AWTIK POU ÉTIDYÉ 31
Ou pé priyé Jéova : ba privilèj-lasa onlo valè !
« Fò priyè an mwen kon lansan ki byen préparé pou mété-y douvan-w » (SÒM 141:2).
KANTIK 47 Prie Jéhovah chaque jour
ON TI LIDÉ ASI SA NOU KAY VWÈ *
1. Ki valè pou nou ba lapriyè ?
NOU ni on bèl lonnè toubònman : nou pé palé ba Kréyatè-la ki fè syèl-la é tè-la. Ou ka rann-vou kont : nou pé di Jéova tousa nou ni anfon a tchè an nou. Nou pé fè sa adan nenpòt ki lang, a nenpòt ki moman é nou pa bizwen pran randévou pou sa. Ki nou kouché asi on kouch lopital, ki nou fèmé lajòl, nou pé priyé-y é nou pé sèten kè i ké kouté-nou. Asiré sèten, lapriyè a pa on ti afè. Sé vréman on bèl lonnè toubònman !
2. Kijan David té ka montré kè lapriyè té ni onlo valè pou-y ?
2 Wa David té ka ba lapriyè onlo valè. Mi sa i di Jéova adan on chanson : « Fò priyè an mwen kon lansan ki byen préparé pou mété-y douvan-w » (Sòm 141:1, 2). An tan a David, lèwvwè sé prèt-la té ka brilé lansan pou Jéova, sé té on biten ki té sakré é kè yo té ka préparé byen konm i fo (Ègz. 30:34, 35). Lè David konparé priyè a-y èvè lansan-lasa, i té vé di kè i té ka pran tan réfléchi a sa i té kay di Pap’a-y ki an syèl-la adan priyè a-y. Nou osi, sé sa nou vé fè. Nou vé kè priyè an nou fè Jéova plézi.
3. Lèwvwè nou ka priyé Jéova, ki konpòwtasyon pou nou ni é poukwa ?
3 Lèwvwè nou ka priyé Jéova, fò-nou fè atansyon pou nou pa palé ba-y konsi nou ka palé ba nenpòt kimoun. Okontrè, nou ké palé ba-y èvè onlo rèspé. Jéova fè Izayi, Ézékyèl, Danyèl, é Jan vwè sèwten vizyon é lè yo vwè sa, yo rété èstèbèkwè. Pran on ti tan pou réfléchi asi sa yo vwè. Adan tout sé vizyon-lasa, té ni on biten ki té ka sanm : yo vwè Jéova ki té sizé anlè on twòn antankè Wa é i té plen glwa. Izayi vwè Jéova sizé asi on manman twòn ki té ho toubònman (Iz. 6:1-3). Ézékyèl, li, vwè Jéova sizé asi cha a-y an syèl-la é alantou a cha-lasa té ni on limyè ki té kon on lawkansyèl (Ézék. 1:26-28). Li Danyèl, i vwè Sila ki la dépi pli lontan la ki té ni on lenj blan asi-y. I té sizé asi on twòn é difé té ka sòti adan twòn-lasa (Dan. 7:9, 10). É Jan, li i vwè Jéova sizé asi on twòn é « tout alantou a twòn-lasa té ni on lawkansyèl ki té ka kléré kon wòch-la yo ka kriyé émwòd » (Rév. 4:2-4). Tout glwa-la Jéova ni la ka fè-nou sonjé kè lapriyè sé on lonnè ki èstraòwdinè toubònman é kè sa enpòwtan kè nou palé ba Jéova èvè onlo onlo rèspé. Aprézan, an-nou vwè dè ki biten pou nou palé èvè Jéova adan priyè an nou.
