisa, sa té’é pran tan pou Dyab-la é bannélo a-y fè lagè èvè pitit a pitit a madanm-la. Men poukwa sa enpòwtan kè nou konprann pwofési-lasa byen ? Paskè i ka anonsé kè mond a Satan ké hay sèwvitè a Jéova é sé sa Jézi té ni lokazyon di disip a-y lontan apré (Mawk 13:13 ; Jan 17:14). Asiré pa pétèt, adan domenn-lasa, pwofési-la ja réyalizé siwtou pannan sé 100 dènyé lanné-la ki pasé la.

15. Pi sa k’ay é pi mond-la hay-nou. Poukwa nou ka di sa é poukwa nou pa ni a pè ?

¹⁵ Kèlkètan apré Jézi vin Wa an 1914, i mèt Satan déwò an syèl-la. Konnyéla, Satan pé pa viré an syèl-la ankò é i sav ka ki kay rivé-y : yo ké détwi-y (Rév. 12:9, 12). Men i pa enki la lébwa-kwazé. A pati kòlè Satan kòlè é i ka pasé tout raj a-y anlè sèwvitè a Bondyé (Rév. 12:13, 17). Sé pousa, pi sa k’ay é pi mond-lasa hay-nou. Men an réyalité, nou pa ni a pè Satan é bannélo a-y. Kon lapòt Pòl, nou pé sèten dè sa. Mi sa i ni lokazyon maké : « Si Bondyé èvè nou, kimoun ké pé gangné-nou ? » (Wom. 8:31). Kon nou sòti vwè, on bèl mòso a pwofési a Jénèz 3:15 ja réyalizé. Alò, nou pé fè Jéova konfyans a san pou san.

16-18. Lèwvwè Curtis, Ursula, é Jessica rivé konprann sa Jénèz 3:15 té vé di, ki bon biten sa pòté ba yo ?

¹⁶ Pwomès-la Jéova fè-nou la an Jénèz 3:15 pé ban-nou bon fòs kèlkèswa sé difikilté-la nou ka jwenn la. Curtis, sé on frè ki misyonè a Gwam é mi sa i ka rakonté : « Difikilté an ja jwenn an vi an mwen té rèd toubònman é délè sa pa té fasil mwen pé sa rété fidèl a Jéova. Men lèwvwè an té ka pran tan réfléchi asi Jénèz  3:15, sa té ka édé-mwen fè Pap’an mwen ki an syèl-la konfyans a désan pou san. » Curtis présé vwè jou-la Jéova ké fè tout éprèv nou ka jwenn disparèt.

¹⁷ An-nou palé dè Ursula, on sè ki ka rété on koté an Almagn yo ka kriyé Bavière. I ka èspliké kè lèwvwè i byen rivé konprann Jénèz 3:15, i vin sèten a san pou san kè Labib sé Pawòl a Bondyé. Lè i vwè kè tout sélézòt pwofési-la ki té adan Bib-la té lyanné èvè pwofési-lasa, i touvé sa èstraòwdinè toubònman. Mi sa i ka di ankò : « Lèwvwè an aprann kè Jéova pran on dispozisyon tousuit pou i té ba lézimen on èspwa, an vin enmé-y plis ankò. »

¹⁸ Jessica, sé on sè ki ka viv an Mikwonézi, é mi sa i ka di : « Jis a jòdijou, an ka sonjé sa an rèsanti lèwvwè an rann-mwen kont kè an touvé lavérité. Jénèz 3:15 té ka réyalizé anba zyé an mwen. Sa édé-mwen sonjé kè sa nou ka viv jòdila, a pa vi-lasa Jéova té prévwa pou nou. Grasa pwofési-lasa, an sèten kè sèvi Jéova sé méyè biten an pé fè adan vi an mwen jòdila é kè vi an mwen ké lontan pi bèl dèmen. »

19. Poukwa nou pé sèten kè dènyé mòso a pwofési a Jénèz 3:15 ké réyalizé ?

¹⁹ Kon nou vwè-y adan awtik-lasa, ni on bèl pawti a pwofési a Jénèz 3:15 ki ja réyalizé. Nou ja konnèt kimoun ki pitit a pitit a madanm-la é kimoun ki pitit a pitit a sèpan-la. Jézi sé désandan a madanm-la é pawmi sé désandan-la, sé-y ki pi enpòwtan la. Talon a-y ja géri é aprézan i sé on Wa puisan an syèl-la é i pé’é jen mò ankò. Bondyé ja chwazi lamajorité a moun ki kay gouvèné èvè Gason a-y an syèl-la. Konm on bèl mòso a pwofési-la ja réyalizé, nou pé sèten kè dènyé mòso a pwofési-la ké réyalizé lèwvwè yo ké krazé tèt a sèpan-la. Mésyé, a pa ti kontan sèwvitè a Jéova ké kontan lè Satan ké disparèt ! Men annatandan, fò pa ou lagé. Nou pé fè Bondyé an nou konfyans a san pou san. Grasa a pitit a pitit a madanm-la, ‘tout sé nasyon-la ki asi latè la’ ké risivwè bénédisyon agogo (Jén. 22:18).