« DONK MI SÉ KONSA POU ZÒ PRIYÉ »
4. Lèwvwè nou ka gadé priyè-la Jézi ban-nou la an Matyé 6:9, 10, ka sé prèmyé pawòl-la i di la ka aprann-nou ?
4 (Li Matyé 6:9, 10.) Adan Sèwmon-la i fè anlè montangn-la, Jézi aprann disip a-y priyé é i montré-yo kijan yo pé fè sa pou fè Jéova plézi. I di-yo : « Donk mi sé konsa pou zò priyé » é aprésa i di-yo kè fò-yo priyé pou sé biten-la ki pi enpòwtan la an prèmyé kivédi kè fò-yo priyé pou non a Bondyé vin sen, pou wayòm a-y vin pas sé wayòm-lasa ki ké détwi lènmi a Bondyé. I di-yo osi kè fò-yo priyé pou tout sé bon biten-la Jéova ké fè la pou limanité é pou latè dèmen. Lèwvwè nou ka palé dè sé biten-lasa adan priyè an nou, nou ka montré Bondyé kè nou anvi vwè volonté a-y fèt.
5. Lèwvwè nou ka priyé pou dé biten kè noumenm an nou bizwen, ès Jéova ka kouté-nou ?
5 Lè nou ka kontinyé gadé priyè-la Jézi ba sé disip-la, nou ka vwè kè Jézi ka ankourajé-nou mandé Bondyé dé biten kè noumenm an nou bizwen. Pa ègzanp, nou pé mandé Jéova pen-la nou bizwen la jòdila oben nou pé mandé-y padonné péché an nou. Nou pé mandé-y osi pwotéjé-nou pou nou pa lésé tantasyon pran lanmen asi nou é nou pé mandé-y woté-nou anba men a méchan-la (Mat. 6:11-13). Lèwvwè nou ka mandé Jéova tout sé biten-lasa, nou ka montré-y kè nou bizwen èd a-y é nou ka montré-y osi kè nou anvi fè-y plézi.
Dè ki biten on mari é madanm a-y pé palé adan priyè a yo * ? (gadé paragraf 6 la).
6. Jézi di-nou pou ki biten pou nou priyé, men ès sé enki pou sé biten-lasa pou nou priyé ? Bay on ti èsplikasyon.
6 Jézi pa di disip a-y kè chakfwa yo ka priyé, fò-yo répété priyè-la i ba-yo la. Dayè, lèwvwè i priyé Jéova dòt lè, i ni lokazyon di-y sa ki té ka enkyété-y (Mat. 26:39, 42 ; Jan 17:1-26). Menmjan-la, nou osi, nou pé di Jéova tousa ki ka trakasé-nou. Lè nou ni on désizyon ki difisil a pran, nou pé di Jéova ban-nou sajès (Sòm 119:33, 34). Lè yo ka ban-nou on travay a fè adan lasanblé-la é kè i ka sanm sa i ké rèd toubònman, nou pé mandé Jéova édé-nou vwè ka pou nou fè adan sitiyasyon-lasa (Pwov. 2:6). Anplisdisa, sé paran-la pé priyé pou timoun a yo é sé timoun-la pé fè menm biten pou paran a yo. É noutout, nou pé priyé pou sé moun-la ki ka étidyé Labib èvè nou la é pou sé moun-la nou ka jwenn an prédikasyon-la é dayè, sé on biten pou nouchak fè. Men nou ka tou konprann kè lè nou ka priyé Bondyé a pa enki mandé pou nou mandé-y dé biten, fò-nou fè dòt biten osi.
Pou ki biten nou pé ba Jéova louwanj é di-y mèsi lèwvwè nou ka priyé-y * ? (gadé sé paragraf 7 a 9 la).
7. Poukwa fò-nou ba Jéova louwanj adan priyè an nou ?
7 On biten pou nou pa oubliyé fè adan priyè an nou, sé ba Jéova louwanj. Pa ni ponmoun ki mérité louwanj plis ki Pap’an nou Jéova. Nou pé di sa pas Jéova sé on Bondyé ki ‘enmé sa ki byen, ki paré a padonné, ki ni mizérikòd, ki ni konpasyon, ki pa ka fè kòlè fasil, ki ni lanmou a débòdé é ki fidèl’ (Sòm 86:5, 15). Sé pousa, nou pé di kè a pa déotwa rézon tousèl nou ni pou ba Jéova louwanj men lè nou ka vwè ki jan dè moun Jéova yé é tousa i ka fè, nou ni onpakèt rézon pou fè sa.
8. Nou pé di Jéova mèsi pou onlo biten. Bay déotwa adan yo (Sòm 104:12-15, 24).
8 Adan priyè an nou, nou ka ba Jéova louwanj, men nou vé pa fè yenki sa. Nou vé di-y mèsi osi pou tout sé bon biten-la i ka ban-nou la. Pa ègzanp, nou vé di-y mèsi pou sé koulè-la sé bèl flè-la ni la, pou sé bon ti manjé-la i ka ban-nou la é pou sé bèl moman-la nou ka pasé la èvè zanmi an nou. Jéova ka ban-nou sé bèl biten-lasa é onlo dòt biten ankò pou nou pé sa ni tchè-kontan (li Sòm 104:12-15, 24). Men nou vé di-y mèsi pou on biten ki pi enpòwtan ankò : i ka anségné-nou pou fwa an nou pé sa rété solid é i ka ban-nou on bèl èspwa.
9. Ka ki pé édé-nou pou nou toujou sonjé di Jéova mèsi ? (1 Tésalonisyen 5:17, 18).
9 Jéova ka fè tèlman biten pou nou. Men nou pé oubliyé di-y mèsi é sa pé rivé-nou fasilman. Ka ki pé édé-nou pou nou toujou sonjé sa ? Pa ègzanp, nou pé pran labitid maké sèwten biten prési nou ka mandé Jéova adan priyè an nou, é dè tanzantan nou pé jété on ti koudzyé asi sa nou maké la pou vwè kijan Jéova réponn-nou. Aprésa, nou ké pran on tan pou di Jéova mèsi pas i réponn a priyè an nou (li 1 Tésalonisyen 5:17, 18). An-nou réfléchi asi sa : lèwvwè on moun ka vin di-nou mèsi é kè moun-lasa ka di-nou jan i ni rèkonésans pou sa nou fè ba-y, nou ka kontan, é sa ka montré-nou kè moun-lasa enmé-nou. Menmjan-la osi, lèwvwè nou ka di Jéova mèsi pas i réponn a priyè an nou, Jéova ka kontan é sa ka touché tchè a-y (Kol. 3:15). Men nou pé di Jéova mèsi pou dòt biten ankò. An-nou vwè kilès.
DI JÉOVA MÈSI PAS I VOYÉ GASON A-Y ASI LATÈ
10. Dapré 1 Pyè 2:21, poukwa nou pé di Jéova mèsi davwa i voyé Gason a-y asi latè ?
10 (Li 1 Pyè 2:21.) Fò-nou di Jéova mèsi davwa i voyé Gason chéri a-y pou anségné-nou. Lè nou ka lésé Jézi anségné-nou é lè nou ka étidyé vi a-y, nou ka aprann konnèt Jéova pibyen é nou ka vin sav ka pou nou fè pou fè Jéova plézi. Si nou ka montré kè nou ni fwa adan sakrifis a Jézi, nou ké pé vin bon bon zanmi èvè Jéova é nou ké anpé èvè-y (Wom. 5:1).
11. Poukwa nou ka priyé an non a Jézi ?
11 Nou ka di Jéova mèsi davwa nou pé priyé-y an non a Jézi. Dayè, sé èvè Jézi Jéova ka sèvi pou ban-nou sa nou ka mandé-y adan priyè an nou. Jéova ka kouté priyè an nou é i ka réponn-nou lèwvwè nou ka priyé-y an non a Jézi. Mi sa Jézi èspliké : « Tousa zò ké mandé an non an mwen, an ké fè-y pou ba Papa-la glwa pa mwayen a Gason-la » (Jan 14:13, 14).
12. Nou pé di Jéova mèsi pou ondòt rézon ankò ki anrapò èvè Gason a-y. Kilès ?
12 Jéova ka padonné péché an nou pas Jézi sakrifyé vi a-y pou nou. Labib ka di kè Jézi sé « gran prèt » an nou é kè « i sizé adwat a twòn a Gran Mèt-la adan syèl-la » (Ébr. 8:1). Anplisdisa, Jézi ka « édé-nou owa Papa-la » (1 Jan 2:1). Jéova ban-nou ‘on gran prèt ki kapab konprann féblès an nou’ é ki ka sipliyé-y pou nou. A pa ti rèkonésans nou ni pou sa ! (Wom. 8:34 ; Ébr. 4:15). Nou, nou sé dé moun ki enpawfè. Men grasa ranson-la, nou pé priyé Jéova. Sèten ou ké dakò pou di kè tout mèsi nou ké pé di Jéova mèsi, sa pé’é jen sifi pou montré-y jan nou ni rèkonésans pou bèl kado-la i fè-nou la lèwvwè i voyé Gason a-y kè i té enmé onlo asi latè.
PRIYÉ POU FRÈ É SÈ A-W
13. Avan jou-la i mò la, lavèy oswa, kijan Jézi montré kè i té enmé disip a-y ?
13 Avan jou-la i mò la, lavèy oswa, Jézi pasé on bèl moman ka priyé Pap’a-y pou disip a-y. I mandé Pap’a-y « voyé on zyé asi yo parapòt a méchan-la » (Jan 17:15). Sa té ka montré jan i té enmé disip a-y toubònman. Magré i té sav kè adan on ti moman i té kay soufè bon soufè la, i té ka enkyété-y onlo pou disip a-y.
Lèwvwè nou ka priyé pou frè é sè an nou, ka nou pé mandé Jéova * ? (gadé sé paragraf 14 a 16 la).
14. Kijan nou pé montré frè é sè an nou kè nou enmé-yo ?
14 Kon Jézi, nou pa ka konsantré-nou enki asi sa nou bizwen. Okontrè, nou ni labitid priyé pou frè é sè an nou. Lè nou ka fè sa, nou ka montré kè nou ka kouté Jézi ki di-nou konsa kè fò yonn enmé lòt é nou ka montré Jéova jan nou enmé frè é sè an nou (Jan 13:34). Sa ka édé frè é sè an nou lèwvwè nou ka priyé pou yo. Pawòl a Bondyé ka di kè « lè on nonm ki jis ka sipliyé Bondyé, sa ni on éfé ki fò toubònman » (Jak 5:16).
15. Poukwa frè é sè an nou bizwen kè nou priyé ba yo ?
15 Frè é sè an nou bizwen kè nou priyé ba yo pas yo ka jwenn onlo éprèv. Pa ègzanp, ni sa ki malad, ni sa ki ka viv on koté ni on katastròf natirèl ki fèt oben on koté ni lagè, é ni sa yo ka pèwsékité. Kifè nou pé mandé Jéova soutyenn-yo. Nou pé priyé osi pou frè é sè an nou ki ka travay rèd pou édé sé frè é sè la lèwvwè ni on katastwòf. Pétèt kè nou osi nou konnèt déotwa frè é sè ki ka jwenn bout-rèd konnyéla la. Alò lèwvwè ou ka priyé, pa oubliyé nonmé non a yo. Lèwvwè nou ka mandé Jéova soutyenn-yo, nou ka montré kè nou enmé frè é sè an nou vréman.
16. Poukwa fò-nou priyé pou sé frè-la ki ka dirijé lasanblé-la ?
16 A pa ti kontan sé frè-la ki ka dirijé lasanblé-la kontan sav kè nou ka priyé pou yo. Lèwvwè nou ka fè sa, sa ka édé-yo toubònman. Lapòt Pòl té sav kè i té bizwen kè lézòt priyé pou-y. Mi sa i maké : « Priyé pou mwen osi, pou an pé sa touvé sé mo-la lè an ka wouvè bouch an mwen. Sé pou an pé sa palé èvè kouraj lè an ka fè moun konnèt sèkré a bon nouvèl-la ki sakré la » (Éféz. 6:19). Jòdijou osi, ni onlo frè ki ka pòté bon mannèv pou lasanblé-la. Nou ka montré-yo kè nou enmé-yo lèwvwè nou ka mandé Jéova béni éfò a yo.
LÈ YO KA BA-W FÈ ON PRIYÈ
17-18. A ki moman yo pé mandé-nou priyé pou lézòt, é ka pou nou sonjé ?
17 Dépawfwa, yo pé ban-nou fè on priyè pou dòt moun. Pa ègzanp, on sè pé di ondòt sè vin èvè-y adan on étid i ka fè é i pé mandé sè-lasa di priyè-la. Men si sè-la pa gè konnèt étidyan-la, pétèt kè i ké préféré fè priyè-la an fen a étid-la. Konsa lèwvwè i ké priyé pou étidyan-la i ké sav ka pou i di pi fasilman.
18 Yo pé mandé on frè priyé pannan réinyon-la oben pannan réinyon a prédikasyon-la. A moman-lasa, fò i sonjé a kibiten réinyon-lasa ka sèvi. A pa lèmoman pou ba lasanblé-la konsèy oben pou bay déotwa kominikasyon. Adan lamajorité a sé réinyon-la, yo ka prévwa 5 minit pou kantik-la é pou priyè-la. Alò, fò pa sé frè-la ki ka fè priyè-la palé twòp siwtou lèwvwè réinyon-la k’ay koumansé (Mat. 6:7).
FÒ OU BA LAPRIYÈ ON PLAS KI ENPÒWTAN ADAN VI A-W
19. Ka ki ké édé-nou pou nou pé sa paré lèwvwè jou a jijman a Jéova ké rivé ?
19 Pi tan ka pasé é pi fò-nou ba lapriyè on plas ki enpòwtan adan vi an nou paskè jou a Jéova toupré rivé. Dayè, mi konsèy-la Jézi ban-nou la : « Sé pousa, kontinyé fè atansyon é sipliyé toutlè pou zòt rivé chapé anba tousa ki pou fèt » (Lik 21:36). Si nou ni labitid priyé, nou ké kontinyé ni on fwa ki fò é nou ké paré lèwvwè jou a Jéova ké rivé.
20. Ka nou pé fè pou priyè an nou kon lansan ki ka santi bon ?
20 Ka nou vwè adan awtik-lasa ? Nou vwè kè fò-nou ba lapriyè onlo valè toubònman. Fò-nou priyé pou sa ki pi enpòwtan, kivédi, fò-nou priyé pou tousa ki anrapò èvè pwojé a Jéova. Anplisdisa, fò-nou di Bondyé mèsi davwa i voyé Gason a-y asi latè é fò-nou di-y mèsi pou tout sé bon biten-la wayòm a-y ké pòté pou nou la. Fò pa nou oubliyé priyé pou frè é sè an nou. Jéova vé kè nou priyé-y osi pou ban-nou sa nou bizwen pou viv é pou mandé-y édé-nou pou fwa an nou pé sa rété solid. Si nou ka pran tan pou préparé sa nou ké di adan priyè an nou, nou ké montré Jéova kè nou ka ba lapriyè onlo valè toubònman. Si nou ka fè sa, sa nou ka di an priyè an nou ké kon lansan ki ka santi bon é priyè an nou ké ‘fè Jéova plézi’ (Pwov. 15:8).
KANTIK 45 « La méditation de mon cœur »
^ Jéova ka pèwmèt-nou priyé-y. A pa ti rèkonésans nou ni pou sa ! Nou vé kè priyè an nou fè Jéova plézi kon lansan ki ni on bon ti lòdè. Adan awtik-lasa, nou ké vwè pou ki biten nou pé priyé. Nou ké vwè osi ka pou nou sonjé lè yo ka mandé-nou priyé ba lézòt.
^ SA NOU KA VWÈ ASI SÉ IMAJ-LA : On mari ka priyé èvè madanm a-y pou Bondyé pwotéjé fi a yo ki lékòl, pou Bondyé soutyenn on moun an fanmi a yo ki malad é pou Bondyé édé on étidyan pwogrésé.
^ SA NOU KA VWÈ ASI SÉ IMAJ-LA : On frè ka di Jéova mèsi pas i sakrifyé Gason a-y pou nou, pas i ban-nou on bèl planèt é pas i ban-nou dé bon ti biten pou nou pé sa manjé.
^ SA NOU KA VWÈ ASI SÉ IMAJ-LA : On sè ka priyé pou mandé Jéova ba sé frè a Komité santral la lèspri sen a-y é i ka mandé-y soutyenn frè é sè an nou ki sibi on katastwòf oben kè yo ka pèwsékité.